Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 AWˬ LAWN 24

Tawˇ g’awˬ daꞈ ve awˬ ceuˬ leh G’uiˬ sha htaꞈ maˇ g’a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ yuˬ baˬ sheˍ!

Tawˇ g’awˬ daꞈ ve awˬ ceuˬ leh G’uiˬ sha htaꞈ maˇ g’a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ yuˬ baˬ sheˍ!

“Tawˇ g’awˬ daꞈ ve awˬ ceuˬ teˇ hpaˍ htaꞈ maˇ k’oˆ, G’uiˬ sha htaꞈ maˇ g’a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ maˇ k’oˆ, ngaˬ hui yuˬ baˬ hpaˆ baˬ ve yoˬ.”—2 KAWˇRENˍHTUˆ 10:5.

K’A MUIˬ HKAWˇ 124 Co co taiˍ taiˍ ka tiꞈ yeˬ ve

HENˇ TUˬ VE TEˇ HPAˍ *

1. Pawˇluꞈ leuˆ yuˬ taˍ ve Hkriꞈ yaˇ htaꞈ aˬ htoꞈ ma ve shaˍ tiꞈ piˇ ve le?

Ngaˬ hui teˇ ceuˬ ceuˬ maˇ g’a te tuˬ Pawˇluꞈ shaˍ tiꞈ peꞈ laˇ ve yoˬ. Awˬ ceuˬ oˇ ve aˬ htoꞈ ma le? “Chi miˬ guiˬ yaˇ ve awˬ liˇ awˬ hk’aˇ teˇ hpaˍ awˬ hk’aˇ suh taˇ k’ai” tehꞈ k’oˆ ve yoˬ. (Roˉmaꞈ 12:2) Pawˇluꞈ awˬ lawn chi ve awˉ lawˉ peuˇ ve Hkriꞈ yaˇ htaꞈ k’oˆ piˇ ve yoˬ. Aˬ htoꞈ ma te chi yawˇ awˬ viˉ awˬ nyi hawˉ hk’aˆ yaˇ miˇ G’uiˬ sha htaꞈ awˬ to chiˇ aꞈ piˇ-oˬ ve leh, G’uiˬ sha ve daꞈ kehˬ ve awˬ ha hpu leuˆ yuˬ ve chaw htaꞈ shaˍ tiꞈ piˇ ve le?—Roˉmaꞈ 1:7.

2-3. Ngaˬ hui Yaˬhoˉvaˬ ve kanˉ maˇ g’a te tuˬ Saˍtanˍ coˇ caˇ leh hk’aˬ hk’e te laˇ ve le? Ngaˬ hui nyi ma hk’aw cawˬ ve maˇ cawˇ ve dawˇ hk’aˇ htaꞈ hk’aˬ hk’e te yuˬ baˬ g’a tuˬ le?

2 Pawˇluꞈ yawˇ hui htaꞈ dawˇ haˍ ve yoˬ. Hkriꞈ yaˇ teˇ hpaˍ maˇ cawˇ ve dawˇ hk’aˇ cawˬ ve pa taw, Saˍtanˍ ve miˬ guiˬ te tcuh gaˇ ve hk’e te ve yoˬ. (Eˇfeˇsuꞈ 4:17-19) Chi ve ngaˬ hui geh kaꞈ hpehꞈ la g’a ve yoˬ. Ngaˬ hui Yaˬhoˉvaˬ ve kanˉ maˇ g’a te tuˬ Saˍtanˍ coˇ caˇ jaˇ. Yawˇ miˬ guiˬ ve g’uiˬ sha hpehꞈ ve pa taw, awˬ hk’aˇ laiˉ hk’aˇ yehˇ ve yoˬ. Tawˇ pa haˉ te k’o, ngaˬ hui a yeˇ uiˍ ve leh awˬ meh bvuhˬ ve chaw hpehꞈ gaˇ ve k’o, awˬ ceuˬ chi ve htaꞈ yehˇ leh ngaˬ hui Yaˬhoˉvaˬ geh maˇ g’a meuˆ daꞈ tuˬ te laˇ ve yoˬ. Ngaˬ hui aˉ hk’aw lo chehˇ htaˇ te ve, liꞈ henˇ yehˬ lo chehˇ htaˇ te ve, leh ngaˬ hui awˬ paˇ awˬ kui lo chehˇ ve chaw te ve awˬ ceuˬ htaꞈ cuˇ leh yawˇ hk’e dawˇ tuˬ te laˇ ve yoˬ.

3 Ngaˬ hui ve nyi ma hk’aw cawˬ ve maˇ daꞈ ve awˬ ceuˬ htaꞈ yuˬ baˬ tuˬ te g’a-aw laˇ? (2 Kawˇrenˍhtuˆ 10:4) Pawˇluꞈ k’oˆ ve, “tawˇ g’awˬ  daꞈ ve awˬ ceuˬ teˇ hpaˍ htaꞈ maˇ k’oˆ, G’uiˬ sha htaꞈ maˇ g’a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ maˇ k’oˆ, ngaˬ hui yuˬ baˬ hpaˆ baˬ ve yoˬ. Dawˇ hk’aˇ teˇ maˬ le le htaꞈ ngaˬ hui hpeh yuˬ leh, Hkriꞈ htaꞈ na yuˬ piˇ lawˬ ve yoˬ.” (2 Kawˇrenˍhtuˆ 10:5) Yaˬhoˉvaˬ ga laˇ tcuh ve k’o, ngaˬ hui maˇ daꞈ ve dawˇ hk’aˇ yuˬ baˬ g’a ve yoˬ. Naˆ tsuhˇ awˬ tawꞈ ma htaꞈ tawˍ daꞈ g’aˇ ve hk’e, Liꞈ hpu kaꞈ ngaˬ hui miˬ guiˬ ve dawˇ hk’aˇ htaꞈ tawˍ daꞈ g’aˇ tuˬ ga laˇ g’a ve yoˬ.

“NYI MA AWˬ SUHˉ K’AWꞈ PA LEH CHAW AWˬ SUHˉ HPEHꞈ LA PIˇ-Oˆ”

4. Ngaˬ hui awˬ tehˬ ve tanˬ henˇ htaˇ aˬ htoꞈ ma g’a pa cawˇ ve le?

4 Nawˬ Liꞈ hpu tanˬ henˇ leh G’uiˬ sha ve kanˉ te tuˬ dawˇ cheˆ htaˇ, aˬ htoꞈ ma g’a pa cawˇ ve dawˇ nyi sheˍ. Ngaˬ hui kaꞈ maˇ daꞈ ve dawˇ hk’aˇ htaꞈ g’a pa cawˇ ve yoˬ. (1 Kawˇrenˍhtuˆ 6:9-11) Yaˬhoˉvaˬ ngaˬ hui htaꞈ ga laˇ leh maˇ daꞈ ve dawˇ hk’aˇ yuˬ baˬ g’a ve ha lehˬ jaˇ!

5. Roˉmaꞈ liꞈ 12:2 hk’aw k’oˆ taˍ ve hk’e, ngaˬ hui aˬ htoꞈ ma g’a te cawˇ ve le?

5 Ngaˬ hui teꞈ chiˉ maˇ g’a pa cawˇ-oˬ ve tehꞈ taˇ dawˇ. Ngaˬ hui Baˆtiˆsaˬ maˇ haꞈ yuˬ sheˍ htaˇ venˇ baˆ uiˍ jaˇ ve htaꞈ te yaꞈ jaw ve htawˇ, ngaˬ hui awˉ lawˉ htaˇ hk’e k’awꞈ te tuˬ beˬ laˇ ve htaꞈ jaw hpaw-e cawˇ ve yoˬ. Ngaˬ hui hk’aˬ hk’e te tuˬ le? Pawˇluꞈ k’oˆ ve, “chi miˬ guiˬ yaˇ ve awˬ liˇ awˬ hk’aˇ teˇ hpaˍ awˬ hk’aˇ suh taˇ k’ai. . . Nyi ma awˬ suhˉ k’awꞈ pa leh, chaw awˬ suhˉ hpehꞈ la piˇ-oˆ.” (Roˉmaꞈ 12:2) Chi htaꞈ pa taw ngaˬ hui nyiˇ ceuˬ htaꞈ g’a te ve yoˬ. Awˉ lawˉ teˇ ceuˬ “chi miˬ guiˬ yaˇ ve awˬ liˇ awˬ hk’aˇ teˇ hpaˍ awˬ hk’aˇ suh taˇ k’ai.” Nyiˇ ceuˬ teˇ ceuˬ “nyi ma awˬ suhˉ k’awꞈ pa leh, chaw awˬ suhˉ hpehꞈ la piˇ-oˆ.”

6. Maꞈhtehˍ liꞈ 12:43-45 hk’aw Yeˍsuˆ ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

6 A shu yawˇ awˬ to pa cawˇ ve tehꞈ Pawˇluꞈ k’oˆ htaˇ, awˬ htaꞈ hpawˇ ceh pa ve maˇ heˆ. Chi ngaˬ hui te ve teˇ ceuˬ le le hpawˇ heuˆ la kuiˬ cawˬ ve yoˬ.  (Awˇ ceˍ awˇ fa “ Ngaˬ hui nyi ma awˬ suhˉ awˬ tehˬ pa-aw laˇ, maˇ heˆ leh pa ve hk’e te-aw laˇ?” htaꞈ nyi sheˍ.) Ngaˬ hui ve dawˇ hk’aˇ awˬ suhˉ k’awꞈ pa cawˇ ve yoˬ. Chi ngaˬ hui ve nyi ma hk’aw cawˬ ve dawˇ hk’aˇ hk’a peu-eˬ htaꞈ k’oˆ gaˇ ve yoˬ. Chi htaꞈ pa taw, ngaˬ hui a shu yawˇ awˬ to htaꞈ na nyi cawˇ ve, ‘ngaˬ pa chehˇ ve awˬ ceuˬ chi awˬ htaꞈ hpawˇ ceh Hkriꞈ yaˇ hpehꞈ ve, maˇ heˆ leh nyi ma awˬ tawˬ hk’a gaˬ Hkriꞈ yaˇ hpehꞈ ve laˇ?’ Chi ve nyiˇ ceuˬ peun daꞈ jaˇ. Yeˍsuˆ ve tawˇ hkawˇ Maꞈhtehˍ liꞈ 12:43-45 hk’aw ngaˬ hui aˬ htoꞈ ma g’a te cawˇ ve na g’a tuˬ ga laˇ ve yoˬ. (G’aw sheˍ.) Yawˇ ve tawˇ hkawˇ ngaˬ hui henˇ yuˬ tuˬ maˍ laˇ ve yoˬ. Maˇ daꞈ ve dawˇ hk’aˇ htaꞈ yuˬ baˬ ve ceh maˇ lawꞈ. Ngaˬ hui ve dawˇ hk’aˇ hk’aw G’uiˬ sha ve dawˇ hk’aˇ kaꞈ g’a cawˬ tcuh ve yoˬ.

“NAWˬ HUI VE NYI MA AWˬ HK’AW LO DAWˇ HK’Aˇ AWˬ SUHˉ CAWˬ LA PIˇ-Oˆ”

7. Ngaˬ hui ve nyi ma hk’aw dawˇ hk’aˇ htaꞈ hk’aˬ hk’e te pa g’a tuˬ le?

7 Ngaˬ hui ve nyi ma hk’aw dawˇ hk’aˇ awˬ suhˉ pa g’a-aw laˇ? Liꞈ hpu hk’aw k’oˆ ve, “nawˬ hui ve nyi ma awˬ hk’aw lo dawˇ hk’aˇ awˬ suhˉ cawˬ la piˇ-oˆ. Awˬ tehˬ awˬ na hteˇ ve cawˇ ve leh daꞈ ve kehˬ ve awˬ hk’aw lo, G’uiˬ sha hpanˍ taˍ ve nyi ma awˬ suhˉ htaꞈ veuꞈ deh-o.” (Eˇfeˇsuꞈ 4:23, 24) Chi te g’a ve yoˬ. Yaꞈ hk’aˇ, maˇ sha. Ngaˬ hui loˍ ve leh maˇ daꞈ ve htaꞈ maˇ te-o ve, chi ve htaꞈ tawˍ daꞈ ve ceh maˇ lawꞈ. Ngaˬ hui ve “nyi ma awˬ hk’aw lo dawˇ hk’aˇ awˬ suhˉ” g’a pa cawˇ ve yoˬ. Chi ve tcuhˉ kuiˬ lehˬ, ngaˬ hui loˍ ve, dawˇ teh taˍ ve, leh ngaˬ hui ve nyi ma hk’aw cawˬ ve dawˇ hk’aˇ htaꞈ g’a pa cawˇ ve tehꞈ k’oˆ gaˇ ve yoˬ. Chi caˉ leh g’a te ve yoˬ.

8-9. Awˬ viˉ awˬ nyi hawˉ hk’aˆ teˇ g’aˇ hpehꞈ laˬ jaw ve awˬ lawn ngaˬ hui ve nyi ma awˬ hk’aw lo dawˇ hk’aˇ awˬ suhˉ cawˬ la tuˬ hk’aˬ hk’e ga laˇ ve le?

8 Awˬ viˉ awˬ nyi hawˉ hk’aˆ teˇ g’aˇ haiˬ ve te jaw ve htaꞈ dawˇ nyi sheˍ. Yawˇ tzuhˬ maˇ dawˬ-o leh shu htaꞈ maˇ yaꞈ daꞈ-o htaˇ Baˆtiˆsaˬ haꞈ yuˬ ve yoˬ. Chi yawˇ awˬ paˇ awˬ kui chehˇ ve chaw htaꞈ daꞈ ve awˬ lawn sha tanˇ hto maˍ piˇ g’a ve yoˬ. Yaꞈ hk’aˇ, yawˇ Baˆtiˆsaˬ haꞈ yuˬ peuˬ hk’awꞈ nawˉ maˇ maw beˬ ve lawˇ ve g’a hpuˇ ve yoˬ. Tzuhˬ bvuhˆ paˍ teˇ g’aˇ yawˇ yehˬ lo laˬ leh ca na dawˆ la ve yoˬ. Awˉ lawˉ htaˇ awˬ viˉ awˬ nyi yeunˇ hkanˍ g’aˇ ve yoˬ. Yaꞈ hk’aˇ, oˇ ve teˇ g’aˇ Yaˬhoˉvaˬ ve awˬ meh htaꞈ maˇ daꞈ ve k’oˆ leh awˬ viˉ awˬ nyi yeunˇ keunˍ maˇ g’aˇ. Yawˇ tawˆ-e leh oˇ ve teˇ g’aˇ htaꞈ dawˆ ve yoˬ. Hk’aˬ hk’e hpehꞈ la ve le? Liꞈ hpu henˇ ve yawˇ ve dawˇ hk’aˇ haiˬ ve htaꞈ pa g’a tuˬ ga piˇ ve htawˇ, yawˇ awˬ tehˬ awˬ na nyi ma hk’aw ve dawˇ hk’aˇ maˇ pa g’a sheˍ.

9 Yaꞈ hk’aˇ, awˬ viˉ awˬ nyi chi teˇ g’aˇ te tcuhˉ taˍ ve yoˬ. (Tawˇ naˉ ve 24:16) Nyi haꞈ shaˉ pa ga laˇ tcuh ve pa taw, yawˇ co ha hpawˇ uiˍ la mvuh la ve yoˬ. Awˬ leh meuˇ htaˇ yawˇ nyi haꞈ shaˉ paˍ g’a te ve yoˬ. Peuˬ hk’awꞈ nawˉ, mvuhˇ hpeuꞈ la htaˇ hpawnˬ daꞈ kuiˬ g’uˇ suhˍ lo yawˇ g’a hpuˇ jaw ve hk’e g’a k’awꞈ hpuˇ ve yoˬ. Tzuhˬ bvuhˆ paˍ teˇ g’aˇ nyi haꞈ shaˉ paˍ hui htaꞈ dawˆ-a te ve yoˬ. Awˬ viˉ awˬ nyi chi teˇ g’aˇ hk’aˬ hk’e te ve le? Yawˇ tzuhˬ bvuhˆ paˍ htaꞈ nyi ma gawˬ lehˍ ve hk’aw tawˇ yaw piˇ leh, maˇ daꞈ ve dawˇ hk’aˇ maˇ cawˬ tcuh leh, tzuhˬ bvuhˆ paˍ htaꞈ aˉ hk’aw k’awꞈ-e tuˬ ga piˇ ve yoˬ. Awˬ bon hk’aˬ hk’e g’a ve le? Awˬ viˉ awˬ nyi chi teˇ g’aˇ nyi ma hk’aw dawˇ hk’aˇ awˬ suhˉ cawˬ ve yoˬ. Nyi ma hk’aw yawˇ dawˇ sha gawˬ lehˍ ve leh nyi ma nuˇ nehˬ ve cawˬ ve yoˬ. Chi awˬ tehˬ awˬ na Yaˬhoˉvaˬ awˬ meꞈ awˬ hponˇ g’a jaˇ!

10. Ngaˬ hui ve nyi ma hk’aw dawˇ hk’aˇ htaꞈ pa ve aˬ htoꞈ ma kaꞈ cawˬ sheˍ ve le?

10 Pa ve chi hk’e ve teˇ hkui teˇ yanˇ leh yawˇ hk’aˇ yawˇ hpehꞈ la g’a ve maˇ heˆ. Ngaˬ hui laiˉ hk’awꞈ “g’aˇ hteꞈ coˇ caˇ” leh g’a te cawˇ ve yoˬ.  (2 Peˍtruˆ 1:5) Ngaˬ hui Yaˬhoˉvaˬ ve kanˉ te laˬ maw jaˇ-oˬ leh chi hk’e pa laˇ ve maˇ heˆ. Ngaˬ hui ve nyi ma hk’aw dawˇ hk’aˇ htaꞈ pa tuˬ g’aˇ hteꞈ g’a coˇ caˇ jaˇ. Chi hk’e te g’a tuˬ ngaˬ hui htaꞈ ga laˇ g’a ve laiˉ hk’aˇ cawˬ ve yoˬ. Teˇ lawn lawn htaꞈ chaˬ nyi sheˍ.

NGAˬ HUI VE NYI MA HK’AW DAWˇ HK’Aˇ AWˬ SUHˉ PA VE AWˬ HK’Aˇ

11. Ngaˬ hui bon lawˬ htaˇ, ngaˬ hui ve nyi ma hk’aw dawˇ hk’aˇ awˬ suhˉ k’awꞈ pa tuˬ hk’aˬ hk’e ga laˇ ve le?

11 A yeˇ uiˍ ve awˉ lawˉ teˇ ceuˬ lehˬ bon lawˬ ve yoˬ. Chiˇ mvuh ve liꞈ bvuhꞈ paˍ k’oˆ ve, “G’uiˬ sha-oˬ, ngaˬ awˬ hk’aw lo hpu ve kehˬ ve nyi ma cawˬ la piˇ leh, ka tiꞈ yeˬ ve dawˇ hk’aˇ awˬ suhˉ cawˬ la piˇ-oˆ.” (Chiˇ mvuh ve 51:10) Ngaˬ hui ve nyi ma hk’aw dawˇ hk’aˇ awˬ suhˉ pa g’a tuˬ Yaˬhoˉvaˬ ga laˇ tcuh cawˇ ve yoˬ. Ngaˬ hui pa g’a tuˬ Yaˬhoˉvaˬ ga laˇ g’a ve tehꞈ hk’aˬ hk’e te yonˍ g’a tuˬ le? Yeˍsaˍkeˍlaˆ ve awˬ co-e htaˇ Iˉsaˍreˍlaˆ chaw nyi ma uiˍ ve htawˇ, Yaˬhoˉvaˬ ga piˇ tuˬ yoˬ tehꞈ ka tiꞈ te taˍ ve yoˬ. Yawˇ ka tiꞈ te taˍ laˇ ve ngaˬ hui g’aw htaˇ awˬ g’aˇ g’a jaˇ. Yawˇ k’oˆ ve, “ngaˬ yawˇ hui htaꞈ nyi ma awˬ suhˉ leh dawˇ hk’aˇ awˬ suhˉ cawˬ la piˇ . . . leh, na yuˬ puiˉ ve nyi ma cawˬ la piˇ tuˬ yoˬ.” (Yeˍsaˍkeˍlaˆ 11:19) Chi ve tcuhˉ kuiˬ lehˬ G’uiˬ sha beˆ maˍ piˇ ve htaꞈ na yuˬ puiˉ ve nyi ma htaꞈ k’oˆ gaˇ ve yoˬ. Iˉsaˍreˍlaˆ chaw pa tuˬ Yaˬhoˉvaˬ ha lehˬ ve hk’aw ga piˇ leh yawˇ ngaˬ hui htaꞈ kaꞈ ha lehˬ ve hk’aw ga laˇ tuˬ yoˬ.

12-13. (a) Chiˇ mvuh ve liꞈ 119:59 hk’aw k’oˆ taˍ ve hk’e, ngaˬ hui aˬ htoꞈ ma ve htaꞈ hk’a dehꞈ dawˇ nyi cawˇ ve le? (b) Ngaˬ hui a shu yawˇ awˬ to htaꞈ hk’aˬ hk’e na nyi cawˇ ve le?

12 A yeˇ uiˍ ve nyiˇ ceuˬ teˇ ceuˬ lehˬ hk’a dehꞈ dawˇ nyi ve yoˬ. Ngaˬ hui teˇ nyi le le Liꞈ hpu g’aw htaˇ, hk’a dehꞈ dawˇ nyi tuˬ awˬ yanˇ g’a yehˇ ve yoˬ. Chi hk’e te htaˇ, ngaˬ hui dawˇ hk’aˇ hk’aˬ hk’e ve g’a pa cawˇ ve shiˍ la ve yoˬ. (Chiˇ mvuh ve 119:59; g’aw sheˍ. Heˍbrehˇ 4:12; Yaˍkoˆ 1:25) Chaw yaˇ loˍ ve hk’e nyi ma hk’aw cawˬ tcuh ve k’o, ngaˬ hui g’a pa cawˇ ve yoˬ. Ngaˬ hui awˬ g’aˇ nuˇ kuiˬ cawˬ ve k’o nyi ma nuˇ nehˬ ve hk’aw haꞈ yuˬ leh chi ve htaꞈ yuˬ baˬ g’a tuˬ g’aˇ hteꞈ g’a coˇ caˇ ve yoˬ.

13 Tawˇ pa haˉ te k’o, a shu yawˇ awˬ to htaꞈ na nyi cawˇ ve, ‘ngaˬ ve nyi ma hk’aw hkawehˉ ve cawˬ sheˍ laˇ?’ (1 Peˍtruˆ 2:1) ‘Ngaˬ g’a hpuˇ jaw ve, g’a henˇ jaw ve, hpu shi mawˇ jeˬ htaꞈ pa taw uiˍ muiˬ caˆ muiˬ ve cawˬ-aw laˇ?’ (Tawˇ naˉ ve 16:5) ‘Shu ngaˬ hk’e leˇ maˇ hpehꞈ sha ve, chaw ceuˬ maˇ shuˍ daꞈ ve, ngaˬ yawˇ hui htaꞈ nyi cha-aw laˇ?’ (Yaˍkoˆ 2:2-4) ‘Miˬ guiˬ yaˇ dawˇ ve hk’e ngaˬ dawˇ cawˇ-aw laˇ?’ (1 Yoˇhanˬ 2:15-17) ‘Pyawˍ ve, pehꞈ ve tzuhˆ ve leh, haiˬ ve awˬ han htaꞈ ngaˬ dawˇ cawˇ-aw laˇ?’ (Chiˇ mvuh ve 97:10; 101:3; Aˍmoˆ 5:15) Ngaˬ hui na hkawˇ chi ve teˇ hpaˍ htaꞈ hk’awꞈ htaˇ, aˬ htoꞈ ma g’a pa cawˇ ve shiˍ la ve yoˬ. Ngaˬ hui nyi ma hk’aw cawˬ ve chi ve hk’a peu-eˬ htaꞈ yuˬ baˬ g’a ve k’o, mvuhˇ naw ma hk’oˆ chehˇ ve Awˬ pa ha lehˬ jaˇ tuˬ yoˬ.—Chiˇ mvuh ve 19:14.

14. Aˬ htoꞈ ma te daꞈ ve chaw htaꞈ awˬ chawˇ te ve a yeˇ uiˍ jaˇ ve le?

14 A yeˇ uiˍ ve shehˆ ceuˬ teˇ ceuˬ lehˬ daꞈ ve chaw htaꞈ awˬ chawˇ te ve yoˬ. Awˬ chawˇ ngaˬ hui htaꞈ heuˆ la kuiˬ cawˬ jaˇ. (Tawˇ naˉ ve 13:20) Kanˉ te kuiˬ, liꞈ henˇ kuiˬ ngaˬ hui G’uiˬ sha hk’e dawˇ tuˬ te laˇ maˇ g’a. Yaꞈ hk’aˇ, Hkriꞈ yaˇ hpawnˬ daꞈ kuiˬ lo ngaˬ hui daꞈ ve awˬ chawˇ cawˬ ve yoˬ. Oˇ kaˬ lo ngaˬ hui “haꞈ pehnˇ ve nyi ma cawˬ leh” a yeˇ yuˬ daꞈ ve yoˬ.—Heˍbrehˇ 10:24, 25.

‘YONˍ VE TEˇ CEUˬ AWˬ HK’AW LO YEˬ CHAWEH CHEHˇ TAˍ SHEˍ’

15-16. Saˍtanˍ coˇ caˇ leh ngaˬ hui ve dawˇ hk’aˇ htaꞈ hk’aˬ hk’e pa laˇ gaˇ ve le?

15 Saˍtanˍ coˇ caˇ leh ngaˬ hui ve dawˇ hk’aˇ htaꞈ pa laˇ gaˇ ve tehꞈ taˇ leunˇ sheˍ. Liꞈ hpu hk’aw awˬ  tehˬ ve htaꞈ tawˍ daꞈ tuˬ yawˇ awˬ hk’aˇ teˇ ceuˬ le le htaꞈ yehˇ ve yoˬ.

16 Saˍtanˍ Eˍdehˍ hko hk’aw Eˇvaꞈ htaꞈ na piˇ jaw ve yoˬ. Chi beuꞈ teˇ co-e kaꞈ yawˇ k’awꞈ na chehˇ sheˍ ve awˬ tehˬ laˇ? (Awˬ hkuiˉ puiˍ 3:1) Miˬ guiˬ hk’oˆ Saˍtanˍ uˉ peunˍ ve pa taw, na hkawˇ chi hk’e ve teˇ hkui teˇ hkui ngaˬ hui g’a kaˇ ve yoˬ. ‘G’uiˬ sha hawˉ hk’aˆ chawˇ hawˉ hk’aˆ leh yaˇ miˇ chawˇ yaˇ miˇ heuˆ daꞈ ve maˇ haꞈ yuˬ ve awˬ tehˬ laˇ? G’uiˬ sha nawˬ htaꞈ Hkiˇsuhˍmaˆ leh paw ve awˬ nyi maˇ te tcuh gaˇ ve awˬ tehˬ laˇ? Nawˬ ve G’uiˬ sha awˬ suhˍ keu ve maˇ haꞈ yuˬ ve awˬ tehˬ laˇ? Nawˬ haꞈ ve chaw Hkriꞈ yaˇ awˬ moˍ hk’aw tawˆ cheˆ ve geh G’uiˬ sha awˬ chawˇ maˇ te tcuh laˇ ve awˬ tehˬ laˇ?’

17. Ngaˬ hui ve yonˍ hk’aˇ htaꞈ beˬ ve lawˇ ve g’a hpuˇ ve k’o Kawˇlawˇsehˇ liꞈ 2:6, 7 hk’aw awˬ bon g’a tuˬ hk’aˬ hk’e hpeuꞈ maw laˇ ve le?

17 Ngaˬ hui yonˍ ve teˇ ceuˬ awˬ hk’aw lo yeˬ chaweh g’a chehˇ ve yoˬ. Ngaˬ hui htawˇ dawˇ nawˬ dawˇ cawˬ ve htaꞈ leuˉ leh k’awꞈ cawˬ tcuh ve k’o, chi ve kawˆ tuˬ cawˬ jaˇ. Chi ve ngaˬ hui ve dawˇ hk’aˇ maˇ daꞈ ve cawˬ tcuh laˇ leh yonˍ hk’aˇ htaꞈ te luˬ laˇ ve yoˬ. Hk’e k’o ngaˬ hui hk’aˬ hk’e te cawˇ ve le? Liꞈ hpu hk’aw k’oˆ ve ngaˬ hui ve nyi ma dawˇ hk’aˇ awˬ suhˉ g’a pa ve yoˬ. Chi htaꞈ pa taw, “G’uiˬ sha ve daꞈ jaˇ ve nyi ma cawˇ jaˇ ve leh biˇ jaˇ ve a loˍ” hk’aˬ hk’e k’oˆ gaˇ ve le hk’awꞈ laˇ hkawˇ chi ngaˬ hui g’a ca ve yoˬ. (Roˉmaꞈ 12:2) Liꞈ hpu hk’aw awˬ tehˬ ve hteˇ cawˇ jaˇ ve tehꞈ ngaˬ hui yonˍ g’a tuˬ hk’aˬ htaˆ kaꞈ Liꞈ hpu g’a henˇ ve yoˬ. Yaˬhoˉvaˬ ve awˬ liˇ awˬ hk’aˇ hteˇ cawˇ jaˇ ve tehꞈ ngaˬ hui hk’a dehꞈ yonˍ g’a ve yoˬ. Chi htaꞈ pa taw, suhˆ cehˬ awˬ geu tcuhˆ naˉ ve hk’e ngaˬ hui ve yonˍ hk’aˇ awˬ geu tcuhˆ naˉ leh “yeˬ chaweh” cawˬ tuˬ yoˬ.—Kawˇlawˇsehˇ 2:6, 7 g’aw sheˍ.

18. Miˬ guiˬ lo laˬ ve awˬ tawꞈ ma cawˬ ve htaꞈ tawˍ daꞈ g’aˇ tuˬ ngaˬ hui htaꞈ aˬ htoꞈ ma ga laˇ g’a ve le?

18 Nawˬ ve yonˍ hk’aˇ yonˍ yeˬ tuˬ shu te laˇ maˇ g’a. Chi htaꞈ pa taw, nyi ma hk’aw cawˬ ve dawˇ hk’aˇ awˬ suhˉ pa tuˬ caˉ leh te sheˍ. Hk’aˬ htaˆ kaꞈ bon lawˬ ve, Yaˬhoˉvaˬ ve daꞈ kehˬ ve awˬ ha hpu ga laˇ tuˬ lawˬ sheˍ. Hk’a dehꞈ dawˇ nyi ve, nawˬ ve nyi ma hk’aw cawˬ ve dawˇ hk’aˇ htaꞈ chaˬ nyi sheˍ. Daꞈ ve chaw htaꞈ awˬ chawˇ te ve, nawˬ ve dawˇ hk’aˇ pa laˇ g’a tuˬ ga laˇ g’a ve chaw geh awˬ chawˇ te sheˍ. Nawˬ chi hk’e te ve k’o miˬ guiˬ lo laˬ ve awˬ tawꞈ ma cawˬ ve leh ‘tawˇ g’awˬ daꞈ ve awˬ ceuˬ leh G’uiˬ sha htaꞈ maˇ g’a shiˍ tuˬ tawˍ taˍ tsuhˇ taˍ ve awˬ ceuˬ teˇ hpaˍ htaꞈ yuˬ baˬ’ leh tawˍ daꞈ g’aˇ ve yoˬ.—2 Kawˇrenˍhtuˆ 10:5.

K’A MUIˬ HKAWˇ 50 Awˬ to chiˇ aꞈ ve bon lawˬ hkawˇ

^ aw? tawn 5 Ngaˬ hui g’a hpuˇ jaw ve, chaw liˇ vaˇ liˇ, leh liꞈ henˇ ve awˬ ceuˬ chi teˇ hpaˍ ngaˬ hui ve te hk’aˇ dawˇ hk’aˇ htaꞈ daꞈ ve leh maˇ daꞈ ve heuˆ la kuiˬ cawˬ ve yoˬ. Ngaˬ hui ve te hk’aˇ dawˇ hk’aˇ maˇ daꞈ ve teˇ hpaˍ hpaˍ nyi ma hk’aw cawˬ ve htaꞈ shiˍ g’a ve yoˬ hehˉ. Ngaˬ hui ve te hk’aˇ dawˇ hk’aˇ maˇ cawˇ ve htaꞈ gu g’a tuˬ awˬ lawn chi ve hk’aw maˍ laˇ tuˬ yoˬ.