Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 AWˬ LAWN 23

“Nawˬ hui htaꞈ maˇ g’a hpeh yuˬ veu tuˬ, shaˍ tiꞈ taˍ-oꞈ”!

“Nawˬ hui htaꞈ maˇ g’a hpeh yuˬ veu tuˬ, shaˍ tiꞈ taˍ-oꞈ”!

“Chaw teˇ g’aˇ kaꞈ cuˇ yiˍ maˍ yiˍ tawˇ hkawˇ leh tcuhˉ kuiˬ maˇ cawˬ ve heˍ ve tawˇ hkawˇ htaꞈ yehˇ leh nawˬ hui htaꞈ maˇ g’a hpeh yuˬ veu tuˬ, shaˍ tiꞈ taˍ-oꞈ. . . . Chaw yaˇ teˇ caˉ peuˬ teˇ caˉ piˇ taˍ ve tawˇ hkawˇ leh, miˬ guiˬ htaꞈ caˉ daꞈ ve dawˇ hk’aˇ ceh hpehꞈ ve yoˬ.”—KAWˇLAWˇSEHˇ 2:8.

K’A MUIˬ HKAWˇ 96 G’uiˬ sha ve liꞈ k’oˆ awˬ hpfuhˇ hk’aˆ ve

HENˇ TUˬ VE TEˇ HPAˍ *

1. Kawˇlawˇsehˇ liꞈ 2:4, 8 hk’aw k’oˆ taˍ ve hk’e, Saˍtanˍ ngaˬ hui ve dawˇ hk’aˇ htaꞈ hk’aˬ hk’e te uˉ peunˍ chehˇ ve le?

Ngaˬ hui Yaˬhoˉvaˬ htaꞈ oˉ k’oˍ maˇ pui tuˬ Saˍtanˍ te tcuh gaˇ ve yoˬ. Chi hk’e hpehꞈ tuˬ yawˇ coˇ caˇ leh ngaˬ hui ve dawˇ hk’aˇ htaꞈ pa laˇ ve yoˬ. Ngaˬ hui ve dawˇ hk’aˇ yawˇ uˉ peunˍ ve awˬ hawˉ lo chehˇ leh yawˇ hk’e dawˇ tcuh gaˇ ve yoˬ. Saˍtanˍ ngaˬ hui htaꞈ heˍ leh yawˇ hk’e te tuˬ ngaˬ hui dawˇ cawˇ ve awˬ ceuˬ htaꞈ yehˇ ve yoˬ.—Kawˇlawˇsehˇ 2:4, 8 g’aw sheˍ.

2-3. (a) Kawˇlawˇsehˇ liꞈ 2:8 hk’aw shaˍ tiꞈ peꞈ laˇ ve htaꞈ aˬ htoꞈ ma te ngaˬ hui a yeˇ yuˬ cawˇ ve le? (b) Awˬ lawn chi ve hk’aw ngaˬ hui aˬ htoꞈ ma htaꞈ henˇ tuˬ le?

2 Saˍtanˍ heˍ ve awˬ tehˬ kawˆ tuˬ cawˬ-aw laˇ? Cawˬ ve yoˬ! Awˬ lawn chi htaꞈ tawnˇ taˍ sheˍ. Kawˇlawˇsehˇ liꞈ 2:8 hk’aw shaˍ tiꞈ peꞈ laˇ ve chi Pawˇluꞈ maˇ yonˍ ve chaw htaꞈ maˇ g’a bvuhꞈ piˇ. Yaꞈ hk’aˇ, yawˇ daꞈ kehˬ ve awˬ ha hpu leuˆ yuˬ taˍ ve Hkriꞈ yaˇ htaꞈ bvuhꞈ piˇ ve yoˬ. (Kawˇlawˇsehˇ 1:2, 5) Awˉ lawˉ peuˇ ve Hkriꞈ yaˇ shaˍ tiꞈ g’a te leh, chi beuꞈ teˇ co-e ngaˬ hui kaꞈ hk’a shuˍ g’a te ve yoˬ. (1 Kawˇrenˍhtuˆ 10:12) Aˬ htoꞈ ma pa taw le? Saˍtanˍ miˬ guiˬ hk’oˆ lo chehˇ leh G’uiˬ sha ve kanˉ te ve ka tiꞈ yeˬ ve chaw htaꞈ heˍ tuˬ yawˇ dawˇ teh taˍ ve yoˬ. (Hpeuꞈ maˍ ve 12:9, 12, 17) Chi hk’oˆ kaꞈ “haiˬ ve chaw leh heˍ puiˉ ve chaw teˇ hpaˍ lehˬ, shaˬ te shaˬ haiˬ la tuˬ” ve awˬ yanˇ awˬ hk’aw lo ngaˬ hui chehˇ ve yoˬ.—2 Tiˆmoˉseˍ 3:1, 13.

3 Saˍtanˍ ngaˬ hui ve dawˇ hk’aˇ htaꞈ pa laˇ tuˬ yawˇ “tcuhˉ kuiˬ maˇ cawˬ ve heˍ ve tawˇ hkawˇ” htaꞈ hk’aˬ hk’e yehˇ ve awˬ lawn chi ve hk’aw teˇ geh henˇ tuˬ yoˬ. Ngaˬ hui “neˇ haiˬ heˍ yuˬ beˬ yuˬ ve” 3 hk’aˇ htaꞈ henˇ tuˬ yoˬ. (Eˇfeˇsuꞈ 6:11) Peuˬ hk’awꞈ nawˉ Saˍtanˍ hk’e  ve dawˇ hk’aˇ cawˬ ve htaꞈ yuˬ baˬ tuˬ, ngaˬ hui hk’aˬ hk’e g’a te cawˇ ve g’uˇ suhˍ teˇ lawn hk’aw teˇ geh henˇ tuˬ yoˬ. Iˉsaˍreˍlaˆ chaw ka tiꞈ te taˍ ve mvuhˇ miˬ hk’aw loꞈ-e peuˬ hk’awꞈ nawˉ, Saˍtanˍ yawˇ hui htaꞈ heˍ piˇ ve awˬ hk’aˇ ngaˬ hui htaꞈ hk’aˬ hk’e maˍ laˇ g’a ve awˉ lawˉ teˇ geh dawˇ nyi sheˍ.

IˉSAˍREˍLAˆ CHAW SHAˉ HOꞈ HTAꞈ Oˉ K’Oˍ PUI TUˬ SAˍTANˍ HEˍ PIˇ VE

4-6. Bon maˍ ve liꞈ 11:10-15 hk’aw k’oˆ taˍ ve hk’e, Iˉsaˍreˍlaˆ chaw ka tiꞈ te taˍ ve mvuhˇ miˬ hk’aw gaˬ-oˬ htaˇ, yawˇ hui aˬ htoꞈ ma htaꞈ g’a henˇ cawˇ ve le?

4 Saˍtanˍ lehˆ jaˇ leh Iˉsaˍreˍlaˆ chaw shaˉ hoꞈ htaꞈ oˉ k’oˍ pui tuˬ heˍ piˇ ve yoˬ. Neˇ haiˬ hk’aˬ hk’e te ve le? Yawˇ hui caˇ tuˬ loˍ ve tehꞈ neˇ haiˬ shiˍ ve pa taw, yawˇ loˍ ve hk’e yawˇ hui g’aꞈ te tuˬ chi htaꞈ yehˇ ve yoˬ. Iˉsaˍreˍlaˆ chaw ka tiꞈ te taˍ ve mvuhˇ miˬ hk’aw gaˬ-oˬ htaˇ, yawˇ hui ti mi te caˇ tuˬ awˬ hk’aˇ awˬ suhˉ g’a henˇ ve yoˬ. Iˉsaˍreˍlaˆ chaw Eˇjiˇtuꞈ mvuhˇ miˬ lo chehˇ htaˇ, yawˇ hui ti mi te caˇ tuˬ Niˍlaˆ iˉ kaˆ lawˬ htaꞈ yehˇ ve yoˬ. Yaꞈ hk’aˇ, ka tiꞈ te taˍ ve mvuhˇ miˬ hk’aw ti mi te caˇ tuˬ iˉ kaˆ lawˬ oˇ hk’e ve htaꞈ maˇ yehˇ-o. Mvuhˇ yeˬ leh ciˬ g’uiˬ htaꞈ cuˇ ve yoˬ. (Bon maˍ ve 11:10-15; g’aw sheˍ. Iˉsaˍyaˆ 18:4, 5) Chi htaꞈ pa taw, yawˇ hui ti mi te caˇ tuˬ awˬ hk’aˇ awˬ suhˉ g’a henˇ ve yoˬ. Ti mi te caˇ jaw ve chaw maˇ-awˍ ve heh puiˉ hk’aw lo suh peuˬ-oˬ ve pa taw, chi hk’e te tuˬ maˇ sha.

Iˉsaˍreˍlaˆ chaw ti mi te caˇ ve dawˇ hk’aˇ htaꞈ Saˍtanˍ hk’aˬ hk’e pa piˇ g’a ve le? (Awˬ tawn 4-6 nyi sheˍ) *

5 Awˬ tcuhˉ awˬ yanˇ pa k’ai-oˬ tehꞈ Yaˬhoˉvaˬ yawˇ ve chaw htaꞈ k’oˆ maˍ piˇ ve yoˬ. Yawˇ yawˇ hui htaꞈ teˇ ceuˬ k’awꞈ k’oˆ piˇ sheˍ. Awˬ lawn chi ve lehˬ nyi-a k’o ti mi te caˇ ve htaꞈ maˇ caˉ daꞈ. Yaꞈ hk’aˇ, yawˇ k’oˆ ve, “nawˬ hui shu hkawˇ na leh, awˬ kaˍ awˬ nu g’uiˬ sha teˇ hpaˍ htaꞈ oˉ k’oˍ maˇ g’a pui tuˬ shaˍ tiꞈ taˍ-oꞈ.” (Bon maˍ ve 11:16, 17) Ti mi te caˇ ve htaꞈ k’oˆ htaˇ, aˬ htoꞈ ma te Yaˬhoˉvaˬ awˬ nu ve g’uiˬ sha htaꞈ oˉ k’oˍ pui ve kaꞈ shaˍ tiꞈ piˇ ve le?

6 Iˉsaˍreˍlaˆ chaw yawˇ hui awˬ paˇ awˬ kui lo chehˇ ve geh ti mi te caˇ ve awˬ hk’aˇ awˬ suhˉ henˇ ve htawˇ, beˬ ve lawˇ ve g’a hpuˇ tuˬ ve tehꞈ Yaˬhoˉvaˬ shiˍ ve yoˬ. Yawˇ hui awˬ paˇ awˬ kui chehˇ  ve chaw awˬ lawn chi htaꞈ hk’a dehꞈ shiˍ leh G’uiˬ sha ve chaw kaꞈ yawˇ hui htaꞈ henˇ yuˬ g’a ve yoˬ. Yaꞈ hk’aˇ, awˬ lawn chi kaꞈ kawˆ tuˬ cawˬ ve yoˬ. Hkaˍnanˍ chaw ti mi te caˇ ve Baˍlaˆ g’uiˬ sha htaꞈ yonˍ ve yoˬ. Baˍlaˆ g’uiˬ sha lehˬ mvuhˇ naw ma ve g’uiˬ sha leh mvuhˇ yeˬ peꞈ laˇ shehˍ hpaˇ hpehꞈ ve tehꞈ yawˇ hui yonˍ ve yoˬ. Chi hk’e ve Yaˬhoˉvaˬ yawˇ ve chaw htaꞈ maˇ heˍ tcuh gaˇ. Yaꞈ hk’aˇ, Iˉsaˍreˍlaˆ chaw Baˍlaˆ g’uiˬ sha htaꞈ oˉ k’oˍ pui tuˬ k’awꞈ leuˆ yuˬ ve yoˬ. (Heh puiˉ hk’aw 25:3, 5; Suhˉ jehˬ ve 2:13; 1 Jawˇ mawˇ 18:18) Saˍtanˍ Iˉsaˍreˍlaˆ chaw htaꞈ hk’aˬ hk’e te hpeh yuˬ veu g’a ve le teˇ geh nyi sheˍ.

IˉSAˍREˍLAˆ CHAW HTAꞈ SAˍTANˍ HPEH YUˬ VEU G’A TUˬ AWˬ HK’Aˇ 3 HK’Aˇ YEHˇ VE

7. Iˉsaˍreˍlaˆ chaw ka tiꞈ te taˍ ve mvuhˇ miˬ hk’aw gaˬ-oˬ htaˇ, yawˇ hui yonˍ ve htaꞈ beˬ ve lawˇ ve hk’aˬ hk’e g’a hpuˇ ve le?

7 Saˍtanˍ yehˇ ve awˉ lawˉ teˇ ceuˬ lehˬ, chaw yaˇ teˇ g’aˇ le le loˍ ve awˬ ceuˬ htaꞈ cuˇ ve yoˬ. Ka tiꞈ te taˍ ve mvuhˇ miˬ hk’aw teˇ hk’awꞈ le le Ha pa 4 maˬ te leh 9 maˬ hk’a gaˬ mvuhˇ yeˬ hk’a dehꞈ maˇ laˬ. Iˉsaˍreˍlaˆ chaw mvuhˇ yeˬ laˬ tcuh gaˇ ve yoˬ. A shaꞈ g’a ponˬ tuˬ leh g’awˇ caˉ leh iˉ shiˍ daꞈ la tuˬ mvuhˇ yeˬ laˬ tuˬ loˍ ve yoˬ. Ha pa 10 maˬ gaˬ htaˇ hehꞈ mvuhˇ yeˬ tanˬ laˬ ve yoˬ. Iˉsaˍreˍlaˆ chaw awˬ paˇ awˬ kui lo chehˇ ve maˇ heˆ heˆ ve awˬ liˇ awˬ hk’aˇ hk’e g’aꞈ te htaˇ hehꞈ, awˬ ceuˬ oˇ ve teˇ hpaˍ daꞈ la g’a tuˬ tehꞈ Saˍtanˍ yawˇ hui htaꞈ yonˍ tcuh ve yoˬ. Awˬ liˇ awˬ hk’aˇ teˇ ceuˬ ceuˬ te htaˇ hehꞈ G’uiˬ sha mvuhˇ yeˬ laˬ tcuh laˇ ve tehꞈ awˬ paˇ awˬ kui chehˇ ve chaw yonˍ ve yoˬ. Yaˬhoˉvaˬ htaꞈ maˇ yonˍ ve chaw yawˇ hui mvuhˇ goˇ ve htaꞈ gu g’a tuˬ chi hk’e g’a te ve tehꞈ yonˍ ve yoˬ. Hk’e te leh yawˇ hui Baˍlaˆ g’uiˬ sha htaꞈ yawˆ yan tuˬ maˇ heˆ heˆ ve awˬ liˇ awˬ hk’aˇ htaꞈ tanˬ te ve yoˬ.

8. Saˍtanˍ yehˇ ve nyiˇ ceuˬ teˇ ceuˬ aˬ htoꞈ ma le? K’oˆ maˍ laˇ sheˍ.

8 Saˍtanˍ yehˇ ve nyiˇ ceuˬ teˇ ceuˬ lehˬ pehꞈ ve tzuhˆ ve hpawˇ te gaˇ ve nyi ma htaꞈ cuˇ ve yoˬ. Awˬ nu ve mvuhˇ miˬ hk’aw chehˇ ve chaw yawˇ hui ve g’uiˬ sha htaꞈ oˉ k’oˍ pui leh pehꞈ ve tzuhˆ ve hpawˇ te gaˇ ve nyi ma htaꞈ kaꞈ caˉ daꞈ ve yoˬ. Yawˇ hui oˉ k’oˍ pui kuiˬ hk’aw yaˇ miˇ leh hawˉ hk’aˆ awˬ to hawˇ ve kaꞈ cawˬ ve yoˬ. Hawˉ hk’aˆ chawˇ hawˉ hk’aˆ yaˇ miˇ chawˇ yaˇ miˇ pehꞈ ve tzuhˆ ve htaꞈ te leh pehꞈ ve tzuhˆ ve hpawˇ te gaˇ ve awˬ nu ve kaꞈ a hk’e leˇ ceh hpehꞈ ve yoˬ! (Bon maˍ ve 23:17, 18; 1 Jawˇ mawˇ 14:24) Maˇ heˆ heˆ ve g’uiˬ sha htaꞈ yonˍ ve chaw yawˇ hui k’oˆ ve, chi hk’e te htaˇ mvuhˇ miˬ daꞈ la tuˬ tehꞈ yonˍ ve yoˬ. Iˉsaˍreˍlaˆ chaw laiˉ g’aˇ htaꞈ pehꞈ ve tzuhˆ ve awˬ liˇ awˬ hk’aˇ te tuˬ heˍ piˇ leh, maˇ heˆ heˆ ve g’uiˬ sha htaꞈ kaꞈ oˉ k’oˍ pui ve yoˬ. Awˬ tehˬ k’o, yawˇ hui Saˍtanˍ hpeh yuˬ veu ve yoˬ.

9. Hawˇseˍ liꞈ 2:16, 17 hk’aw k’oˆ taˍ ve hk’e, Saˍtanˍ Iˉsaˍreˍlaˆ chaw Yaˬhoˉvaˬ htaꞈ leunˇ-e tuˬ hk’aˬ hk’e te piˇ ve le?

9 Saˍtanˍ yehˇ ve shehˆ ceuˬ teˇ ceuˬ lehˬ, Iˉsaˍreˍlaˆ chaw Yaˬhoˉvaˬ htaꞈ leunˇ-e tuˬ te piˇ ve yoˬ. Tcuh kaˍ paˍ Yeˍraˍmiˆ ve awˬ co-e htaˇ, “Baˍlaˆ g’uiˬ sha htaꞈ” pa taw, Yaˬhoˉvaˬ ve chaw yawˇ ve awˬ meh htaꞈ leunˇ-e tuˬ, maˇ heˆ heˆ ve tcuh kaˍ paˍ te piˇ tuˬ yoˬ tehꞈ Yaˬhoˉvaˬ k’oˆ taˍ ve yoˬ. (Yeˍraˍmiˆ 23:27) Yaˬhoˉvaˬ ve chaw yawˇ ve awˬ meh awˬ tan, Baˍlaˆ g’uiˬ sha ve awˬ meh htaꞈ tanˬ yehˇ leh chi ve tcuhˉ kuiˬ lehˬ “awˬ shehˍ hpaˇ” maˇ heˆ leh “paw leˍ” tehꞈ k’oˆ gaˇ ve yoˬ. Chi hk’e te ve lehˬ yawˇ hui Yaˬhoˉvaˬ hk’aˬ hk’e dawˇ ve htaꞈ leunˇ-e leh Baˍlaˆ g’uiˬ sha htaꞈ tiˉ dawˇ nyi ve yoˬ. Chi Iˉsaˍreˍlaˆ chaw Baˍlaˆ g’uiˬ sha htaꞈ oˉ k’oˍ pui leh, Yaˬhoˉvaˬ htaꞈ oˉ k’oˍ pui ve tanˬ hpawˇ daꞈ ve yoˬ.—Hawˇseˍ 2:16, 17 g’aw sheˍ.

CHI BEUꞈ TEˇ CO-E SAˍTANˍ YEHˇ VE AWˬ HK’Aˇ

10. Chi beuꞈ teˇ co-e Saˍtanˍ aˬ htoꞈ ma ve awˬ hk’aˇ htaꞈ yehˇ ve le?

10 Saˍtanˍ awˬ hk’aˇ awˬ piˍ hk’e k’awꞈ yehˇ sheˍ ve  yoˬ. Chaw yaˇ htaꞈ hpeh yuˬ veu tuˬ, teˇ g’aˇ le le loˍ ve, pehꞈ ve tzuhˆ ve hpawˇ te gaˇ ve nyi ma, leh Yaˬhoˉvaˬ hk’aˬ hk’e dawˇ ve htaꞈ chaw yaˇ leunˇ-e tuˬ awˬ hk’aˇ chi teˇ hpaˍ htaꞈ Saˍtanˍ cuˇ ve yoˬ. Awˬ leh meuˇ ve awˬ hk’aˇ htaꞈ teˇ geh chaˬ nyi sheˍ.

11. Yaˬhoˉvaˬ hk’aˬ hk’e hpehꞈ ve, chaw yaˇ leunˇ-e tuˬ Saˍtanˍ hk’aˬ hk’e te piˇ ve le?

11 Yaˬhoˉvaˬ hk’aˬ hk’e hpehꞈ ve, chaw yaˇ leunˇ-e tuˬ Saˍtanˍ te piˇ ve yoˬ. Yeˍsuˆ ve awˬ laꞈ g’awˇ awˬ leh meuˇ teˇ g’aˇ suh peuˬ hk’awꞈ nawˉ, chaw teˇ hpaˍ hpaˍ Hkriꞈ yaˇ hpehꞈ ve tehꞈ k’oˆ leh maˇ heˆ heˆ ve tanˬ maˍ ve yoˬ. (Tcuh yaˇ 20:29, 30; 2 Hteˇsaˍlawˇniˆ 2:3) Yaˬhoˉvaˬ ve kenˉ hk’aˇ htaꞈ tawˍ daꞈ ve chaw teˇ hpaˍ lehˬ, chaw yaˇ awˬ tehˬ ve G’uiˬ sha htaꞈ maˇ shiˍ tuˬ te piˇ ve yoˬ. Tawˇ pa haˉ te k’o, yawˇ hui Liꞈ hpu hk’aw G’uiˬ sha ve awˬ meh htaꞈ maˇ yehˇ-oˬ leh yawˇ ve awˬ meh awˬ tan “Jawˇ mawˇ” tehꞈ yehˇ ve yoˬ. Chi hk’e te ve lehˬ, Liꞈ hpu g’aw ve chaw teˇ hpaˍ Yaˬhoˉvaˬ lehˬ “Jawˇ mawˇ teˇ hpaˍ” htaꞈ hk’aˬ hk’e peun daꞈ ve maˇ nyi mawˬ tuˬ yawˇ hui te piˇ ve yoˬ. (1 Kawˇrenˍhtuˆ 8:5) Yawˇ hui Yaˬhoˉvaˬ leh Yeˍsuˆ htaꞈ kaꞈ “Jawˇ mawˇ” tehꞈ k’oˆ ve yoˬ. Chi htaꞈ pa taw Yaˬhoˉvaˬ leh yawˇ ve Yaˇ paˍ teˇ g’aˇ tiˉ maˇ heˆ ve htaꞈ chaw yaˇ shiˍ tuˬ haˍ jaˇ. (Yoˇhanˬ 17:3) Chi htawˇ dawˇ nawˬ dawˇ cawˬ la leh 3 g’aˇ teˇ to tiˉ maˍ ve cawˬ la ve yoˬ. Maˍ ve chi Liꞈ hpu hk’aw maˇ cawˬ. Chi htaꞈ pa taw laiˉ g’aˇ dawˇ ve G’uiˬ sha lehˬ yawˇ htaꞈ maˇ shiˍ tuˬ te laˇ leh yawˇ hui G’uiˬ sha htaꞈ maˇ shiˍ g’a. Chi lehˬ heˍ puiˉ jaˇ!—Tcuh yaˇ 17:27.

Saˍtanˍ maˇ heˆ heˆ ve bon htaꞈ cuˇ leh pehꞈ ve tzuhˆ ve hpawˇ te gaˇ ve nyi ma cawˬ tuˬ hk’aˬ hk’e yehˇ ve le? (Awˬ tawn 12 nyi sheˍ) *

12. Maˇ heˆ heˆ ve bon aˬ htoꞈ ma htaꞈ te tcuh gaˇ ve le? Roˉmaꞈ liꞈ 1:28-31 hk’aw k’oˆ taˍ ve hk’e, aˬ htoꞈ ma hpehꞈ la ve le?

12 Saˍtanˍ pehꞈ ve tzuhˆ ve hpawˇ te gaˇ ve nyi ma htaꞈ kaꞈ cuˇ ve yoˬ. Iˉsaˍreˍlaˆ chaw ve awˬ co-e htaˇ, Saˍtanˍ maˇ heˆ heˆ ve bon htaꞈ cuˇ leh pehꞈ ve tzuhˆ ve hpawˇ te gaˇ tuˬ te piˇ ve yoˬ. Chi beuꞈ teˇ co-e kaꞈ te chehˇ sheˍ. Maˇ heˆ heˆ ve bon pehꞈ ve tzuhˆ ve te gaˇ tuˬ kaꞈ te piˇ ve yoˬ. Laiˉ g’aˇ G’uiˬ sha ve kanˉ te ve tehꞈ k’oˆ ve htawˇ, G’uiˬ sha ve awˬ liˇ awˬ hk’aˇ cawˇ ve htaꞈ maˇ g’aꞈ te. Aˬ htoꞈ ma hpehꞈ la ve le? Tcuh yaˇ Pawˇluꞈ yawˇ Roˉmaꞈ Hkriꞈ yaˇ htaꞈ liꞈ bvuhꞈ piˇ ve hk’aw k’oˆ taˍ ve yoˬ. (Roˉmaꞈ 1:28-31 g’aw sheˍ.) “Maˇ keunˍ maˇ cawˇ ve” lehˬ pehꞈ ve tzuhˆ ve hpawˇ teˇ ceuˬ le le leh hawˉ hk’aˆ chawˇ hawˉ hk’aˆ leh yaˇ miˇ chawˇ yaˇ miˇ teˇ geh zuhꞈ ve kaꞈ yoˬ. (Roˉmaꞈ 1:24-27, 32; Hpeuꞈ maˍ ve 2:20) Ngaˬ hui Liꞈ hpu hk’aw maˍ laˇ taˍ ve htaꞈ a yeˇ g’a yuˬ ve yoˬ. Chi a yeˇ uiˍ jaˇ!

13. Saˍtanˍ k’awꞈ cuˇ sheˍ ve awˬ nu ve teˇ ceuˬ aˬ htoꞈ ma le?

13 Chaw yaˇ teˇ g’aˇ le le loˍ ve awˬ ceuˬ htaꞈ Saˍtanˍ cuˇ ve yoˬ. A shu yawˇ awˬ to leh yehˬ k’a  htaꞈ hu tuˬ, chaw yaˇ teˇ g’aˇ le le loˍ ve awˬ ceuˬ htaꞈ g’a henˇ ve yoˬ. (1 Tiˆmoˉseˍ 5:8) Laiˉ pawˆ k’o liꞈ henˇ-e ve maˇ heˆ leh na yuˬ puiˉ ve geh laˬ ve tehꞈ ngaˬ hui htaꞈ maˍ laˇ ve yoˬ. Yaꞈ hk’aˇ, ngaˬ hui shaˍ tiꞈ g’a te cawˇ ve yoˬ. Laiˉ mvuhˇ miˬ hk’aw liꞈ henˇ ve, liꞈ henˇ yaˇ awˬ bon cawˬ tuˬ maˍ piˇ ve htawˇ, chaw yaˇ ve dawˇ hk’aˇ kaꞈ maˍ piˇ ve yoˬ. G’uiˬ sha awˬ tehˬ cawˬ-aw laˇ tehꞈ, liꞈ henˇ yaˇ laiˉ g’aˇ htawˇ dawˇ nawˬ dawˇ cawˬ tuˬ te piˇ leh Liꞈ hpu htaꞈ maˇ yawˆ yan. A shaꞈ awˬ hkuiˉ puiˍ htaˇ hk’aˬ kaˬ lo laˬ ve shiˍ tuˬ, a shaꞈ lehˬ yawˇ hk’aˇ yawˇ cawˬ la g’a ve awˬ lawn chi ve ceh tiˉ k’oˆ maˍ laˇ g’a ve tehꞈ, yawˇ hui g’a henˇ ve yoˬ. (Roˉmaꞈ 1:21-23) Maˍ ve chi lehˬ “G’uiˬ sha dawˇ cheˆ taˍ ve cuˇ yiˍ” htaꞈ tawˍ daꞈ ve yoˬ.—1 Kawˇrenˍhtuˆ 1:19-21; 3:18-20.

14. Chaw yaˇ hk’e dawˇ ve lehˬ yawˇ hui hk’aˬ hk’e k’ai tuˬ te piˇ ve le?

14 Chaw yaˇ ve dawˇ hk’aˇ G’uiˬ sha ve awˬ liˇ awˬ hk’aˇ cawˇ ve htaꞈ maˇ hawˍ daꞈ. Chi ve ngaˬ hui G’uiˬ sha ve daꞈ kehˬ ve awˬ ha hpu cawˬ la tuˬ te laˇ maˇ g’a leh “awˬ suhˍ awˬ shaˍ ve kanˉ teˇ hpaˍ hk’a tawˍ lehˆ tawˆ la” tuˬ yoˬ. (Gaˍlaˍtiˆ 5:19-23) Chaw yaˇ ve dawˇ hk’aˇ uiˍ muiˬ caˆ muiˬ ve cawˬ tuˬ te piˇ ve yoˬ. Laiˉ g’aˇ “a shu yawˇ awˬ to htaꞈ haꞈ ve” chaw hpehꞈ ve yoˬ. (2 Tiˆmoˉseˍ 3:2-4) Yaꞈ hk’aˇ, G’uiˬ sha yawˇ ve chaw htaꞈ nyi ma nuˇ nehˬ cawˬ tcuh gaˇ ve yoˬ. (2 Saˍmo-eˍlaˆ 22:28) Hkriꞈ yaˇ teˇ hpaˍ hpaˍ liꞈ tanˇ mvuh ve k’awꞈ henˇ leh yawˇ hui ve dawˇ hk’aˇ G’uiˬ sha hk’e dawˇ cawˇ ve htawˇ, chaw yaˇ hk’e dawˇ tuˬ te piˇ ve yoˬ. Hpehꞈ la g’a ve awˬ lawn teˇ lawn htaꞈ teˇ geh dawˇ nyi sheˍ.

Chaw yaˇ hk’e dawˇ ve ngaˬ hui ve dawˇ hk’aˇ htaꞈ hk’aˬ hk’e pa laˇ g’a ve le? (Awˬ tawn 14-16 nyi sheˍ) *

15-16. Awˬ viˉ awˬ nyi yaˇ miˇ teˇ g’aˇ ve awˬ lawn nawˬ htaꞈ aˬ htoꞈ ma maˍ laˇ ve le?

15 Awˬ viˉ awˬ nyi yaˇ miˇ G’uiˬ sha ve kanˉ awˬ yanˇ hk’a biˇ 15 hk’awꞈ hpaˆ te-oˬ ve k’oˆ ve, “shaˉ hkiˆ hkanˍ ve chaw Baˆtiˆsaˬ haꞈ yuˬ-oˬ ve liꞈ henˇ  mvuh ve k’o kawˆ tuˬ cawˬ ve tehꞈ ngaˬ g’aw leh g’a kaˇ jaw-oˬ. Yaꞈ hk’aˇ, shaˍ tiꞈ peꞈ laˇ ve chi htaꞈ ngaˬ a yeˇ maˇ te. Chi ve lehˬ ngaˬ awˬ pon beˆ maˍ laˇ ve maˇ heˆ tehꞈ dawˇ ve yoˬ.” Yawˇ aˬ htoꞈ ma ve awˬ lawn htaꞈ g’a hpuˇ ve le? Yawˇ k’oˆ ve, “ngaˬ liꞈ henˇ ve htaꞈ awˬ yanˇ yehˇ maˇ jaˇ ve pa taw, oˇ htaˇ hk’e leˇ Yaˬhoˉvaˬ geh bon chi maw maw lawˬ tuˬ te maˇ g’a, heuˬ jaˇ leh Liꞈ hpu g’aw ve ha lehˬ tuˬ maˇ cawˬ, leh hpawnˬ daꞈ-e tuˬ hk’a dehꞈ gu ve kaꞈ awˬ yanˇ maˇ cawˬ. Yaꞈ hk’aˇ, liꞈ henˇ mvuh ve k’o ngaˬ Yaˬhoˉvaˬ geh meuˆ daꞈ ve luˬ k’ai tuˬ te laˇ ve tehꞈ ngaˬ shiˍ leh pa ve yoˬ.”

16 Liꞈ henˇ mvuh ve awˬ viˉ awˬ nyi yaˇ miˇ chi teˇ g’aˇ ve dawˇ hk’aˇ htaꞈ heuˆ la kuiˬ hk’aˬ hk’e cawˬ ve le? Yawˇ k’oˆ ve, “liꞈ henˇ mvuh ve pa taw awˬ viˉ awˬ nyi leh shu htaꞈ hk’aiˉ puiˉ ve ngaˬ yaꞈ taw jaˇ. Ngaˬ yawˇ hui geh dawˇ law jaˇ leh yawˇ hui geh maˇ caˉ daꞈ gaˇ. Ngaˬ dawˇ hk’aˇ chi hk’e ve htaꞈ pa g’a tuˬ g’a coˇ caˇ jaˇ. Awˬ yanˇ oˇ ve teˇ yanˇ, mvuhˇ naw ma hk’oˆ ve Awˬ pa, G’uiˬ sha ve kanˉ hk’aˇ htaꞈ cuˇ leh shaˍ tiꞈ peꞈ laˇ ve htaꞈ ngaˬ maˇ na yuˬ leh kawˆ tuˬ cawˬ jaˇ ve tehꞈ shiˍ la ve yoˬ. Ngaˬ awˬ to ngaˬ shiˍ ve aꞈ kehˉ Yaˬhoˉvaˬ ngaˬ htaꞈ shiˍ ve yoˬ. Ngaˬ awˉ lawˉ htaˇ kaꞈ yawˇ hkawˇ na cawˇ ve law!”

17. (a) Ngaˬ hui aˬ htoꞈ ma te tuˬ dawˇ law taˍ ve le? (b) G’uˇ suhˍ teˇ lawn hk’aw aˬ htoꞈ ma htaꞈ henˇ tuˬ le?

17 Saˍtanˍ ve miˬ guiˬ “tcuhˉ kuiˬ maˇ cawˬ ve heˍ ve tawˇ hkawˇ” nawˬ htaꞈ maˇ g’a hpeh yuˬ veu tuˬ shaˍ tiꞈ te-o. Saˍtanˍ ve awˬ hk’aˇ htaꞈ caˉ leh tawˍ daꞈ sheˍ. (1 Kawˇrenˍhtuˆ 3:18; 2 Kawˇrenˍhtuˆ 2:11) Nawˬ Yaˬhoˉvaˬ htaꞈ leunˇ-e tuˬ neˇ haiˬ taˇ te laˇ tcuh. Yaˬhoˉvaˬ ve awˬ liˇ awˬ hk’aˇ daꞈ jaˇ ve htaꞈ g’aꞈ te leh nawˬ Yaˬhoˉvaˬ beˆ maˍ laˇ ve htaꞈ maˇ na tuˬ Saˍtanˍ taˇ te laˇ tcuh. Yaꞈ hk’aˇ, nawˬ miˬ guiˬ yaˇ hk’e dawˇ-oˬ ve k’o-ehꞈ? Ngaˬ hui nyi ma hk’aw cawˬ ve maˇ daꞈ ve dawˇ hk’aˇ htaꞈ“te luˬ tuˬ awˬ pon” Liꞈ hpu hk’aˬ hk’e ga laˇ g’a ve g’uˇ suhˍ teˇ lawn hk’aw henˇ tuˬ yoˬ.—2 Kawˇrenˍhtuˆ 10:4, 5.

K’A MUIˬ HKAWˇ 49 Yaˬhoˉvaˬ nyi hk’aˇ suh tuˬ te piˇ ve

^ aw? tawn 5 Saˍtanˍ chaw yaˇ htaꞈ heˍ ve cheuˬ jaˇ. Yawˇ hui te gaˇ ve hk’e te g’a ve tehꞈ dawˇ tuˬ yawˇ heˍ piˇ ve yoˬ. Yaꞈ hk’aˇ, awˬ tehˬ k’o yawˇ hui yawˇ uˉ peunˍ ve awˬ hawˉ lo chehˇ ve yoˬ. Saˍtanˍ yehˇ leh chaw yaˇ htaꞈ heˍ ve awˬ hk’aˇ teˇ hpaˍ ngaˬ hui awˬ lawn chi ve hk’aw teˇ geh henˇ tuˬ yoˬ.

^ aw? tawn 48 AWˬ HAN HTAꞈ K’Oˆ MAˍ TAˍ VE: Hkaˍnanˍ chaw htaꞈ caˉ daꞈ ve Iˉsaˍreˍlaˆ chaw Baˍlaˆ g’uiˬ sha htaꞈ oˉ k’oˍ pui tuˬ leh pehꞈ ve tzuhˆ ve hpawˇ te gaˇ ve nyi ma cawˬ tuˬ beˬ piˇ ve.

^ aw? tawn 51 AWˬ HAN HTAꞈ K’Oˆ MAˍ TAˍ VE: Bon yehˬ teˇ maˬ g’uˇ suhˍ lo hawˉ hk’aˆ chawˇ hawˉ hk’aˆ yaˇ miˇ chawˇ yaˇ miˇ pehꞈ ve tzuhˆ ve htaꞈ haꞈ yuˬ ve shu dawˇ cawˇ ve nehˉ taˍ ve.

^ aw? tawn 53 AWˬ HAN HTAꞈ K’Oˆ MAˍ TAˍ VE: Awˬ viˉ awˬ nyi yaˇ miˇ liꞈ tanˇ mvuh ve. Chaˬ nyi tehˆ nyi paˍ maˍ ve leh awˬ suhˉ awˬ suhˉ tawˆ la ve, chaw yaˇ shoꞈ shaꞈ ve hk’a peu-eˬ gu laˇ g’a ve tehꞈ liꞈ maˍ paˍ maˍ piˇ ve. Yawˇ leh liꞈ teˇ geh henˇ ve awˬ chawˇ liꞈ maˍ paˍ hk’e dawˇ ve. Peuˬ hk’awꞈ nawˉ yawˇ shu htaꞈ a yeˇ maˇ yuˬ leh maˇ daꞈ ve hpawˇ dawˇ cheˆ puiˉ jaˇ.