Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ Lawn 21

“Miˬ guiˬ ve cuˇ yiˍ” taˇ heˍ laˇ tcuh

“Miˬ guiˬ ve cuˇ yiˍ” taˇ heˍ laˇ tcuh

“Chi miˬ guiˬ ve cuˇ yiˍ lehˬ G’uiˬ sha mehˆ g’uˇ suhˍ lo cuˇ yiˍ maˇ cawˬ ve teˇ ceuˬ hpehꞈ ve yoˬ.”—1 KAWˇRENˍHTUˆ 3:19.

K’A MUIˬ HKAWˇ 98 G’uiˬ sha ve awˬ ha hpu Liꞈ hpu htaꞈ dawˇ pawnˍ piˇ ve

HENˇ TUˬ VE TEˇ HPAˍ *

1. G’uiˬ sha ve tawˇ hkawˇ ngaˬ hui htaꞈ aˬ htoꞈ ma maˍ laˇ ve le?

Yaˬhoˉvaˬ uiˍ jaˇ mvuh jaˇ ve saˍ laꞈ lonˉ hpehꞈ ve yoˬ. Hk’e te leh ngaˬ hui shoꞈ shaꞈ ve aˬ htoꞈ ma g’a hpuˇ ve htawˇ gu g’a ve yoˬ. (Iˉsaˍyaˆ 30:20, 21) Liꞈ hpu lehˬ ngaˬ hui “daꞈ ve kanˉ teˇ ceuˬ le le awˬ pon gu taˍ ve chaw hpehꞈ la tuˬ” maˍ laˇ ve yoˬ. (2 Tiˆmoˉseˍ 3:17) Liꞈ hpu hk’aw maˍ laˇ ve htaꞈ g’aꞈ te htaˇ, “miˬ guiˬ ve cuˇ yiˍ” yehˇ cawˇ ve tehꞈ k’oˆ ve chaw aꞈ kehˉ ngaˬ hui cuˇ yiˍ cawˬ tuˬ yoˬ.—1 Kawˇrenˍhtuˆ 3:19; Chiˇ mvuh ve 119:97-100.

2. Awˬ lawn chi ve hk’aw ngaˬ hui aˬ htoꞈ ma htaꞈ chaˬ nyi tuˬ le?

2 Miˬ guiˬ ve cuˇ yiˍ ngaˬ hui awˬ suhˍ awˬ shaˍ hpawˇ nyi hk’aˇ suh tuˬ te laˇ g’a ve tehꞈ g’a henˇ tuˬ yoˬ. Hk’e te leh miˬ guiˬ yaˇ hk’e dawˇ leh te ve htaꞈ ngaˬ hui tawˍ baˬ tuˬ haˍ jaˇ ve yoˬ hehˉ. Chi htaꞈ pa taw, Liꞈ hpu hk’aw k’oˆ ve, ‘chaw teˇ g’aˇ kaꞈ cuˇ yiˍ maˍ yiˍ leh tcuhˉ kuiˬ maˇ cawˬ ve heˍ ve tawˇ hkawˇ htaꞈ yehˇ leh nawˬ hui htaꞈ maˇ g’a hpeh yuˬ veu tuˬ, shaˍ tiꞈ taˍ-oꞈ. Tawˇ hkawˇ oˇ ve teˇ hpaˍ lehˬ chaw yaˇ teˇ caˉ peuˬ teˇ caˉ piˇ taˍ ve ceh hpehꞈ ve yoˬ.’ (Kawˇlawˇsehˇ 2:8) Chaw yaˇ Saˍtanˍ heˍ ve 2 ceuˬ htaꞈ hk’aˬ hk’e tanˬ yonˍ la ve, leh aˬ htoꞈ ma te miˬ guiˬ ve cuˇ yiˍ k’aˍ jaˇ ve, leh G’uiˬ sha ve tawˇ hkawˇ hk’aw cawˬ ve cuˇ yiˍ daꞈ jaˇ ve awˬ lawn chi ve hk’aw chaˬ nyi tuˬ yoˬ.

TEˇ GEH ZUHꞈ VE HTAꞈ CAˉ DAꞈ VE DAWˇ HK’Aˇ HK’Aˬ HK’E PA K’AI VE LE?

3-4. Aˍmeˬriˆkaꞈ mvuhˇ miˬ lo 1900 hk’awꞈ htaˇ tanˬ leh teˇ geh zuhꞈ ve htaꞈ caˉ daꞈ ve dawˇ hk’aˇ hk’aˬ hk’e pa k’ai ve le?

3 Aˍmeˬriˆkaꞈ mvuhˇ miˬ lo 1900 hk’awꞈ htaˇ tanˬ leh teˇ geh zuhꞈ ve htaꞈ caˉ daꞈ ve dawˇ hk’aˇ pa k’ai ve yoˬ. Oˇ htaˇ lehˬ heuˆ daꞈ-oˬ ve ceh tiˉ teˇ geh zuhꞈ g’a ve, leh awˬ nu ve chaw geh kaꞈ tawˇ yaw daꞈ maˇ keunˍ tehꞈ yawˇ hui dawˇ ve yoˬ. Yaꞈ hk’aˇ, chi ve htaꞈ maˇ te kaꞈ hpehꞈ ve tehꞈ yawˇ hui tanˬ dawˇ ve yoˬ.

 4 1922 te leh 1929 hk’awꞈ hk’a gaˬ yawˇ hui ve te hk’aˇ dawˇ hk’aˇ laiˉ ceuˬ pa k’ai ve yoˬ. Chaˬ nyi tehˆ nyi paˍ teˇ g’aˇ k’oˆ ve, “awˬ han, liꞈ k’oˆ, liꞈ hkawˇ, shu heuˆ gaˇ tuˬ te maˍ ve awˬ han kaꞈ pehꞈ ve tzuhˆ ve htaꞈ caˉ daꞈ ve cawˬ la ve yoˬ.” Awˬ yanˇ oˇ ve teˇ yanˇ, veuꞈ k’aˇ veuꞈ ve leh pawehˇ kaˆ ve kaꞈ pehꞈ ve tzuhˆ ve hpawˇ nyi ma cawˬ la tuˬ te piˇ ve yoˬ. Awˬ leh meuˇ ve awˬ yanˇ hk’aˬ hk’e hpehꞈ tuˬ Liꞈ hpu hk’aw k’oˆ taˍ ve hk’e, “miˬ guiˬ ha lehˬ tuˬ teˇ hpaˍ htaꞈ haꞈ ve chaw” cawˬ maˇ la ve yoˬ.—2 Tiˆmoˉseˍ 3:4.

Teˇ geh zuhꞈ ve htaꞈ caˉ daꞈ ve miˬ guiˬ yaˇ ve dawˇ hk’aˇ lehˬ Yaˬhoˉvaˬ ve chaw htaꞈ heuˆ la kuiˬ maˇ cawˬ (Awˬ tawn 5 nyi sheˍ) *

5. 1960 hk’awꞈ tanˬ leh teˇ geh zuhꞈ ve awˬ lawn miˬ guiˬ yaˇ hk’aˬ hk’e dawˇ ve le?

5 1960 hk’awꞈ tanˬ leh laiˉ g’aˇ maˇ heuˆ daꞈ sheˍ ve kaꞈ teˇ geh chehˇ ve, hawˉ hk’aˆ chawˇ hawˉ hk’aˆ yaˇ miˇ chawˇ yaˇ miˇ teˇ geh zuhꞈ ve, leh baˬ daꞈ ve kaꞈ cawˬ maˇ jaˇ. Pyawˍ ve awˬ ceuˬ kaꞈ pehꞈ ve tzuhˆ ve cawˬ la maˇ jaˇ. Awˬ ceuˬ chi teˇ hpaˍ maˇ daꞈ ve hpawˇ heuˆ la kuiˬ hk’aˬ hk’e cawˬ ve le? Liꞈ bvuhꞈ paˍ teˇ g’aˇ k’oˆ ve, “chi beuꞈ teˇ co-e chaw yaˇ pehꞈ ve tzuhˆ ve hpawˇ shaˬ te shaˬ luˬ k’ai ve” pa taw, yehˬ k’a hk’aw awˬ pa awˬ e teˇ g’aˇ tiˉ cawˬ ve, awˬ k’u nyi ve awˬ han dawˇ cawˇ ve, nyi ma naˬ tuˬ te piˇ ve, leh awˬ nu ve haiˬ ve kaꞈ cawˬ maˇ la ve yoˬ. Chi hk’oˆ kaꞈ, miˬ guiˬ ve cuˇ yiˍ k’aˍ jaˇ ve pa taw, eˍ (AIDS) leh teˇ geh zuhꞈ ve a naˍ nehˉ ve awˬ nu ve kaꞈ cawˬ maˇ la ve yoˬ.—2 Peˍtruˆ 2:19.

6. Teˇ geh zuhꞈ ve htaꞈ caˉ daꞈ ve miˬ guiˬ yaˇ ve dawˇ hk’aˇ htaꞈ Saˍtanˍ dawˇ cawˇ ve tehꞈ ngaˬ hui hk’aˬ hk’e te shiˍ g’a ve le?

6 Teˇ geh zuhꞈ ve htaꞈ caˉ daꞈ ve miˬ guiˬ yaˇ ve dawˇ hk’aˇ htaꞈ Saˍtanˍ dawˇ cawˇ ve yoˬ. Teˇ geh zuhꞈ ve lehˬ heuˆ daꞈ ve chaw awˬ pon G’uiˬ sha peꞈ laˇ ve laꞈ shawnˍ hpehꞈ ve htawˇ, chaw yaˇ chi htaꞈ te yaꞈ ve Saˍtanˍ mawˬ htaˇ dawˇ cawˇ jaˇ. (Eˇfeˇsuꞈ 2:2) Chaw teˇ hpaˍ pehꞈ ve tzuhˆ ve te yaꞈ ve k’o, Yaˬhoˉvaˬ peꞈ laˇ ve yaˇ cawˬ tuˬ ve laꞈ shawnˍ chi htaꞈ awˬ hpfuhˇ maˇ shiˍ. Yawˇ hui co co taiˍ taiˍ ve a shaꞈ maˇ g’a.—1 Kawˇrenˍhtuˆ 6:9, 10.

TEˇ GEH ZUHꞈ VE HTAꞈ CAˉ DAꞈ VE LIꞈ HPU HK’AW HK’Aˬ HK’E MAˍ LAˇ VE LE?

7-8. Teˇ geh zuhꞈ ve htaꞈ caˉ daꞈ ve Liꞈ hpu hk’aw cawˇ ve awˬ hk’aˇ hk’aˬ hk’e maˍ laˇ ve le?

7 Miˬ guiˬ ve cuˇ yiˍ htaꞈ g’aꞈ te ve chaw hui k’oˆ ve, teˇ geh zuhꞈ ve htaꞈ caˉ daꞈ ve Liꞈ hpu hk’aw maˍ ve yehˇ maˇ g’a. ‘G’uiˬ sha chaw yaˇ htaꞈ hpanˍ htaˇ, teˇ geh zuhꞈ gaˇ ve nyi ma cawˬ tcuh laˇ ve htawˇ, peuˬ hk’awꞈ nawˉ aˬ htoꞈ ma te nyi ma g’aꞈ te gaˇ ve hk’e maˇ te tcuh ve le?’ tehꞈ yawˇ hui na laˇ ve yoˬ hehˉ. Chaw yaˇ te gaˇ ve hk’e te cawˇ ve tehꞈ yawˇ hui dawˇ ve pa taw chi hk’e na ve yoˬ. Yaꞈ hk’aˇ,  Liꞈ hpu hk’aw k’oˆ ve, ngaˬ hui ve nyi ma maˇ cawˇ ve htaꞈ te gaˇ ve k’o, chi hk’e ve dawˇ hk’aˇ htaꞈ tawˍ daꞈ hpehꞈ ve yoˬ. (Kawˇlawˇsehˇ 3:5) Chi hk’oˆ kaꞈ, heuˆ daꞈ ve kaꞈ Yaˬhoˉvaˬ peꞈ laˇ ve laꞈ shawnˍ teˇ ceuˬ hpehꞈ ve yoˬ. (1 Kawˇrenˍhtuˆ 7:8, 9) Heuˆ daꞈ-oˬ htaˇ, awˬ hpawˇ awˬ miˇ ma teˇ geh zuhꞈ gaˇ ve nyi ma htaꞈ cawˇ ve hk’aw g’aꞈ te g’a ve yoˬ. Pehꞈ ve tzuhˆ ve htaꞈ te ve chaw shoꞈ shaꞈ ve g’a hpuˇ ve hk’e yawˇ hui dawˇ haˍ tuˬ maˇ loˍ.

8 Teˇ geh zuhꞈ ve htaꞈ caˉ daꞈ ve Liꞈ hpu hk’aw cawˇ ve awˬ hk’aˇ htaꞈ maˍ laˇ ve yoˬ. Teˇ geh zuhꞈ ve lehˬ ha lehˬ tuˬ te laˇ g’a ve tehꞈ Liꞈ hpu hk’aw maˍ laˇ ve yoˬ. (Tawˇ naˉ ve 5:18, 19) Yaꞈ hk’aˇ, Liꞈ hpu hk’aw k’oˆ sheˍ ve, “nawˬ hui teˇ g’aˇ le le daꞈ ve kehˬ ve leh yawˆ yan ve awˬ hk’aw lo a shu yawˇ ve awˬ miˇ ma htaꞈ hk’a dehꞈ heuˆ chehˇ-oˆ. G’uiˬ sha htaꞈ maˇ shiˍ ve buiˇ shaˆ aˉ naˆ chaw teˇ hpaˍ lehˬ, pehꞈ ve tzuhˆ ve awˬ hk’aˇ suh te k’ai ve yoˬ. Nawˬ hui oˇ hk’e taˇ te.”—1 Hteˇsaˍlawˇniˆ 4:4, 5.

9. (a) 1900 hk’awꞈ htaˇ tanˬ leh Yaˬhoˉvaˬ ve chaw Liꞈ hpu hk’aw cawˬ ve cuˇ yiˍ htaꞈ g’aꞈ te tuˬ, ngaˬ hui ve liꞈ k’oˆ hk’aw hk’aˬ hk’e beˆ maˍ piˇ ve le? (b) 1 Yoˇhanˬ liꞈ 2:15, 16 hk’aw daꞈ ve beˆ maˍ laˇ hkawˇ aˬ htoꞈ ma cawˬ ve le? (c) Roˉmaꞈ liꞈ 1:24-27 hk’aw k’oˆ taˍ ve hk’e, ngaˬ hui aˬ htoꞈ ma htaꞈ g’a tawˍ daꞈ cawˇ ve le?

9 Miˬ guiˬ yaˇ laiˉ g’aˇ 1900 hk’awꞈ htaˇ tanˬ leh ‘yaꞈ taw puiˉ ve teˇ ceuˬ maˇ cawˬ-o’ ve htawˇ, Yaˬhoˉvaˬ ve chaw yawˇ hui hk’e maˇ dawˇ. (Eˇfeˇsuꞈ 4:19) Yawˇ hui coˇ caˇ leh Yaˬhoˉvaˬ ve awˬ liˇ awˬ hk’aˇ htaꞈ g’aꞈ te ve yoˬ. Shaw nyi kuiˬ Taꞈ yehˬ Ha pa 5 maˬ 15 nyi 1926 hk’awꞈ hk’aw k’oˆ ve, “hawˉ hk’aˆ yaˇ miˇ htawˇ maˇ k’oˆ, ngaˬ hui te hk’aˇ dawˇ hk’aˇ g’a daꞈ kehˬ cawˇ ve yoˬ.” Awˬ paˇ awˬ kui chehˇ ve chaw hk’aˬ hk’e te chehˇ ve htawˇ maˇ k’oˆ, Yaˬhoˉvaˬ ve chaw Liꞈ hpu hk’aw cawˬ ve cuˇ yiˍ htaꞈ g’aꞈ te ve yoˬ. (1 Yoˇhanˬ 2:15, 16 g’aw sheˍ.) G’uiˬ sha Liꞈ hpu peꞈ laˇ ve ngaˬ hui ha lehˬ jaˇ! Miˬ guiˬ yaˇ ve dawˇ hk’aˇ chi htaꞈ tawˍ daꞈ tuˬ, Yaˬhoˉvaˬ cawˇ ve awˬ yanˇ htaˇ co ha hpawˇ ve caˇ tuˬ peꞈ laˇ ve ngaˬ hui awˬ bon uiˍ jaˇ k’oˆ piˇ gaˇ ve yoˬ. *Roˉmaꞈ 1:24-27 g’aw sheˍ.

A SHU YAWˇ AWˬ TO HTAꞈ HAꞈ VE DAWˇ HK’Aˇ HK’Aˬ HK’E PA K’AI VE LE?

10-11. Awˬ leh meuˇ ve awˬ yanˇ htaˇ hk’aˬ hk’e hpehꞈ tuˬ Liꞈ hpu hk’aw aˬ htoꞈ ma k’oˆ maˍ laˇ taˍ ve le?

10 Liꞈ hpu hk’aw k’oˆ ve, awˬ leh meuˇ ve awˬ yanˇ htaˇ, chaw yaˇ lehˬ “a shu yawˇ awˬ to htaꞈ haꞈ” tuˬ yoˬ. (2 Tiˆmoˉseˍ 3:1, 2) Miˬ guiˬ yaˇ a shu yawˇ awˬ pon tiˉ dawˇ nyi ve ngaˬ hui g’a mawˬ maˇ jaˇ. Liꞈ k’oˆ teˇ k’oˆ hk’aw k’oˆ ve, 1970 hk’awꞈ tanˬ leh dawˇ taˍ ve hk’e te g’a tuˬ beˆ maˍ laˇ ve liꞈ k’oˆ cawˬ maˇ jaˇ. Liꞈ k’oˆ teˇ k’oˆ k’oˆ hk’aw, yaꞈ kuiˬ maˇ cawˬ leh pa tuˬ maˇ loˍ tehꞈ g’aw ve chaw htaꞈ maˍ piˇ ve yoˬ. Tawˇ pa haˉ te k’o, liꞈ k’oˆ teˇ k’oˆ hk’aw k’oˆ ve, “a shu yawˇ awˬ to htaꞈ haꞈ sheˍ. Nawˬ shu aꞈ kehˉ daꞈ jaˇ leh awˬ hpfuhˇ hk’aˆ jaˇ.” Liꞈ chi teˇ k’oˆ hk’aw k’oˆ sheˍ ve, teˇ g’aˇ leh teˇ g’aˇ a shu yawˇ te gaˇ ve hk’e dawˇ cheˆ cawˇ ve yoˬ. Yawˇ cawˇ ve tehꞈ dawˇ leh puiˉ ve hpehꞈ ve hk’e te ve yoˬ.

11 Chi hk’e leˇ ve kaˇ jaw-aw laˇ? Saˍtanˍ kaꞈ Eˇvaꞈ htaꞈ chi hk’e te tcuh ve yoˬ. ‘G’uiˬ sha hk’e hpehꞈ la leh maˇ daꞈ ve awˬ ceuˬ htaꞈ shiˍ la tuˬ yoˬ’ tehꞈ Saˍtanˍ k’oˆ piˇ ve yoˬ. (Awˬ hkuiˉ puiˍ 3:5) Chi beuꞈ teˇ co-e laiˉ g’aˇ a shu yawˇ awˬ to daꞈ leh cawˇ ve tehꞈ dawˇ leh, aˬ htoꞈ ma cawˇ maˇ cawˇ ve awˬ nu ve chaw leh G’uiˬ sha htawˇ yawˇ htaꞈ k’oˆ piˇ maˇ g’a. Tawˇ pa haˉ te k’o, heuˆ daꞈ ve htaꞈ caˉ daꞈ ve awˬ lawn yawˇ hui chi hk’e dawˇ ve yoˬ.

Hkriꞈ yaˇ lehˬ yawˇ ve awˬ ca loˍ ve htaꞈ awˉ lawˉ dawˇ nyi ve (Awˬ tawn 12 nyi sheˍ) *

12. Heuˆ daꞈ ve htaꞈ caˉ daꞈ ve miˬ guiˬ yaˇ hk’aˬ hk’e maˍ ve le?

12 Awˬ hpawˇ awˬ miˇ ma yawˆ yan daꞈ cawˇ leh heuˆ daꞈ htaˇ hkanˍ taˍ ve htaꞈ g’aꞈ te cawˇ ve tehꞈ Liꞈ hpu hk’aw maˍ laˇ ve yoˬ. Yawˇ huiˉ maˬ coˇ caˇ leh hk’aˬ htaˆ kaꞈ teˇ geh chehˇ tuˬ Liꞈ hpu hk’aw  beˆ maˍ laˇ ve yoˬ. “Hawˉ hk’aˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ ve awˬ hk’aw lo yawˇ huiˉ maˬ teˇ suhˍ teˇ shaˍ tiˉ hpehꞈ la tuˬ yoˬ.” (Awˬ hkuiˉ puiˍ 2:24) Yaꞈ hk’aˇ, miˬ guiˬ ve cuˇ yiˍ g’aꞈ te ve chaw k’oˆ ve, awˬ hpawˇ awˬ miˇ ma a shu yawˇ loˍ ve htaꞈ awˉ lawˉ dawˇ nyi cawˇ ve yoˬ. Baˬ daꞈ ve htaꞈ caˉ daꞈ ve liꞈ k’oˆ teˇ k’oˆ hk’aw k’oˆ ve, “chaw liˇ vaˇ liˇ teˇ ceuˬ ceuˬ k’o, yawˇ hui heuˆ daꞈ htaˇ hkanˍ taˍ ve hk’aw ‘a shaꞈ teꞈ chehˇ ve teˇ co-e’ tawˇ hkawˇ chi lehˬ ‘haꞈ daꞈ chehˇ sheˍ ve’ tehꞈ k’awꞈ pa ve yoˬ.” Dawˇ hk’aˇ chi hk’e ve htaꞈ pa taw, yehˬ k’a hpaˆ daꞈ tuˬ leh laiˉ g’aˇ nyi ma naˬ jaˇ tuˬ te piˇ ve yoˬ. Heuˆ daꞈ ve htaꞈ caˉ daꞈ ve miˬ guiˬ ve dawˇ hk’aˇ cuˇ yiˍ maˇ cawˬ ve tehꞈ ngaˬ hui hk’a dehꞈ g’a mawˬ ve yoˬ.

13. Aˬ htoꞈ ma te Yaˬhoˉvaˬ nyi ma uiˍ ve chaw hui htaꞈ canˇ ve le?

13 Liꞈ hpu hk’aw k’oˆ ve, “nyi ma uiˍ ve chaw hui htaꞈ G’uiˬ sha canˇ ve yoˬ.” (Tawˇ naˉ ve 16:5) Aˬ htoꞈ ma te Yaˬhoˉvaˬ yawˇ hui htaꞈ canˇ ve le? Uiˍ muiˬ caˆ muiˬ ve chaw lehˬ Saˍtanˍ hk’e hpehꞈ leh yawˇ awˬ to htaꞈ haꞈ jaˇ. Dawˇ nyi sheˍ. Yaˬhoˉvaˬ Yeˍsuˆ htaꞈ cuˇ leh teˇ ceuˬ le le hpanˍ tcuh ve htawˇ, Saˍtanˍ Yeˍsuˆ hkui tcuhˉ teh leh yawˇ htaꞈ oˉ k’oˍ pui cawˇ ve tehꞈ dawˇ sheˍ ve yoˬ! (Maꞈhtehˍ 4:8, 9; Kawˇlawˇsehˇ 1:15, 16) Nyi ma uiˍ ve chaw te hk’aˇ dawˇ hk’aˇ ngaˬ hui htaꞈ hpeuꞈ maw laˇ ve, miˬ guiˬ ve cuˇ yiˍ G’uiˬ sha mehˆ g’uˇ suhˍ lo cuˇ yiˍ maˇ cawˬ.

A SHU YAWˇ AWˬ TO HTAꞈ HAꞈ VE DAWˇ HK’Aˇ LIꞈ HPU HK’AW HK’Aˬ HK’E MAˍ LAˇ VE LE?

14. Ngaˬ hui a shu yawˇ awˬ to htaꞈ keunˍ lawꞈ cawˇ lawꞈ ve hk’e dawˇ tuˬ, Roˉmaꞈ liꞈ 12:3 hk’aw hk’aˬ hk’e maˍ laˇ ve le?

14 Ngaˬ hui a shu yawˇ awˬ to htaꞈ keunˍ lawꞈ cawˇ lawꞈ ve hk’e dawˇ tuˬ leh haꞈ shaˉ tuˬ kaꞈ Liꞈ hpu hk’aw maˍ laˇ ve yoˬ. “Nawˬ awˬ to htaꞈ haꞈ ve hk’e nawˬ awˬ paˇ awˬ kui chehˇ ve chaw htaꞈ haꞈ-oꞈ” tehꞈ Yeˍsuˆ k’oˆ ve yoˬ. (Maꞈhtehˍ 19:19) Chi k’oˆ gaˇ ve lehˬ ngaˬ hui a shu yawˇ loˍ ve htaꞈ kaꞈ dawˇ nyi cawˇ ve yoˬ. Yaꞈ hk’aˇ, ngaˬ hui shu aꞈ kehˉ a yeˇ uiˍ ve tehꞈ maˇ g’a dawˇ tuˬ Liꞈ hpu hk’aw maˍ laˇ ve yoˬ. Liꞈ hpu hk’aw k’oˆ sheˍ ve, “hk’aˬ ve teˇ ceuˬ htawˇ maˇ k’oˆ, tawˇ g’awˬ daꞈ leh nyi ma uiˍ ve awˬ hk’aw lo taˇ te. Yaꞈ hk’aˇ, nyi ma nuˇ nehˬ ve awˬ  hk’aw lo, teˇ g’aˇ leh teˇ g’aˇ a shu yawˇ awˬ to aꞈ kehˉ shu htaꞈ taˍ uiˍ taˍ mvuh piˇ-oˆ.”—Hpiˇliˇpiˆ 2:3; Roˉmaꞈ 12:3 g’aw sheˍ.

15. Nawˬ dawˇ k’o, Liꞈ hpu hk’aw beˆ maˍ laˇ ve a shu yawˇ awˬ to htaꞈ dawˇ ve awˬ hk’aˇ aˬ htoꞈ ma te daꞈ ve le?

15 Chi beuꞈ teˇ co-e laiˉ g’aˇ liꞈ henˇ mvuh leh cuˇ yiˍ cawˬ ve htawˇ, Liꞈ hpu hk’aw beˆ maˍ piˇ ve htaꞈ cuˇ yiˍ maˇ cawˬ tehꞈ k’oˆ ve yoˬ. Yawˇ hui k’oˆ ve, ‘shu nawˬ aꞈ kehˉ a yeˇ uiˍ ve tehꞈ shawˍ ve k’o, yawˇ hui nawˬ htaꞈ maˇ shawˍ maˇ caˆ te laˇ tuˬ yoˬ.’ Saˍtanˍ ve miˬ guiˬ geh laˬ ve dawˇ hk’aˇ chi hk’e ve lehˬ chaw yaˇ hk’aˬ hk’e hpehꞈ tuˬ te piˇ ve le? A shu yawˇ awˬ pon tiˉ dawˇ nyi ve chaw lehˬ ha lehˬ-aw laˇ? Yawˇ hui ve yehˬ k’a ha lehˬ-aw laˇ? Yawˇ hui awˬ tehˬ ve awˬ chawˇ cawˬ-aw laˇ? Yawˇ hui G’uiˬ sha ve awˬ chawˇ hpehꞈ-aw laˇ? Nawˬ dawˇ k’o, miˬ guiˬ ve cuˇ yiˍ g’aꞈ te ve leh G’uiˬ sha geh laˬ ve cuˇ yiˍ g’aꞈ te ve hk’aˬ ve teˇ maˬ awˬ bon cawˬ ve le?

16-17. Aˬ htoꞈ ma ve awˬ lawn htaꞈ ngaˬ hui ha lehˬ ve le? Aˬ htoꞈ ma pa taw le?

16 Miˬ guiˬ ve cuˇ yiˍ cawˬ ve chaw beˆ maˍ piˇ ve hk’e g’aꞈ te ve chaw hui lehˬ, guiˇ toˇ paˍ teˇ g’aˇ yaꞈ k’aw yaꞈ chehˇ ve awˬ nu ve guiˇ toˇ paˍ htaꞈ yaꞈ k’aw k’ai tuˬ na piˇ ve hk’e hpehꞈ ve yoˬ. Yeˍsuˆ k’oˆ maˍ laˇ ve, “yawˇ hui mehˆ cuˉ ve kaꞈ, yaꞈ k’aw maˍ piˇ paˍ te ve yoˬ. Mehˆ cuˉ ve chaw lehˬ, mehˆ cuˉ ve chaw htaꞈ yaꞈ k’aw maˍ piˇ ve k’o, yawˇ huiˉ maˬ nyiˇ g’aˇ g’aˇ miˬ k’oˍ hk’aw ce loꞈ-e tuˬ yoˬ.” (Maꞈhtehˍ 15:14) Chi miˬ guiˬ ve cuˇ yiˍ lehˬ G’uiˬ sha mehˆ g’uˇ suhˍ lo cuˇ yiˍ a ciˉ kaꞈ maˇ cawˬ.

G’uiˬ sha ve kanˉ te ve chaw lehˬ yawˇ a shaꞈ teꞈ chehˇ ve teˇ co-e Yaˬhoˉvaˬ ve cuˇ yiˍ htaꞈ g’aꞈ te ve awˬ lawn htaꞈ dawˇ nyi htaˇ ha lehˬ g’a ve (Awˬ tawn 17 nyi sheˍ) *

17 Liꞈ hpu hk’aw laˬ ve cuˇ yiˍ lehˬ “maˍ piˇ ve, venˇ baˆ hpeuꞈ maˍ piˇ ve, k’awꞈ daꞈ la piˇ ve leh, hteˇ ve cawˇ ve htaꞈ te tuˬ maˍ piˇ ve yoˬ.” (2 Tiˆmoˉseˍ 3:17) Yaˬhoˉvaˬ yawˇ ve kanˉ hk’aˇ htaꞈ cuˇ leh, miˬ guiˬ ve cuˇ yiˍ maˇ heuˆ la tcuh tuˬ haꞈ shaˉ laˇ ve, ngaˬ hui ha lehˬ jaˇ! (Eˇfeˇsuꞈ 4:14) Liꞈ hpu hk’aw ve awˬ liˇ awˬ hk’aˇ htaꞈ ngaˬ hui g’aꞈ te tuˬ, Yaˬhoˉvaˬ co ha hpawˇ ve caˇ tuˬ leh awˬ g’aˇ peꞈ laˇ ve yoˬ. Yaˬhoˉvaˬ Liꞈ hpu htaꞈ cuˇ leh cuˇ yiˍ leh beˆ maˍ laˇ hkawˇ daꞈ jaˇ ve peꞈ laˇ ve ngaˬ hui ha lehˬ jaˇ!

K’A MUIˬ HKAWˇ 54 “Yaꞈ k’aw choˬ hpawˇ lo cawˬ ve yoˬ”

^ aw? tawn 5 Yaˬhoˉvaˬ teˇ g’aˇ ceh tiˉ daꞈ ve hpawˇ beˆ maˍ laˇ g’a ve tehꞈ awˬ lawn chi ve hk’aw ngaˬ hui htaꞈ hk’a dehꞈ maˍ laˇ tuˬ yoˬ. Miˬ guiˬ ve cuˇ yiˍ awˬ hk’aˇ suh g’aꞈ te ve lehˬ luˬ tuˬ cawˬ jaˇ. G’uiˬ sha ve tawˇ hkawˇ hk’aw cawˬ ve cuˇ yiˍ awˬ hk’aˇ suh g’aꞈ te ve lehˬ awˬ bon cawˬ jaˇ.

^ aw? tawn 9 Yaˇ nehˬ na ve na hkawˇ—hk’awꞈ laˇ hkawˇ yehˇ g’a ve 1 liꞈ awˬ lawn 24, 25, 26 leh Yaˇ nehˬ na ve na hkawˇ—hk’awꞈ laˇ hkawˇ yehˇ g’a ve 2 liꞈ awˬ lawn 4-5 htaꞈ nyi sheˍ.

^ aw? tawn 50 AWˬ HAN HTAꞈ K’Oˆ MAˍ TAˍ VE: Awˬ viˉ awˬ nyi teˇ ca ve a shaꞈ teꞈ hk’aˇ. Aˬ laˬ hk’e 1960 hk’awꞈ htaˇ, yawˇ huiˉ maˬ teˇ geh hto toˇve.

^ aw? tawn 52 AWˬ HAN HTAꞈ K’Oˆ MAˍ TAˍ VE: Aˬ laˬ hk’e 1980 hk’awꞈ awˬ miˇ ma maˇ chehˇ sha htaˇ, awˬ hpawˇ leh yaˇ teˇ geh yawˇ htaꞈ nyi haꞈ shaˉ piˇ ve.

^ aw? tawn 54 AWˬ HAN HTAꞈ K’Oˆ MAˍ TAˍ VE: Yaˬhoˉvaˬ ve kanˉ ha lehˬ ve hk’aw teˇ geh te ve awˬ yanˇ htaꞈ dawˇ nyi chehˇ ve. Yaˇ miˇ ve yehˬ k’a kaꞈ teˇ geh ha lehˬ ve.