Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ Lawn 18

Haꞈ pehnˇ ve leh hteˇ ve cawˇ ve—Hkriꞈ yaˇ awˬ moˍ hk’aw

Haꞈ pehnˇ ve leh hteˇ ve cawˇ ve—Hkriꞈ yaˇ awˬ moˍ hk’aw

“Nawˬ hui teˇ g’aˇ leh teˇ g’aˇ ve awˬ vuiˬ htaꞈ ga pfuhˇ daꞈ-oꞈ. Chi hk’e te ve k’o, Hkriꞈ ve awˬ liˇ tawˇ hkawˇ htaꞈ nawˬ hui te biˇ la tuˬ yoˬ.”—GAˍLAˍTIˆ 6:2.

K’A MUIˬ HKAWˇ 12 Uiˍ jaˇ mvuh jaˇ ve G’uiˬ sha Yaˬhoˉvaˬ

HENˇ TUˬ VE TEˇ HPAˍ *

1. Aˬ htoꞈ ma ve 2 lawn htaꞈ ngaˬ hui yonˍ g’a ve le?

Yaˬhoˉvaˬ htaꞈ oˉ k’oˍ pui ve chaw yawˇ haꞈ ve yoˬ. Yawˇ yawˇ hui htaꞈ co co taiˍ taiˍ haꞈ tuˬ yoˬ. Yawˇ hteˇ ve cawˇ ve htaꞈ kaꞈ haꞈ ve yoˬ. (Chiˇ mvuh ve 33:5) Hk’e te leh 2 lawn htaꞈ ngaˬ hui yonˍ g’a ve yoˬ. (1) Yaˬhoˉvaˬ yawˇ ve chaw maˇ hteˇ maˇ cawˇ ve g’a hpuˇ htaˇ yawˇ nyi ma luˬ jaˇ. (2) Yawˇ ve chaw maˇ hteˇ maˇ cawˇ ve co co taiˍ taiˍ maˇ g’a hpuˇ, leh keunˍ daꞈ ve hk’aw ciˍ yanˍ piˇ tuˬ yoˬ tehꞈ yawˇ ka tiꞈ te taˍ ve yoˬ. Laiˉ tawn cawˬ ve awˉ lawˉ teˇ lawn hk’aw, * Moˉseˍ ve awˬ liˇ tawˇ hkawˇ haꞈ pehnˇ ve geh laˬ ve tehꞈ ngaˬ hui g’a henˇ ve yoˬ. Awˬ liˇ tawˇ hkawˇ chi teˇ g’aˇ le le leh awˬ g’aˇ nuˇ ve awˬ pon kaꞈ yoˬ. (Bon maˍ ve 10:18) Yaˬhoˉvaˬ htaꞈ oˉ k’oˍ pui ve chaw htaꞈ yawˇ hk’aˬ hk’e taw haꞈ ve awˬ liˇ tawˇ hkawˇ chi maˍ laˇ ve yoˬ.

2. Ngaˬ hui aˬ htoꞈ ma ve na hkawˇ htaꞈ chaˬ nyi tuˬ le?

2 Hkriꞈ yaˇ awˬ moˍ 33 hk’awꞈ tanˬ cawˬ la htaˇ Moˉseˍ ve awˬ liˇ tawˇ hkawˇ maˇ k’awꞈ yehˇ-o. Chi haꞈ pehnˇ ve leh hteˇ ve cawˇ ve geh laˬ ve awˬ liˇ tawˇ hkawˇ Hkriꞈ yaˇ maˇ g’a-o ve tehꞈ k’oˆ gaˇ ve laˇ? Maˇ heˆ! Hkriꞈ yaˇ awˬ liˇ tawˇ hkawˇ awˬ suhˉ k’awꞈ g’a ve yoˬ. Chi aˬ htoꞈ ma le, awˬ lawn chi ve hk’aw teˇ geh henˇ tuˬ yoˬ. Peuˬ leh na hkawˇ chi htaꞈ hk’awꞈ tuˬ yoˬ. Aˬ htoꞈ ma te awˬ liˇ tawˇ hkawˇ chi haꞈ pehnˇ ve geh laˬ ve tehꞈ ngaˬ hui k’oˆ g’a ve le? Aˬ htoꞈ ma te awˬ liˇ tawˇ hkawˇ chi hteˇ ve cawˇ ve tehꞈ ngaˬ hui k’oˆ g’a ve le? Awˬ liˇ tawˇ hkawˇ chi ve awˬ hawˉ lo chehˇ ve kanˇ paˆ cawˬ ve, shu htaꞈ hk’aˬ hk’e te piˇ cawˇ ve le?

“HKRIꞈ VE AWˬ LIˇ TAWˇ HKAWˇ” Aˬ HTOꞈ MA LE?

3. Gaˍlaˍtiˆ liꞈ 6:2 hk’aw k’oˆ taˍ ve hk’e, “Hkriꞈ ve awˬ liˇ tawˇ hkawˇ” hk’aw aˬ htoꞈ ma cawˬ ve le?

3 Gaˍlaˍtiˆ liꞈ 6:2 g’aw sheˍ. Hkriꞈ yaˇ lehˬ “Hkriꞈ ve awˬ liˇ tawˇ  hkawˇ” awˬ hawˉ lo chehˇ ve yoˬ. Yeˍsuˆ awˬ laꞈ g’awˇ htaꞈ awˬ liˇ tawˇ hkawˇ maˇ g’a bvuhꞈ piˇ. Yaꞈ hk’aˇ yawˇ beˆ maˍ piˇ ve, tawˇ piˇ ve, leh yawˇ hui a shaꞈ teꞈ kuiˬ hk’aw g’aꞈ te tuˬ awˬ liˇ awˬ hk’aˇ piˇ ve yoˬ. “Hkriꞈ ve awˬ liˇ tawˇ hkawˇ” lehˬ yawˇ maˍ ve teˇ ceuˬ le le htaꞈ k’oˆ gaˇ ve yoˬ. Chi htaꞈ hk’a dehꞈ na g’a tuˬ teˇ geh chaˬ nyi sheˍ.

4-5. Yeˍsuˆ hk’aˬ hk’e maˍ ve le? Yawˇ maˍ ve hk’aˬ htaˆ le?

4 Yeˍsuˆ chaw yaˇ htaꞈ hk’aˬ hk’e maˍ ve le? Awˉ lawˉ teˇ ceuˬ lehˬ, k’oˆ maˍ piˇ ve yoˬ. Yeˍsuˆ ve tawˇ hkawˇ kanˇ paˆ cawˬ jaˇ. Yawˇ ve tawˇ G’uiˬ sha htaꞈ caˉ daꞈ ve awˬ tehˬ ve hpehꞈ ve pa taw, a shaꞈ htaꞈ caˉ daꞈ ve leh G’uiˬ sha ve mvuhˇ miˬ teˇ ceuˬ ceh tiˉ chaw yaˇ tuꞈ ve hkanˍ ve htaꞈ gu laˇ g’a ve tehꞈ maˍ ve yoˬ. (Luˉkaꞈ 24:19) Yeˍsuˆ tawˇ pa haˉ kaꞈ tehˆ maˍ ve yoˬ. Yawˇ a shaꞈ teꞈ hk’aˇ hk’e awˬ laꞈ g’awˇ kaꞈ te tuˬ maˍ piˇ ve yoˬ.—Yoˇhanˬ 13:15.

5 Yeˍsuˆ hk’aˬ htaˆ maˍ ve le? Miˬ guiˬ hk’oˆ G’uiˬ sha ve kanˉ te htaˇ maˍ ve yoˬ. (Maꞈhtehˍ 4:23) Yawˇ teꞈ tu la peuˬ hk’awꞈ nawˉ maˇ maw awˬ laꞈ g’awˇ htaꞈ kaꞈ maˍ piˇ ve yoˬ. Tawˇ pa haˉ te k’o, awˬ laꞈ g’awˇ aˬ laˬ hk’e 500 g’aˇ htaꞈ yawˇ awˬ to maw piˇ leh “chaw ceuˬ hk’a peu-eˬ ngaˬ ve awˬ laꞈ g’awˇ hpehꞈ la tuˬ ca te-o” tehꞈ k’oˆ piˇ ve yoˬ. (Maꞈhtehˍ 28:19, 20; 1 Kawˇrenˍhtuˆ 15:6) Yeˍsuˆ lehˬ Hkriꞈ yaˇ awˬ moˍ ve oˉ k’oˍ hpehꞈ leh, yawˇ mvuhˇ naw ma hk’oˆ k’awꞈ-e peuˬ hk’awꞈ nawˉ kaꞈ awˬ laꞈ g’awˇ htaꞈ beˆ maˍ chehˇ sheˍ ve yoˬ. Tawˇ pa haˉ te k’o, aˬ laˬ hk’e 96 hk’awꞈ htaˇ ka tiꞈ yeˬ ve Hkriꞈ yaˇ htaꞈ awˬ g’aˇ piˇ leh beˆ maˍ piˇ sheˍ tehꞈ tcuh yaˇ Yoˇhanˬ htaꞈ Yeˍsuˆ k’oˆ piˇ ve yoˬ.—Kawˇlawˇsehˇ 1:18; Hpeuꞈ maˍ ve 1:1.

6-7. (a) Yeˍsuˆ maˍ ve tawˇ hkawˇ hk’aˬ kaˬ lo bvuhꞈ taˍ ve le? (b) Ngaˬ hui Hkriꞈ ve awˬ liˇ tawˇ hkawˇ htaꞈ hk’aˬ hk’e na yuˬ g’a tuˬ le?

6 Yeˍsuˆ maˍ ve awˬ ceuˬ hk’aˬ kaˬ lo bvuhꞈ taˍ ve le? Maꞈhtehˍ, Maˍkuˆ, Luˉkaꞈ, leh Yoˇhanˬ chi ve 4 daw Yeˍsuˆ miˬ guiˬ hk’oˆ chehˇ htaˇ ve awˬ lawn bvuhꞈ taˍ ve yoˬ. Heˍlaˍsaˆ ve Liꞈ hpu awˬ tawn hk’aw G’uiˬ sha ve awˬ ha hpu dawˇ pawnˍ piˇ leh bvuhꞈ taˍ ve chaw hui lehˬ, Yeˍsuˆ dawˇ ve awˬ lawn teˇ hpaˍ ngaˬ hui na g’a tuˬ yawˇ hui “Hkriꞈ ve nyi ma cawˬ” ve tehꞈ hpeuꞈ maˍ laˇ ve yoˬ.—1 Kawˇrenˍhtuˆ 2:16.

7 Henˇ tuˬ ve: Yeˍsuˆ maˍ ve teˇ ceuˬ le le hpawˇ caˉ daꞈ ve yoˬ. Chi htaꞈ pa taw ngaˬ hui aˉ hk’aw chehˇ htaˇ, kanˉ te chehˇ htaˇ, liꞈ henˇ chehˇ htaˇ, leh Hkriꞈ yaˇ awˬ moˍ hk’aw chehˇ htaˇ Hkriꞈ ve awˬ liˇ tawˇ hkawˇ htaꞈ caˉ daꞈ ve yoˬ. Ngaˬ hui awˬ liˇ tawˇ hkawˇ chi htaꞈ henˇ tuˬ Heˍlaˍsaˆ ve Liꞈ hpu awˬ tawn htaꞈ  g’aw leh dawˇ nyi cawˇ ve yoˬ. Ngaˬ hui awˬ liˇ tawˇ hkawˇ chi htaꞈ na yuˬ ve lehˬ beˆ maˍ laˇ ve, tawˇ peꞈ laˇ ve, leh Liꞈ hpu hk’aw cawˬ ve awˬ liˇ awˬ hk’aˇ htaꞈ g’aꞈ te ve yoˬ. Ngaˬ hui Hkriꞈ ve awˬ liˇ tawˇ hkawˇ htaꞈ na yuˬ ve k’o, Yaˬhoˉvaˬ G’uiˬ sha haꞈ pehnˇ uiˍ jaˇ ve hkawˇ na yuˬ chehˇ ve yoˬ. Yeˍsuˆ maˍ ve teˇ ceuˬ le le G’uiˬ sha geh laˬ ve yoˬ.—Yoˇhanˬ 8:28.

AWˬ LIˇ TAWˇ HKAWˇ HAꞈ PEHNˇ VE GEH LAˬ VE

8. Hkriꞈ ve awˬ liˇ tawˇ hkawˇ aˬ htoꞈ ma ve geh laˬ ve le?

8 Yehˬ yeˬ chaweh te taˍ ve lehˬ yehˬ chi ve hk’aw chehˇ ve chaw kawˆ tuˬ maˇ cawˬ tehꞈ dawˇ ve yoˬ. Chi ve kaꞈ hk’a shuˍ awˬ liˇ tawˇ hkawˇ yeˬ chaweh teh taˍ leh chi htaꞈ g’aꞈ te ve chaw kawˆ tuˬ maˇ cawˬ tehꞈ dawˇ ve yoˬ. Hkriꞈ ve awˬ liˇ tawˇ hkawˇ daꞈ jaˇ ve lehˬ haꞈ pehnˇ ve geh laˬ ve yoˬ. Aˬ htoꞈ ma te ngaˬ hui chi hk’e k’oˆ g’a ve le?

Ngaˬ hui shu htaꞈ haꞈ pehnˇ ve te piˇ htaˇ, “Hkriꞈ ve awˬ liˇ tawˇ hkawˇ” htaꞈ na yuˬ chehˇ ve (Awˬ tawn 9-14 nyi sheˍ) *

9-10. Haꞈ pehnˇ ve htaꞈ caˉ daꞈ ve Yeˍsuˆ aˬ htoꞈ ma te maˍ laˇ ve le? Ngaˬ hui hk’aˬ hk’e te yawˇ htaꞈ henˇ yuˬ g’a tuˬ le?

9 Awˉ lawˉ teˇ ceuˬ, Yeˍsuˆ te ve hk’a peu-eˬ haꞈ pehnˇ ve geh laˬ ve yoˬ. Ha k’aˉ ve lehˬ haꞈ pehnˇ ve hk’aw te tawˆ la ve teˇ ceuˬ hpehꞈ ve yoˬ. Yeˍsuˆ yawˇ hui htaꞈ ha k’aˉ ve pa taw, maˍ piˇ ve, naˬ ve chaw htaꞈ gu na-e piˇ ve, meuꞈ ve kaˆ ve chaw htaꞈ caˍ piˇ ve, leh suh peuˬ ve chaw htaꞈ k’awꞈ teꞈ tu la piˇ ve yoˬ. (Maꞈhtehˍ 14:14; 15:32-38; Maˍkuˆ 6:34; Luˉkaꞈ 7:11-15) Chi hk’e te ve lehˬ yawˇ awˬ g’aˇ leh awˬ yanˇ g’a yehˇ maˇ jaˇ ve htawˇ, Yeˍsuˆ yawˇ loˍ ve aꞈ kehˉ shu loˍ ve htaꞈ awˉ lawˉ dawˇ nyi ve yoˬ. A yeˇ uiˍ jaˇ ve lehˬ shu awˬ pon yawˇ ve a shaꞈ tanˇ piˇ ve yoˬ.—Yoˇhanˬ 15:13.

10 Henˇ tuˬ ve: Ngaˬ hui loˍ ve aꞈ kehˉ shu loˍ ve htaꞈ awˉ lawˉ dawˇ nyi ve k’o, ngaˬ hui kaꞈ Yeˍsuˆ htaꞈ henˇ yuˬ chehˇ ve yoˬ. Chi hk’oˆ kaꞈ ngaˬ hui yawˇ htaꞈ henˇ yuˬ leh hto toˇ kuiˬ lo ve chaw hui haꞈ pehnˇ ve cawˬ tuˬ maˍ piˇ g’a ve yoˬ. Ngaˬ hui yawˇ hui htaꞈ haꞈ ve k’o, hto toˇ leh maˍ piˇ tuˬ yoˬ. Ngaˬ hui chi hk’e te ve k’o, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

11-12. (a) Yaˬhoˉvaˬ ngaˬ hui htaꞈ dawˇ haˍ ve tehꞈ aˬ htoꞈ ma hpeuꞈ maw laˇ ve le? (b) Yaˬhoˉvaˬ haꞈ pehnˇ ve htaꞈ ngaˬ hui hk’aˬ hk’e te henˇ yuˬ g’a tuˬ le?

11 Nyiˇ ceuˬ teˇ ceuˬ lehˬ, Yeˍsuˆ yawˇ Awˬ pa ve haꞈ pehnˇ ve hpeuꞈ maw laˇ ve yoˬ. Yawˇ G’uiˬ sha ve kanˉ te htaˇ, Yaˬhoˉvaˬ htaꞈ oˉ k’oˍ pui ve chaw htaꞈ hk’aˬ hk’e taw dawˇ haˍ ve Yeˍsuˆ hpeuꞈ maw laˇ ve yoˬ. Yawˇ awˬ kaˍ awˬ nu ve leh awˬ hk’aˇ chi ve kaꞈ maˍ ve yoˬ. Ngaˬ hui teˇ g’aˇ leh teˇ g’aˇ mvuhˇ naw ma hk’oˆ ve Awˬ pa Yaˬhoˉvaˬ mehˆ g’uˇ suhˍ awˬ hpfuhˇ hk’aˆ jaˇ. (Maꞈhtehˍ 10:31) Yaˬhoˉvaˬ Hkriꞈ yaˇ awˬ moˍ hk’aw mehˉ k’ai taˍ ve yawˬ htaꞈ venˇ baˆ dawˇ hpfuhˆ leh k’awꞈ la tcuh gaˇ ve yoˬ. (Luˉkaꞈ 15:7, 10) Yaˬhoˉvaˬ ngaˬ hui htaꞈ hk’aˬ hk’e taw haꞈ ve yawˇ ve Yaˇ paˍ htaiˍ hk’awꞈ laˇ ve hpeuꞈ maw laˇ ve yoˬ.—Yoˇhanˬ 3:16.

12 Henˇ tuˬ ve: Ngaˬ hui Yaˬhoˉvaˬ haꞈ pehnˇ ve htaꞈ hk’aˬ hk’e te henˇ yuˬ g’a tuˬ le? (Eˇfeˇsuꞈ 5:1, 2) Awˬ viˉ awˬ nyi awˬ hpfuhˇ hk’aˆ jaˇ ve, “mehˉ k’ai taˍ ve yawˬ” Yaˬhoˉvaˬ geh k’awꞈ la ve htaꞈ haꞈ yuˬ piˇ sheˍ. (Chiˇ mvuh ve 119:176) Awˬ viˉ awˬ nyi loˍ ve htaꞈ ga piˇ htaˇ, ngaˬ hui yawˇ hui htaꞈ haꞈ ve tehꞈ hpeuꞈ maw piˇ ve yoˬ. (1 Yoˇhanˬ 3:17) Ngaˬ hui haꞈ pehnˇ ve hk’aw shu htaꞈ te piˇ ve k’o, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

13-14. (a) Yoˇhanˬ liꞈ 13:34, 35 hk’aw k’oˆ taˍ ve hk’e, Yeˍsuˆ awˬ laꞈ g’awˇ htaꞈ aˬ htoꞈ ma te tuˬ k’oˆ piˇ ve le? Aˬ htoꞈ ma te tawˇ chi awˬ suhˉ hpehꞈ ve le? (b) Ngaˬ hui tawˇ awˬ suhˉ chi htaꞈ hk’aˬ hk’e te na yuˬ g’a tuˬ le?

13 Shehˆ ceuˬ teˇ ceuˬ lehˬ, Yeˍsuˆ awˬ laꞈ g’awˇ htaꞈ a shu yawˇ awˬ to yuˬ tanˇ tuˬ k’oˆ maˍ piˇ ve yoˬ. (Yoˇhanˬ 13:34, 35 g’aw sheˍ.) Yeˍsuˆ ve tawˇ chi awˬ suhˉ hpehꞈ ve yoˬ. Tawˇ chi lehˬ Iˉsaˍreˍlaˆ chaw hui ve awˬ liˇ tawˇ hkawˇ awˬ hawˉ lo maˇ chehˇ tuˬ maˍ piˇ ve pa taw yoˬ. Yeˍsuˆ nawˬ htaꞈ haꞈ ve hk’e, yonˍ hk’aˇ hk’a shuˍ ve chaw htaꞈ haꞈ-oꞈ. Haꞈ ve chi hk’e ve lehˬ a shu yawˇ awˬ to yuˬ tanˇ ve yoˬ. * Ngaˬ  hui awˬ to htaꞈ haꞈ ve aꞈ kehˉ awˬ viˉ awˬ nyi htaꞈ haꞈ cawˇ ve yoˬ. Yeˍsuˆ ngaˬ hui htaꞈ te laˇ jaw ve hk’e ngaˬ hui yawˇ hui awˬ pon hkanˍ suh piˇ g’a ve yoˬ.

14 Henˇ tuˬ ve: Ngaˬ hui tawˇ awˬ suhˉ chi htaꞈ hk’aˬ hk’e g’aꞈ te g’a tuˬ le? Ngaˬ hui awˬ viˉ awˬ nyi awˬ pon yuˬ tanˇ cawˇ ve yoˬ. Ngaˬ hui ve a shaꞈ yuˬ tanˇ g’a ve yoˬ. Yaꞈ hk’aˇ, ngaˬ hui a yaˇ maˇ uiˍ ve htawˇ yuˬ tanˇ ve yoˬ. Tawˇ pa haˉ te k’o, awˬ viˉ awˬ nyi chaw mawˇ hpawnˬ daꞈ kuiˬ lo laˬ tuˬ ca g’awˬ-e ve, Maˇ heˆ leh ngaˬ hui haꞈ ve chaw nyi hk’aˇ suh tuˬ ngaˬ hui dawˇ taˍ ve hk’e maˇ te, maˇ heˆ leh ngaˬ hui ve kanˉ jehˇ leh tuꞈ ve hkanˍ ve hpawˇ g’a hpuˇ ve chaw htaꞈ ga piˇ ve, chi hk’e te ve lehˬ Hkriꞈ ve awˬ liˇ tawˇ hkawˇ htaꞈ g’aꞈ te ve yoˬ. Chi hk’oˆ kaꞈ Hkriꞈ yaˇ awˬ moˍ hk’aw teˇ g’aˇ le le kawˆ ve maˇ cawˬ tehꞈ dawˇ tuˬ ngaˬ hui te piˇ ve yoˬ.

Aˬ HTOꞈ MA TE AWˬ LIˇ TAWˇ HKAWˇ CHI HTEˇ VE CAWˇ VE LE?

15-17. (a) Yeˍsuˆ hteˇ ve cawˇ ve htaꞈ dawˇ nyi ve tehꞈ yawˇ ve te hk’aˇ dawˇ hk’aˇ hk’aˬ hk’e hpeuꞈ maw laˇ ve le? (b) Ngaˬ hui Yeˍsuˆ htaꞈ hk’aˬ hk’e henˇ yuˬ g’a tuˬ le?

15 Liꞈ hpu hk’aw “hteˇ ve cawˇ ve” tcuhˉ kuiˬ lehˬ, G’uiˬ sha cawˇ ve tehꞈ shawˍ ve awˬ ceuˬ htaꞈ te leh chaw mehˆ hpfuhˇ htaꞈ maˇ nyi ve htaꞈ k’oˆ gaˇ ve yoˬ. Aˬ htoꞈ ma te Hkriꞈ ve awˬ liˇ tawˇ hkawˇ hteˇ ve cawˇ ve tehꞈ ngaˬ hui k’oˆ g’a ve le?

Yaˇ miˇ teˇ hpaˍ hpaˍ shu awˬ hpfuhˇ maˇ cawˬ tehꞈ dawˇ ve htawˇ, Yeˍsuˆ yawˇ hui htaꞈ yawˆ yan leh daꞈ ve te piˇ ve (Awˬ tawn 16 nyi sheˍ) *

16 Awˉ lawˉ teˇ ceuˬ lehˬ, Yeˍsuˆ haꞈ pehnˇ ve hk’aw te tawˆ la ve aˬ htoꞈ ma te hteˇ ve cawˇ ve tehꞈ hpeuꞈ maw laˇ ve ngaˬ hui dawˇ nyi sheˍ. Yawˇ miˬ guiˬ hk’oˆ chehˇ htaˇ Yuˇdaꞈ chaw ve bon awˬ hoˉ teˇ hpaˍ lehˬ Yuˇdaꞈ chaw maˇ heˆ ve, haˍ g’awˇ ve, leh yaˇ miˇ htaꞈ kaꞈ maˇ yawˆ yan piˇ leh yawˇ hui nyi bawˬ ve yoˬ. Yaꞈ hk’aˇ, Yeˍsuˆ hteˇ ve cawˇ ve pa taw teˇ g’aˇ le le htaꞈ hk’a shuˍ te piˇ ve yoˬ. Yuˇdaꞈ chaw maˇ heˆ ve htawˇ yonˍ ve cawˬ leh yawˇ geh laˬ ve chaw htaꞈ haꞈ yuˬ piˇ ve yoˬ. (Maꞈhtehˍ 8:5-10, 13) Haˍ ve paw sha ve htaꞈ maˇ nyi leh teˇ g’aˇ le le htaꞈ yawˇ bon maˍ piˇ ve yoˬ. (Maꞈhtehˍ 11:5; Luˉkaꞈ 19:2, 9) Yawˇ yaˇ miˇ htaꞈ maˇ yawˆ yan ve maˇ te piˇ jaw. Yaꞈ hk’aˇ, yawˇ yaˇ miˇ htaꞈ yawˆ yan leh daꞈ ve te piˇ ve yoˬ. Chaw teˇ hpaˍ yawˇ hui htaꞈ awˬ hpfuhˇ maˇ cawˬ tehꞈ shawˍ ve yoˬ.—Luˉkaꞈ 7:37-39, 44-50.

17 Henˇ tuˬ ve: Ngaˬ hui shu htaꞈ hteˇ ve cawˇ ve te piˇ ve k’o, yawˇ hui haˍ g’awˇ ve paw sha ve htawˇ maˇ k’oˆ, bon liˇ aˬ htoꞈ ma ve htaꞈ yonˍ ve htawˇ maˇ k’oˆ, ngaˬ hui teˇ g’aˇ le le htaꞈ hto maˍ piˇ ve k’o, Yeˍsuˆ htaꞈ henˇ yuˬ chehˇ ve yoˬ. Awˬ viˉ awˬ nyi hawˉ hk’aˆ Yeˍsuˆ htaꞈ henˇ yuˬ leh yaˇ miˇ htaꞈ yawˆ yan piˇ ve yoˬ. Ngaˬ hui chi hk’e te ve k’o, Hkriꞈ ve awˬ liˇ tawˇ hkawˇ htaꞈ na yuˬ chehˇ ve yoˬ.

18-19. Hteˇ ve cawˇ ve htaꞈ caˉ daꞈ ve Yeˍsuˆ aˬ htoꞈ ma maˍ laˇ ve le? Yawˇ maˍ laˇ ve htaꞈ ngaˬ hui aˬ htoꞈ ma henˇ yuˬ g’a ve le?

18 Nyiˇ ceuˬ teˇ ceuˬ lehˬ, Yeˍsuˆ maˍ ve hteˇ ve cawˇ ve htaꞈ dawˇ nyi sheˍ. Yawˇ ve awˬ laꞈ g’awˇ shu htaꞈ hteˇ ve cawˇ ve te piˇ tuˬ maˍ piˇ ve yoˬ. Tawˇ pa haˉ te k’o, shi ve awˬ liˇ htaꞈ dawˇ nyi sheˍ. (Maꞈhtehˍ 7:12) Ngaˬ hui hteˇ ve cawˇ ve g’a gaˇ ve yoˬ. Hk’e te leh shu htaꞈ hteˇ ve cawˇ ve te piˇ cawˇ ve yoˬ. Chi hk’e te ve k’o, shu ngaˬ hui htaꞈ kaꞈ hteˇ ve cawˇ ve te laˇ tuˬ yoˬ. Yaꞈ hk’aˇ, chaw teˇ g’aˇ ngaˬ hui htaꞈ maˇ hteˇ maˇ cawˇ ve te laˇ ve k’o-ehꞈ? “G’uiˬ sha leuˆ yuˬ taˍ ve chaw teˇ hpaˍ lehˬ, tanˇ hkuinˇ tanˇ vanˇ yawˇ htaꞈ lawˬ hkawˉ ve k’o, G’uiˬ sha lehˬ hteˇ ve cawˇ ve” hk’aw g’aˇ va g’a ve tehꞈ Yeˍsuˆ awˬ laꞈ g’awˇ htaꞈ maˍ piˇ ve yoˬ. (Luˉkaꞈ 18:6, 7) Chi lehˬ ka tiꞈ te taˍ laˇ ve yoˬ. Awˬ leh meuˇ ve awˬ yanˇ ngaˬ hui aˬ htoꞈ ma g’a hpuˇ ve, hteˇ ve cawˇ ve G’uiˬ sha shiˍ leh yawˇ tiˍ taˍ ve awˬ nyi gaˬ k’o, ngaˬ hui hteˇ ve cawˇ ve htaꞈ g’a tuˬ yawˇ ka tiꞈ te taˍ laˇ ve yoˬ.—2 Hteˇsaˍlawˇniˆ 1:6.

19 Henˇ tuˬ ve: Yeˍsuˆ maˍ laˇ ve htaꞈ ngaˬ hui g’aꞈ te htaˇ, shu htaꞈ hteˇ ve cawˇ ve te piˇ gaˇ ve yoˬ. Saˍtanˍ ve miˬ guiˬ maˇ hteˇ maˇ cawˇ ve hk’aw ngaˬ hui va yaw ve k’o, Yaˬhoˉvaˬ ngaˬ hui htaꞈ hteˇ ve cawˇ ve te laˇ tuˬ shiˍ htaˇ awˬ g’aˇ g’a ve yoˬ.

 KANˇ PAˆ CAWˬ VE CHAW SHU HTAꞈ HK’Aˬ HK’E YAWˆ YAN CAWˇ VE LE?

20-21. (a) Kanˇ paˆ cawˬ ve chaw shu htaꞈ hk’aˬ hk’e te piˇ cawˇ ve le? (b) Awˬ hpawˇ haꞈ pehnˇ ve hk’aw a shu yawˇ awˬ to hk’aˬ hk’e yuˬ tanˇ g’a ve le? Awˬ pa yaˇ htaꞈ hk’aˬ hk’e te piˇ cawˇ ve le?

20 Hkriꞈ ve awˬ liˇ tawˇ hkawˇ awˬ hawˉ lo chehˇ ve chaw shu htaꞈ hk’aˬ hk’e te piˇ cawˇ ve le? Haꞈ pehnˇ ve chi Hkriꞈ ve awˬ liˇ tawˇ hkawˇ awˬ hkuiˉ puiˍ hpehꞈ ve pa taw kanˇ paˆ cawˬ ve chaw yawˇ hui awˬ hawˉ lo chehˇ ve chaw htaꞈ haꞈ pehnˇ ve hk’aw g’a yawˆ yan piˇ ve yoˬ. Yeˍsuˆ te ve awˬ hk’aˇ lehˬ haꞈ pehnˇ ve tehꞈ yawˇ hui g’a tawnˇ taˍ cawˇ ve yoˬ.

21 Yehˬ k’a hk’aw. “Hkriꞈ lehˬ, yawˇ ve awˬ moˍ htaꞈ haꞈ ve hk’e” awˬ hpawˇ awˬ miˇ ma htaꞈ g’a haꞈ ve yoˬ. (Eˇfeˇsuꞈ 5:25, 28, 29) Yeˍsuˆ haꞈ pehnˇ ve hk’aw yuˬ tanˇ ve hk’e awˬ hpawˇ yawˇ htaꞈ g’a henˇ yuˬ cawˇ ve yoˬ. Yawˇ loˍ ve aꞈ kehˉ awˬ miˇ ma htaꞈ a yeˇ g’a yuˬ ve yoˬ. Chaw teˇ hpaˍ hpaˍ shu htaꞈ haꞈ ve haˍ jaˇ tehꞈ dawˇ ve yoˬ hehˉ. Teˇ g’aˇ leh teˇ g’aˇ hteˇ ve cawˇ ve te daꞈ ve chaw geh yawˇ hui maˇ g’a uiˍ la ve pa taw, haꞈ pehnˇ ve chi a yeˇ maˇ uiˍ tehꞈ dawˇ ve yoˬ hehˉ. Yawˇ hui dawˇ hk’aˇ maˇ daꞈ ve pa tcuh tuˬ maˇ shaˍ ve yoˬ hehˉ. Yaꞈ hk’aˇ, yawˇ hui Hkriꞈ ve awˬ liˇ tawˇ hkawˇ na yuˬ tuˬ dawˇ hk’aˇ g’a pa ve yoˬ. Awˬ hpawˇ yawˇ awˬ to yuˬ tanˇ ve lehˬ awˬ miˇ ma yawˆ yan ve htaꞈ g’a keunˍ ve yoˬ. Awˬ pa yaˇ htaꞈ awˬ tehˬ haꞈ ve k’o, tawˇ yaw ve te ve yaˇ nyi ma luˬ tuˬ maˇ te. (Eˇfeˇsuꞈ 4:31) Yaꞈ hk’aˇ, yawˇ haꞈ pehnˇ ve hk’aw yaˇ kawˆ ve maˇ cawˬ tuˬ hpeuꞈ maw piˇ ve yoˬ. Awˬ pa chi hk’e te ve k’o, yaˇ g’aˇ va g’a leh yonˍ tuˬ yoˬ.

22. 1 Peˍtruˆ liꞈ 5:1-3 hk’aw k’oˆ taˍ ve hk’e, “yawˬ” a shu ve le? Yawˇ hui hk’aˬ hk’e te piˇ ve htaꞈ g’a cawˇ ve le?

22 Hkriꞈ yaˇ awˬ moˍ hk’aw. Nyi haꞈ shaˉ paˍ lehˬ “yawˬ” yawˇ hui ve maˇ heˆ tehꞈ tawnˇ taˍ cawˇ ve yoˬ. (Yoˇhanˬ 10:16; 1 Peˍtruˆ 5:1-3 g’aw sheˍ.) “G’uiˬ sha ve yawˬ awˬ moˍ” leh G’uiˬ sha ve mawˇ yawˇ htaꞈ hk’awꞈ piˇ-oˆ. Yawˬ Yaˬhoˉvaˬ ve mawˇ hpehꞈ ve tehꞈ nyi haꞈ shaˉ paˍ htaꞈ shaˍ tiꞈ piˇ ve yoˬ. Yawˇ ve yawˬ  htaꞈ haꞈ pehnˇ ve leh nuˇ nehˬ ve hk’aw te piˇ tcuh gaˇ ve yoˬ. (1 Hteˇsaˍlawˇniˆ 2:7, 8) Nyi haꞈ shaˉ paˍ haꞈ pehnˇ ve hk’aw yawˬ htaꞈ te piˇ ve k’o, Yaˬhoˉvaˬ nyi hk’aˇ suh ve yoˬ. Yawˇ hui awˬ viˉ awˬ nyi yawˆ yan piˇ ve htaꞈ kaꞈ g’a keunˍ ve yoˬ.

23-24. (a) Venˇ baˆ uiˍ jaˇ ve htaꞈ te yaꞈ ve k’o, nyi haꞈ shaˉ paˍ ve awˬ vuiˬ aˬ htoꞈ ma le? (b) Chi hk’e hpehꞈ la htaˇ, nyi haꞈ shaˉ paˍ aˬ htoꞈ ma htaꞈ dawˇ nyi cawˇ ve le?

23 Venˇ baˆ uiˍ jaˇ ve htaꞈ te yaꞈ htaˇ, nyi haꞈ shaˉ paˍ ve awˬ vuiˬ aˬ htoꞈ ma le? Nyi haꞈ shaˉ paˍ ve awˬ vuiˬ lehˬ G’uiˬ sha Iˉsaˍreˍlaˆ chaw htaꞈ awˬ liˇ tawˇ hkawˇ piˇ taˍ ve, suhˉ jehˬ paˍ leh mvuhˇ miˬ uˉ peunˍ paˍ kanˇ paˇ cawˬ ve htaꞈ maˇ shuˍ daꞈ. Awˬ liˇ tawˇ hkawˇ oˇ ve htaꞈ nyi haꞈ shaˉ tuˬ leuˆ yuˬ taˍ ve chaw lehˬ co ha hpawˇ, mvuhˇ miˬ leh haiˬ ve hpawˇ kaꞈ g’a nyi haꞈ shaˉ ve yoˬ. Yaꞈ hk’aˇ, nyi haꞈ shaˉ paˍ Hkriꞈ ve awˬ liˇ tawˇ hkawˇ awˬ hawˉ lo chehˇ ve chaw lehˬ co ha hpawˇ te yaꞈ ve htaꞈ caˉ daꞈ ve kaꞈ nyi haꞈ shaˉ ve yoˬ. Miˬ guiˬ hk’oˆ kanˇ paˇ cawˬ ve mvuhˇ miˬ leh haiˬ ve hpawˇ nyi haꞈ shaˉ tuˬ G’uiˬ sha awˬ vuiˬ piˇ ve tehꞈ yawˇ hui shiˍ ve yoˬ. Chi kanˇ paˆ yehˇ leh ciˍ yanˍ piˇ ve htaꞈ k’oˆ gaˇ ve yoˬ. Tawˇ pa haˉ te k’o, meuˉ ve htawnˍ hk’aw lo yuˬ keu piˇ ve yoˬ.—Roˉmaꞈ 13:1-4.

24 Hk’e k’o venˇ baˆ uiˍ jaˇ ve htaꞈ gu piˇ tuˬ nyi haꞈ shaˉ paˍ ve awˬ vuiˬ aˬ htoꞈ ma le? Yawˇ hui hpehꞈ la ve awˬ lawn htaꞈ chaˬ nyi tuˬ Liꞈ hpu htaꞈ cuˇ leh g’a dawˇ cheˆ ve yoˬ. Haꞈ pehnˇ ve lehˬ Hkriꞈ ve awˬ liˇ tawˇ hkawˇ awˬ hkuiˉ puiˍ hpehꞈ ve tehꞈ yawˇ hui maˇ leunˇ. Haꞈ pehnˇ ve nyi haꞈ shaˉ paˍ awˬ lawn chi ve teˇ hpaˍ htaꞈ dawˇ nyi tuˬ ga piˇ ve yoˬ. Hkriꞈ yaˇ awˬ moˍ hk’aw te yaꞈ ve chaw htaꞈ ga piˇ tuˬ yawˇ hui aˬ htoꞈ ma g’a te ve le? Haꞈ pehnˇ ve hk’aw nyi haꞈ shaˉ paˍ awˬ lawn chi teˇ hpaˍ htaꞈ g’a dawˇ nyi ve yoˬ. Yawˇ dawˇ hpfuhˆ-aw laˇ? Yawˇ co ha hpawˇ awˬ g’aˇ hehnˇ la tuˬ ngaˬ hui ga piˇ g’a-aw laˇ?

25. G’uˇ suhˍ teˇ lawn hk’aw ngaˬ hui aˬ htoꞈ ma htaꞈ henˇ tuˬ le?

25 Ngaˬ hui Hkriꞈ ve awˬ liˇ tawˇ hkawˇ awˬ hawˉ lo g’a chehˇ ve ha lehˬ ja! Ngaˬ hui teˇ g’aˇ leh teˇ g’aˇ awˬ liˇ tawˇ hkawˇ chi htaꞈ na yuˬ tuˬ coˇ caˇ ve k’o, Hkriꞈ yaˇ awˬ moˍ hk’aw teˇ g’aˇ le le haꞈ pehnˇ ve, awˬ hpfuhˇ hk’aˆ ve, kawˆ ve maˇ cawˬ tuˬ tehꞈ dawˇ tuˬ ga piˇ ve yoˬ hehˉ. Yaꞈ hk’aˇ, “haiˬ ve chaw . . . shaˬ te shaˬ haiˬ la tuˬ” ve hk’aw ngaˬ hui chehˇ sheˍ ve yoˬ. (2 Tiˆmoˉseˍ 3:13) Ngaˬ hui hk’aˬ htaˆ kaꞈ shaˍ tiꞈ g’a te ve yoˬ. Tawˇ pa haˉ te k’o, yaˇ pehꞈ ve tzuhˆ ve hpawˇ naˬ taweh te piˇ ve htaꞈ gu piˇ htaˇ, Hkriꞈ yaˇ awˬ moˍ G’uiˬ sha hteˇ ve cawˇ ve tehꞈ hk’aˬ hk’e hpeuꞈ maw piˇ g’a tuˬ le? G’uˇ suhˍ teˇ lawn hk’aw henˇ tuˬ yoˬ.

K’A MUIˬ HKAWˇ 15 Yaˬhoˉvaˬ ve yaˇ kaoˬ htaꞈ chiˇ mvuh-o!

^ aw? tawn 5 Yaˬhoˉvaˬ haꞈ pehnˇ ve leh hteˇ ve cawˇ ve tehꞈ aˬ htoꞈ ma te ngaˬ hui yonˍ g’a ve le, laiˉ tawn cawˬ ve henˇ tuˬ ve awˬ lawn teˇ hpaˍ yoˬ. Chi lehˬ 4 lawn hk’aw ve nyiˇ lawn teˇ lawn hpehꞈ ve yoˬ. G’uiˬ sha yawˇ ve chaw htaꞈ hteˇ ve cawˇ ve g’a tcuh gaˇ leh haiˬ ve miˬ guiˬ chi hk’oˆ maˇ hteˇ maˇ cawˇ ve g’a hpuˇ ve chaw htaꞈ yawˇ awˬ g’aˇ piˇ gaˇ ve yoˬ.

^ aw? tawn 1 Shaw nyi kuiˬ Taꞈ yehˬ Ha pa 2 maˬ 2019 hk’awꞈ hk’aw ve “Haꞈ pehnˇ ve leh hteˇ ve cawˇ ve–Oˇ htaˇ teˇ co-e Iˉsaˍreˍlaˆ chaw hk’aw” ve awˬ lawn htaꞈ nyi sheˍ.

^ aw? tawn 13 K’AWꞈ K’Oˆ MAˍ TAˍ VE: Haꞈ pehnˇ ve lehˬ a shu yawˇ awˬ to yuˬ tanˇ ve, ngaˬ hui loˍ ve aꞈ kehˉ shu loˍ ve htaꞈ awˉ lawˉ dawˇ nyi ve yoˬ. Shu htaꞈ ga piˇ leh awˬ bon g’a tuˬ ngaˬ hui teˇ ceuˬ ceuˬ yuˬ tanˇ ve yoˬ.

^ aw? tawn 61 AWˬ HAN HTAꞈ K’Oˆ MAˍ TAˍ VE: Mehˇ chawˇ ma ve yaˇ paˍ teˇ g’aˇ tiˉ ve suh-oˬ ve htaꞈ Yeˍsuˆ g’a mawˬ ve. Yeˍsuˆ yawˇ htaꞈ ha k’aˉ jaˇ leh yaˇ paˍ htaꞈ teˇ pawˆ k’awꞈ teꞈ tu la piˇ ve.

^ aw? tawn 63 AWˬ HAN HTAꞈ K’Oˆ MAˍ TAˍ VE: Hpaˍriˍsehˇ chaw Siˉmonˍ meh ve aˉ hk’aw lo Yeˍsuˆ awˍ caˇ ve. Yaˇ miˇ meh maˬ lanˉ hpehꞈ ve teˇ g’aˇ yawˇ ve mehˆ g’uiˬ Yeˍsuˆ ve hkui sheh htaꞈ jaˆ pfuhˍ leh, yawˇ ve uˉ hkeh mvuh yuˬ shiˆ piˇ ve. Naˍ manˇ hawnˉ Yeˍsuˆ ve hkui sheh htaꞈ ngeuˍ pfuhˍ ve. Yawˇ chi hk’e te ve htaꞈ Siˉmonˍ maˇ dawˇ cawˇ. Yaꞈ hk’aˇ, Yeˍsuˆ yawˇ hpawˇ chehˇ ve.