Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 HPEHꞈ LAˬ JAW VE AWˬ LAWN

Ngaˬ hui “awˬ hpfuhˇ hk’aˆ jaˇ ve piˉ ko-eˍ shehnˉ” ca mawˬ ve

Ngaˬ hui “awˬ hpfuhˇ hk’aˆ jaˇ ve piˉ ko-eˍ shehnˉ” ca mawˬ ve

Vinˍtonˇ leh Hpaˍmehˍlaˇ (Hpehn) Hpenˬ Awˆsuh-teˇriˇaˇ awˬ tcuhˆ puiˍ lo kanˉ te chehˇ ve yoˬ. Yawˇ hui ha lehˬ ve htawˇ, haˍ ve laiˉ ceuˬ g’a hpuˇ jaw ve yoˬ. Chaw liˇ vaˇ liˇ maˇ shuˍ daꞈ ve pa taw g’a pa leh, yaˇ kaꞈ shawˆ-e ve yoˬ. Yaꞈ hk’aˇ, yawˇ hui lehˬ Yaˬhoˉvaˬ, yawˇ ve chaw, leh yawˇ ve kanˉ htaꞈ hk’aˬ htaˆ kaꞈ haꞈ ve yoˬ. Yawˇ hui g’a hpuˇ ve awˬ lawn k’oˆ maˍ laˇ tuˬ yoˬ.

Vinˍtonˇ-oˬ, nawˬ awˬ tehˬ ve G’uiˬ sha htaꞈ hk’aˬ hk’e te ca mawˬ ve le?

Ngaˬ Awˆsuh-teˇriˇaˇ mvuhˇ miˬ Hku-iˉlehn venˇ heh hk’aw lo uiˍ la ve yoˬ. Ngaˬ pa ngaˬ e bon htaꞈ maˇ yonˍ. Ngaˬ hui awˬ paˇ awˬ kui lo chaw maˇ chehˇ leh yehˬ k’a hk’aw ve chaw geh ceh g’a yaw daꞈ ve yoˬ. Ngaˬ 12 hk’awꞈ htaˇ, G’uiˬ sha htaꞈ tanˬ ca ve yoˬ. Ngaˬ yawˇ htaꞈ shiˍ gaˇ leh bon lawˬ ve yoˬ. Ngaˬ uiˍ la htaˇ, Aˬdeˬleˇdiˬ venˇ lo kanˉ ca te ve yoˬ. Ngaˬ 21 hk’awꞈ htaˇ, ngaˬ Hpehn htaꞈ Siˆdaˬniˬ lo mawˬ daꞈ ve yoˬ. Yawˇ Biˆtenˬ-Iˉsaˍreˍlaˆ meh ve bon awˬ moˍ teˇ moˍ ve awˬ lawn htaꞈ k’oˆ maˍ laˇ ve yoˬ. Bon awˬ moˍ chi ve Eˍgaˍlanˍ chaw ceuˬ lehˬ Iˉsaˍreˍlaˆ chaw awˬ na hpawˇ 10 chaw ceuˬ geh laˬ ve tehꞈ yonˍ ve yoˬ. Hk’e te leh ngaˬ Aˬdeˬleˇdiˬ venˇ lo k’oꞈ-e htaˇ, awˬ lawn chi kanˉ teˇ geh te ve chaw htaꞈ k’oˆ maˍ piˇ ve yoˬ. Yawˇ Yaˬhoˉvaˬ ve Shaˉhkiˆhkanˍ ve chaw geh Liꞈ hpu tanˬ henˇ ve yoˬ. Yawˇ geh Shaˉhkiˆhkanˍ ve chaw ve awˬ lawn tawˇ yaw daꞈ ve hk’aˬ nyiˇ naˍ riˍ maˇ gaˬ sheˍ htaˇ, Hpanˍ shehˍ hpaˇ leh yawˇ ve mvuhˇ miˬ htaꞈ caˉ daꞈ ve awˬ tehˬ ve htaꞈ ngaˬ shiˍ la ve yoˬ! Ngaˬ yaˇ ehˉ htaˇ bon lawˬ ve hk’awꞈ laˇ-oˬ. Ngaˬ “awˬ hpfuhˇ hk’aˆ jaˇ ve piˉ ko-eˍ shehnˉ” ca mawˬ ve yoˬ.—Maꞈhtehˍ 13:45, 46.

Hpehn-oˬ, nawˬ kaꞈ yaˇ ehˉ htaˇ piˉ ko-eˍ shehnˉ ca mawˬ ve maˇ heˆ laˇ? Nawˬ hk’aˬ hk’e te ca mawˬ ve le?

Ngaˬ Hkawˆ Ha-beuˇ venˇ lo uiˍ la ve yoˬ. Ngaˬ pa ngaˬ e leh ngaˬ puˍ ngaˬ pi Biˆtenˬ-Iˉsaˍreˍlaˆ meh ve bon awˬ moˍ hk’aw chehˇ ve yoˬ. G’uiˬ sha Eˍgaˍlanˍ chaw htaꞈ shu aꞈ kehˉ a yeˇ yuˬ jaˇ ve tehꞈ yawˇ hui ngaˬ leh ngaˬ viˉ ngaˬ nyi htaꞈ maˍ laˇ ve yoˬ. Yaꞈ hk’aˇ, ngaˬ hk’a dehꞈ maˇ yonˍ leh G’uiˬ sha htaꞈ hk’a dehꞈ maˇ shiˍ daꞈ sheˍ tehꞈ dawˇ ve yoˬ. Ngaˬ 14 hk’awꞈ htaˇ, ngaˬ bon yehˬ laiˉ kaˬ lo k’ai ve yoˬ. Eˍgaˍlanˍ mvuhˇ miˬ awˬ moˍ, Iˉ kaˆ tuˍ ve awˬ moˍ, leh Hkawꞈ nyi awˬ moˍ kaꞈ ca nyi ve yoˬ. Yaꞈ hk’aˇ, yawˇ hui ngaˬ G’uiˬ sha htaꞈ shiˍ daꞈ tuˬ ga laˇ maˇ g’a.

 Peuˬ hk’awꞈ nawˉ ngaˬ hui ve yehˬ k’a Siˆdaˬniˬ venˇ lo ca chehˇ ve yoˬ. Ngaˬ Vinˍtonˇ htaꞈ oˇ kaˬ lo mawˬ daꞈ ve yoˬ. Yawˇ k’oˆ taˍ ve hk’e, ngaˬ huiˉ maˬ bon awˬ tehˬ ve htaꞈ ca chehˇ ve pa taw, awˬ leh meuˇ htaˇ yawˇ Shaˉhkiˆhkanˍ ve chaw geh Liꞈ hpu tanˬ henˇ ve yoˬ. Peuˬ hk’awꞈ nawˉ, yawˇ ngaˬ htaꞈ liꞈ bvuhꞈ laˇ htaˇ, Liꞈ hpu awˬ tawn laiˉ tawn cawˬ ve yoˬ! Awˉ lawˉ htaˇ ngaˬ kawˆ leh yawˇ htaꞈ beuꞈ ve yoˬ. Yaꞈ hk’aˇ, yawˇ k’oˆ laˇ ve chi awˬ tehˬ ve tehꞈ a yehˉ yehˉ shiˍ la ve yoˬ.

1962 hk’awꞈ ngaˬ 18 hk’awꞈ htaˇ, Vinˍtonˇ awˬ paˇ lo g’a chehˇ tuˬ, ngaˬ kaꞈ Aˬdeˬleˇdiˬ venˇ lo ca chehˇ ve yoˬ. Yawˇ ngaˬ htaꞈ Shaˉhkiˆhkanˍ ve chaw teˇ ca geh chehˇ tcuh laˇ ve yoˬ. Yawˇ huiˉ maˬ Htoˉmaꞈ leh Cehˇniˆ Saꞈlawˬmanˇ meh ve leh Paˬpu-a nuˇ iˇniˇ-a lo miˍshenˍnaˍliˍ te jaw ve yoˬ. Yawˇ huiˉ maˬ nyi ma daꞈ jaˇ leh, ngaˬ co ha hpawˇ uiˍ la mvuh la g’a tuˬ ga laˇ ve yoˬ. Ngaˬ kaꞈ Liꞈ hpu tanˬ henˇ leh awˬ tehˬ ve htaꞈ ca mawˬ-oˬ tehꞈ ngaˬ yonˍ g’a ve yoˬ. Ngaˬ leh Vinˍtonˇ heuˆ daꞈ peuˬ hk’awꞈ nawˉ, G’uiˬ sha ve kanˉ teˇ geh tanˬ te ve yoˬ. Ngaˬ huiˉ maˬ haˍ ve laiˉ ceuˬ g’a hpuˇ ve pa taw, piˉ ko-eˍ shehnˉ ca mawˬ ve chi htaꞈ awˬ hpfuhˇ shiˍ jaˇ.

Vinˍtonˇ-oˬ, nawˬ hui awˉ lawˉ htaˇ Yaˬhoˉvaˬ ve kanˉ te ve hk’aˬ hk’e k’ai ve a ciˉ k’oˆ maˍ laˇ sheˍ.

A. Toˇ nyi shehˍ hpaˇ te htaˇ ca guiˇ-e jaw ve awˬ ti

B. Liꞈ feu piˇ ve nehˉ tuˬ (Stamp) conˇ teˇ hpaˍ hk’aw yehˇ ve (Kiˬriˬbaˬtiˬ leh Tuˬbaˬluˬ mvuhˇ miˬ lehˬ oˇ htaˇ k’o Ginˍbeuˍ leh Eˍliˆ conˇ tehꞈ kuˬ ve)

C. Tuˬbaˬluˬ mvuhˇ miˬ hk’aw cawˬ ve daꞈ jaˇ ve conˇ Fuˬnaˬfuꞈtiˆ meh ve. Miˍshenˍnaˍliˍ maˇ cawˬ sheˍ htaˇ kaꞈ oˇ kaˬ lo ve awˬ viˉ awˬ nyi geh ca guiˇ-e jaw ve

Hpehn leh ngaˬ heuˆ daꞈ peuˬ hk’awꞈ nawˉ maˇ maw, ngaˬ hui htaꞈ Yaˬhoˉvaˬ “k’ehˬ jaˇ ve yehˬ miˉ” laiˉ maˬ hpaw laˇ ve yoˬ. (1 Kawˇrenˍhtuˆ 16:9) Awˬ viˉ awˬ nyi Cehˆ Hpaw-teuˇ yehˬ miˉ awˉ lawˉ teˇ maˬ ngaˬ hui htaꞈ k’oˆ maˍ laˇ ve yoˬ. Oˇ teˇ yanˇ, yawˇ ngaˬ hui ve toˇ nyi shehˍ hpaˇ hpehꞈ ve yoˬ. (Chi teˇ hkui yawˇ Awˆsuh-teˇriˇaˇ awˬ tcuhˆ puiˍ lo ve Kawˍmiˍtiˍ hk’aw kanˉ te ve yoˬ.) Ngaˬ hui hk’aˬ htaˆ kaꞈ g’uˇ suhˍ peuˍ ve te tuˬ, Cehˆ leh yawˇ ve awˬ miˇ ma Roˉsaꞈliˍ awˬ g’aˇ peꞈ laˇ ve yoˬ. Ngaˬ hui g’uˇ suhˍ peuˍ ve 5 hk’awꞈ te ve yoˬ. Ngaˬ 29 hk’awꞈ htaˇ, toˇ nyi shehˍ hpaˇ tanˬ te ve yoˬ. Paˬciˬfeˆ Awˬ naˬ hpawˇ Laˇ tsuhˇ laˉ shaˆ g’uiˬ hk’aw ve conˇ laiˉ kaˬ lo ca guiˇ-e ve yoˬ. Tawˇ pa haˉ te k’o, Fiˬjiˬ, Aˍmeˬriˆkaꞈ Saˬmoˇaˇ, Saˬmoˇaˇ, Kiˬriˬbaˬtiˬ, Nawˬruˆ, neuˇ-aˆ, Toˬkeˬlaˇ-uˆ, Tonˬgaˬ, Tuˬbaˬluˬ, leh Veˬnuˆ-a tuˬ conˇ lo k’ai ve yoˬ.

Awˬ yanˇ oˇ ve teˇ yanˇ htaˇ, vuiˇ jaˇ kuiˬ conˇ hk’aw ve chaw Yaˬhoˉvaˬ ve Shaˉhkiˆhkanˍ ve chaw htaꞈ htawˇ dawˇ nawˬ dawˇ cawˬ ve yoˬ. Ngaˬ hui cuˇ yiˍ cawˬ ve hk’aw yawˇ hui geh ca guiˇ-e cawˇ ve yoˬ. (Maꞈhtehˍ 10:16) Hkriꞈ yaˇ awˬ moˍ hk’aw chaw maˇ maˇ leh, teˇ kaˬ kaˬ k’o haˉ kuiˬ maˇ cawˬ. Hk’e te leh teˇ pawˆ pawˆ k’o hk’aˆ yaˇ geh haˉ tuˬ lawˬ ve yoˬ. Yawˇ hui shiˍ puiˉ jaˇ.

Vinˍtonˇ-oˬ, nawˬ liꞈ yuˬ tawˆ ve kanˉ dawˇ cawˇ ve maˇ heˆ laˇ? Aˬ htoꞈ ma pa taw le?

Saˬmoˇaˇ mvuhˇ miˬ chehˇ htaˇ, Vinˍtonˇ nyi haꞈ shaˉ paˍ liꞈ henˇ yehˬ hk’aw maˍ ve

Oˇ htaˇ, awˬ viˉ awˬ nyi Tonˬgaˬ conˇ lo chehˇ ve yawˇ hui ve chaw ceuˬ tawˇ hkawˇ hk’aw liꞈ k’oˆ ehˉ maˇ cawˬ maˇ sheˍ. Hto toˇ-e htaˇ, kaˇ laˇ hkawˇ Awˬ tehˬ ve lehˬ Co co taiˍ taiˍ a shaꞈ g’a tuˬ shehˍ k’ai laˇ ve liꞈ k’oˆ g’a yehˇ ve yoˬ. Hk’e te leh nyi haꞈ shaˉ paˍ ve liꞈ henˇ yehˬ cawˬ htaˇ, nyi haꞈ shaˉ paˍ 3 g’aˇ kaˇ laˇ hkawˇ a ciˉ ceh shiˍ ve, yawˇ hui liꞈ k’oˆ oˇ ve Tonˬgaˬ hkawˇ yuˬ tawˆ tuˬ kanˉ chi htaꞈ haꞈ yuˬ ve yoˬ. Hpehn liꞈ k’oˆ oˇ ve htaꞈ htawˆ tawˆ leh liꞈ k’oˆ te tawˆ la g’a tuˬ Aˍmeˬriˆkaꞈ awˬ tcuhˆ puiˍ lo feu piˇ ve yoˬ. Kanˉ chi te ve awˬ yanˇ 2 ha pa ceh yehˇ ve yoˬ. Liꞈ yuˬ tawˆ ve hk’a dehꞈ maˇ daꞈ ve htawˇ, liꞈ k’oˆ chi Tonˬgaˬ chaw laiˉ g’aˇ awˬ tehˬ ve htaꞈ henˇ tuˬ ga piˇ ve yoˬ. Ngaˬ leh Hpehn liꞈ yuˬ tawˆ ve chaw maˇ hpehꞈ ve htawˇ, kanˉ chi htaꞈ dawˇ cawˇ ve yoˬ.

Hpehn-oˬ, Awˆsuh-teˇriˇaˇ mvuhˇ miˬ leh conˇ hk’aw chehˇ ve hk’aˬ hk’e te peun daꞈ ve le?

Toˇ nyi shehˍ hpaˇ te htaˇ chi hk’e ve hk’aw kaꞈ haˉ jaw ve

Peun daꞈ jaˇ! Puiˉ cheꞈ jaˇ, haw chiˆ haw moꞈ hpehꞈ ve, faˆ kaꞈ peh jaˇ. A naˍ laiˉ ceuˬ cawˬ leh, teˇ pawˆ pawˆ k’o caˇ tuˬ maˇ lawꞈ. Ngaˬ hui ve yehˬ zuhˇ yehˬ hpehꞈ leh g’oꞈ pa kaꞈ maˇ cawˬ. Yaꞈ hk’aˇ, teˇ nyi le le mvuhˇ hpeuꞈ la htaˇ, ngaˬ hui yehˬ hk’aw mui leh laˇ tsuhˇ g’uiˬ hpawˇ lo nyi peu htaˇ, nyi ma sha jaˇ. Ha pa laˇ tsuhˇ g’uiˬ htaꞈ awˬ g’euˆ hte leh maꞈ paoˍ cehˬ ve aˉ g’uiˬ ha htaꞈ kaꞈ mawˬ ve yoˬ. Ngaˬ hui chi hk’e ve htaꞈ mawˬ htaˇ hk’a  dehꞈ dawˇ nyi leh bon lawˬ gaˇ tuˬ te laˇ leh, maˇ daꞈ ve awˬ ceuˬ htaꞈ maˇ dawˇ nyi leh daꞈ ve awˬ ceuˬ htaꞈ tiˉ dawˇ nyi tuˬ ga laˇ ve yoˬ.

Ngaˬ hui oˇ kaˬ lo ve yaˇ geh chehˇ ve kaꞈ dawˇ cawˇ jaˇ. Ngaˬ hui kaˇ laˇ hpu hpehꞈ ve pa taw, yawˇ hui kaꞈ ngaˬ hui geh chehˇ gaˇ ve yoˬ. Ngaˬ hui neuˇ-aˆ conˇ hk’aw ve Hkriꞈ yaˇ awˬ moˍ geh ca guiˇ-e htaˇ, yaˇ paˍ teˇ g’aˇ Vinˍtonˇ ve laꞈ sheh awˬ mvuh maˇ jaˇ leh ca shoˆ nyi la leh k’oˆ ve, “ngaˬ nawˬ ve ngaˆ mvuh htaꞈ dawˇ cawˇ jaˇ.” Yawˇ laꞈ sheh awˬ mvuh maˇ jaˇ ve htaꞈ maˇ mawˬ jaw ve pa taw, hk’aˬ hk’e k’oˆ tuˬ naˍ maˇ shiˍ ve yoˬ hehˉ!

Oˇ kaˬ lo ve chaw haˍ g’awˇ jaˇ leh ngaˬ hui g’a mawˬ htaˇ nyi ma maˇ sha. Awˬ paˇ awˬ kui lo daꞈ jaˇ ve htawˇ, iˉ kaˆ dawˬ tuˬ maˇ lawꞈ leh naˆ tsuhˇ gu kuiˬ kaꞈ maˇ lawꞈ. Yaꞈ hk’aˇ awˬ viˉ awˬ nyi maˇ dawˇ haˍ. Yawˇ hui yehˬ k’a hk’aw hk’a geh g’a chehˇ leh, hpawnˬ daꞈ leh Yaˬhoˉvaˬ htaꞈ chiˇ mvuh kuiˬ cawˬ ve ceh kaꞈ ha lehˬ jaˇ. A shaꞈ teꞈ hk’aˇ cawˇ lawꞈ dawˬ lawꞈ te leh G’uiˬ sha ve mvuhˇ miˬ htaꞈ awˉ lawˉ te tuˬ ve awˬ hk’aˇ yawˇ hui ngaˬ hui htaꞈ maˍ laˇ ve yoˬ.

Hpehn-oˬ, teˇ pawˆ pawˆ k’o nawˬ iˉ kaˆ leh caˇ tuˬ a shu yawˇ hk’aˇ g’a ca ve yoˬ leˇ? Nawˬ hk’aˬ hk’e te g’a ve le?

Tonˬgaˬ mvuhˇ miˬ lo Hpehn mawˇ tsuhˇ ve

Ngaˬ pa ngaˬ htaꞈ laiˉ ceuˬ maˍ laˇ ve ha lehˬ jaˇ. Aˬ miˍ ceh leh awˬ chiˇ awˍ te tuˬ awˬ hk’aˇ leh mawˇ hk’a dehꞈ pehˇ yehˇ tuˬ awˬ hk’aˇ kaꞈ maˍ laˇ ve yoˬ. Kiˬriˬbaˬtiˬ conˇ hk’aw ve Hkriꞈ yaˇ awˬ moˍ geh ca guiˇ-e htaˇ, zuhˇ yehˬ vaˇ hpiˇ ko-aˍ ve hk’aw haˉ ve yoˬ. Awˬ chiˇ te tuˬ, ngaˬ miˬ k’oˍ duˇ leh maꞈ paoˍ guiˬ k’uˉ yuˬ leh aˬ miˍ ceh ve yoˬ. Hk’aˆ hk’aw ve yaˇ miˇ hk’aˇ suh k’ai leh nanˬ bawˍ hk’aw iˉ kaˆ hk’o-e ve yoˬ. Yawˇ hui pfuhˇ k’oˍ htaꞈ hpeh taˍ ve aˉ hkeh htaꞈ cawˬ leh iˉ kaˆ nyiˉ yuˬ tuˬ nanˬ bawˍ hk’aw baˬ keu leh jawˆ nyiˉ yuˬ ve yoˬ. Nyi-a k’o sha jaˇ ve htawˇ, ngaˬ te-a nyi htaˇ te maˇ g’a! Ngaˬ ve pfuhˇ k’oˍ iˉ kaꞈ hk’aw maˇ loꞈ-e laˇ. Teˇ g’aˇ le le g’uiˬ peuˬ hk’awꞈ nawˉ teˇ g’aˇ ngaˬ htaꞈ ga laˇ ve yoˬ. Yawˇ hui shiˍ puiˉ jaˇ leh hk’aˬ htaˆ kaꞈ ga laˇ ve yoˬ.

Nawˬ hui conˇ hk’aw ve awˬ vuiˬ dawˇ cawˇ jaˇ ve maˇ heˆ laˇ? Nawˬ tawnˇ g’a sheˍ ve awˬ lawn aˬ htoꞈ ma cawˬ sheˍ ve le?

Vinˍtonˇ: Yawˇ hui ve chaw liˇ vaˇ liˇ htaꞈ shiˍ tuˬ awˬ yanˇ g’a yehˇ ve yoˬ. Tawˇ pa haˉ te k’o, awˬ viˉ awˬ nyi ngaˬ hui htaꞈ awˬ chiˇ te laˇ htaˇ, yawˇ hui cawˬ taˍ ve hk’a peu-eˬ te laˇ ve yoˬ. Awˉ lawˉ htaˇ, yawˇ hui htaꞈ g’a teh-aˉ piˇ ve ngaˬ hui maˇ shiˍ. Yawˇ hui gu laˇ ve hk’a peu-eˬ caˇ peuˬ ve yoˬ! Peuˬ hk’awꞈ nawˉ shiˍ-oˬ htaˇ, yawˇ hui awˬ pon kaꞈ g’a teh-aˉ piˇ ve yoˬ. Ngaˬ hui maˇ shiˍ ve htaꞈ yawˇ hui na g’a ve yoˬ. 6 ha pa k’o teˇ pawˆ yawˇ hui htaꞈ g’a mawˬ daꞈ ve yawˇ hui ha lehˬ jaˇ. Ngaˬ hui htaꞈ maˇ heˆ k’o yawˇ hui awˬ kaˍ awˬ nu ve awˬ viˉ awˬ nyi htaꞈ maˇ mawˬ jaw.

Neuˇ-aˆ conˇ lo ca guiˇ-e htaˇ, awˬ viˉ awˬ nyi geh teˇ geh hto toˇ-e ve

Ngaˬ hui Hkriꞈ yaˇ awˬ moˍ hk’aw ca k’awꞈ guiˇ la htaˇ, hk’aˆ yaˇ awˬ pon kaꞈ awˬ bon cawˬ jaˇ. Awˬ viˉ awˬ nyi ve bon yawˇ hui hk’aˇ yawˇ hui dawˇ leh te ve tehꞈ hk’aˆ yaˇ laiˉ g’aˇ k’oˆ ve yoˬ. Hk’e te leh shu mvuhˇ miˬ lo laˬ ve Shaˉhkiˆhkanˍ ve chaw teˇ ca awˬ viˉ awˬ nyi geh ca guiˇ la htaˇ, yawˇ hui hk’aˇ yawˇ hui dawˇ tawˆ leh te-aˍ ve maˇ heˆ tehꞈ hk’aˆ yaˇ shiˍ la ve yoˬ.

Hpehn: Ngaˬ hui Kiˬriˬbaˬtiˬ conˇ hk’aw ve Hkriꞈ yaˇ awˬ moˍ geh ca guiˇ-e htaˇ ve awˬ lawn hk’a dehꞈ tawnˇ g’a ve yoˬ. Oˇ kaˬ lo awˬ viˉ awˬ nyi maˇ maˇ leh nyi haꞈ shaˉ paˍ teˇ g’aˇ tiˉ cawˬ ve yoˬ Yawˇ I-tin-Iˉkai Ma-tehˇraˆ meh leh ngaˬ hui htaꞈ nyi haꞈ shaˉ laˇ daꞈ jaˇ. Teˇ nyi htaˇ, yawˇ ngaˬ hui geh ca guiˇ la leh yawˇ ve hk’awˍ lawˇ hk’aw g’aˆ u 1 shiˍ tiˉ cawˬ ve yoˬ. Yawˇ k’oˆ ve, “chi nawˬ awˬ pon yoˬ.” Oˇ htaˇ lehˬ g’aˆ u ca haˍ jaˇ. Yawˇ te laˇ ve chi ngaˬ hui nyi ma hk’aw gaˬ jaˇ.

Hpehn-oˬ, nawˬ yaˇ shawˆ-e jaw ve maˇ heˆ laˇ? Nawˬ nyi ma luˬ-aˬ laˇ?

1973 hk’awꞈ Paˬciˬfeˆ Awˬ naˬ hpawˇ Laˇ tsuhˇ laˉ shaˆ g’uiˬ hk’aw ve conˇ lo chehˇ htaˇ ngaˬ yaˇ hu ve yoˬ. Awˆsuh-teˇriˇaˇ mvuhˇ miˬ lo k’oꞈ-e tuˬ ngaˬ hui dawˇ cheˆ ve yoˬ. Yaꞈ hk’aˇ, 4 ha pa gaˬ leh ngaˬ yaˇ shawˆ-e laˇ ve yoˬ. Ngaˬ leh Vinˍtonˇ kaꞈ nyi ma luˬ jaˇ. Awˬ yanˇ maw la htaˇ nyi ma sha  la ve htawˇ, hk’a dehꞈ maˇ sha sheˍ. Yaꞈ hk’aˇ, Shaw nyi kuiˬ Taꞈ yehˬ Ha pa 4 maˬ 15 nyi 2009 hk’awꞈ “G’aw ve chaw na nyi hkawˇ” ve awˬ lawn ngaˬ htaꞈ ga laˇ jaˇ. Oˇ kaˬ lo k’oˆ taˍ ve, “yaˇ awˬ e g’oˇ peˬ hk’aw suh-e ve k’o, k’awꞈ teꞈ tu la g’a-aw laˇ?” Awˬ lawn oˇ ve hk’aw k’oˆ ve, hk’aˬ hk’e te tuˬ Yaˬhoˉvaˬ dawˇ cheˆ g’a leh yawˇ hk’aˬ htaˆ kaꞈ cawˇ ve htaꞈ tiˉ te ve yoˬ. Yaˬhoˉvaˬ yawˇ ve Yaˇ hpu htaꞈ cuˇ leh “neˇ haiˬ ve kanˉ teˇ hpaˍ htaꞈ te luˬ” leh, haiˬ ve miˬ guiˬ chi htaꞈ pa taw nyi ma luˬ ve chaw htaꞈ Yaˬhoˉvaˬ nyi ma sha la tcuh tuˬ yoˬ. (1 Yoˇhanˬ 3:8) Awˬ lawn chi ngaˬ hui htaꞈ maˍ laˇ ve, Yaˬhoˉvaˬ yawˇ ve chaw htaꞈ peꞈ laˇ ve “piˉ ko-eˍ shehnˉ” lehˬ awˬ hpfuhˇ hk’aˆ jaˇ! G’uiˬ sha ve Mvuhˇ miˬ dawˇ law kuiˬ maˇ cawˬ ve k’o, ngaˬ hui teꞈ chiˉ kaꞈ te maˇ g’a.

Yaˇ shawˆ peuˬ hk’awꞈ nawˉ, ngaˬ hui G’uiˬ sha ve kanˉ awˬ yanˇ hk’a biˇ teˇ pawˆ k’awꞈ te ve yoˬ. Awˉ lawˉ htaˇ ngaˬ hui Awˆsuh-teˇriˇaˇ Beˍteˍlaˆ hk’aw kanˉ te leh, peuˬ hk’awꞈ nawˉ toˇ nyi shehˍ hpaˇ teˇ pawˆ k’awꞈ te ve yoˬ. 1981 hk’awꞈ Neuˇ Saoˉ Venˍ leh Siˆdaˬniˬ venˇ lo toˇ nyi shehˍ hpaˇ 4 hk’awꞈ te peuˬ hk’awꞈ nawˉ, Awˆsuh-teˇriˇaˇ Beˍteˍlaˆ hk’aw ngaˬ hui awˬ vuiˬ awˬ suhˉ k’awꞈ g’a leh chi teˇ hkui hk’a gaˬ kaꞈ chehˇ sheˍ ve yoˬ.

Vinˍtonˇ-oˬ, Paˬciˬfeˆ Awˬ naˬ hpawˇ Laˇ tsuhˇ laˉ shaˆ g’uiˬ hk’aw ve conˇ lo chehˇ htaˇ ve awˬ vuiˬ chi nawˬ Awˬ tcuhˆ puiˍ Kawˍmiˍtiˍ hk’aw kanˉ te ve htaꞈ ga laˇ ve laˇ?

Ga laˇ ve yoˬ. Awˉ lawˉ htaˇ, Uˉ peunˍ ve Kawˍmiˍtiˍ Awˆsuh-teˇriˇaˇ ve awˬ tcuhˆ puiˍ Saˬmoˇaˇ conˇ htaꞈ nyi haꞈ shaˉ tcuh ve yoˬ. Peuˬ hk’awꞈ nawˉ Nuˇziˬlehˬ ve awˬ tcuhˆ puiˍ leh Awˆsuh-teˇriˇaˇ ve awˬ tcuhˆ puiˍ teˇ kaˬ tiˉ te ve yoˬ. Chi beuꞈ, Awˆsuh-teˇriˇaˇ ve awˬ tcuhˆ puiˍ lehˬ Awˆsuh-teˇriˇaˇ, Aˍmeˬriˆkaꞈ Saˬmoˇaˇ, Saˬmoˇaˇ, Hkuˆ conˇ, Nuˇziˬlehˬ, neuˇ-aˆ, Tiˬmawˇ Lehˆ, Toˬkeˬlaˇ-uˆ, leh Tonˬgaˬ mvuhˇ miˬ htaꞈ nyi haꞈ shaˉ chehˇ ve yoˬ. Ngaˬ kaꞈ laiˉ mvuhˇ miˬ hk’aw ve awˬ viˉ awˬ nyi geh ca guiˇ-e g’a ve yoˬ. Conˇ hk’aw ve awˬ viˉ awˬ nyi ka tiꞈ yeˬ ve geh ngaˬ G’uiˬ sha ve kanˉ teˇ geh te jaw ve lehˬ chi teˇ hkui yawˇ hui awˬ pon kanˉ hk’a dehꞈ te piˇ tuˬ ga laˇ g’a ve yoˬ.

Vinˍtonˇ leh Hpehn Awˆsuh-teˇriˇaˇ awˬ tcuhˆ puiˍ hk’aw chehˇ ve

Ngaˬ leh Hpehn g’a hpuˇ ve awˬ ceuˬ ngaˬ hui htaꞈ maˍ laˇ ve, chaw mawˇ ceh tiˉ G’uiˬ sha htaꞈ ca ve maˇ heˆ. Yaˇ nehˬ kaꞈ “awˬ hpfuhˇ hk’aˆ jaˇ ve piˉ ko-eˍ shehnˉ” htaꞈ ca gaˇ ve yoˬ. Yehˬ k’a hk’aw ve chaw a yeˇ maˇ yuˬ ve htawˇ kaꞈ. (2 Jawˇ mawˇ 5:2, 3; 2 Raˍsaˍvanˍ 34:1-3) Yaˬhoˉvaˬ lehˬ haꞈ pehnˇ ve G’uiˬ sha hpehꞈ leh, yaˇ nehˬ, chaw mawˇ maˇ k’oˆ, teˇ g’aˇ le le co co taiˍ taiˍ ve a shaꞈ g’a tcuh gaˇ ve yoˬ!

Peuˬ laˬ ve 50 hk’awꞈ ngaˬ leh Hpehn G’uiˬ sha htaꞈ tanˬ ca ve teˇ yanˇ, ngaˬ hui aˬ htoꞈ ma ca mawˬ tuˬ naˍ maˇ shiˍ. G’uiˬ sha ve Mvuhˇ miˬ awˬ tehˬ ve lehˬ awˬ hpfuhˇ hk’aˆ jaˇ ve piˉ ko-eˍ shehnˉ hpehꞈ ve yoˬ! Ngaˬ hui piˉ ko-eˍ shehnˉ chi htaꞈ maˇ baˬ taˬ!