Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ Lawn 11

Yaˬhoˉvaˬ hkawˇ na yuˬ ve

Yaˬhoˉvaˬ hkawˇ na yuˬ ve

“Chaw chi lehˬ, ngaˬ haꞈ jaˇ ve ngaˬ ve Yaˇ hpu hpehꞈ leh . . . yawˇ ve tawˇ hkawˇ htaꞈ na yuˬ-oꞈ.”—MAꞈHTEHˍ 17:5.

K’A MUIˬ HKAWˇ 89 Na yuˬ ve, g’aꞈ te ve, leh awˬ bon g’a ve

HENˇ TUˬ VE TEˇ HPAˍ *

1-2. (a) Yaˬhoˉvaˬ chaw yaˇ geh hk’aˬ hk’e te caˉ daꞈ ve le? (b) Awˬ lawn chi ve hk’aw ngaˬ hui aˬ htoꞈ ma htaꞈ henˇ tuˬ le?

Yaˬhoˉvaˬ ngaˬ hui geh yaw daꞈ gaˇ ve yoˬ. Awˉ lawˉ peuˇ htaˇ tcuh kaˍ paˍ, mvuhˇ naw ma tcuh yaˇ, leh yawˇ ve Yaˇ paˍ Yeˍsuˆ Hkriꞈ htaꞈ cuˇ leh ngaˬ hui G’uiˬ sha ve dawˇ hk’aˇ htaꞈ shiˍ tuˬ ga laˇ ve yoˬ. (Aˍmoˆ 3:7; Gaˍlaˍtiˆ 3:19; Hpeuꞈ maˍ ve 1:1) Chi beuꞈ teˇ co-e yawˇ ngaˬ hui htaꞈ caˉ daꞈ tuˬ Liꞈ hpu htaꞈ cuˇ ve yoˬ. Yawˇ ve te hk’aˇ dawˇ hk’aˇ htaꞈ ngaˬ hui shiˍ tuˬ yawˇ Liꞈ hpu peꞈ laˇ ve yoˬ.

2 Yeˍsuˆ miˬ guiˬ hk’oˆ chehˇ htaˇ, Yaˬhoˉvaˬ ve hkawˇ mvuhˇ naw ma hk’oˆ 3 pawˆ bvuhˬ tawˆ la ve yoˬ. Yaˬhoˉvaˬ aˬ htoꞈ ma k’oˆ ve, yawˇ ve tawˇ ngaˬ hui htaꞈ aˬ htoꞈ ma maˍ laˇ ve, leh awˬ bon hk’aˬ hk’e g’a ve teˇ geh dawˇ nyi sheˍ.

“NAWˬ LEHˬ NGAˬ HAꞈ JAˇ VE NGAˬ VE YAˇ HPU YOˬ”

3. Maˍkuˆ liꞈ 1:9-11 hk’aw Yeˍsuˆ Baˆtiˆsaˬ haꞈ yuˬ htaˇ Yaˬhoˉvaˬ aˬ htoꞈ ma k’oˆ piˇ ve le? Yaˬhoˉvaˬ ve tawˇ hkawˇ maˍ laˇ ve awˬ tehˬ ve 3 lawn aˬ htoꞈ ma le?

3 Maˍkuˆ liꞈ 1:9-11 hk’aw yawˇ Awˬ pa ve hkawˇ mvuhˇ naw ma hk’oˆ bvuhˬ tawˆ la ve awˉ lawˉ teˇ pawˆ bvuhꞈ taˍ ve yoˬ. (G’aw sheˍ.) Yawˇ k’oˆ ve, “nawˬ lehˬ ngaˬ haꞈ jaˇ ve ngaˬ ve Yaˇ hpu yoˬ. Nawˬ htaꞈ ngaˬ nyi hk’aˇ suh jaˇ.” Mvuhˇ naw ma hk’oˆ Awˬ pa chi hk’e k’oˆ ve htaꞈ Yeˍsuˆ g’a kaˇ htaˇ, yawˇ ha lehˬ jaˇ ve yoˬ hehˉ! Yaˬhoˉvaˬ ve tawˇ hkawˇ chi ve hk’aw Yeˍsuˆ htaꞈ caˉ daꞈ ve awˬ tehˬ ve 3 lawn htaꞈ hk’a dehꞈ maˍ laˇ ve yoˬ. (1) Yeˍsuˆ G’uiˬ sha ve yaˇ hpehꞈ ve yoˬ. (2) Yaˬhoˉvaˬ yawˇ ve Yaˇ htaꞈ haꞈ jaˇ. (3) Yaˬhoˉvaˬ yawˇ ve Yaˇ htaꞈ nyi hk’aˇ suh jaˇ. Awˬ tehˬ ve 3 lawn chi htaꞈ teˇ geh dawˇ nyi sheˍ.

4. Yeˍsuˆ Baˆtiˆsaˬ haꞈ yuˬ peuˬ hk’awꞈ nawˉ G’uiˬ sha geh awˬ vuiˬ awˬ suhˉ aˬ htoꞈ ma g’a ve le?

4 “Nawˬ lehˬ ngaˬ ve Yaˇ hpu yoˬ.” Yawˇ haꞈ jaˇ ve Yaˇ htaꞈ awˬ vuiˬ awˬ suhˉ piˇ tuˬ Yaˬhoˉvaˬ ve tawˇ hkawˇ chi hk’a dehꞈ maˍ laˇ ve yoˬ. Yeˍsuˆ mvuhˇ naw ma hk’oˆ chehˇ htaˇ, yawˇ G’uiˬ sha ve Yaˇ hpehꞈ ve yoˬ. Yaꞈ hk’aˇ, Baˆtiˆsaˬ haꞈ yuˬ peuˬ hk’awꞈ nawˉ daꞈ kehˬ ve  awˬ ha hpu yawˇ htaꞈ leuˆ yuˬ ve yoˬ. Oˇ teˇ yanˇ G’uiˬ sha hk’a dehꞈ maˍ laˇ ve Yeˍsuˆ co ha hpawˇ G’uiˬ sha ve Yaˇ hpehꞈ ve yoˬ. Chi k’oˆ gaˇ ve lehˬ Yeˍsuˆ mvuhˇ naw ma hk’oˆ k’awꞈ-e tuˬ dawˇ law kuiˬ cawˬ leh G’uiˬ sha leuˆ yuˬ taˍ ve Jawˇ mawˇ leh Paw hkuˇ lonˉ hpehꞈ tuˬ yoˬ. (Luˉkaꞈ 1:31-33; Heˍbrehˇ 1:8, 9; 2:17) Chi htaꞈ pa taw Yeˍsuˆ Baˆtiˆsaˬ haꞈ yuˬ peuˬ hk’awꞈ nawˉ Yaˬhoˉvaˬ k’oˆ ve, “nawˬ lehˬ ngaˬ ve Yaˇ hpu yoˬ.”—Luˉkaꞈ 3:22.

Ngaˬ hui shu chiˇ mvuh laˇ leh awˬ g’aˇ g’a htaˇ uiˍ la mvuh la ve (Awˬ tawn 5 nyi sheˍ) *

5. Yaˬhoˉvaˬ haꞈ pehnˇ ve htaꞈ ngaˬ hui henˇ yuˬ leh hk’aˬ hk’e te shu htaꞈ awˬ g’aˇ piˇ g’a tuˬ le?

5 “Nawˬ lehˬ ngaˬ haꞈ jaˇ ve Yaˇ hpu yoˬ.” Yaˬhoˉvaˬ ve haꞈ pehnˇ ve awˬ lawn chi ngaˬ hui shu htaꞈ awˬ g’aˇ piˇ tuˬ shaˍ tiꞈ peꞈ laˇ ve yoˬ. (Yoˇhanˬ 5:20) Ngaˬ hui haꞈ ve chaw teˇ g’aˇ yawˇ ngaˬ hui htaꞈ haꞈ ve tehꞈ hpeuꞈ maw laˇ leh chiˇ mvuh laˇ htaˇ, ngaˬ hui ha lehˬ ve yoˬ. Chi ve hk’a shuˍ Hkriꞈ yaˇ awˬ moˍ hk’aw leh yehˬ k’a hk’aw ve chaw kaꞈ awˬ g’aˇ g’a tuˬ loˍ ve yoˬ. Ngaˬ hui shu htaꞈ chiˇ mvuh piˇ htaˇ, yawˇ hui ve yonˍ hk’aˇ uiˍ la mvuh la tuˬ te piˇ leh yawˇ hui Yaˬhoˉvaˬ ve kanˉ ka tiꞈ yeˬ ve hk’aw te g’a ve yoˬ. Awˬ pa awˬ e yaˇ htaꞈ awˬ g’aˇ g’a piˇ ve yoˬ. Awˬ pa awˬ e yaˇ htaꞈ haꞈ leh awˬ tehˬ chiˇ mvuh piˇ htaˇ, yaˇ uiˍ la mvuh la tuˬ ga piˇ ve yoˬ.

6. Aˬ htoꞈ ma te ngaˬ hui Yeˍsuˆ htaꞈ yonˍ g’a ve le?

6 “Nawˬ htaꞈ ngaˬ nyi hk’aˇ suh jaˇ.” Yeˍsuˆ ka tiꞈ yeˬ leh Yaˬhoˉvaˬ ve a loˍ htaꞈ g’aꞈ te g’a tuˬ yawˇ yonˍ g’a ve tehꞈ tawˇ hkawˇ chi hpeuꞈ maw laˇ ve yoˬ. Yaˬhoˉvaˬ yawˇ ve Yaˇ paˍ htaꞈ yonˍ g’a jaˇ. Chi htaꞈ pa taw, Yeˍsuˆ ka tiꞈ yeˬ leh Yaˬhoˉvaˬ ve a loˍ htaꞈ te biˇ g’a ve tehꞈ ngaˬ hui kaꞈ yonˍ g’a ve yoˬ. (2 Kawˇrenˍhtuˆ 1:20) Yeˍsuˆ ve awˬ lawn htaꞈ nyi htaˇ, ngaˬ hui kaꞈ henˇ yuˬ gaˇ ve yoˬ. Yaˬhoˉvaˬ ve chaw yawˇ ve Yaˇ paˍ htaꞈ caˉ leh henˇ yuˬ tuˬ yoˬ tehꞈ yawˇ yonˍ ve yoˬ.—1 Peˍtruˆ 2:21.

 “YAWˇ VE TAWˇ HKAWˇ HTAꞈ NA YUˬ-Oꞈ”

7. Maꞈhtehˍ liꞈ 17:1-5 hk’aw k’oˆ taˍ ve hk’e yawˇ Awˬ pa ve hkawˇ mvuhˇ naw ma hk’oˆ bvuhˬ tawˆ la ve hk’aˬ hk’e htaˇ le? Aˬ htoꞈ ma k’oˆ ve le?

7 Maꞈhtehˍ liꞈ 17:1-5 g’aw sheˍ. Nyiˇ pawˆ teˇ pawˆ Awˬ pa ve hkawˇ mvuhˇ naw ma hk’oˆ bvuhˬ tawˆ la htaˇ lehˬ Yeˍsuˆ ve “awˬ hoꞈ awˬ han pa” htaˇ yoˬ. yawˇ geh hk’aw pui hk’oˆ lo k’ai tuˬ Peˍtruˆ, Yaˍkoˆ, Yoˇhanˬ htaꞈ jehˬ piˇ ve yoˬ. Oˇ kaˬ lo chehˇ htaˇ yawˇ hui daꞈ jaˇ ve awˬ ha htaꞈ mawˬ ve yoˬ. Yeˍsuˆ ve mehˆ hpfuhˇ mvuhˇ nyi g’euˆ hk’e ba jaˇ leh yawˇ ve veuꞈ k’aˇ kaꞈ hpu leh awˬ g’euˆ ba jaˇ. Moˉseˍ leh Eˇliˇyaꞈ ve awˬ tan te shehˍ hpaˇ 2 g’aˇ awˬ g’uˇ suhˍ hpawˇ Yeˍsuˆ k’awꞈ teꞈ tu la ve awˬ lawn yawˇ geh tanˬ yaw daꞈ ve yoˬ. Awˉ lawˉ htaˇ tcuh yaˇ 3 g’aˇ “zuhꞈ muiˉ geuꞈ jaˇ leh zuhꞈ muiˉ jo ve” htawˇ, daꞈ jaˇ ve awˬ ha htaꞈ g’a mawˬ leh zuhꞈ muiˉ maˇ jo-o. (Luˉkaꞈ 9:29-32) Peuˬ leh moˬ yawˇ hui htaꞈ hoˆ beh leh G’uiˬ sha ve hkawˇ moˬ hk’aw bvuhˬ tawˆ la ve yoˬ! Yeˍsuˆ Baˆtiˆsaˬ haꞈ yuˬ htaˇ hk’e Yaˬhoˉvaˬ yawˇ ve Yaˇ paˍ htaꞈ awˬ g’aˇ piˇ leh haꞈ pehnˇ ve hk’aw k’oˆ piˇ ve, “chaw chi lehˬ, ngaˬ haꞈ jaˇ ve ngaˬ ve Yaˇ hpu hpehꞈ leh, yawˇ htaꞈ ngaˬ nyi hk’aˇ suh jaˇ.” Yawˇ k’awꞈ k’oˆ ve, ‘Yaˇ hpu ve tawˇ hkawˇ htaꞈ na yuˬ-oꞈ.’

8. Awˬ ha Yeˍsuˆ awˬ hoꞈ awˬ ha pa ve htaꞈ caˉ daꞈ ve chi yawˇ leh awˬ laꞈ g’awˇ awˬ pon aˬ htoꞈ ma awˬ bon cawˬ ve le?

8 Awˬ ha chi awˬ g’uˇ suhˍ hpawˇ Yeˍsuˆ htaꞈ caˉ daꞈ ve k’oˆ maˍ laˇ ve yoˬ. Yawˇ G’uiˬ sha ve mvuhˇ miˬ hk’aw Jawˇ mawˇ te htaˇ, awˬ meꞈ awˬ hponˇ leh kanˇ paˆ g’a tuˬ yoˬ. Yeˍsuˆ tuꞈ jaˇ hkanˍ jaˇ ve hk’aw suh tuˬ ve htaꞈ yeunˇ hkanˍ g’aˇ tuˬ awˬ g’aˇ g’a ve yoˬ. Awˬ ha chi awˬ laꞈ g’awˇ htaꞈ yonˍ yeˬ tuˬ te piˇ leh, yawˇ hui awˬ g’uˇ suhˍ hpawˇ beˬ ve lawˇ ve g’a hpuˇ htaˇ ka tiꞈ yeˬ g’a tuˬ ga piˇ ve yoˬ. 30 hk’awꞈ peuˬ hk’awꞈ nawˉ tcuh yaˇ Peˍtruˆ Yeˍsuˆ awˬ hoꞈ awˬ ha pa ve htaꞈ k’oˆ sheˍ ve yoˬ. Awˬ ha oˇ ve yawˇ ve dawˇ hk’aˇ hk’aw cawˬ sheˍ ve tehꞈ ngaˬ hui htaꞈ maˍ laˇ ve yoˬ.—2 Peˍtruˆ 1:16-18.

9. Awˬ laꞈ g’awˇ awˬ tehˬ yehˇ g’a ve Yeˍsuˆ aˬ htoꞈ ma k’oˆ maˍ piˇ ve le?

9 “Yawˇ ve tawˇ hkawˇ htaꞈ na yuˬ-oꞈ.” Yaˬhoˉvaˬ hk’a tawˍ lehˆ k’oˆ laˇ ve, yawˇ ve Yaˇ paˍ ve hkawˇ htaꞈ na yuˬ leh g’aꞈ te-o. Yeˍsuˆ miˬ guiˬ hk’oˆ chehˇ htaˇ aˬ htoꞈ ma k’oˆ ve le? Ngaˬ hui na yuˬ cawˇ ve laiˉ ceuˬ k’oˆ laˇ ve yoˬ. Tawˇ pa haˉ te k’o, yawˇ ve awˬ laꞈ g’awˇ htaꞈ daꞈ ve awˬ lawn sha tanˇ hto toˇ tuˬ haꞈ pehnˇ ve hk’aw maˍ piˇ leh shaw taˍ-oꞈ tehꞈ laiˉ pawˆ k’oˆ piˇ ve yoˬ. (Maꞈhtehˍ 24:42; 28:19, 20) G’uiˬ sha ve kanˉ te tcuhˉ taˍ tuˬ Yeˍsuˆ awˬ g’aˇ piˇ ve yoˬ. (Luˉkaꞈ 13:24) Yeˍsuˆ ve awˬ laꞈ g’awˇ haꞈ daꞈ tuˬ, teˇ moˍ tiˉ hpehꞈ tuˬ, leh yawˇ ve tawˇ hkawˇ htaꞈ g’aꞈ te tuˬ a yeˇ uiˍ jaˇ tehꞈ k’oˆ piˇ ve yoˬ. (Yoˇhanˬ 15:10, 12, 13) Yeˍsuˆ awˬ laꞈ g’awˇ htaꞈ k’oˆ maˍ piˇ ve awˬ tehˬ yehˇ g’a ve yoˬ! Chi ngaˬ hui awˬ co-e kaꞈ a yeˇ uiˍ jaˇ.

10-11. Ngaˬ hui Yeˍsuˆ ve tawˇ hkawˇ na yuˬ ve tehꞈ hk’aˬ hk’e hpeuꞈ maw piˇ g’a tuˬ le?

10 Yeˍsuˆ k’oˆ ve, “hteˇ ve cawˇ ve htaꞈ caˉ daꞈ ve chaw hk’a peu-eˬ lehˬ, ngaˬ ve tawˇ hkawˇ htaꞈ na ve yoˬ.” (Yoˇhanˬ 18:37) “Teˇ g’aˇ leh teˇ g’aˇ yeunˇ hkanˍ daꞈ-oꞈ. Teˇ g’aˇ leh teˇ g’aˇ venˇ baˆ taˍ daꞈ kuiˬ cawˬ k’o, venˇ baˆ hpehˇ daꞈ-oꞈ” ngaˬ hui chi hk’e te ve k’o, Yeˍsuˆ k’oˆ ve htaꞈ g’aꞈ te chehˇ ve yoˬ. (Kawˇlawˇsehˇ 3:13; Luˉkaꞈ 17:3, 4) Chi hk’oˆ kaꞈ ngaˬ hui ‘awˬ yanˇ cawˬ ve maˇ k’oˆ, maˇ cawˬ ve maˇ k’oˆ’ hto toˇ ve kanˉ coˇ caˇ leh te ve yoˬ.—2 Tiˆmoˉseˍ 4:2.

11 Yeˍsuˆ k’oˆ ve, “ngaˬ ve yawˬ teˇ hpaˍ lehˬ ngaˬ ve tawˇ hkawˇ htaꞈ na yuˬ ve yoˬ.” (Yoˇhanˬ 10:27) Awˬ laꞈ g’awˇ Yeˍsuˆ ve hkawˇ na yuˬ leh g’aꞈ te ve tehꞈ hpeuꞈ maw laˇ ve yoˬ. Yawˇ hui “dawˇ haˍ gaˇ haˍ tuˬ” htaꞈ ceh maˇ dawˇ nyi. (Luˉkaꞈ 21:34) Yaꞈ hk’aˇ, yawˇ hui a shaꞈ teꞈ kuiˬ lo Yeˍsuˆ ve hkawˇ a yeˇ uiˍ jaˇ tehꞈ shawˍ ve yoˬ. Haˍ jaˇ ve htawˇ na  yuˬ ve yoˬ. Awˬ viˉ awˬ nyi laiˉ g’aˇ beˬ ve lawˇ ve hehnˇ jaˇ ve htaꞈ g’a hpuˇ ve kaꞈ yeunˇ hkanˍ ve yoˬ. Tawˍ taˍ paˍ ngaˬ hui htaꞈ ca yaꞈ la ve, haˍ ve g’awˇ ve, leh mvuhˇ yeˬ mvuhˇ haw lonˉ g’a hpuˇ ve htaꞈ k’oˆ gaˇ ve yoˬ. Yawˇ hui chi hk’e g’a hpuˇ ve htawˇ Yaˬhoˉvaˬ htaꞈ ka tiꞈ yeˬ g’a ve yoˬ. Yeˍsuˆ yawˇ hui htaꞈ ka tiꞈ te piˇ ve, “ngaˬ piˇ taˍ ve tawˇ hkawˇ htaꞈ kaˇ leh te ve chaw lehˬ, ngaˬ htaꞈ haꞈ ve chaw hpehꞈ ve yoˬ. Ngaˬ htaꞈ haꞈ ve chaw teˇ g’aˇ htaꞈ ngaˬ Awˬ pa haꞈ tuˬ yoˬ. Ngaˬ htawˇ chaw oˇ ve htaꞈ haꞈ leh ngaˬ ve awˬ to yawˇ htaꞈ hk’a tawˍ lehˆ maw piˇ tuˬ yoˬ.”—Yoˇhanˬ 14:21.

Ngaˬ hui G’uiˬ sha ve kanˉ te ve caˉ leh Yeˍsuˆ ve hkawˇ na tuˬ te laˇ ve (Awˬ tawn 12 nyi sheˍ) *

12. Ngaˬ hui Yeˍsuˆ ve hkawˇ na yuˬ ve tehꞈ aˬ htoꞈ ma hpeuꞈ maw piˇ g’a sheˍ ve le?

12 Ngaˬ hui Yeˍsuˆ ve hkawˇ na ve teˇ hk’aˇ lehˬ yawˇ leuˆ yuˬ taˍ ve chaw hkawˇ htaꞈ na yuˬ ve yoˬ. (Heˍbrehˇ 13:7, 17) Ponˬ laˬ ve hk’aˬ nyiˇ hk’awꞈ maˇ gaˬ sheˍ G’uiˬ sha ve kanˉ hk’aˇ laiˉ ceuˬ pa ve yoˬ. Chi k’oˆ gaˇ ve lehˬ ngaˬ hui hto toˇ kuiˬ hk’aw liꞈ k’oˆ leh awˬ hk’aˇ awˬ suhˉ yehˇ ve, mvuhˇ hpeuꞈ hpawnˬ daꞈ ve pa leh hpawn daꞈ kuiˬ te leh haꞈ shaˉ ve yoˬ. Beˆ maˍ laˇ ve chi teˇ hpaˍ ngaˬ hui awˬ pon awˬ bon cawˬ leh, G’uiˬ sha ve kanˉ hk’aˇ ngaˬ hui htaꞈ haꞈ ve tehꞈ hpeuꞈ maw laˇ ve yoˬ. Chi teˇ hpaˍ htaꞈ ngaˬ hui awˬ hpfuhˇ shiˍ ve yoˬ! G’uiˬ sha ve kanˉ hk’aˇ beˆ maˍ laˇ ve htaꞈ ngaˬ hui g’aꞈ te ve k’o, yawˇ awˬ bon naꞈ laˇ tuˬ tehꞈ yonˍ g’a ve yoˬ.

13. Yeˍsuˆ k’oˆ ve htaꞈ ngaˬ hui na yuˬ htaˇ aˬ htoꞈ ma awˬ bon g’a ve le?

13 Yeˍsuˆ maˍ ve htaꞈ ngaˬ hui na yuˬ htaˇ awˬ bon g’a ve yoˬ. Yeˍsuˆ awˬ laꞈ g’awˇ hui htaꞈ ka tiꞈ te piˇ ve, yawˇ maˍ ve tawˇ lehˬ yawˇ hui nyi ma sha tuˬ te piˇ ve yoˬ. Yawˇ k’oˆ ve, “nawˬ hui ve nyi ma htawˇ g’aˇ g’a jehˇ tuˬ yoˬ. Awˬ lawn k’o, ngaˬ ve taˆ tuˬ taˆ sha leh, ngaˬ ve mawˇ htawˇ lawˬ ve yoˬ.” (Maꞈhtehˍ 11:28-30) Yeˍsuˆ ve a shaꞈ teꞈ hk’aˇ leh G’uiˬ sha ve kanˉ te ve, Liꞈ hpu hk’aw 4 daw cawˬ ve chi ngaˬ hui ha lehˬ tuˬ leh, co ha hpawˇ uiˍ la mvuh la tuˬ, leh ngaˬ hui cuˇ yiˍ cawˬ tuˬ ga laˇ ve yoˬ. (Chiˇ mvuh ve 19:7; 23:3) Yeˍsuˆ k’oˆ ve, “awˬ tehˬ awˬ na awˬ bon uiˍ ve chaw teˇ hpaˍ lehˬ, G’uiˬ sha ve tawˇ hkawˇ htaꞈ na yuˬ leh te k’ai ve chaw hui yoˬ!”—Luˉkaꞈ 11:28.

“NGAˬ VE AWˬ MEH HTAꞈ AWˬ MEꞈ AWˬ HPONˇ CAWˬ PIˇ PEUˬ”

14-15. (a) Yoˇhanˬ liꞈ 12:27, 28 hk’aw Yaˬhoˉvaˬ ve hkawˇ mvuhˇ naw ma hk’oˆ bvuhˬ tawˆ la ve shehˆ pawˆ teˇ pawˆ hk’aˬ hk’e htaˇ le? (b) Aˬ htoꞈ ma te Yaˬhoˉvaˬ ve hkawˇ Yeˍsuˆ nyi ma sha leh awˬ g’aˇ g’a jaˇ ve le?

14 Yoˇhanˬ liꞈ 12:27, 28 g’aw sheˍ. Yoˇhanˬ ve ha lehˬ ve bon hkawˇ liꞈ chi hk’aw Yaˬhoˉvaˬ ve  hkawˇ mvuhˇ naw ma hk’oˆ bvuhˬ tawˆ la ve shehˆ pawˆ teˇ pawˆ htaˇ ve bvuhꞈ taˍ ve yoˬ. Yeˍsuˆ suh-e tuˬ hk’aˬ nyiˇ nyi maˇ cawˬ-o htaˇ, yawˇ Yeˍruˆsaˍlehnˍ venˇ lo chehˇ leh Paˍsaˍhkaˍ awˬ leh meuˇ teˇ pawˆ te ve yoˬ. Yawˇ k’oˆ ve “ngaˬ nyi ma dawˇ haˍ jaˇ.” Peuˬ leh Yeˍsuˆ bon lawˬ ve, “A pa-oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ-oˆ.” Yawˇ Awˬ pa ve hkawˇ mvuhˇ naw ma hk’oˆ tawˆ la leh hk’awꞈ piˇ ve, “ngaˬ ve awˬ meh htaꞈ awˬ meꞈ awˬ hponˇ cawˬ piˇ peuˬ. Ngaˬ teˇ pawˆ k’awꞈ cawˬ piˇ tuˬ sheˍ.”

15 Yeˍsuˆ Yaˬhoˉvaˬ htaꞈ ka tiꞈ yeˬ tuˬ a yeˇ uiˍ jaˇ ve awˬ vuiˬ cawˬ ve pa taw, yawˇ nyi ma tuꞈ hkanˍ jaˇ. Yawˇ shu jawꞈ leh tuꞈ jaˇ hkanˍ jaˇ ve hk’aw g’a suh-e tuˬ shiˍ ve yoˬ. (Maꞈhtehˍ 26:38) Yaꞈ hk’aˇ, a yeˇ uiˍ jaˇ ve lehˬ Yeˍsuˆ yawˇ ve Awˬ pa ve awˬ meh htaꞈ chiˇ mvuh gaˇ ve yoˬ. Yeˍsuˆ G’uiˬ sha htaꞈ maˇ shawˍ maˇ caˆ k’oˆ ve tehꞈ shu she pfuhˍ piˇ leh, yawˇ suh-e ve G’uiˬ sha ve awˬ meh luˬ la ve htaꞈ kawˆ ve yoˬ. Yaˬhoˉvaˬ ve hkawˇ Yeˍsuˆ g’a kaˇ htaˇ, awˬ g’aˇ g’a jaˇ ve yoˬ hehˉ! Yaˬhoˉvaˬ ve awˬ meh awˬ meꞈ awˬ hponˇ g’a tuˬ yoˬ tehꞈ yawˇ hk’a dehꞈ yonˍ g’a ve yoˬ. Awˬ pa ve tawˇ Yeˍsuˆ nyi ma sha tuˬ te piˇ leh g’a hpuˇ tuˬ ve htaꞈ yeunˇ hkanˍ g’aˇ tuˬ ga piˇ ve yoˬ. Oˇ ve teˇ yanˇ Yeˍsuˆ teˇ g’aˇ tiˉ Awˬ pa ve tawˇ hk’awˇ g’a kaˇ ve htawˇ, ngaˬ hui g’a g’aw tuˬ Yaˬhoˉvaˬ Liꞈ hpu hk’aw bvuhꞈ tcuh taˍ ve yoˬ.—Yoˇhanˬ 12:29, 30.

Yaˬhoˉvaˬ yawˇ ve awˬ meh awˬ meꞈ awˬ hponˇ g’a tuˬ te leh yawˇ ve chaw g’a ponˬ tuˬ ga piˇ ve (Awˬ tawn 16 nyi sheˍ) *

16. Aˬ htoꞈ ma te teˇ pawˆ pawˆ G’uiˬ sha ve awˬ meh htaꞈ shu nyi cha la ve ngaˬ hui kawˆ ve le?

16 Yeˍsuˆ hk’a shuˍ Yaˬhoˉvaˬ ve awˬ meh htaꞈ shu  nyi cha la ve ngaˬ hui kaꞈ kawˆ ve yoˬ. Yeˍsuˆ hk’a shuˍ ngaˬ hui kaꞈ maˇ hteˇ maˇ cawˇ ve g’a hpfuhˇ la ve yoˬ. Tawˍ taˍ paˍ ngaˬ hui htaꞈ caˉ daꞈ ve awˬ lawn heˍ laˇ ve ngaˬ hui maˇ dawˇ cawˇ ve yoˬ hehˉ. Chi hk’e ve Yaˬhoˉvaˬ ve awˬ meh leh yawˇ ve kanˉ hk’aˇ luˬ la ve yoˬ. Chi ngaˬ hui g’a hpuˇ htaˇ Yaˬhoˉvaˬ ve hkawˇ awˬ g’aˇ peꞈ laˇ g’a ve yoˬ. Ngaˬ hui maˇ dawˇ haˍ dawˇ hkiˉ cawˇ. Ngaˬ hui yonˍ g’a ve, “G’uiˬ sha lo laˬ ve, chaw yaˇ hui ca dawˇ maˇ gaˬ ve dawˇ sha gaˇ sha ve teˇ ceuˬ lehˬ, [nawˬ hui] ve nyi ma leh nawˬ hui ve dawˇ hk’aˇ teˇ hpaˍ htaꞈ Yeˍsuˆ Hkriꞈ awˬ hk’aw lo haꞈ shaˉ laˇ tuˬ yoˬ.” (Hpiˇliˇpiˆ 4:6, 7) Yaˬhoˉvaˬ yawˇ ve awˬ meh awˬ meꞈ awˬ hponˇ g’a tuˬ te tuˬ yoˬ. Saˍtanˍ leh miˬ guiˬ chi Yaˬhoˉvaˬ ve chaw ka tiꞈ yeˬ ve htaꞈ tawˍ piˇ ve hk’a peu-eˬ yawˇ ve mvuhˇ miˬ htaꞈ cuˇ leh gu tuˬ yoˬ.—Chiˇ mvuh ve 94:22, 23; Iˉsaˍyaˆ 65:17.

CHI BEUꞈ TEˇ CO-E YAˬHOˉVAˬ HKAWˇ NA YUˬ VE AWˬ BON G’A VE

17. Iˉsaˍyaˆ liꞈ 30:21 hk’aw k’oˆ taˍ ve hk’e, chi beuꞈ teˇ co-e Yaˬhoˉvaˬ ngaˬ hui htaꞈ tawˇ hk’aˬ hk’e yaw laˇ ve le?

17 Chi beuꞈ teˇ co-e Yaˬhoˉvaˬ ngaˬ hui htaꞈ tawˇ yaw laˇ chehˇ sheˍ. (Iˉsaˍyaˆ 30:21 g’aw sheˍ.) Mvuhˇ naw ma hk’oˆ Yaˬhoˉvaˬ ngaˬ hui htaꞈ tawˇ yaw laˇ ve maˇ heˆ. Yaꞈ hk’aˇ, yawˇ ve tawˇ Liꞈ hpu hk’aw bvuhꞈ taˍ ve ngaˬ hui htaꞈ beˆ maˍ laˇ ve yoˬ. Chi hk’oˆ kaꞈ Yaˬhoˉvaˬ ve daꞈ kehˬ ve awˬ ha hpu ‘ka tiꞈ yeˬ leh cuˇ yiˍ cawˬ ve awˬ ceˬ’ htaꞈ cuˇ leh yawˇ ve chaw co ha hpawˇ ve caˇ tuˬ piˇ ve yoˬ. (Luˉkaꞈ 12:42) Liꞈ k’oˆ, awn laiˉ, VDO, leh awˬ hkawˇ hpaˇ ve hk’aw ngaˬ hui co ha hpawˇ ve caˇ tuˬ laiˉ ceuˬ g’a ve yoˬ!

18. Yaˬhoˉvaˬ ve tawˇ ngaˬ hui yonˍ leh hk’aˬ hk’e te haꞈ hanˉ g’a tuˬ le?

18 Yaˬhoˉvaˬ yawˇ ve Yaˇ miˬ guiˬ hk’oˆ chehˇ htaˇ tawˇ yaw piˇ ve htaꞈ ngaˬ hui tawnˇ taˍ cawˇ ve yoˬ! G’uiˬ sha ve tawˇ Liꞈ hpu hk’aw cawˬ taˍ ve ngaˬ hui yonˍ g’a tuˬ te laˇ ve yoˬ. Yaˬhoˉvaˬ lehˬ hk’a peu-eˬ htaꞈ uˉ peunˍ g’a leh Saˍtanˍ leh yawˇ ve miˬ guiˬ te taˍ ve shoꞈ shaꞈ ve htaꞈ gu laˇ tuˬ yoˬ. Yaˬhoˉvaˬ ve hkawˇ coˇ caˇ leh hk’a dehꞈ na sheˍ. Ngaˬ hui chi hk’e te ve k’o, chi teˇ hkui aˬ htoꞈ ma ve awˬ lawn g’a hpuˇ ve htawˇ awˬ g’uˇ suhˍ hpawˇ ngaˬ hui yeunˇ hkanˍ g’a tuˬ yoˬ. Liꞈ hpu hk’aw ngaˬ hui htaꞈ shaˍ tiꞈ peꞈ laˇ ve, “G’uiˬ sha ve a loˍ htaꞈ nawˬ hui te leh, yawˇ k’oˆ taˍ ve hk’e g’a hpehꞈ tuˬ, yeunˇ hkanˍ puiˉ ve nyi ma htaꞈ nawˬ hui loˍ ve yoˬ.”—Heˍbrehˇ 10:36.

K’A MUIˬ HKAWˇ 4 ‘Yaˬhoˉvaˬ lehˬ ngaˬ ve yawˬ hawˉ shehˍ hpaˇ hpehꞈ ve’

^ aw? tawn 5 Yeˍsuˆ miˬ guiˬ hk’oˆ chehˇ htaˇ, yawˇ Awˬ pa ve hkawˇ mvuhˇ naw ma hk’oˆ 3 pawˆ bvuhˬ tawˆ la ve yoˬ. Awˉ lawˉ teˇ pawˆ lehˬ Yaˬhoˉvaˬ Yeˍsuˆ ve awˬ laꞈ g’awˇ htaꞈ yawˇ ve Yaˇ paˍ ve hkawˇ htaꞈ na yuˬ-oꞈ tehꞈ k’oˆ piˇ ve yoˬ. Chi beuꞈ teˇ co-e Yaˬhoˉvaˬ Liꞈ hpu leh yawˇ ve kanˉ hk’aˇ htaꞈ cuˇ leh ngaˬ hui htaꞈ tawˇ yaw laˇ ve yoˬ. Liꞈ hpu hk’aw Yeˍsuˆ maˍ ve kaꞈ cawˬ ve yoˬ. Ngaˬ hui Yaˬhoˉvaˬ leh Yeˍsuˆ ve hkawˇ htaꞈ na yuˬ htaˇ aˬ htoꞈ ma awˬ bon g’a ve, awˬ lawn chi ve hk’aw teˇ geh henˇ tuˬ yoˬ.

^ aw? tawn 52 AWˬ HAN HTAꞈ K’Oˆ MAˍ TAˍ VE: Ga piˇ shehˍ hpaˇ hpawnˬ daꞈ kuiˬ leh liꞈ k’oˆ hpawˇ caˉ daꞈ ve htaꞈ nyi haꞈ shaˉ ve, nyi haꞈ shaˉ paˍ g’a mawˬ ve. Nyi haꞈ shaˉ paˍ yawˇ htaꞈ chiˇ mvuh piˇ ve.

^ aw? tawn 54 AWˬ HAN HTAꞈ K’Oˆ MAˍ TAˍ VE: Awˬ viˉ awˬ nyi teˇ ca Siˬyaˬleˬyonˍ mvuhˇ miˬ hk’aw ve chaw ngaˇ ca paˍ htaꞈ liꞈ k’oˆ ehˉ piˇ ve.

^ aw? tawn 56 AWˬ HAN HTAꞈ K’Oˆ MAˍ TAˍ VE: Mvuhˇ miˬ teˇ peˆ hk’aw Yaˬhoˉvaˬ ve Shaˉhkiˆhkanˍ ve chaw htaꞈ yawˇ ve kanˉ maˇ te tuˬ tawˍ piˇ leh yawˇ hui yehˬ teˇ yehˬ hk’aw hpawnˬ daꞈ ve. Yawˇ hui shu maˇ g’a dawˇ yaꞈ tuˬ guiˇ-e htaˇ ve veuꞈ k’aˇ veuꞈ ve.