Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ Lawn 7

Nyi ma nuˇ nehˬ ve chaw hpehꞈ leh Yaˬhoˉvaˬ nyi hk’aˇ suh tuˬ te piˇ-oˆ

Nyi ma nuˇ nehˬ ve chaw hpehꞈ leh Yaˬhoˉvaˬ nyi hk’aˇ suh tuˬ te piˇ-oˆ

“Nyi ma nuˇ nuˇ nehˬ nehˬ cawˬ leh  . . [Yaˬhoˉvaˬ] geh hpfuhˆ k’awꞈ la-o.  . . Nyi ma nehˬ lehˍ taˍ-oꞈ.”—ZEˍHPAˍNIˆ 2:3.

K’A MUIˬ HKAWˇ 80 Yaˬhoˉvaˬ hk’aˬ ma daꞈ ve chaˬ nyi sheˍ mehˍ

HENˇ TUˬ VE TEˇ HPAˍ *

1-2. (a) Moˉseˍ hk’aˬ hk’e ve chaw hpehꞈ ve le? Yawˇ aˬ htoꞈ ma te ve le? (b) Nyi ma nuˇ nehˬ ve chaw hpehꞈ tuˬ aˬ htoꞈ ma te ngaˬ hui te jawˬ gaˇ ve le?

Liꞈ hpu hk’aw k’oˆ ve Moˉseˍ lehˬ “miˬ guiˬ hk’oˆ chehˇ ve chaw hk’a peu-eˬ aꞈ kehˉ nyi ma nuˇ nehˬ jaˇ.” (Heh puiˉ hk’aw 12:3) Moˉseˍ awˬ g’aˇ maˇ cawˬ ve, dawˇ cheˆ maˇ puiˉ ve, shu mehˆ g’uˇ suhˍ maˇ tawˍ daꞈ haˆ ve htaꞈ k’oˆ gaˇ ve laˇ? Nyi ma nuˇ nehˬ ve chi hk’e hpehꞈ ve tehꞈ chaw teˇ hpaˍ dawˇ ve yoˬ. Yaꞈ hk’aˇ, chi awˬ tehˬ maˇ heˆ. Moˉseˍ awˬ g’aˇ hehnˇ ve, yawˇ hk’aˇ yawˇ dawˇ cheˆ g’a ve, leh G’uiˬ sha ve kanˉ te shehˍ hpaˇ haꞈ hanˉ ve chaw hpehꞈ ve yoˬ. Yaˬhoˉvaˬ Moˉseˍ htaꞈ ga piˇ ve pa taw, yawˇ Eˇjiˇtuꞈ jawˇ mawˇ geh ca mawˬ daꞈ-e g’a ve yoˬ. Iˉsaˍreˍlaˆ chaw aˬ laˬ hk’e 3,000,000 g’aˇ shehˇ de mvuhˇ miˬ lo hpanˍ k’ai leh canˇ paˍ htaꞈ tawˍ daꞈ g’aˇ tuˬ yawˇ shehˍ k’ai piˇ g’a ve yoˬ.

2 Moˉseˍ te jaw ve hk’e ngaˬ hui maˇ g’a te. Yaꞈ hk’aˇ, teˇ nyi le le g’a hpuˇ ve awˬ ceuˬ htaꞈ pa taw nyi ma nuˇ nehˬ ve chaw hpehꞈ tuˬ haˍ jaˇ. Ngaˬ hui te hk’aˇ dawˇ hk’aˇ chi hk’e ve cawˬ tuˬ te jawˬ gaˇ ve yoˬ. Awˬ lawn k’o, Yaˬhoˉvaˬ ka tiꞈ te taˍ laˇ ve “nyi ma nuˇ nehˬ ve chaw hui lehˬ mvuhˇ miˬ hk’aw” g’a chehˇ tuˬ yoˬ. (Chiˇ mvuh ve 37:11) Nawˬ nyi ma nuˇ nehˬ ve chaw hpehꞈ-aw laˇ? Shu nawˬ htaꞈ hk’aˬ hk’e dawˇ ve le? A yeˇ uiˍ ve na hkawˇ chi ve teˇ hpaˍ maˇ hk’awꞈ sheˍ htaˇ, nyi ma nuˇ nehˬ ve aˬ htoꞈ ma htaꞈ k’oˆ gaˇ ve awˉ lawˉ shiˍ cawˇ ve yoˬ.

NYI MA NUˇ NEHˬ VE Aˬ HTOꞈ MA LE?

3-4. (a) Nyi ma nuˇ nehˬ ve aˬ htoꞈ ma htaꞈ tehˆ taˍ ve le? (b) Nyi ma nuˇ nehˬ ve cawˬ tuˬ, aˬ htoꞈ ma ve te hk’aˇ dawˇ hk’aˇ g’a cawˬ ve le? Aˬ htoꞈ ma pa taw le?

3 Nyi ma nuˇ nehˬ ve lehˬ awˬ han shawehˇ ve daꞈ jaˇ ve htaꞈ shuˍ ve yoˬ. Chi hk’aˬ hk’e k’oˆ gaˇ ve le? Awˬ han shawehˇ paˍ awˬ sheuˉ laiˉ ceuˬ htaꞈ yehˇ ve hk’e, nyi ma nuˇ nehˬ ve chaw hpehꞈ tuˬ daꞈ ve te hk’aˇ dawˇ hk’aˇ g’a cawˬ ve yoˬ. A yeˇ uiˍ ve teˇ hpaˍ lehˬ uˉ peunˍ ve  awˬ hawˉ lo chehˇ ve, ha k’aˉ puiˉ ve, leh nyi ma yeˬ ve yoˬ. Ngaˬ hui Yaˬhoˉvaˬ nyi hk’aˇ suh tuˬ te piˇ gaˇ ve k’o, te hk’aˇ dawˇ hk’aˇ chi ve teˇ hpaˍ aˬ htoꞈ ma te g’a cawˬ cawˇ ve le? *

4 Nyi ma nuˇ nehˬ ve chaw ceh tiˉ G’uiˬ sha ve a loˍ htaꞈ g’aꞈ te ve yoˬ. G’uiˬ sha ve te hk’aˇ dawˇ hk’aˇ teˇ ceuˬ lehˬ ngaˬ hui ha k’aˉ puiˉ ve chaw g’a hpehꞈ ve yoˬ. (Maꞈhtehˍ 5:5; Gaˍlaˍtiˆ 5:23) Ngaˬ hui G’uiˬ sha ve a loˍ htaꞈ g’aꞈ te htaˇ, Saˍtanˍ nyi ma zuhˆ jaˇ. Chi htaꞈ pa taw, ngaˬ hui nyi ma nuˇ nehˬ leh ha k’aˉ puiˉ ve chaw hpehꞈ ve k’o, Saˍtanˍ leh miˬ guiˬ yaˇ ngaˬ hui htaꞈ nyi ma zuhˆ jaˇ tuˬ yoˬ. (Yoˇhanˬ 15:18, 19) Saˍtanˍ htaꞈ tawˍ daꞈ g’aˇ tuˬ ngaˬ hui nyi ma g’a yeˬ ve yoˬ.

5-6. (a) Aˬ htoꞈ ma te Saˍtanˍ nyi ma nuˇ nehˬ ve chaw htaꞈ nyi bawˬ ve le? (b) Aˬ htoꞈ ma ve na hkawˇ htaꞈ hk’awꞈ tuˬ le?

5 Nyi ma nuˇ nehˬ ve maˇ cawˬ ve chaw hk’aˬ hk’e hpehꞈ ve le? Yawˇ uiˍ muiˬ caˆ muiˬ ve, yawˇ ve nyi ma htaꞈ maˇ yuˬ tiˍ ve, leh Yaˬhoˉvaˬ hkawˇ maˇ na yuˬ. Chi ve hk’a peu-eˬ Saˍtanˍ ve te hk’aˇ dawˇ hk’aˇ hpehꞈ ve yoˬ. Saˍtanˍ yawˇ nyi ma nuˇ nehˬ ve chaw htaꞈ nyi bawˬ ve anˇ tuˬ maˇ loˍ! Saˍtanˍ ve te hk’aˇ dawˇ hk’aˇ hk’aˬ hk’e maˇ daꞈ ve, yawˇ heˍ shehˍ hpaˇ hpehꞈ ve, nyi ma nuˇ nehˬ ve chaw hk’a tawˍ lehˆ hpeuꞈ maw laˇ ve yoˬ. Aˬ htoꞈ ma pa taw le? Saˍtanˍ k’oˆ ve te ve Yaˬhoˉvaˬ ve chaw yawˇ ve kanˉ maˇ te tuˬ te piˇ maˇ g’a!—Yawˇbaˆ 2:3-5.

6 Ngaˬ hui nyi ma nuˇ nehˬ ve cawˬ tuˬ haˍ jaˇ ve aˬ htoꞈ ma te laˇ ve le? Aˬ htoꞈ ma te ngaˬ hui g’a coˇ caˇ ve le? Moˉseˍ, Baˍbuˍlonˍ mvuhˇ miˬ hk’aw chehˇ ve Heˍbrehˇ chaw yaˇ nehˬ 3 g’aˇ, Yeˍsuˆ leh chaw chi teˇ hpaˍ ve awˬ lawn htaꞈ hk’awꞈ tuˬ yoˬ.

NYI MA NUˇ NEHˬ VE CAWˬ TUˬ HAˍ JAˇ VE HK’Aˬ HK’E HTAˇ LE?

7-8. Moˉseˍ htaꞈ maˇ yawˆ yan piˇ htaˇ yawˇ hk’aˬ hk’e te ve le?

7 Ngaˬ hui kanˇ paˆ cawˬ htaˇ. Kanˇ paˆ cawˬ ve chaw nyi ma nuˇ nehˬ ve cawˬ tuˬ haˍ jaˇ. Aˬ htoꞈ ma pa taw le? Teˇ pawˆ pawˆ kanˇ paˆ cawˬ ve awˬ hawˉ lo chehˇ ve chaw lehˬ yawˇ htaꞈ maˇ yawˆ yan, maˇ heˆ leh yawˇ suhˉ jehˬ ve htaꞈ htawˇ dawˇ nawˬ dawˇ cawˬ ve yoˬ. Nawˬ chi hk’e g’a hpuˇ jaw-aw laˇ? Nawˬ ve yehˬ k’a hk’aw ve chaw chi hk’e hpehꞈ ve k’o-ehꞈ? Nawˬ hk’aˬ hk’e te tuˬ le? Moˉseˍ hk’aˬ hk’e te ve teˇ geh dawˇ nyi sheˍ.

 8 Yaˬhoˉvaˬ Moˉseˍ Iˉsaˍreˍlaˆ chaw htaꞈ sheh k’ai tcuh leh yawˇ hui htaꞈ uˉ peunˍ tuˬ awˬ liˇ bvuhꞈ tcuh ve yoˬ. Moˉseˍ htaꞈ Yaˬhoˉvaˬ awˬ g’aˇ piˇ ve ngaˬ hui htawˇ dawˇ nawˬ dawˇ cawˬ tuˬ maˇ loˍ. Yaꞈ hk’aˇ, Moˉseˍ ve awˬ viˉ paˍ Aˍronˍ leh awˬ viˉ ma Meˇriˆanˍ Moˉseˍ htaꞈ daꞈ ve awˬ miˇ ma maˇ heuˆ tehꞈ k’oˆ piˇ ve yoˬ. Chaw teˇ hpaˍ Moˉseˍ hk’e aˉ yaˇ cawˬ ve k’o, yawˇ nyi ma zuhˆ leh te hk’awꞈ gaˇ tuˬ yoˬ hehˉ. Yaꞈ hk’aˇ, yawˇ chi hk’e maˇ dawˇ. Yawˇ nyi ma haˆ haˆ maˇ zuhˆ tcuh. Meˇriˆanˍ htaꞈ hkeu piˇ ve pa taw hkiˬ tuꞈ a naˍ keuˆ leh haꞈ shaˉ piˇ tuˬ, Moˉseˍ Yaˬhoˉvaˬ geh bon lawˬ ve yoˬ. (Heh puiˉ hk’aw 12:1-13) Aˬ htoꞈ ma pa taw le?

Meˇriˆanˍ htaꞈ hkeu piˇ ve pa taw hkiˬ tuꞈ a naˍ keuˆ leh haꞈ shaˉ piˇ tuˬ Moˉseˍ Yaˬhoˉvaˬ geh bon lawˬ ve (Awˬ tawn 8 nyi sheˍ)

9-10. (a) Moˉseˍ na g’a tuˬ Yaˬhoˉvaˬ aˬ htoꞈ ma ga piˇ ve le? (b) Yehˬ shehˍ hpaˇ leh nyi haꞈ shaˉ paˍ Moˉseˍ ve awˬ lawn htaꞈ aˬ htoꞈ ma henˇ yuˬ g’a ve le?

9 Moˉseˍ Yaˬhoˉvaˬ htaꞈ maˍ tcuh ve yoˬ. Peuˬ taˉ ve 40 hk’awꞈ yawˇ Eˇjiˇtuꞈ ve hawˉ yehˬ hk’aw chehˇ htaˇ yawˇ nyi ma maˇ nuˇ nehˬ. Awˬ tehˬ k’o, yawˇ nyi ma zuhˆ puiˉ jaˇ. Teˇ pawˆ htaˇ, chaw teˇ g’aˇ maˇ hteˇ maˇ cawˇ ve tehꞈ Moˉseˍ dawˇ leh yawˇ htaꞈ tiˇ pehˍ piˇ ve yoˬ. Yawˇ te ve htaꞈ Yaˬhoˉvaˬ dawˇ cawˇ ve tehꞈ yawˇ dawˇ ve yoˬ. Moˉseˍ na g’a tuˬ Yaˬhoˉvaˬ awˬ yanˇ 40 hk’awꞈ yehˇ ve yoˬ. Hk’e te leh, Iˉsaˍreˍlaˆ chaw htaꞈ sheh k’ai tuˬ haꞈ hanˉ ve ceh maˇ lawꞈ. Nyi ma nuˇ nehˬ ve kaꞈ g’a cawˬ ve yoˬ. Moˉseˍ kanˇ paˆ awˬ hawˉ lo g’a chehˇ leh ha k’aˉ puiˉ cawˇ ve yoˬ. Moˉseˍ hk’a dehꞈ na yuˬ leh daꞈ jaˇ ve sheh k’ai paˍ hpehꞈ ve yoˬ.—Tawˆ k’ai ve 2:11, 12; Tcuh yaˇ 7:21-30, 36.

10 Chi beuꞈ teˇ co-e yehˬ shehˍ hpaˇ leh nyi haꞈ shaˉ paˍ Moˉseˍ htaꞈ henˇ yuˬ cawˇ ve yoˬ. Nawˬ htaꞈ shu maˇ yawˆ yan laˇ htaˇ, nyi ma haˆ haˆ taˇ zuhˆ. Nyi ma nuˇ nehˬ te leh nawˬ te yaꞈ ve htaꞈ haꞈ yuˬ sheˍ. (Cuˇ yiˍ piˇ ve 7:9, 20) Yaˬhoˉvaˬ ve kanˇ paˆ awˬ hawˉ lo chehˇ leh shoꞈ shaꞈ ve awˬ lawn htaꞈ gu laˇ tuˬ beˆ maˍ laˇ ve htaꞈ haꞈ yuˬ sheˍ. Shu htaꞈ hk’aˬ htaˆ kaꞈ nuˇ nehˬ ve hk’aw hk’awꞈ piˇ sheˍ. (Tawˇ naˉ ve 15:1) Yehˬ shehˍ hpaˇ leh nyi haꞈ shaˉ paˍ chi hk’e te htaˇ Yaˬhoˉvaˬ nyi hk’aˇ suh tuˬ te piˇ leh, dawˇ sha gawˬ lehˍ ve cawˬ leh, nyi ma nuˇ nehˬ ve daꞈ ve henˇ yuˬ tuˬ hpehꞈ ve yoˬ.

11-13. Heˍbrehˇ chaw 3 g’aˇ ngaˬ hui henˇ tuˬ aˬ htoꞈ ma te maˍ laˇ ve le?

11 Fawˉ mehˍ ve g’a hpuˇ htaˇ: Peuˬ laˬ ve awˬ yanˇ uˉ peunˍ shehˍ hpaˇ chaw yaˇ lehˬ G’uiˬ sha ve chaw htaꞈ fawˉ mehˍ ve yoˬ. Ngaˬ hui laiˉ ceuˬ te yaꞈ ve tehꞈ yawˇ hui k’oˆ laˇ ve yoˬ. Awˬ tehˬ k’o, “chaw yaˇ ve tawˇ hkawˇ aꞈ kehˉ G’uiˬ sha ve tawˇ hkawˇ htaꞈ ngaˬ hui g’a na yuˬ ve yoˬ.” (Tcuh yaˇ 5:29) Ngaˬ hui htaꞈ k’oˆ guiˇ g’uiˬ guiˇ laˇ ve, htawnˍ hk’aw lo g’a chehˇ ve, maˇ heˆ leh awˬ to htaꞈ naˬ tuˬ te laˇ ve yoˬ hehˉ. Yaꞈ hk’aˇ, Yaˬhoˉvaˬ ga laˇ ve pa taw, fawˉ mehˍ ve g’a hpuˇ htaˇ, ngaˬ hui nyi ma gawˬ lehˍ cawˬ leh maˇ te hk’awꞈ ve yoˬ.

12 Heˍbrehˇ chaw yaˇ nehˬ 3 g’aˇ Shaˆdraˆ,  Meˍshehˆ, leh Aˍbeˍdaˍneˍgoˍ htaꞈ dawˇ nyi sheˍ. * Baˍbuˍlonˍ jawˇ mawˇ yawˇ hui shi shaˉ hoꞈ lonˉ htaꞈ oˉ k’oˍ pui tcuh ve yoˬ. Yawˇ hui aˬ htoꞈ ma te oˉ k’oˍ maˇ pui ve, nyi ma nuˇ nehˬ ve hk’aw k’oˆ piˇ ve yoˬ. Aˬ miˍ buiˬ hpfuh hk’aw lo baˬ keu tuˬ yoˬ tehꞈ jawˇ mawˇ kawˆ ho piˇ ve htawˇ, yawˇ hui Yaˬhoˉvaˬ hkawˇ na yuˬ ve yoˬ. Yaˬhoˉvaˬ laꞈ haˉ ga piˇ ve yoˬ. Yawˇ chi hk’e te tuˬ yawˇ hui maˇ dawˇ law. Awˬ tehˬ k’o, yawˇ hk’aˬ hk’e hpehꞈ la tcuh ve htawˇ, yawˇ hui haꞈ yuˬ ve yoˬ. (Daˍyeˍlaˆ 3:1, 8-28) Nyi ma nuˇ nehˬ ve chaw haꞈ hanˉ jaˇ ve tehꞈ yawˇ hui hpeuꞈ maw piˇ ve yoˬ. Ngaˬ hui ‘Yaˬhoˉvaˬ teˇ g’aˇ htaꞈ ceh tiˉ oˉ k’oˍ pui ve’ dawˇ teh taˍ ve htaꞈ jawˇ mawˇ, kawˆ ho ve, leh fawˉ mehˍ ve teˇ hpaˍ te luˬ laˇ maˇ g’a.—Tawˆ k’ai ve 20:4, 5.

13 Ngaˬ hui G’uiˬ sha htaꞈ ka tiꞈ yeˬ ve lawˇ nyi laˇ htaˇ, yaˇ nehˬ 3 g’aˇ htaꞈ hk’aˬ hk’e te henˇ yuˬ g’a tuˬ le? Ngaˬ hui nyi ma nuˇ nehˬ leh Yaˬhoˉvaˬ ga laˇ tuˬ yoˬ tehꞈ yonˍ ve yoˬ. (Chiˇ mvuh ve 118:6, 7) Ngaˬ hui yaꞈ ve tehꞈ shu k’oˆ laˇ htaˇ, nyi ma nuˇ nehˬ ve hk’aw yaw hk’awꞈ piˇ ve yoˬ. (1 Peˍtruˆ 3:15) Chi hk’oˆ kaꞈ, ngaˬ hui ve Awˬ pa geh meuˆ daꞈ ve htaꞈ teˇ g’aˇ-ehˬ kaꞈ maˇ te luˬ laˇ tcuh.

Shu ngaˬ hui htaꞈ tawˍ laˇ htaˇ nyi ma nuˇ nehˬ ve hk’aw hk’awꞈ piˇ ve (Awˬ tawn 13 nyi sheˍ)

14-15. (a) Ngaˬ hui dawˇ haˍ dawˇ hkiˉ htaˇ aˬ htoꞈ ma hpehꞈ la g’a ve le? (b) Iˉsaˍyaˆ liꞈ 53:7, 10 hk’aw k’oˆ taˍ ve hk’e, Yeˍsuˆ dawˇ haˍ dawˇ hkiˉ ve g’a hpuˇ htaˇ kaꞈ nyi ma nuˇ nehˬ jaˇ ve tehꞈ aˬ htoꞈ ma te ngaˬ hui k’oˆ g’a ve le?

14 Dawˇ haˍ dawˇ hkiˉ htaˇ. Teˇ g’aˇ leh teˇ g’aˇ dawˇ haˍ ve maˇ shuˍ daꞈ. Liꞈ henˇ yehˬ lo liꞈ maˇ na sheˍ htaˇ, kanˉ teˇ ceuˬ ceuˬ maˇ te sheˍ htaˇ, maˇ heˆ leh chehˇ sha cawˬ sha hpawˇ g’a nyi haꞈ shaˉ htaˇ, ngaˬ hui dawˇ haˍ dawˇ hkiˉ ve yoˬ. Ngaˬ hui dawˇ haˍ dawˇ hkiˉ htaˇ, nyi ma nuˇ nehˬ tuˬ maˇ sha. A hk’e leˇ ve awˬ lawn htawˇ, shoꞈ shaꞈ tuˬ te laˇ g’a ve yoˬ. Ngaˬ hui maˇ daꞈ ve tawˇ yaw la ve yoˬ. Nawˬ dawˇ haˍ dawˇ hkiˉ htaˇ, Yeˍsuˆ htaꞈ dawˇ nyi sheˍ.

15 Yeˍsuˆ miˬ guiˬ hk’oˆ chehˇ ve hk’aˬ nyiˇ ha pa maˇ cawˬ-o htaˇ, yawˇ dawˇ haˍ dawˇ hkiˉ jaˇ. Yawˇ htaꞈ tuꞈ hkanˍ jaˇ ve hk’aw tiˇ pehˍ laˇ tuˬ yawˇ shiˍ ve yoˬ. (Yoˇhanˬ 3:14, 15; Gaˍlaˍtiˆ 3:13) Yawˇ suh-e tuˬ ve hk’aˬ nyiˇ ha pa maˇ cawˬ-o htaˇ, yawˇ tuꞈ hkanˍ jaˇ. (Luˉkaꞈ 12:50) Yawˇ suh-e tuˬ ve hk’aˬ nyiˇ nyi maˇ cawˬ-o htaˇ yawˇ k’oˆ ve, “ngaˬ nyi ma dawˇ haˍ jaˇ.” Yeˍsuˆ bon lawˬ ve hk’aw dawˇ haˍ ve hk’a peu-eˬ Yaˬhoˉvaˬ htaꞈ hto piˇ ve pa taw, yawˇ nyi ma nuˇ nehˬ leh G’uiˬ sha ve kanˇ paˆ awˬ hawˉ lo chehˇ ve tehꞈ ngaˬ hui hk’a tawˍ lehˆ g’a mawˬ ve yoˬ. Yeˍsuˆ k’oˆ ve, “A pa-oˬ, awˬ yanˇ chi awˬ hk’aw lo ngaˬ htaꞈ htaiˍ hk’awꞈ laˇ-oˆ tehꞈ g’a k’oˆ tuˬ laˇ. Maˇ heˆ, awˬ lawn k’o awˬ yanˇ chi awˬ pon ngaˬ gaˬ la peuˬ. A pa-oˬ, nawˬ ve awˬ meh htaꞈ awˬ meꞈ awˬ hponˇ tawˆ la piˇ-oˆ.” (Yoˇhanˬ 12:27, 28) Awˬ yanˇ gaˬ la htaˇ, Yeˍsuˆ haꞈ hanˉ ve hk’aw canˇ paˍ htaꞈ awˬ to aꞈ piˇ ve yoˬ. Yawˇ hui tuꞈ hkanˍ leh yaꞈ taw jaˇ ve hk’aw tiˇ pehˍ piˇ ve yoˬ. Tuꞈ jaˇ hkanˍ jaˇ leh dawˇ haˍ jaˇ ve htawˇ, yawˇ nyi ma nuˇ nehˬ ve hk’aw G’uiˬ sha ve a loˍ htaꞈ g’aꞈ te ve yoˬ. Yeˍsuˆ dawˇ haˍ htaˇ kaꞈ nyi ma nuˇ nehˬ ve daꞈ ve henˇ yuˬ tuˬ hpehꞈ ve tehꞈ ngaˬ hui k’oˆ g’a ve yoˬ!—Iˉsaˍyaˆ 53:7, 10 g’aw sheˍ.

Yeˍsuˆ lehˬ nyi ma nuˇ nehˬ ve daꞈ jaˇ ve henˇ yuˬ tuˬ hpehꞈ ve (Awˬ tawn 16-17 nyi sheˍ) *

16-17. (a) Yeˍsuˆ ve awˬ chawˇ meuˆ daꞈ jaˇ ve yawˇ htaꞈ hk’aˬ hk’e lawˇ nyi piˇ ve le? (b) Ngaˬ hui hk’aˬ hk’e te Yeˍsuˆ htaꞈ henˇ yuˬ g’a tuˬ le?

16 Yeˍsuˆ miˬ guiˬ hk’oˆ chehˇ ve awˬ leh meuˇ teˇ haˉ htaˇ, meuˆ daꞈ jaˇ ve awˬ chawˇ yawˇ htaꞈ lawˇ nyi piˇ ve yoˬ. Yeˍsuˆ hk’aˬ hk’e taw dawˇ haˍ ve htaꞈ dawˇ nyi sheˍ. Yawˇ awˬ leh meuˇ hk’a gaˬ ka tiꞈ yeˬ g’a-aw laˇ? Chi ve chaw laiˉ lanˬ g’aˇ htaꞈ heuˆ la kuiˬ cawˬ ve yoˬ. (Roˉmaꞈ 5:18, 19) Yawˇ ve Awˬ pa ve awˬ meh htaꞈ kaꞈ caˉ daꞈ ve yoˬ. (Yawˇbaˆ 2:4) Peuˬ hk’awꞈ nawˉ, yawˇ ve awˬ chawˇ meuˆ daꞈ jaˇ ve geh awˬ leh meuˇ teˇ pawˆ awˍ caˇ chehˇ htaˇ, “yawˇ  hui awˬ hk’aw lo hk’aˬ ve teˇ g’aˇ shu aꞈ kehˉ g’a uiˍ tuˬ le tehꞈ, teˇ g’aˇ leh teˇ g’aˇ g’awˬ daꞈ ve yoˬ.” Awˬ lawn chi hk’e ve Yeˍsuˆ yawˇ hui ve dawˇ hk’aˇ htaꞈ laiˉ pawˆ gu piˇ-oˬ. Oˇ ve teˇ haˉ hk’aw ceh kaꞈ gu piˇ! Yaꞈ hk’aˇ, yawˇ nyi ma maˇ zuhˆ leh nyi ma nuˇ nehˬ ve hk’aw hk’awꞈ piˇ ve yoˬ. Awˬ tehˬ ha k’aˉ ve dawˇ hk’aˇ yawˇ hui cawˬ cawˇ ve Yeˍsuˆ teˇ pawˆ k’awꞈ k’oˆ maˍ piˇ ve yoˬ. Yawˇ ve awˬ chawˇ ka tiꞈ yeˬ leh yawˇ hpawˇ chehˇ ve htaꞈ pa taw, chiˇ mvuh piˇ ve yoˬ.—Luˉkaꞈ 22:24-28; Yoˇhanˬ 13:1-5, 12-15.

17 Nawˬ chi hk’e g’a hpuˇ htaˇ hk’aˬ hk’e te tuˬ le? Dawˇ haˍ dawˇ hkiˉ htaˇ, Yeˍsuˆ htaꞈ henˇ yuˬ leh nyi ma maˇ zuhˆ tuˬ coˇ caˇ sheˍ. Ngaˬ hui Yaˬhoˉvaˬ uˉ peunˍ ve awˬ hawˉ lo chehˇ leh “teˇ g’aˇ leh teˇ g’aˇ yeunˇ hkanˍ daꞈ-oꞈ” tehꞈ yawˇ k’oˆ ve htaꞈ na yuˬ sheˍ. (Kawˇlawˇsehˇ 3:13) Ngaˬ hui k’oˆ ve leh te ve shu nyi ma zuhˆ tuˬ te piˇ g’a ve tehꞈ tawnˇ taˍ ve k’o, tawˇ hkawˇ oˇ ve na yuˬ g’a ve yoˬ. (Tawˇ naˉ ve 12:18; Yaˍkoˆ 3:2, 5) Shu daꞈ ve awˬ ceuˬ htaꞈ kaꞈ k’oˆ sheˍ.—Eˇfeˇsuꞈ 4:29.

NYI MA NUˇ NEHˬ TUˬ Aˬ HTOꞈ MA TE NGAˬ HUI CAˉ LEH COˇ CAˇ CAWˇ VE LE?

18. Yaˬhoˉvaˬ nyi ma nuˇ nehˬ ve chaw hk’a dehꞈ dawˇ cheˆ g’a tuˬ hk’aˬ hk’e ga piˇ ve le? Ngaˬ hui coˇ caˇ leh aˬ htoꞈ ma g’a te cawˇ ve le?

18 Ngaˬ hui hk’a dehꞈ dawˇ cheˆ g’a ve. Haˍ jaˇ ve awˬ ceuˬ g’a hpuˇ htaˇ, ngaˬ hui hk’a dehꞈ dawˇ cheˆ g’a tuˬ Yaˬhoˉvaˬ ga laˇ ve yoˬ. Yaꞈ hk’aˇ, ngaˬ hui nyi ma g’a nuˇ nehˬ ve yoˬ. Yawˇ ka tiꞈ te laˇ ve, “nyi ma nuˇ nuˇ nehˬ nehˬ cawˬ ve chaw hui ve bon lawˬ hkawˇ htaꞈ na yuˬ” tuˬ yoˬ. (Chiˇ mvuh ve 10:17) Yawˇ na ve ceh maˇ te. Liꞈ hpu hk’aw ka tiꞈ te laˇ ve,“nyi ma nuˇ nehˬ cawˬ ve chaw hui htaꞈ cawˇ ve yaꞈ k’aw hk’aw yawˇ shiˍ k’ai piˇ leh, yawˇ ve dawˇ hk’aˇ yawˇ hui htaꞈ maˍ piˇ ve yoˬ.” (Chiˇ mvuh ve 25:9) Yaˬhoˉvaˬ Liꞈ hpu, kanˉ hk’aˇ hk’aw ve liꞈ k’oˆ, * leh “ka tiꞈ yeˬ leh cuˇ yiˍ cawˬ ve awˬ ceˬ” geh laˬ ve teˇ hpaˍ cuˇ leh beˆ maˍ laˇ ve yoˬ. (Maꞈhtehˍ 24:45-47) Ngaˬ hui ve awˬ vuiˬ ngaˬ hui g’a te ve yoˬ. Ngaˬ hui ga laˇ tuˬ loˍ ve tehꞈ nyi ma nuˇ nehˬ ve hk’aw haꞈ yuˬ ve, Yaˬhoˉvaˬ gu taˍ laˇ ve htaꞈ henˇ leh g’aꞈ te cawˇ ve yoˬ.

19-21. Moˉseˍ Kaˍdeˍshaˆ venˇ lo aˬ htoꞈ ma te yaꞈ ve le? Awˬ lawn chi ngaˬ hui htaꞈ aˬ htoꞈ ma maˍ laˇ ve le?

19 Te yaꞈ ve htaꞈ ngaˬ hui jaw hpaw-e g’a ve. Moˉseˍ htaꞈ teˇ pawˆ k’awꞈ dawˇ nyi sheˍ. Laiˉ chi hk’awꞈ yawˇ nyi ma nuˇ nehˬ leh Yaˬhoˉvaˬ nyi hk’aˇ suh tuˬ te piˇ ve yoˬ. Heh puiˉ hk’aw lo 40 hk’awꞈ te toˇ ve awˬ leh meuˇ htaˇ, Moˉseˍ nyi ma maˇ nuˇ nehˬ. Moˉseˍ awˬ viˉ ma Eˇjiˇtuꞈ mvuhˇ miˬ hk’aw yawˇ htaꞈ ga piˇ jaw ve suh-e leh Kaˍdeˍshaˆ venˇ  lo tuˍ taˉ ve yoˬ. Iˉsaˍreˍlaˆ chaw keunˍ lawꞈ cawˇ lawꞈ ve hk’aw nyi haꞈ shaˉ laˇ tuˬ teˇ pawˆ k’awꞈ lawˬ piˇ ve yoˬ. Yawˇ hui iˉ kaˆ maˇ cawˬ k’oˆ leh Moˉseˍ geh hk’anˇ maˍ piˇ ve yoˬ. Yaˬhoˉvaˬ Moˉseˍ htaꞈ cuˇ leh anˇ tuˬ laiˉ ceuˬ te tcuh ve, Moˉseˍ yawˇ awˬ to pon maˇ dawˇ nyi leh daꞈ ve sheh k’ai shehˍ hpaˇ hk’aˬ htaˆ kaꞈ hpehꞈ ve htawˇ, yawˇ hui hk’anˇ maˍ piˇ sheˍ ve yoˬ. Iˉ kaˆ maˇ cawˬ ve htaꞈ ceh hk’anˇ ve maˇ heˆ. Yawˇ hui iˉ kaˆ maˇ g’a dawˬ ve chi Moˉseˍ htaꞈ pa taw yoˬ tehꞈ k’oˆ leh hk’anˇ maˍ piˇ ve yoˬ.—Heh puiˉ hk’aw 20:1-5, 9-11.

20 Moˉseˍ nyi ma zuhˆ leh maˇ ha k’aˉ puiˉ. Yonˍ ve hk’aw haˉ hpawˇ htaꞈ tawˇ yaw piˇ cawˇ ve htawˇ, yawˇ chaw yaˇ htaꞈ nyi ma zuhˆ ve hk’aw tawˇ yaw piˇ leh yawˇ awˬ to htaꞈ chiˇ mvuh ve yoˬ. Yawˇ haˉ hpawˇ htaꞈ 2 pawˆ dawˆ leh iˉ kaˆ maˇ maˇ tawˆ la ve yoˬ. Uiˍ muiˬ caˆ muiˬ ve leh nyi ma zuhˆ ve htaꞈ pa taw, yawˇ venˇ baˆ uiˍ ve htaꞈ te ve yoˬ. (Chiˇ mvuh ve 106:32, 33) Moˉseˍ teˇ tcuhˉ teˇ yanˇ nyi ma maˇ nuˇ nehˬ ve pa taw, ka tiꞈ te taˍ ve mvuhˇ miˬ hk’aw maˇ g’a loꞈ-e.—Heh puiˉ hk’aw 20:12.

21 Ngaˬ hui awˬ hpfuhˇ hk’aˆ jaˇ ve htaꞈ g’a henˇ ve yoˬ. (1) Nyi ma nuˇ nehˬ ve chaw hpehꞈ tuˬ g’a coˇ caˇ jaˇ. Teˇ hkui tiˉ a yeˇ maˇ te ve k’o, uiˍ muiˬ caˆ muiˬ leh cuˇ yiˍ maˇ cawˬ ve hk’aw k’oˆ leh te la ve yoˬ. (2) Dawˇ haˍ dawˇ hkiˉ ve ngaˬ hui awˬ g’a nuˇ tuˬ te laˇ g’a ve yoˬ. Chi htaꞈ pa taw, shu nyiˉ laˇ ve htawˇ, nyi ma nuˇ nehˬ tuˬ coˇ caˇ sheˍ.

22-23. (a) Aˬ htoꞈ ma te nyi ma nuˇ nehˬ ve chaw hpehꞈ tuˬ ngaˬ hui g’a coˇ caˇ cawˇ ve le? (b) Zeˍhpaˍniˆ liꞈ 2:3 hk’aw hk’aˬ hk’e k’oˆ gaˇ ve le?

22 Ngaˬ hui haꞈ shaˉ laˇ ve htaꞈ g’a ve. Maˇ maw k’o Yaˬhoˉvaˬ haiˬ jaˇ ve hk’a peu-eˬ htaꞈ te luˬ leh nyi ma nuˇ nehˬ ve chaw ceh leuˉ taˉ tuˬ yoˬ. Miˬ guiˬ hk’oˆ awˬ tehˬ dawˇ sha gawˬ lehˍ ve tiˉ cawˬ tuˬ yoˬ. (Chiˇ mvuh ve 37:10, 11) Nawˬ kaꞈ teˇ g’aˇ nyi ma nuˇ nehˬ ve chaw hpehꞈ-aw laˇ? Yaˬhoˉvaˬ tcuh kaˍ paˍ Zeˍhpaˍniˆ htaꞈ cuˇ leh k’oˆ tcuh taˍ ve nawˬ na yuˬ ve k’o, hpehꞈ g’a tuˬ yoˬ.—Zeˍhpaˍniˆ 2:3 g’aw sheˍ.

23 Aˬ htoꞈ ma te Zeˍhpaˍniˆ liꞈ 2:3 hk’aw k’oˆ ve, “G’uiˬ sha nyi ma zuhˆ ve awˬ nyi gaˬ la htaˇ, yawˇ nawˬ hui htaꞈ ponˬ laˇ tuˬ naˍ, maˇ shiˍ.” Yaˬhoˉvaˬ htaꞈ haꞈ ve chaw hui yawˇ ponˬ piˇ maˇ g’a ve tehꞈ k’oˆ gaˇ ve maˇ heˆ. Yaꞈ hk’aˇ, daꞈ ve awˬ bon htaꞈ g’a tuˬ ngaˬ hui ve awˬ vuiˬ g’a te ve tehꞈ k’oˆ gaˇ ve yoˬ. “G’uiˬ sha nyi ma zuhˆ ve awˬ nyi gaˬ la htaˇ” ngaˬ hui ponˬ tuˬ a hkaw-anˬ cawˬ leh co co taiˍ taiˍ ve a shaꞈ g’a tuˬ yoˬ. Yaꞈ hk’aˇ, ngaˬ hui chi teˇ hkui kaꞈ nyi ma nuˇ nehˬ ve chaw hpehꞈ tuˬ coˇ caˇ leh Yaˬhoˉvaˬ nyi hk’aˇ suh tuˬ te cawˇ ve yoˬ.

K’A MUIˬ HKAWˇ 120 Yeˍsuˆ Hkriꞈ nyi ma nuˇ nehˬ ve htaꞈ henˇ yuˬ-oꞈ

^ aw? tawn 5 Paw la htaˇ teˇ g’aˇ-ehˬ kaꞈ nyi ma nuˇ nehˬ ve maˇ cawˬ. Chi hk’e ve cawˬ tuˬ ngaˬ hui g’a te jawˬ ve yoˬ. Ngaˬ hui nyi ma nuˇ nehˬ ve chaw geh awˬ chawˇ te htaˇ, nyi ma nuˇ nehˬ cawˬ tuˬ sha ve tehꞈ dawˇ ve yoˬ. Yaꞈ hk’aˇ, ngaˬ hui uiˍ muiˬ caˆ muiˬ ve chaw geh awˬ chawˇ te htaˇ, nyi ma nuˇ nehˬ cawˬ tuˬ haˍ jaˇ tehꞈ dawˇ ve yoˬ. Nyi ma nuˇ nehˬ ve chaw hpehꞈ tuˬ beˬ ve lawˇ ve teˇ hpaˍ htaꞈ ngaˬ hui g’a g’aˇ tcuh ve awˬ lawn chi ve hk’aw teˇ geh henˇ tuˬ yoˬ.

^ aw? tawn 3 K’AWꞈ K’Oˆ MAˍ TAˍ VE: Nyi ma nuˇ nehˬ ve. Nyi ma nuˇ nehˬ ve chaw lehˬ shu geh tawˇ yaw daꞈ htaˇ nuˇ nehˬ ve hk’aw yaw piˇ leh shu nyi ma zuhˆ tuˬ te piˇ htaˇ kaꞈ yawˇ nyi ma gawˬ lehˍ cawˬ ve yoˬ. Yawˇ hui uiˍ muiˬ caˆ muiˬ ve maˇ cawˬ leh shu yawˇ hui aꞈ kehˉ daꞈ ve tehꞈ dawˇ ve yoˬ. Yaˬhoˉvaˬ kaꞈ nyi ma nuˇ nehˬ ve yoˬ. Yawˇ haꞈ pehnˇ ve leh ha k’aˉ puiˉ ve hk’aw chaw yaˇ geh tawˇ yaw ve yoˬ.

^ aw? tawn 12 Baˍbuˍlonˍ chaw Heˍbrehˇ chaw yaˇ nehˬ 3 g’aˇ htaꞈ Shaˆdraˆ, Meˍshehˆ, Aˍbeˍdaˍneˍgoˍ tehꞈ awˬ meh awˬ suhˉ k’awꞈ meh piˇ taˍ ve yoˬ.—Daˍyeˍlaˆ. 1:7.

^ aw? tawn 18 Shaw nyi kuiˬ Taꞈ yehˬ Ha pa 4 maˬ 15 nyi 2011 hk’awꞈ hk’aw ve “G’uiˬ sha awˬ meꞈ awˬ hponˇ g’a tuˬ dawˇ cheˆ ve” htaꞈ nyi sheˍ.

^ aw? tawn 59 K’AWꞈ K’Oˆ MAˍ TAˍ VE: Yawˇ hui awˬ hk’aw lo hk’aˬ ve teˇ g’aˇ shu aꞈ kehˉ g’a uiˍ tuˬ le tehꞈ, teˇ g’aˇ leh teˇ g’aˇ g’awˬ daꞈ peuˬ hk’awꞈ nawˉ, Yeˍsuˆ nyi ma nuˇ nehˬ ve hk’aw tcuh yaˇ hui ve dawˇ hk’aˇ htaꞈ gu piˇ ve.