Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

Yonˍ ve​—Ngaˬ hui awˬ g’aˇ hehnˇ tuˬ te laˇ ve

Yonˍ ve​—Ngaˬ hui awˬ g’aˇ hehnˇ tuˬ te laˇ ve

Yonˍ ve ngaˬ hui awˬ g’aˇ hehnˇ tuˬ te laˇ ve yoˬ. Chi Saˍtanˍ ngaˬ hui htaꞈ co ha hpawˇ tiˇ pehˍ gaˇ ve htawˇ, yonˍ ve htaꞈ pa taw “haiˬ ve awˬ shehˍ hpaˇ teˇ g’aˇ bawˆ laˇ ve aˬ miˍ to chehˇ ve hk’aˆ ce teˇ hpaˍ htaꞈ tiˇ pehˍ” g’a ve yoˬ. (Eˇfeˇsuꞈ 6:16) Ngaˬ hui yonˍ ve k’o, shoꞈ shaꞈ ve hk’aw hk’a shuˍ uiˍ ve htawˇ yeunˇ hkanˍ g’aˇ ve yoˬ. Yeˍsuˆ awˬ laꞈ g’awˇ htaꞈ k’oˆ piˇ ve, “nawˬ hui yonˍ ve teˇ ceuˬ g’awˇ caˉ yawˇ hk’e hui cawˬ ve k’o, hk’aw chi teˇ shiˍ htaꞈ, oˇ kaˬ lo jiˆ k’ai-o tehꞈ k’oˆ piˇ ve teˇ yanˇ, jiˆ k’ai tuˬ yoˬ.” (Maꞈhtehˍ 17:20) Yonˍ ve lehˬ ngaˬ hui co ha hpawˇ awˬ g’aˇ hehnˇ la tuˬ ga laˇ ve yoˬ. Yonˍ ve lehˬ aˬ htoꞈ ma le? Ngaˬ hui ve nyi ma yonˍ hk’aˇ htaꞈ hk’aˬ hk’e te heuˆ la g’a ve le? Ngaˬ hui ve yonˍ hk’aˇ uiˍ la mvuh la tuˬ hk’aˬ hk’e te g’a tuˬ le?—Roˉmaꞈ 4:3.

YONˍ VE LEHˬ Aˬ HTOꞈ MA LE?

Ngaˬ hui yonˍ ve lehˬ Liꞈ hpu htaꞈ yonˍ ve ceh k’oˆ gaˇ ve maˇ heˆ. Awˬ lawn k’o, “Neˇ teˇ hpaˍ htawˇ yonˍ leh kawˆ cheˇ chehˇ ve yoˬ.” (Yaˍkoˆ 2:19) Hk’e k’o yonˍ ve lehˬ aˬ htoꞈ ma le?

Mvuhˇ lawꞈ k’aw leh mvuhˇ hpeuꞈ ve awˬ yanˇ hk’aˬ htaˆ kaꞈ cawˬ tuˬ yoˬ tehꞈ ngaˬ hui yonˍ ve hk’e, G’uiˬ sha ve tawˇ hkawˇ awˬ tehˬ hpehꞈ tuˬ yoˬ tehꞈ ngaˬ hui yonˍ ve

Liꞈ hpu hk’aw a yeˇ uiˍ ve 2 ceuˬ htaꞈ k’oˆ taˍ ve yoˬ. Awˉ lawˉ teˇ ceuˬ lehˬ “yonˍ ve teˇ ceuˬ htaꞈ pa taw, ngaˬ hui dawˇ law taˍ ve teˇ hpaˍ htaꞈ awˬ tehˬ awˬ na g’a tuˬ ve htaꞈ . . . ngaˬ hui hk’a dehꞈ dehꞈ shiˍ taˍ ve yoˬ.” (Heˍbrehˇ 11:1a) Ngaˬ hui yonˍ ve k’o, Yaˬhoˉvaˬ k’oˆ ve teˇ ceuˬ le le awˬ tehˬ hpehꞈ la tuˬ yoˬ tehꞈ hk’a dehꞈ yonˍ ve yoˬ. Yaˬhoˉvaˬ Iˉsaˍreˍlaˆ chaw htaꞈ k’oˆ piˇ ve, ‘a shu yawˇ ve awˬ yanˇ cawˇ cawˇ kanˉ te k’ai tuˬ, mvuhˇ lawꞈ k’aw leh mvuhˇ hpeuꞈ ve awˬ yanˇ htaꞈ ngaˬ ka tiꞈ te taˍ peuˬ. Ka tiꞈ chi ve teˇ pawˆ kaꞈ luˬ k’ai tuˬ ve maˇ heˆ. Oˇ ve hk’a shuˍ, ngaˬ ve awˬ ceˬ paˍ Daˍviˆ geh ka tiꞈ te piˇ taˍ ve luˬ k’ai tuˬ ve maˇ heˆ.’ (Yeˍraˍmiˆ 33:20, 21) Mvuhˇ nyi maˇ tawˆ la-o leh mvuhˇ lawꞈ k’aw leh mvuhˇ hpeuꞈ ve awˬ yanˇ maˇ cawˬ-o tehꞈ dawˇ jaw-aw laˇ? Miˬ guiˬ ve awˬ liˇ mvuhˇ nyi htaꞈ caw chehˇ ve luˬ k’ai tuˬ ve tehꞈ ngaˬ hui maˇ dawˇ jaw ve k’o, chi htaꞈ Hpanˍ shehˍ hpaˇ htaꞈ kaꞈ nawˬ yonˍ g’a ve maˇ heˆ laˇ? Yonˍ g’a ve yoˬ!—Iˉsaˍyaˆ 55:10, 11; Maꞈhtehˍ 5:18.

Nyiˇ ceuˬ teˇ ceuˬ lehˬ “yonˍ ve teˇ ceuˬ htaꞈ pa taw, . . . ngaˬ hui maˇ mawˬ sheˍ ve awˬ ceuˬ teˇ hpaˍ awˬ tehˬ awˬ na cawˬ taˍ ve htaꞈ . . . ngaˬ hui hk’a dehꞈ dehꞈ shiˍ taˍ ve yoˬ.” (Heˍbrehˇ 11:1b) ‘Mvuhˇ haw shaˉ awˬ tehˬ cawˬ ve tehꞈ hk’aˬ hk’e te shiˍ g’a ve le?’ tehꞈ yaˇ na laˇ ve k’o, hk’aˬ hk’e hk’awꞈ piˇ tuˬ le? Nawˬ kaꞈ mvuhˇ haw shaˉ maˇ mawˬ g’a. Yaꞈ hk’aˇ, ngaˬ hui shaˉ hk’aˬ hk’e te g’awˬ g’a ve, mvuhˇ haw hk’aˬ hk’e te meuˆ g’a ve nawˬ yawˇ htaꞈ k’oˆ maˍ piˇ tuˬ yoˬ. Yaˇ na g’a-oˬ ve k’o, mvuhˇ haw shaˉ maˇ mawˬ g’a ve htawˇ, awˬ tehˬ cawˬ ve tehꞈ yaˇ kaꞈ yonˍ g’a ve yoˬ. Ngaˬ hui ve yonˍ hk’aˇ kaꞈ chi hk’e g’a dawˇ ve yoˬ.—Roˉmaꞈ 1:20.

AWˬ TEHˬ VE HTAꞈ AWˬ HPFUHˇ G’A SHIˍ VE

Ngaˬ hui yonˍ ve cawˬ tuˬ, hteˇ ve cawˇ ve cuˇ yiˍ awˉ lawˉ g’a cawˬ cawˇ ve yoˬ. (1 Tiˆmoˉseˍ 2:4) Yaꞈ hk’aˇ, chi hk’e ceh cawˬ ve maˇ lawꞈ. Tcuh yaˇ Pawˇluꞈ k’oˆ ve, ‘chaw yaˇ lehˬ nyi ma hk’aw yonˍ ve yoˬ.’ (Roˉmaꞈ 10:10) Ngaˬ hui awˬ tehˬ ve htaꞈ yonˍ ve ceh maˇ heˆ, awˬ hpfuhˇ kaꞈ g’a shiˍ ve yoˬ. Chi hk’e te ve k’o, ngaˬ hui ve teˇ hk’aˇ dawˇ hk’aˇ awˬ tehˬ ve htaꞈ hawˍ daꞈ tuˬ yoˬ. (Yaˍkoˆ 2:20) A shu teˇ g’aˇ awˬ tehˬ ve htaꞈ awˬ hpfuhˇ maˇ shiˍ ve k’o, yawˇ ve yonˍ hk’aˇ  maˇ pa gaˇ leh yawˇ dawˇ taˍ ve hk’e te gaˇ ve pa taw, awˬ tehˬ ve htaꞈ maˇ haꞈ yuˬ. (2 Peˍtruˆ 3:3, 4; Yuˇdaꞈ 18) Chi htaꞈ pa taw, Liꞈ hpu ve awˬ co-eˬ htaˇ, anˇ tuˬ htaꞈ mawˬ ve chaw hk’a peu-eˬ yonˍ ve maˇ heˆ. (Heh puiˉ hk’aw 14:11; Yoˇhanˬ 12:37) G’uiˬ sha ve awˬ ha hpu awˬ tehˬ ve htaꞈ haꞈ ve chaw ceh tiˉ yonˍ tuˬ ga piˇ ve yoˬ.—Gaˍlaˍtiˆ 5:22; 2 Hteˇsaˍlawˇniˆ 2:10, 11.

DAˍVIˆ YONˍ VE HK’Aˬ HK’E TE MAˇ LA VE LE?

Jawˇ mawˇ Daˍviˆ kaꞈ teˇ g’aˇ yonˍ yeˬ jaˇ. (Heˍbrehˇ 11:32, 33) Yaꞈ hk’aˇ, Daˍviˆ ve yehˬ k’a hk’aw teˇ g’aˇ le le yonˍ yeˬ ve maˇ heˆ. Gawˇliˇyaˆ ca na dawˆ la htaˇ, Daˍviˆ nyi ma zuhˆ jaˇ. Yaꞈ hk’aˇ, Daˍviˆ ve awˬ viˉ paˍ Eˇlaˍbaˆ Daˍviˆ nyi ma uiˍ leh caˆ muiˬ puiˉ ve tehꞈ k’oˆ ve yoˬ. (1 Saˍmo-eˍlaˆ 17:26-28) Ngaˬ hui teˇ g’aˇ le le paw la htaˇ kaꞈ yonˍ ve maˇ heˆ, leh awˬ pa awˬ e ngaˬ hui htaꞈ peꞈ laˇ ve kaꞈ maˇ heˆ. Daˍviˆ G’uiˬ sha geh meuˆ daꞈ ve pa taw, yawˇ yonˍ yeˬ la ve yoˬ.

Daˍviˆ hk’aˬ hk’e yonˍ yeˬ ve Chiˇ mvuh ve liꞈ 27 hk’aw yawˇ k’oˆ taˍ ve yoˬ. (27:1) Daˍviˆ g’a hpuˇ ve awˬ ceuˬ leh yawˇ ve canˇ paˍ htaꞈ Yaˬhoˉvaˬ hk’aˬ hk’e te piˇ ve htaꞈ yawˇ hk’a dehꞈ dawˇ nyi ve yoˬ. (27:2, 3) Yaˬhoˉvaˬ htaꞈ oˉ k’oˍ pui tuˬ ve awˬ hk’aˇ yawˇ awˬ hpfuhˇ shiˍ jaˇ. (27:4) Daˍviˆ aˉ po k’oˍ bon yehˬ lo awˬ nu ve chaw geh G’uiˬ sha htaꞈ oˉ k’oˍ pui ve yoˬ. (27:6) Yawˇ Yaˬhoˉvaˬ geh nyi ma awˬ tawˬ hk’a gaˬ bon lawˬ ve yoˬ. (27:7, 8) Daˍviˆ G’uiˬ sha yawˇ htaꞈ maˍ tcuh gaˇ ve yoˬ. (27:11) Daˍviˆ na piˇ ve, “ngaˬ maˇ yonˍ ve k’o hk’aˬ hk’e hpehꞈ tuˬ le?”—27:13, MGS.

NAWˬ VE YONˍ HK’Aˇ HK’Aˬ HK’E TE YONˍ YEˬ G’A TUˬ LE?

Nawˬ Chiˇ mvuh ve liꞈ 27 htaꞈ hk’a dehꞈ dawˇ nyi ve k’o, Daˍviˆ hk’a shuˍ yonˍ yeˬ g’a ve yoˬ. Yonˍ ve cawˬ tuˬ cuˇ yiˍ awˉ lawˉ g’a cawˬ ve pa taw, nawˬ Liꞈ hpu leh ngaˬ hui ve kanˉ hk’aˇ hk’aw ve liꞈ maˇ maˇ henˇ ve k’o, daꞈ kehˬ ve awˬ ha hpu ve awˬ shiˍ ve teˇ hpawˇ yonˍ ve chi uiˍ la mvuh la tuˬ yoˬ. (Chiˇ mvuh ve 1:2, 3) Liꞈ hpu henˇ htaˇ awˬ yanˇ yehˇ leh hk’a dehꞈ dawˇ nyi sheˍ. Hk’a dehꞈ dawˇ nyi ve lehˬ jeꞈ hk’a shuˍ hpehꞈ ve yoˬ. Jeꞈ daꞈ ve k’o, Yaˬhoˉvaˬ ngaˬ hui awˬ pon te laˇ ve htaꞈ ngaˬ hui awˬ hpfuhˇ shiˍ maˇ la tuˬ yoˬ. Leh chi ngaˬ hui ve yonˍ hk’aˇ yonˍ yeˬ gaˇ tuˬ te laˇ leh, Hkriꞈ yaˇ awˬ moˍ hk’aw yawˇ htaꞈ oˉ k’oˍ pui gaˇ tuˬ leh daꞈ ve dawˇ law kuiˬ shu htaꞈ hto piˇ gaˇ tuˬ kaꞈ te laˇ ve yoˬ. (Heˍbrehˇ 10:23-25) Chi hk’oˆ kaꞈ ngaˬ hui yonˍ ve k’o, “hk’aˬ htaˆ kaꞈ bon g’a lawˬ” tuˬ yoˬ. (Luˉkaꞈ 18:1-8) Hk’e te leh Yaˬhoˉvaˬ geh “hk’aˬ htaˆ kaꞈ bon lawˬ tcuhˉ taˍ” leh ‘G’uiˬ sha ngaˬ hui awˬ pon dawˇ nyi puiˉ ve’ tehꞈ yonˍ sheˍ. (1 Hteˇsaˍlawˇniˆ 5:17; 1 Peˍtruˆ 5:7) Ngaˬ hui ve yonˍ hk’aˇ teˇ ceuˬ ceuˬ te gaˇ tuˬ te laˇ leh, chi ngaˬ hui ve yonˍ hk’aˇ k’awꞈ yonˍ yeˬ tuˬ te laˇ ve yoˬ.—Yaˍkoˆ 2:22.

YEˍSUˆ HTAꞈ YONˍ VE

Yeˍsuˆ maˇ suh sheˍ teˇ haˉ htaˇ, yawˇ ve awˬ laꞈ g’awˇ htaꞈ k’oˆ piˇ ve, “G’uiˬ sha htaꞈ yonˍ-oꞈ. Ngaˬ htaꞈ htawˇ yonˍ-oꞈ.” (Yoˇhanˬ 14:1) Hk’e te leh ngaˬ hui Yaˬhoˉvaˬ ceh tiˉ yonˍ ve maˇ heˆ, Yeˍsuˆ htaꞈ kaꞈ  yonˍ ve yoˬ. Ngaˬ hui hk’aˬ hk’e te g’a tuˬ le? 3 hk’aˇ teˇ geh nyi sheˍ.

Yeˍsuˆ htaꞈ yonˍ ve aˬ htoꞈ ma htaꞈ k’oˆ gaˇ ve le?

Awˉ lawˉ teˇ hk’aˇ lehˬ G’uiˬ sha nawˬ htaꞈ dawˇ nawˇ leh htaiˍ hk’awꞈ ve laꞈ shawnˍ peꞈ laˇ ve tehꞈ tawnˇ taˍ sheˍ. Tcuh yaˇ Pawˇluꞈ k’oˆ ve, “ngaˬ htaꞈ haꞈ leh ngaˬ awˬ pon yawˇ awˬ to tanˇ peuˬ ve, G’uiˬ sha ve Yaˇ hpu htaꞈ ngaˬ yonˍ ve pa taw teꞈ chehˇ” ve yoˬ. (Gaˍlaˍtiˆ 2:20) Nawˬ Yeˍsuˆ htaꞈ yonˍ ve k’o, yawˇ htaiˍ hk’awꞈ laˇ ve nawˬ htaꞈ awˬ tehˬ ga laˇ g’a ve, nawˬ venˇ baˆ hpehˇ la tuˬ te laˇ g’a ve, co co taiˍ taiˍ ve dawˇ lawˬ kuiˬ kaꞈ peꞈ laˇ ve tehꞈ hk’a dehꞈ yonˍ ve tehꞈ k’oˆ gaˇ ve yoˬ. Chi lehˬ G’uiˬ sha haꞈ pehnˇ uiˍ jaˇ ve teˇ ceuˬ hpehꞈ ve yoˬ. (Roˉmaꞈ 8:32, 38, 39; Eˇfeˇsuꞈ 1:7) Htaiˍ hk’awꞈ ve nawˬ htaꞈ awˬ tehˬ awˬ na ga laˇ g’a ve tehꞈ yonˍ ve k’o, awˬ hpfuhˇ maˇ cawˬ tehꞈ maˇ dawˇ tuˬ te laˇ ve yoˬ.—2 Hteˇsaˍlawˇniˆ 2:16, 17.

Nyiˇ hk’aˇ teˇ hk’aˇ lehˬ Yeˍsuˆ tuˉ tanˇ laˇ ve htaꞈ cuˇ leh Yaˬhoˉvaˬ geh meuˆ daꞈ tuˬ bon lawˬ sheˍ. Htaiˍ hk’awꞈ ve htaꞈ pa taw, “ngaˬ hui ha k’aˉ ve teˇ ceuˬ htaꞈ kaꞈ, loˍ ve awˬ yanˇ awˬ hk’aw lo ga laˇ tuˬ ve awˬ bon htaꞈ kaꞈ g’a tuˬ, nyi ma haꞈ hanˉ ve awˬ hk’aw lo” Yaˬhoˉvaˬ geh bon lawˬ g’a ve yoˬ. (Heˍbrehˇ 4:15, 16; 10:19-22) Ngaˬ hui bon maˇ maˇ lawˬ htaˇ, venˇ baˆ htaꞈ tawˍ daꞈ g’aˇ tuˬ yoˬ.—Luˉkaꞈ 22:40.

Shehˆ hk’aˇ teˇ hk’aˇ lehˬ Yeˍsuˆ htaꞈ na yuˬ sheˍ. Tcuh yaˇ Yoˇhanˬ k’oˆ ve, “Yaˇ hpu htaꞈ yonˍ ve chaw lehˬ, co tiꞈ ha tiꞈ cawˬ ve yoˬ. Yaˇ hpu htaꞈ maˇ haꞈ yuˬ ve chaw lehˬ, co tiꞈ ha tiꞈ htaꞈ maˇ g’a mawˬ. Yawˇ awˬ hk’oˆ htaꞈ G’uiˬ sha nyi ma zuhˆ ve teˇ ceuˬ cawˬ taˍ ve yoˬ.” (Yoˇhanˬ 3:36) Yoˇhanˬ k’oˆ ve, yonˍ ve chaw leh maˇ na yuˬ ve chaw peun daꞈ jaˇ. Hk’e te leh nawˬ Yeˍsuˆ htaꞈ yonˍ gaˇ ve k’o, yawˇ hkawˇ g’a na yuˬ ve yoˬ. Ngaˬ hui “Hkriꞈ ve awˬ liˇ tawˇ hkawˇ” na yuˬ ve lehˬ yawˇ maˍ laˇ leh beˆ maˍ laˇ ve teˇ ceuˬ le le htaꞈ na yuˬ ve tehꞈ k’oˆ gaˇ ve yoˬ. (Gaˍlaˍtiˆ 6:2) Yeˍsuˆ hkawˇ na yuˬ tuˬ, “ka tiꞈ yeˬ leh cuˇ yiˍ cawˬ ve awˬ ceˬ” beˆ maˍ laˇ ve htaꞈ ngaˬ hui g’a g’aꞈ te ve yoˬ. (Maꞈhtehˍ 24:45) Ngaˬ hui Yeˍsuˆ hkawˇ na yuˬ ve k’o, tuꞈ hkanˍ ve mvuhˇ haw lonˉ hk’a shuˍ g’a hpuˇ ve htawˇ, yeunˇ hkanˍ g’aˇ ve yoˬ.—Luˉkaꞈ 6:47, 48.

‘DAꞈ KEHˬ JAˇ VE NAWˬ HUI YONˍ VE TEˇ CEUˬ AWˬ HK’AW LO UIˍ LA YEˬ LA PIˇ-Oˆ’

Oˇ htaˇ chaw teˇ g’aˇ Yeˍsuˆ htaꞈ k’oˆ piˇ ve, “ngaˬ yonˍ ve yoˬ! Ngaˬ yonˍ maˇ biˇ ve awˬ ceuˬ htaꞈ a ciˉ ga laˇ-oˆ!” (Maˍkuˆ 9:24) Yawˇ yonˍ ve cawˬ-oˬ ve htawˇ, g’a cawˬ sheˍ ve tehꞈ nyi ma nuˇ nehˬ ve hk’aw na g’a ve yoˬ. Yawˇ hk’a shuˍ ngaˬ hui teˇ g’aˇ le le htawˇ teˇ ceuˬ ceuˬ g’a hpuˇ htaˇ, yonˍ ve g’a k’awꞈ cawˬ ve yoˬ. Ngaˬ hui teˇ g’aˇ le le chi teˇ hkui kaꞈ yonˍ ve yonˍ yeˬ tuˬ te g’a ve yoˬ. Ngaˬ hui Liꞈ hpu g’aw leh hk’a dehꞈ dawˇ nyi ve k’o, yonˍ yeˬ g’a leh Yaˬhoˉvaˬ ngaˬ hui awˬ pon te laˇ ve ngaˬ hui awˬ hpfuhˇ shiˍ jaˇ tuˬ yoˬ. Ngaˬ hui Yaˬhoˉvaˬ htaꞈ oˉ k’oˍ pui ve, daꞈ ve dawˇ law kuiˬ shu htaꞈ k’oˆ piˇ ve, leh bon hk’aˬ htaˆ kaꞈ lawˬ ve k’o, ngaˬ hui ve yonˍ hk’aˇ yonˍ yeˬ tuˬ yoˬ. Ngaˬ hui chi hk’e te htaˇ, daꞈ jaˇ ve laꞈ shawnˍ g’a tuˬ yoˬ. Liꞈ hpu hk’aw k’oˆ ve, ‘haꞈ ve chaw teˇ hpaˍ-oˬ, daꞈ kehˬ jaˇ ve nawˬ hui yonˍ ve teˇ ceuˬ awˬ hk’aw lo uiˍ la yeˬ la piˇ-oˆ. Nawˬ hui lehˬ, G’uiˬ sha ve haꞈ pehnˇ ve awˬ hk’aw lo a shu yawˇ awˬ to yeˬ chaweh chehˇ taˍ-oꞈ.’—Yuˇdaꞈ 20, 21.