Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

Miˬ guiˬ hk’oˆ aˬ htoꞈ ma te chi hk’e hpehꞈ ve le?

Miˬ guiˬ hk’oˆ aˬ htoꞈ ma te chi hk’e hpehꞈ ve le?

Liꞈ sha tanˇ hk’aw, TV hk’aw, Ri di-o hk’aw awˬ haiˬ te daꞈ ve, maꞈ te daꞈ ve awˬ lawn nawˬ maˇ maˇ g’a kaˇ ve yoˬ hehˉ. Maˇ heˆ leh nawˬ a naˍ g’a hkanˍ chehˇ ve, haꞈ ve chaw suh k’ai leh nyi ma luˬ chehˇ ve yoˬ hehˉ.

Nawˬ awˬ to htaꞈ na nyi sheˍ:

  • Ngaˬ leh ngaˬ ve yehˬ k’a htaꞈ G’uiˬ sha chi hk’e hpuˇ tcuh gaˇ-aw laˇ?

  • Ngaˬ htaꞈ ga laˇ g’a tuˬ aˬ htoꞈ ma cawˬ ve le?

  • Awˬ tehˬ dawˇ sha gawˬ lehˍ ve cawˬ g’a-aw laˇ?

Liꞈ hpu hk’aw hk’a dehꞈ k’oˆ maˍ laˇ taˍ ve yoˬ.

 Liꞈ hpu hk’aw maˍ ve miˬ guiˬ hk’oˆ lo anˇ tuˬ chi teˇ hpaˍ htaꞈ G’uiˬ sha te tuˬ yoˬ.

  • Chaw teˇ g’aˇ kaꞈ naˬ ve, mawˇ ve, suh ve htaꞈ g’a k’awꞈ hpuˇ tuˬ ve maˇ heˆ.—Hpeuꞈ maˍ ve 21:4

  • “Hkui luˬ paˍ teˇ hpaˍ k’awꞈ daꞈ la leh k’aˍ hk’eˆ g’a tuˬ yoˬ.”—Iˉsaˍyaˆ 35:6

  • “Mehˆ cuˉ ve chaw teˇ hpaˍ mehˆ k’awꞈ mawˬ la” tuˬ yoˬ.—Iˉsaˍyaˆ 35:5

  •  Suh peuˬ ve chaw k’awꞈ teꞈ tu la tuˬ yoˬ.—Yoˇhanˬ 5:28, 29

  • Naˬ ve k’awꞈ cawˬ tuˬ ve maˇ heˆ.—Iˉsaˍyaˆ 33:24

  • Miˬ guiˬ hk’oˆ caˇ tuˬ dawˬ tuˬ hk’a biˇ cawˬ tuˬ yoˬ.—Chiˇ mvuh ve 72:16

 Liꞈ hpu hk’aw maˍ laˇ ve awˬ bon cawˬ ve

K’oˆ laˬ peuˬ ve awˬ lawn teˇ hpaˍ zuhꞈ maˆ maˆ ve hk’e ceh nawˬ dawˇ ve yoˬ hehˉ. Yaꞈ hk’aˇ, G’uiˬ sha ka tiꞈ te taˍ ve maˇ maw k’o, miˬ guiˬ hk’oˆ awˬ ceuˬ chi teˇ hpaˍ yawˇ te tuˬ yoˬ. Yawˇ hk’aˬ hk’e te tuˬ tehꞈ, Liꞈ hpu hk’aw k’oˆ maˍ laˇ taˍ ve yoˬ.

Chi hk’oˆ kaꞈ, chi teˇ hkui ngaˬ hui hk’aˬ hk’e te leh ha lehˬ g’a tuˬ, Liꞈ hpu hk’aw k’oˆ laˇ taˍ ve yoˬ. Chi beuꞈ nawˬ hpu awˬ lawn, yehˬ k’a awˬ lawn, chehˇ sha cawˬ sha hpawˇ ve awˬ lawn leh haꞈ ve chaw suh peuˬ ve awˬ lawn dawˇ haˍ chehˇ ve htaꞈ dawˇ nyi sheˍ. Awˬ ceuˬ chi teˇ hpaˍ htaꞈ yeunˇ hkanˍ g’aˇ tuˬ, Liꞈ hpu ga laˇ g’a ve yoˬ. Awˬ hawˉ lo na taˍ laˇ ve htaꞈ htawˇ, Liꞈ hpu hk’awꞈ laˇ tuˬ cawˬ ve yoˬ.

  • Ngaˬ hui tuꞈ ve hkanˍ ve htaꞈ aˬ htoꞈ ma te g’a hpuˇ ve le?

  • Ngaˬ hui dawˇ haˍ gaˇ haˍ ve htaꞈ hk’aˬ hk’e te yeunˇ hkanˍ g’aˇ tuˬ le?

  • Ngaˬ hui ve yehˬ k’a hk’aˬ hk’e te dawˇ sha maˇ la g’a tuˬ le?

  • Suh peuˬ ve k’o, hk’aˬ hk’e k’ai ve le?

  • Ngaˬ hui suh peuˬ ve chaw htaꞈ teˇ pawˆ k’awꞈ mawˬ daꞈ tuˬ awˬ nyi cawˬ-aw laˇ?

  • G’uiˬ sha ka tiꞈ te taˍ ve hk’e yawˇ te tuˬ yoˬ tehꞈ, ngaˬ hui hk’aˬ hk’e te yonˍ g’a ve le?

 Liꞈ hpu ngaˬ hui htaꞈ aˬ htoꞈ ma maˍ laˇ g’a ve le k’oˆ ve, liꞈ chi teˇ k’oˆ htaꞈ nawˬ g’aw chehˇ ve k’o, nawˬ shiˍ gaˇ ve yoˬ tehꞈ hpeuꞈ maw laˇ ve yoˬ. Liꞈ chi teˇ k’oˆ nawˬ htaꞈ ga laˇ g’a ve yoˬ. Teˇ tawn le le na hkawˇ cawˬ ve yoˬ. Na hkawˇ chi teˇ hpaˍ htaꞈ hk’a dehꞈ dawˇ nyi ve k’o, Liꞈ hpu na g’a maˇ laˇ tuˬ yoˬ. Chaw laiˉ lanˬ g’aˇ Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve dawˇ cawˇ ve yoˬ. Nawˬ kaꞈ dawˇ cawˇ tuˬ yoˬ hehˉ. Nawˬ Liꞈ hpu henˇ ve k’o, G’uiˬ sha geh laˬ ve awˬ tehˬ awˬ na awˬ bon g’a tuˬ yoˬ.