Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ lawn 15

G’uiˬ sha htaꞈ oˉ k’oˍ ve awˬ hk’aˇ

G’uiˬ sha htaꞈ oˉ k’oˍ ve awˬ hk’aˇ

1. G’uiˬ sha htaꞈ oˉ k’oˍ pui ve hk’aˬ ve teˇ hk’aˇ cawˇ ve a shu teˇ g’aˇ k’oˆ laˇ g’a ve le?

Bon liˇ maˇ-awˍ ve k’oˆ ve, G’uiˬ sha ve awˬ lawn yawˇ hui maˍ chehˇ ve lehˬ awˬ tehˬ hpehꞈ ve yoˬ. Chi ve awˬ tehˬ hpehꞈ-aw laˇ? Maˇ hpehꞈ g’a. Awˬ lawn k’o, G’uiˬ sha a shu hpehꞈ ve leh yawˇ htaꞈ oˉ k’oˍ pui tuˬ awˬ hk’aˇ bon liˇ teˇ hpaˍ maˍ ve maˇ shuˍ daꞈ. Oˇ hk’e k’o, G’uiˬ sha htaꞈ oˉ k’oˍ pui ve cawˇ ve awˬ hk’aˇ nawˬ hk’aˬ hk’e te shiˍ hpehꞈ tuˬ le? Yaˬhoˉvaˬ htaꞈ oˉ k’oˍ pui ve cawˇ ve awˬ hk’aˇ yawˇ ceh tiˉ ngaˬ hui htaꞈ k’oˆ laˇ g’a ve yoˬ.

2. Nawˬ G’uiˬ sha htaꞈ oˉ k’oˍ pui ve cawˇ ve awˇ hk’aˇ hk’aˬ kaˬ lo ca g’a tuˬ le?

2 Yaˬhoˉvaˬ htaꞈ oˉ k’oˍ pui ve cawˇ ve awˬ hk’aˇ htaꞈ shiˍ tuˬ, yawˇ ngaˬ hui htaꞈ Liꞈ hpu peꞈ laˇ ve yoˬ. Chi htaꞈ pa taw, ngaˬ hui Liꞈ hpu g’a henˇ ve yoˬ. Yaˬhoˉvaˬ ngaˬ hui htaꞈ haꞈ leh dawˇ nyi laˇ puiˉ ve pa taw, yawˇ maˍ laˇ ve htaꞈ ngaˬ hui awˬ bon g’a tuˬ yawˇ ga laˇ ve yoˬ.—Iˉsaˍyaˆ 48:17.

3. G’uiˬ sha ngaˬ hui htaꞈ aˬ htoꞈ ma te tcuh gaˇ ve le?

3 Chaw teˇ hpaˍ k’oˆ ve, G’uiˬ sha teˇ bon liˇ le le htaꞈ haꞈ yuˬ ve yoˬ. Yaꞈ hk’aˇ, Yeˍsuˆ chi hk’e maˇ g’a maˍ. Yawˇ k’oˆ ve, “ngaˬ htaꞈ Jawˇ mawˇ-oˬ, Jawˇ mawˇ-oˬ tehꞈ hk’a k’oˆ laˇ ve chaw teˇ g’aˇ le le lehˬ, mvuhˇ naw ma mvuhˇ miˬ awˬ hk’aw lo g’a loꞈ-e tuˬ ve maˇ heˆ. Mvuhˇ naw ma hk’oˆ lo chehˇ ve ngaˬ Awˬ pa ve a loˍ htaꞈ te ve chaw ceh tiˉ g’a loꞈ-e tuˬ yoˬ.” Chi htaꞈ pa taw, G’uiˬ sha ve a loˍ htaꞈ ngaˬ hui g’a henˇ leh g’aꞈ te ve yoˬ. Chi hk’e te ve a yeˇ uiˍ jaˇ. Awˬ lawn k’o, G’uiˬ sha maˍ piˇ ve htaꞈ maˇ g’aꞈ te ve chaw lehˬ “haiˬ ve chaw” hpehꞈ ve tehꞈ Yeˍsuˆ k’oˆ ve yoˬ.—Maꞈhtehˍ 7:21-23.

4. G’uiˬ sha ve a loˍ htaꞈ g’aꞈ te tuˬ, Yeˍsuˆ shaˍ tiꞈ hk’aˬ hk’e peꞈ laˇ ve le?

4 Yeˍsuˆ shaˍ tiꞈ peꞈ laˇ ve, G’uiˬ sha ve a loˍ htaꞈ g’aꞈ te tuˬ maˇ sha, laiˉ ceuˬ htaꞈ g’a hpuˇ tuˬ yoˬ. Yawˇ k’oˆ ve, “maˇ k’oˍ ve yehˬ miˉ hpeꞈ htaꞈ loꞈ-e loˬ. Awˬ lawn k’o, luˬ kuiˬ lo k’ai ve yaꞈ k’aw lehˬ  k’ehˬ jaˇ leh, yehˬ miˉ hpeꞈ kaꞈ k’oˍ jaˇ ve yoˬ. Oˇ kaˬ lo loꞈ-e ve chaw kaꞈ maˇ jaˇ ve yoˬ. Yaꞈ hk’aˇ, a shaꞈ teꞈ kuiˬ lo loꞈ-e ve yehˬ miˉ hpeꞈ lehˬ, maˇ k’oˍ leh yaꞈ k’aw kaꞈ haˍ jaˇ ve yoˬ. Ca mawˬ leh loꞈ-e ve chaw a ciˉ ceh tiˉ cawˬ ve yoˬ.” (Maꞈhtehˍ 7:13, 14) Haˍ jaˇ ve yaꞈ k’aw chi lehˬ G’uiˬ sha htaꞈ oˉ k’oˍ pui ve cawˇ ve awˬ hk’aˇ hpehꞈ leh co co taiˍ taiˍ a shaꞈ g’a tuˬ ve yaꞈ k’aw hpehꞈ ve yoˬ. Yaꞈ hk’aˇ, k’ehˬ jaˇ ve yaꞈ kaw chi lehˬ G’uiˬ sha htaꞈ oˉ k’oˍ pui ve maˇ cawˇ ve awˬ hk’aˇ hpehꞈ leh suh tuˬ ve yaꞈ k’aw hpehꞈ ve yoˬ. Yaˬhoˉvaˬ chaw teˇ g’aˇ htaꞈ kaꞈ maˇ suh tcuh gaˇ leh yawˇ ve awˬ lawn shiˍ tcuh gaˇ ve yoˬ.—2 Peˍtruˆ 3:9.

G’uiˬ sha htaꞈ oˉ k’oˍ pui ve cawˇ ve awˬ hk’aˇ

5. Cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ pui chehˇ ve chaw htaꞈ shiˍ tuˬ, nawˬ hk’aˬ hk’e te cawˇ ve le?

5 Yeˍsuˆ k’oˆ ve, a shu teˇ g’aˇ cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ pui chehˇ ve le tehꞈ, ngaˬ hui shiˍ g’a ve yoˬ. Yawˇ hui ve yonˍ hk’aˇ leh te ve htaꞈ g’a chaˬ nyi ve yoˬ. Yawˇ k’oˆ ve, “yawˇ hui ve awˬ shiˍ htaꞈ nyi k’o, yawˇ hui ve nyi ma htaꞈ g’a shiˍ tuˬ yoˬ. . . . Daꞈ ve awˬ cehˬ lehˬ, daꞈ ve awˬ shiˍ nawꞈ ve yoˬ.” (Maꞈhtehˍ 7:16, 17) G’uiˬ sha htaꞈ oˉ k’oˍ pui ve chaw lehˬ maˇ te yaꞈ puiˉ tehꞈ k’oˆ gaˇ ve maˇ heˆ. Yaꞈ hk’aˇ, yawˇ hui cawˇ ve awˬ ceuˬ te tuˬ, coˇ caˇ ve yoˬ. Cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ pui tuˬ, hk’aˬ hk’e g’a te ve le? Teˇ geh nyi sheˍ.

6, 7. Aˬ htoꞈ ma te awˬ tehˬ oˉ k’oˍ pui ve teˇ ceuˬ Liꞈ hpu htaꞈ cuˇ leh maˍ ve le? Yeˍsuˆ hk’aˬ hk’e te maˍ laˇ ve le?

6 Ngaˬ hui oˉ k’oˍ pui ve lehˬ Liꞈ hpu htaꞈ cuˇ cawˇ ve yoˬ. Liꞈ hpu hk’aw k’oˆ ve, “Liꞈ hpu hk’a peu-eˬ lehˬ, G’uiˬ sha ve Awˬ ha hpu dawˇ pawnˍ piˇ ve htaꞈ pa taw cawˬ la ve yoˬ. G’uiˬ sha ve chaw lehˬ, hk’aˬ hk’e te leh biˇ ve chaw leh, daꞈ ve kanˉ teˇ ceuˬ le le awˬ pon gu taˍ ve chaw hpehꞈ la tuˬ, Liꞈ hpu lehˬ maˍ piˇ ve, venˇ baˆ hpeuꞈ maˍ piˇ ve, k’awꞈ daꞈ la piˇ ve leh, hteˇ ve cawˇ ve htaꞈ te tuˬ maˍ piˇ ve yoˬ. Chi hk’a peu-eˬ awˬ pon Liꞈ hpu lehˬ awˬ bon cawˬ ve yoˬ.” (2 Tiˆmoˉseˍ 3:16, 17) Tcuh yaˇ Pawˇluꞈ Hkriꞈ yaˇ hui htaꞈ k’oˆ piˇ ve, ‘nawˬ hui lehˬ, ngaˬ hui maˍ laˇ ve G’uiˬ sha ve tawˇ  hkawˇ htaꞈ g’a kaˇ ve teˇ yanˇ, chaw yaˇ ve tawˇ hkawˇ hk’e nawˬ hui shawˍ taˍ leh haꞈ yuˬ ve maˇ heˆ. G’uiˬ sha ve tawˇ hkawˇ awˬ tehˬ awˬ na hpehꞈ ve htaꞈ nawˬ hui shawˍ taˍ leh haꞈ yuˬ ve yoˬ.’ (1 Hteˇsaˍlawˇniˆ 2:13) Awˬ tehˬ oˉ k’oˍ pui ve lehˬ Liꞈ hpu hk’aw G’uiˬ sha ve tawˇ hkawˇ ceh tiˉ cuˇ leh maˍ ve yoˬ. Chaw liˇ vaˇ liˇ, awˬ kaˍ awˬ nu ve awˬ lawn leh chaw yaˇ ve dawˇ hk’aˇ htaꞈ yuˬ maˍ ve maˇ heˆ.

7 Yeˍsuˆ maˍ ve hk’a peu-eˬ lehˬ G’uiˬ sha ve tawˇ hkawˇ htaꞈ cuˇ ve yoˬ. (Yoˇhanˬ 17:17 g’aw ve.) Yawˇ laiˉ pawˆ Liꞈ hpu awˬ tawn htaꞈ yuˬ laˬ leh maˍ ve yoˬ. (Maꞈhtehˍ 4:4, 7, 10) Awˬ tehˬ ve G’uiˬ sha kanˉ te ve chaw Yeˍsuˆ te ve hk’a shuˍ, yawˇ hui maˍ ve hk’a peu-eˬ Liꞈ hpu htaꞈ cuˇ ve yoˬ.

8. Yaˬhoˉvaˬ htaꞈ oˉ k’oˍ pui tuˬ, Yeˍsuˆ hk’aˬ hk’e k’oˆ maˍ laˇ ve le?

8 Ngaˬ hui Yaˬhoˉvaˬ htaꞈ ceh tiˉ oˉ k’oˍ pui cawˇ ve yoˬ. Chiˇ mvuh ve liꞈ 83:18 (MGS) hk’aw k’oˆ ve, “nawˬ Yaˬhoˉ vaˬ meh leh miˬ guiˬ hk’oˆ uˉ peunˍ chehˇ ve G’uiˬ sha nawˬ teˇ g’aˇ ceh tiˉ hpehꞈ ve yoˬ.” Yeˍsuˆ lehˬ awˬ tehˬ ve G’uiˬ sha hk’aˬ ve teˇ g’aˇ hpehꞈ ve htaꞈ k’oˆ laˇ leh G’uiˬ sha ve awˬ meh htaꞈ kaꞈ maˍ ve yoˬ. (Yoˇhanˬ 17:6 g’aw ve.) Yeˍsuˆ k’oˆ ve, ‘nawˬ ve Yaˬhoˉvaˬ G’uiˬ sha htaꞈ ceh tiˉ nawˬ oˉ k’oˍ g’a pui leh, yawˇ ve kanˉ htaꞈ ceh tiˉ nawˬ g’a te ve yoˬ.’ (Maꞈhtehˍ 4:10) Ngaˬ hui G’uiˬ sha ve kanˉ te ve chaw hpehꞈ ve pa taw, Yeˍsuˆ htaꞈ henˇ yuˬ ve yoˬ. Ngaˬ hui Yaˬhoˉvaˬ htaꞈ ceh tiˉ oˉ k’oˍ pui leh yawˇ ve awˬ meh htaꞈ yehˇ ve yoˬ. G’uiˬ sha ve awˬ meh leh yawˇ ngaˬ hui htaꞈ te laˇ tuˬ ve awˬ ceuˬ shu htaꞈ maˍ piˇ ve yoˬ.

9, 10. Ngaˬ hui hk’aˬ hk’e te leh haꞈ daꞈ g’a tuˬ le?

9 Ngaˬ hui shu htaꞈ awˬ tehˬ awˬ na g’a haꞈ ve yoˬ. Haꞈ daꞈ-oꞈ tehꞈ Yeˍsuˆ awˬ laꞈ g’awˇ htaꞈ maˍ piˇ ve yoˬ. (Yoˇhanˬ 13:35 g’aw ve.) Haˍ ve g’awˇ ve leh paw sha ve maˇ k’oˆ, hk’aˬ kaˬ lo laˬ ve maˇ k’oˆ, chaw liˇ vaˇ liˇ hk’aˬ hk’e hpehꞈ ve maˇ k’oˆ, awˬ viˉ awˬ nyi hk’e awˬ tehˬ awˬ na haꞈ daꞈ ve yoˬ. (Kawˇlawˇsehˇ 3:14) Hk’e te leh, ngaˬ hui maꞈ maˇ te leh shu htaꞈ maˇ tiˇ pehˍ. Liꞈ hpu hk’aw k’oˆ ve, “G’uiˬ sha ve awˬ yaˇ awˬ duˬ leh neˇ haiˬ ve awˬ yaˇ awˬ duˬ teˇ  hpaˍ htaꞈ hk’a tawˍ lehˆ fuiˍ daꞈ pehˬ daꞈ g’a ve yoˬ. Hteˇ ve cawˇ ve htaꞈ maˇ te ve chaw hk’aˬ ve teˇ g’aˇ maˇ k’oˆ, G’uiˬ sha htaꞈ maˇ caˉ daꞈ. A shu yawˇ ve awˬ viˉ awˬ nyi htaꞈ maˇ haꞈ ve chaw htawˇ, G’uiˬ sha htaꞈ maˇ caˉ daꞈ ve yoˬ.” Leh ‘ngaˬ hui teˇ g’aˇ leh teˇ g’aˇ g’a haꞈ daꞈ ve yoˬ. Haiˬ ve awˬ shehˍ hpaˇ teˇ g’aˇ htaꞈ caˉ daꞈ leh yawˇ ve awˬ nyi paˍ htaꞈ tiˇ pehˍ shehˍ hpaˇ Kaˍiˉnaˆ hk’e taˇ hpehꞈ piˇ.’—1 Yoˇhanˬ 3:10-12; 4:20, 21.

10 Ngaˬ hui teˇ g’aˇ leh teˇ g’aˇ ga daꞈ leh awˬ g’aˇ piˇ daꞈ tuˬ, awˬ yanˇ, awˬ g’aˇ awˬ shaˉ, hpu shi mawˇ jeˬ htaꞈ ngaˬ hui yehˇ ve yoˬ. (Heˍbrehˇ 10:24, 25) Ngaˬ hui “chaw hk’a peu-eˬ awˬ pon daꞈ ve htaꞈ” te ve yoˬ.—Gaˍlaˍtiˆ 6:10.

11. Aˬ htoꞈ ma te ngaˬ hui Yeˍsuˆ hkawˇ htaꞈ na yuˬ ve le?

11 Ngaˬ hui Yeˍsuˆ hkawˇ htaꞈ g’a na yuˬ ve yoˬ. Liꞈ hpu hk’aw k’oˆ ve, “yawˇ maˇ heˆ k’o, awˬ kaˍ awˬ nu chaw teˇ g’aˇ kaꞈ htaiˍ hk’awꞈ laˇ maˇ g’a. Awˬ lawn k’o, ngaˬ hui htaiˍ hk’awꞈ ve htaꞈ g’a tuˬ, yawˇ ve awˬ meh maˇ heˆ k’o, miˬ guiˬ hk’oˆ lo chaw yaˇ hui htaꞈ piˇ taˍ ve awˬ kaˍ awˬ nu awˬ meh maˇ cawˬ.” (Tcuh yaˇ 4:12) Liꞈ chi teˇ k’oˆ awˬ lawn 5 hk’aw g’a henˇ-oˬ, na yuˬ ve chaw awˬ pon Yeˍsuˆ a shaꞈ tanˇ laˇ leh htaiˍ hk’awꞈ laˇ tuˬ, Yaˬhoˉvaˬ Yeˍsuˆ htaꞈ miˬ guiˬ hk’oˆ peu laˇ ve yoˬ. (Maꞈhtehˍ 20:28) Yaˬhoˉvaˬ Yeˍsuˆ htaꞈ leuˆ yuˬ leh miˬ guiˬ chi htaꞈ uˉ peunˍ tuˬ, Jawˇ mawˇ te tcuh ve yoˬ. Chi htaꞈ pa taw, Liꞈ hpu hk’aw maˍ laˇ ve ngaˬ hui co tiꞈ ha tiꞈ g’a gaˇ ve k’o, Yeˍsuˆ ve hkawˇ htaꞈ g’a na yuˬ ve yoˬ.—Yoˇhanˬ 3:36 g’aw ve.

12. Aˬ htoꞈ ma te ngaˬ hui mvuhˇ miˬ hpawˇ maˇ caˉ daꞈ ve le?

12 Ngaˬ hui mvuhˇ miˬ hpawˇ maˇ caˉ daꞈ cawˇ ve yoˬ. Yeˍsuˆ mvuhˇ miˬ hpawˇ maˇ caˉ daꞈ. Yawˇ htaꞈ suhˉ jehˬ piˇ htaˇ, Roˉmaꞈ jawˇ mawˇ Piˉlaꞈ htaꞈ k’oˆ piˇ ve, “ngaˬ hkunˉ hawˉ hkanˇ te kuiˬ lehˬ, chi miˬ guiˬ htaꞈ maˇ caˉ daꞈ.” (Yoˇhanˬ 18:36 g’aw ve.) Ngaˬ hui Yeˍsuˆ hk’a shuˍ mvuhˇ naw ma hk’oˆ cawˬ ve G’uiˬ sha ve mvuhˇ miˬ htaꞈ ka tiꞈ yeˬ ve yoˬ. Chi htaꞈ pa taw, ngaˬ hui hk’aˬ kaˬ lo chehˇ ve htawˇ, mvuhˇ miˬ hpawˇ ma ca caˉ daꞈ ve yoˬ. Yaꞈ hk’aˇ, Liꞈ hpu hk’aw k’oˆ ve, “uˉ peunˍ shehˍ hpaˇ” ve hkawˇ htaꞈ g’a na  yuˬ ve yoˬ. Chi ve lehˬ miˬ guiˬ hk’oˆ ve mvuhˇ miˬ uˉ peunˍ shehˍ hpaˇ teˇ hpaˍ htaꞈ k’oˆ gaˇ ve yoˬ. (Roˉmaꞈ 13:1) Ngaˬ hui mvuhˇ miˬ hpawˇ ve awˬ liˇ htaꞈ na yuˬ ve yoˬ. Yaꞈ hk’aˇ, mvuhˇ miˬ hpawˇ ve awˬ liˇ G’uiˬ sha ve awˬ liˇ htaꞈ maˇ hawˍ daꞈ ve k’o, tcuh yaˇ hui hk’a shuˍ, “chaw yaˇ ve tawˇ hkawˇ aꞈ kehˉ G’uiˬ sha ve tawˇ hkawˇ htaꞈ ngaˬ hui g’a na yuˬ ve yoˬ.”—Tcuh yaˇ 5:29; Maˍkuˆ 12:17.

13. G’uiˬ sha ve mvuhˇ miˬ htaꞈ caˉ daꞈ ve ngaˬ hui aˬ htoꞈ ma awˬ lawn hto maˍ piˇ ve le?

13 Miˬ guiˬ hk’oˆ shoꞈ shaꞈ chehˇ ve htaꞈ G’uiˬ sha ve mvuhˇ miˬ ceh tiˉ gu g’a ve yoˬ tehꞈ ngaˬ hui yonˍ ve yoˬ. Yeˍsuˆ k’oˆ ve, “G’uiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” miˬ guiˬ hk’oˆ teˇ kaˬ le le lo g’a kaˇ tuˬ yoˬ. (Maꞈhtehˍ 24:14 g’aw ve.) Miˬ guiˬ hk’oˆ ve mvuhˇ miˬ teˇ peˆ kaꞈ G’uiˬ sha ve mvuhˇ miˬ hk’a shuˍ, ngaˬ hui htaꞈ te laˇ maˇ g’a. (Chiˇ mvuh ve 146:3) Ngaˬ hui bon chi hk’e lawˬ tuˬ Yeˍsuˆ maˍ laˇ ve, “nawˬ ve mvuhˇ miˬ gaˬ la piˇ-oˆ. Mvuhˇ naw ma hk’oˆ lo nawˬ ve a loˍ biˇ ve hk’e, miˬ guiˬ hk’oˆ htaꞈ htawˇ biˇ la piˇ-oˆ.” (Maꞈhtehˍ 6:10) Liꞈ hpu hk’aw k’oˆ ve, G’uiˬ sha ve mvuhˇ miˬ chi lehˬ “awˬ g’aˇ uiˍ jaˇ leh, awˬ nu ve mvuhˇ miˬ teˇ hpaˍ htaꞈ te luˬ te sheˆ piˇ” leh co co taiˍ taiˍ yeˬ chehˇ tuˬ yoˬ.—Daˍyeˍlaˆ 2:44.

14. Nawˬ dawˇ k’o, a shu te g’aˇ cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ pui chehˇ ve le?

14 A yeˇ uiˍ ve chi teˇ hpaˍ htaꞈ henˇ peuˬ ve k’o, nawˬ dawˇ nyi sheˍ. Liꞈ hpu htaꞈ cuˇ leh maˍ ve a shu le? G’uiˬ sha ve awˬ meh shu htaꞈ k’oˆ piˇ ve a shu le? Awˬ tehˬ awˬ na haꞈ daꞈ ve a shu le? Ngaˬ hui awˬ pon G’uiˬ sha Yeˍsuˆ htaꞈ peu laˇ ve yoˬ tehꞈ a shu yonˍ ve le? Mvuhˇ miˬ hpawˇ maˇ caˉ daꞈ ve a shu le? Miˬ guiˬ hk’oˆ shoꞈ shaꞈ chehˇ ve htaꞈ G’uiˬ sha ve mvuhˇ miˬ ceh tiˉ gu g’a ve yoˬ tehꞈ, k’oˆ maˍ ve a shu le? Yaˬhoˉvaˬ ve Shaˉhkiˆhkanˍ ve chaw ceh tiˉ chi hk’e te chehˇ ve yoˬ.—Iˉsaˍyaˆ 43:10-12.

Nawˬ hk’aˬ hk’e te tuˬ le?

15. Ngaˬ hui oˉ k’oˍ pui ve htaꞈ G’uiˬ sha haꞈ yuˬ tcuh gaˇ ve k’o, hk’aˬ hk’e g’a te ve le?

15 G’uiˬ sha cawˬ ve tehꞈ yonˍ ve ceh tiˉ maˇ lawꞈ. Neˇ teˇ hpaˍ  htawˇ, G’uiˬ sha cawˬ ve tehꞈ yonˍ ve yoˬ. Yaꞈ hk’aˇ, yawˇ hui G’uiˬ sha hkawˇ maˇ na yuˬ. (Yaˍkoˆ 2:19) Ngaˬ hui oˉ k’oˍ pui ve htaꞈ G’uiˬ sha haꞈ yuˬ tcuh gaˇ ve k’o, yonˍ ve ceh tiˉ maˇ lawꞈ, g’a g’aꞈ te ve yoˬ.

16. Aˬ htoꞈ ma te ngaˬ hui maˇ heˆ heˆ ve bon liˇ htaꞈ maˇ caˉ daꞈ ve le?

16 Ngaˬ hui oˉ k’oˍ pui ve htaꞈ G’uiˬ sha haꞈ yuˬ tcuh gaˇ ve k’o, maˇ heˆ heˆ ve bon liˇ htaꞈ maˇ g’a caˉ daꞈ. Tcuh kaˍ paˍ Iˉsaˍyaˆ bvuhꞈ taˍ ve, “nawˬ hui ve awˬ to htaꞈ daꞈ kehˬ tuˬ te leh venˇ hk’aw tawˆ k’ai loˬ.” (Iˉsaˍyaˆ 52:11; 2 Kawˇrenˍhtuˆ 6:17) Chi htaꞈ pa taw, ngaˬ hui maˇ heˆ heˆ ve bon liˇ htaꞈ maˇ caˉ daꞈ.

17, 18. “Uiˍ ve Baˍbuˍlonˍ” aˬ htoꞈ ma le? Aˬ ma te leh Uiˍ ve Baˍbuˍlonˍ hk’aw tawˆ la cawˇ ve le?

17 Maˇ heˆ heˆ ve bon liˇ aˬ htoꞈ ma le? Liꞈ hpu hk’aw k’oˆ taˍ ve hk’e, G’uiˬ sha htaꞈ oˉ k’oˍ pui ve awˬ hk’aˇ maˇ maˍ ve teˇ bon liˇ le le yoˬ. Maˇ heˆ heˆ ve bon liˇ hk’a peu-eˬ htaꞈ “Uiˍ ve Baˍbuˍlonˍ” tehꞈ, Liꞈ hpu hk’aw k’oˆ taˍ ve yoˬ. (Hpeuꞈ maˍ ve 17:5) Aˬ htoꞈ ma te oˇ hk’e kuˬ ve le? Noˉaꞈ awˬ co-e iˉ kaˆ htonˍ peuˬ hk’awꞈ nawˉ, maˇ heˆ heˆ ve bon liˇ maˍ ve awˬ ceuˬ Baˍbuˍlonˍ venˇ hk’aw yuˬ laˬ leh maˍ ve pa taw, miˬ guiˬ hk’oˆ zuhˇ k’ai ve yoˬ. Tawˇ pa haˉ te k’o, Baˍbuˍlonˍ chaw g’uiˬ sha shehˆ g’aˇ ve awˬ moˍ laiˉ moˍ htaꞈ oˉ k’oˍ pui ve yoˬ. Chi beuꞈ teˇ co-e kaꞈ, g’uiˬ sha shehˆ g’aˇ teˇ to tiˉ ve awˬ lawn laiˉ bon liˇ maˍ ve yoˬ. Yaꞈ hk’aˇ, Liꞈ hpu hk’aw hk’a tawˍ lehˆ k’oˆ taˍ ve, awˬ tehˬ awˬ na G’uiˬ sha lehˬ Yaˬhoˉvaˬ teˇ g’aˇ tiˉ hpehꞈ ve yoˬ. Yeˍsuˆ lehˬ yawˇ ve Yaˇ paˍ hpehꞈ ve yoˬ. (Yoˇhanˬ 17:3) Baˍbuˍlonˍ chaw yonˍ ve, ngaˬ hui suh peuˬ k’o, awˬ ha ku tawˆ-e leh moˬ naˆ hoꞈ hk’aw g’a hkanˍ ve yoˬ. Chi lehˬ awˬ tehˬ maˇ heˆ.—K’oˆ maˍ ve awˬ lawn 14, 17 leh 18 htaꞈ nyi sheˍ.

18 G’uiˬ sha k’oˆ ve maˇ maw k’o, maˇ heˆ heˆ ve bon liˇ hk’a peu-eˬ htaꞈ te luˬ te sheˆ piˇ tuˬ yoˬ. (Hpeuꞈ maˍ ve 18:8) Maˇ heˆ heˆ ve bon liˇ hk’aw aˬ ma te haˆ haˆ tawˆ la cawˇ ve nawˬ na g’a-aw laˇ? Hk’awꞈ nawˉ maˇ g’a leh tuˬ, Yaˬhoˉvaˬ G’uiˬ sha nawˬ htaꞈ tawˆ la tcuh gaˇ ve yoˬ.—Hpeuꞈ maˍ ve 18:4.

Yaˬhoˉvaˬ ve chaw geh teˇ geh kanˉ te ve k’o, nawˬ miˬ guiˬ hk’oˆ lo yawˇ ve yehˬ yaˇ k’a yaˇ teˇ g’aˇ hpehꞈ g’a ve

19. Nawˬ Yaˬhoˉvaˬ ve kanˉ ca te la ve k’o, yawˇ nawˬ htaꞈ hk’aˬ hk’e haꞈ shaˉ laˇ tuˬ le?

 19 Maˇ heˆ heˆ ve bon liˇ hk’aw tawˆ la leh Yaˬhoˉvaˬ ve kanˉ htaꞈ ca te la ve k’o, yehˬ k’a hk’aw ve chaw leh awˬ chawˇ teˇ hpaˍ nawˬ dawˇ cheˆ ve htaꞈ maˇ na g’a leh, nawˬ ve a shaꞈ teꞈ kuiˬ haˍ jaˇ tuˬ te laˇ ve yoˬ hehˉ. Yaꞈ hk’aˇ, Yaˬhoˉvaˬ nawˬ htaꞈ maˇ chiˇ baˬ leh haꞈ shaˉ laˇ tuˬ yoˬ. Miˬ guiˬ hk’oˆ awˬ tehˬ haꞈ daꞈ ve G’uiˬ sha ve yehˬ k’a lonˉ hk’aw nawˬ kaꞈ teˇ g’aˇ chehˇ g’a leh G’uiˬ sha ve miˬ guiˬ awˬ suhˉ hk’aw co co taiˍ taiˍ g’a chehˇ tuˬ dawˇ law kuiˬ cawˬ g’a ve yoˬ. (Maˍkuˆ 10:28-30) Nawˬ Yaˬhoˉvaˬ ve kanˉ ca te la ve htaꞈ sha hpawˇ maˇ cawˇ ve yehˬ k’a hk’aw ve chaw leh awˬ chawˇ Liꞈ hpu k’awꞈ henˇ la tuˬ naˍ, maˇ shiˍ.

20. Cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ pui ve teˇ ceuˬ aˬ htoꞈ ma te a yeˇ uiˍ ve le?

20 Maˇ maw k’o, haiˬ ve hk’a peu-eˬ htaꞈ G’uiˬ sha te luˬ piˇ leh miˬ guiˬ hk’oˆ G’uiˬ sha ve mvuhˇ miˬ uˉ peunˍ la tuˬ yoˬ. (2 Peˍtruˆ 3:9, 13) Awˬ yanˇ chi lehˬ daꞈ jaˇ! Yaˬhoˉvaˬ loˍ ve hk’e, chaw hk’a peu-eˬ yawˇ htaꞈ oˉ k’oˍ pui la tuˬ yoˬ. Chi htaꞈ pa taw, chi teˇ hkui kaꞈ cawˇ ve awˬ hk’aˇ awˬ hk’aw lo G’uiˬ sha htaꞈ oˉ k’oˍ tanˬ pui ve a yeˇ uiˍ jaˇ.