Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

A shu Yaˬhoˉvaˬ ve A loˍ Awˬ hk’aˇ suh Te Chehˇ ve le

 Awˬ lawn 20

Uˉ peunˍ ve Kawˍmiˍtiˍ Chi beuꞈ teˇ co-e Aˬ htoꞈ ma Kanˉ te ve le

Uˉ peunˍ ve Kawˍmiˍtiˍ Chi beuꞈ teˇ co-e Aˬ htoꞈ ma Kanˉ te ve le

Tcuh yaˇ awˬ co-e uˉ peunˍ ve kawˍmiˍtiˍ

Uˉ peunˍ ve kawˍmiˍtiˍ bvuhꞈ feu piˇ ve liꞈ htaꞈ g’aw ve

Tcuh yaˇ awˬ co-e awˬ hk’aw lo “Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ” a yeˇ uiˍ ve awˬ lawn htaꞈ jehˬ cheˆ tuˬ, Hkriꞈ yaˇ awˬ moˍ hk’a peu-eˬ awˬ tan leuˆ yuˬ taˍ ve i ve awˬ moˍ kawˍmiˍtiˍ kanˉ te ve yoˬ. (Tcuh yaˇ 15:2) Yawˇ hui Liꞈ hpu hk’aw chaˬ nyi leh, G’uiˬ sha ve awˬ ha hpu beˆ maˍ piˇ ve awˬ hk’aˇ suh g’aꞈ te ve pa taw, yawˇ hui nyi ma teˇ shiˍ tiˉ taˍ leh jehˬ daꞈ ve yoˬ.[1] (Tcuh yaˇ 15:25) Chi beuꞈ teˇ co-e htawˇ oˇ htaˇ hk’a shuˍ g’aꞈ te ve yoˬ.

G’uiˬ sha kawˍmiˍtiˍ chi htaꞈ yehˇ leh yawˇ ve a loˍ g’aꞈ te tcuh ve yoˬ. Kawˍmiˍtiˍ awˬ hk’aw lo leuˆ yuˬ taˍ ve awˬ viˉ awˬ nyi hawˉ hk’aˆ chi teˇ hpaˍ lehˬ, G’uiˬ sha ve Tawˇ hkawˇ htaꞈ a yeˇ te jaˇ leh, co ha hpawˇ leh kanˉ hpawˇ te laˬ maw jaˇ peuˬ ve yoˬ. Miˬ guiˬ hk’a peu-eˬ hk’oˆ awˬ viˉ awˬ nyi loˍ kuiˬ teˇ hpaˍ chaˬ nyi tuˬ awˬ pon yawˇ hui teˇ shinˉ le le hpawnˬ daꞈ ve yoˬ. Tcuh yaˇ awˬ co-e hk’a shuˍ, yawˇ hui Liꞈ hpu awˬ hk’aˇ suh maˍ tuˬ awˬ pon, bvuhꞈ taˍ ve liꞈ maˇ k’oˆ, toˇ nyi shehˍ hpaˇ maˇ k’oˆ, leh awˬ kaˍ awˬ nu awˬ hk’aˇ htaꞈ yehˇ ve yoˬ.[2] Chi hk’e te ve teˇ ceuˬ, G’uiˬ sha ve chaw hk’a peu-eˬ te hk’aˇ leh dawˇ hk’aˇ hawˍ daꞈ tcuh ve yoˬ. (Tcuh yaˇ 16:4, 5)[3] Uˉ peunˍ ve Kawˍmiˍtiˍ lehˬ, co ha hpawˇ ve caˇ tuˬ pehˬ piˇ ve, G’uiˬ sha ve mvuhˇ miˬ awˬ lawn hto toˇ ve teˇ ceuˬ uiˍ la mvuh la tuˬ te ve, leh awˬ viˉ awˬ nyi htaꞈ awˬ vuiˬ aꞈ piˇ tuˬ kanˉ teˇ hpaˍ htaꞈ nyi haꞈ shaˉ ve yoˬ.[4]

Uˉ peunˍ ve Kawˍmiˍtiˍ chi ve G’uiˬ sha ve awˬ ha hpu beˆ maˍ piˇ ve htaꞈ haꞈ yuˬ ve yoˬ. Uˉ peunˍ ve Kawˍmiˍtiˍ lehˬ, mvuhˇ naw ma miˬ naˆ ma htaꞈ uiˍ jaˇ mvuh jaˇ ve Uˉ peunˍ shehˍ hpaˇ Yaˬhoˉvaˬ leh Hkriꞈ yaˇ awˬ moˍ ve awˬ hoˉ Yeˍsuˆ geh laˬ ve beˆ maˍ laˇ ve htaꞈ cuˇ ve yoˬ. (1 Kawˇrenˍhtuˆ 11:3; Eˇfeˇsuꞈ 5:23) Uˉ peunˍ ve Kawˍmiˍtiˍ hk’aw teˇ g’aˇ leh teˇ g’aˇ lehˬ, G’uiˬ sha ve chaw awˬ hk’oˆ awˬ hoˉ hpehꞈ ve yoˬ tehꞈ yawˇ hui maˇ shawˍ ve yoˬ. Yawˇ hui leh leuˆ yuˬ taˍ ve Hkriꞈ yaˇ teˇ g’aˇ le le, “Yawˬ ehˉ hk’a k’ai kuiˬ teˇ kaˬ le le lo awˬ hk’aˇ suh k’ai ve chaw hui hpehꞈ ve yoˬ.” (Hpeuꞈ maˍ ve 14:4)[5] Ngaˬ hui yawˇ hui awˬ pon bon lawˬ piˇ ve k’o, awˬ hpfuhˇ hk’aˆ jaˇ tehꞈ Uˉ peunˍ ve Kawˍmiˍtiˍ shawˍ ve yoˬ.

  •  Tcuh yaˇ awˬ co-e Uˉ peunˍ ve Kawˍmiˍtiˍ a shu hpehꞈ ve le.

  •  Chi beuꞈ teˇ co-e Uˉ peunˍ ve Kawˍmiˍtiˍ G’uiˬ sha geh beˆ maˍ laˇ ve awˬ hk’aˇ htaꞈ hk’aˬ hk’e te cuˇ ve le.