Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

A shu Yaˬhoˉvaˬ ve A loˍ Awˬ hk’aˇ suh Te Chehˇ ve le

 Awˬ lawn 9

Hpawnˬ daꞈ tuˬ Ngaˬ hui Hk’aˬ hk’e Gu Hehnˇ tuˬ le

Hpawnˬ daꞈ tuˬ Ngaˬ hui Hk’aˬ hk’e Gu Hehnˇ tuˬ le

Kanˍbawˇdiˇ-aˇ

Yuˬkaˬrenˇ

Yaˬhoˉvaˬ ve Shaˉhkiˆhkanˍ ve chaw geh nawˬ Liꞈ hpu henˇ chehˇ ve k’o, teˇ pawˆ le le henˇ tuˬ ve awˬ lawn awˬ tanˇ htaꞈ awˉ lawˉ nawˬ coˇ caˇ leh g’aw tuˬ yoˬ hehˉ. Hkriꞈ yaˇ awˬ moˍ geh maˇ hpawnˬ daꞈ sheˍ htaˇ, nawˬ oˇ hk’e te ve kaꞈ daꞈ jaˇ ve yoˬ. Hk’aˬ htaˆ chi htaˆ kaꞈ ngaˬ hui gu chehˇ ve k’o, awˬ bon cawˬ maˇ tuˬ yoˬ.

Henˇ tuˬ daꞈ ve awˬ yanˇ leh keunˍ ve awˬ ti htaꞈ g’a leuˆ yuˬ ve yoˬ. Nawˬ dawˇ tcuhˉ-aˍ tuˬ hk’aˬ teˇ yanˇ daꞈ ve le. Mvuhˇ shawˉ teˇ naꞈ kanˉ maˇ te sheˍ htaˇ, maˇ heˆ leh mvuhˇ hpeuꞈ hpawˇ yaˇ zuhꞈ peuˬ hk’awꞈ nawˉ laˇ. Nawˬ henˇ tuˬ awˬ yanˇ a ciˉ cawˬ ve htawˇ, teˇ ceuˬ ceuˬ maˇ shoꞈ shaꞈ laˇ tuˬ, awˬ yanˇ hk’aˬ maw fuiˍ teh tuˬ dawˇ cheˆ loˬ. Gawˬ kuiˬ ca leh teˇ ceuˬ kaꞈ maˇ shoꞈ shaꞈ laˇ tuˬ ri di-o, hti vi, leh caꞈ tawˇ yaw tuˬ hoˆ cawˇ ve yoˬ. G’uiˬ sha ve tawˇ hkawˇ htaꞈ dawˇ tcuhˉ-aˍ tuˬ maˇ henˇ sheˍ htaˇ bon lawˬ ve teˇ ceuˬ oˇ ve teˇ nyi dawˇ hkiˉ ve awˬ lawn yawnˇ k’ai tuˬ ga laˇ ve yoˬ. (Hpiˇliˇpiˆ 4:6, 7)

Dawˇ hk’aˇ piˇ tuˬ awˬ pon gu leh a yeˇ uiˍ ve tawˇ hkawˇ htaꞈ hk’aiˇ taˍ loˬ. Hk’a dehꞈ maˇ henˇ sheˍ htaˇ, awˬ lawn htaꞈ tanˬ nyi loˬ. Henˇ tuˬ ve awˬ lawn lonˉ ma leh awˬ lawn ehˉ teˇ lawn le le htaꞈ hk’aˬ hk’e hawˍ daꞈ ve, a yeˇ uiˍ ve awˬ lawn, awˬ han leh k’awꞈ hpfuhˆ dawˇ nyi ve na nyi hkawˇ teˇ hpaˍ htaꞈ nyi ve yoˬ. Peuˬ leh, teˇ tawn peuˬ teˇ tawn g’aw leh oˇ teˇ tawn hk’aw na hkawˇ htaꞈ hk’awꞈ tuˬ g’a ca ve yoˬ. Cawˬ taˍ ve Liꞈ hpu awˬ tawn htaꞈ hpeuꞈ g’aw nyi leh, Liꞈ hpu oˇ teˇ tawn ve awˬ lawn htaꞈ hk’aˬ hk’e caˉ daꞈ ve le tehꞈ g’a dawˇ nyi ve yoˬ. (Tcuh yaˇ 17:11) Hk’awꞈ hkawˇ htaꞈ nawˬ ca mawˬ peuˬ k’o, hpawnˬ daꞈ ve awˬ yanˇ awˬ hk’aw lo hk’awꞈ htaˇ nawˬ dawˇ nawˇ tuˬ, oˇ teˇ tawn hk’aw liꞈ mehˆ a yeˇ uiˍ ve awˬ hawˉ lo g’a hk’aiˇ taˍ ve yoˬ. Peuˬ k’o, hpawnˬ daꞈ kuiˬ hk’aw nawˬ hk’awꞈ gaˇ ve k’o, laꞈ sheh chiˇ leh nawˬ ve tawˇ hkawˇ ngeh chaweh hk’awꞈ piˇ hpehꞈ ve yoˬ.

Teˇ shinˉ leh teˇ shinˉ hpawnˬ daꞈ ve awˬ lawn chaˬ nyi ve teˇ yanˇ, nawˬ dawˇ hk’aˇ awˬ suhˉ leh Liꞈ hpu hk’aw cuˇ yiˍ maˍ yiˍ cawˬ maˇ la ve yoˬ. (Maꞈhtehˍ 13:51, 52)

  •  Hpawnˬ daꞈ tuˬ awˬ pon gu hehnˇ taˍ tuˬ nawˬ hk’aˬ htaˆ chi htaˆ kaꞈ aˬ htoꞈ ma te tuˬ le.

  •  Hpawnˬ daꞈ kuiˬ hk’aw dawˇ hk’aˇ piˇ tuˬ nawˬ hk’aˬ hk’e gu hehnˇ taˍ g’a ve le.