Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

A shu Yaˬhoˉvaˬ ve A loˍ Awˬ hk’aˇ suh Te Chehˇ ve le

 Awˬ lawn 16

Ga piˇ Shehˍ hpaˇ Aˬ htoꞈ ma Awˬ vuiˬ Cawˬ ve le

Ga piˇ Shehˍ hpaˇ Aˬ htoꞈ ma Awˬ vuiˬ Cawˬ ve le

Man

Hpawnˬ daꞈ kuiˬ hk’aw bon maˍ paˍ

Hto toˇ ve awˬ moˍ

Hpawnˬ daꞈ kuiˬ yehˬ htaꞈ nyi haꞈ shaˉ ve

Hkriꞈ yaˇ awˬ moˍ hk’aw ve awˬ vuiˬ teˇ hpaˍ htaꞈ te ve Hkriꞈ yaˇ hawˉ hk’aˆ nyiˇ moˍ cawˬ ve yoˬ. Chaw chi nyiˇ moˍ lehˬ, “nyi haꞈ shaˉ shehˍ hpaˇ teˇ hpaˍ leh ga piˇ shehˍ hpaˇ teˇ hpaˍ” hpehꞈ ve yoˬ tehꞈ Liꞈ hpu hk’aw k’aoˍ taˍ ve yoˬ. (Hpiˇliˇpiˆ 1:1) Maˇ-awˍ ve, Hkriꞈ yaˇ awˬ moˍ teˇ kaˬ le le hk’aw chehˇ ve chaw mawˇ chaw kehˉ leh ga piˇ shehˍ hpaˇ laiˉ g’aˇ cawˬ ve yoˬ. Ngaˬ hui awˬ bon g’a tuˬ ga piˇ shehˍ hpaˇ aˬ htoꞈ ma kanˉ te ve le.

Chaw mawˇ chaw kehˉ htaꞈ kanˉ ga piˇ ve yoˬ. Ga piˇ shehˍ hpaˇ te ve chaw mawˇ leh yaˇ nehˬ teˇ hpaˍ lehˬ, yonˍ ve teˇ ceuˬ yeˬ jaˇ. Yawˇ hui daꞈ ve dawˇ shiˍ puiˉ ve nyi ma cawˬ leh yawˇ hui htaꞈ yonˍ g’a ve yoˬ. Hkriꞈ yaˇ awˬ moˍ hk’aw a yeˇ uiˍ ve leh awˬ bon cawˬ ve kanˉ teˇ hpaˍ htaꞈ yawˇ hui te ve yoˬ. Chi hk’e te ve pa taw chaw mawˇ chaw kehˉ maˍ piˇ ve leh co ha hpawˇ caˍ piˇ taw piˇ tcuhˉ taˍ tuˬ awˬ yanˇ cawˬ maˇ ve yoˬ.[1]

Awˬ bon cawˬ ve kanˉ te ve yoˬ. Ga piˇ shehˍ hpaˇ teˇ hpaˍ hpaˍ htaꞈ hpawnˬ daꞈ la ve chaw htaꞈ haꞈ yuˬ ve kanˉ aꞈ piˇ ve yoˬ. Teˇ hpaˍ hpaˍ awˬ hkawˇ tawˆ kuiˬ awˬ hk’eun htaꞈ nyi haꞈ shaˉ ve, liꞈ pehˬ piˇ ve, caˇ lanˇ te ve, leh awˬ moˍ yaˇ htaꞈ hto toˇ kuiˬ awˬ ti aꞈ piˇ ve yoˬ. Yawˇ hui Hpawnˬ daꞈ kuiˬ yehˬ kaꞈ haꞈ shaˉ ve yoˬ. Teˇ pawˆ pawˆ, chaw mawˇ htaꞈ ga piˇ tuˬ chaw mawˇ chaw kehˉ yawˇ hui geh lawˬ ve yoˬ. Aꞈ piˇ ve kanˉ teˇ ceuˬ le le htaꞈ ha lehˬ ha k’a te leh, yawˇ hui kanˉ hkeuꞈ ve pa taw, Hkriꞈ yaˇ awˬ moˍ yawˇ hui htaꞈ yawˆ yan ve yoˬ. (1 Tiˆmoˉseˍ 3:13)

Hkriꞈ yaˇ hawˉ hk’aˆ chi lehˬ daꞈ ve henˇ yuˬ tuˬ te ve yoˬ. Yawˇ hui daꞈ ve Hkriꞈ yaˇ ve awˬ hoꞈ awˬ han cawˬ ve pa taw, ga piˇ shehˍ hpaˇ hpehꞈ tuˬ yawˇ hui htaꞈ leuˆ teh ve yoˬ. Hpawnˬ daꞈ kuiˬ hk’aw maˍ htaˇ, ngaˬ hui yonˍ ve teˇ ceuˬ shaˬ te shaˬ yeˬ la tuˬ awˬ g’aˇ peꞈ laˇ ve yoˬ. Hto toˇ kuiˬ lo sheh k’ai htaˇ kaꞈ, nyi ma shaˬ te shaˬ pfuhˇ la tuˬ yawˇ hui ngaˬ hui htaꞈ awˬ g’aˇ peꞈ laˇ ve yoˬ. Chaw mawˇ chaw kehˉ geh yawˇ hui hk’a dehꞈ g’a ga ve pa taw, ha lehˬ ve teˇ ceuˬ leh cawˇ daꞈ hawˍ daꞈ ve teˇ ceuˬ cawˬ ve yoˬ. (Eˇfeˇsuꞈ 4:16) Awˬ yanˇ hpanˍ k’ai ve k’o yawˇ hui htawˇ, chaw mawˇ chaw kehˉ g’a hpehꞈ tuˬ yoˬ.

  •  Ga piˇ shehˍ hpaˇ hk’aˬ hk’e ve chaw hpehꞈ ve le.

  •  Hkriꞈ yaˇ awˬ moˍ awˬ pon g’a te ve kanˉ hk’a peu-eˬ hk’a sha sha-ehˍ te k’ai tuˬ, ga piˇ shehˍ hpaˇ teˇ hpaˍ hk’aˬ hk’e ga piˇ ve le.