Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

A shu Yaˬhoˉvaˬ ve A loˍ Awˬ hk’aˇ suh Te Chehˇ ve le

 Awˬ lawn 18

Dawˇ haˍ hpehꞈ haˍ Chehˇ ve Awˬ viˉ awˬ nyi htaꞈ Ngaˬ hui Hk’aˬ hk’e Ga Piˇ ve le

Dawˇ haˍ hpehꞈ haˍ Chehˇ ve Awˬ viˉ awˬ nyi htaꞈ Ngaˬ hui Hk’aˬ hk’e Ga Piˇ ve le

Doˬmiˬniˬkan

Jaˬpanˍ

Heˬtiˬ

Kawˆ tuˬ dawˇ haˍ tuˬ keuˆ la htaˇ, dawˇ haˍ hpehꞈ haˍ ve awˬ viˉ awˬ nyi htaꞈ laꞈ haˉ ca ga tuˬ Yaˬhoˉvaˬ ve Shaˉhkiˆhkanˍ ve chaw gu taˍ hehnˇ taˍ ve yoˬ. Chi hk’e te coˇ caˇ ve teˇ ceuˬ, ngaˬ hui awˬ tehˬ haꞈ daꞈ ve yoˬ tehꞈ te tawˆ la ve yoˬ. (Yoˇhanˬ 13:34, 35; 1 Yoˇhanˬ 3:17, 18) Ngaˬ hui aˬ htoꞈ ma ga g’a tuˬ le.

Hpu tanˇ piˇ ve yoˬ. Tcuh yaˇ awˬ co-e hk’aw Yuˇdaꞈ mvuhˇ miˬ lo meuꞈ lonˉ kaˆ lonˉ hpehꞈ la htaˇ, oˇ kaˬ lo chehˇ taˍ ve awˬ viˉ awˬ nyi Hkriꞈ yaˇ htaꞈ ga piˇ tuˬ Anˍtiˆawˍ venˇ lo chehˇ ve Hkriꞈ yaˇ hpu tanˇ piˇ ve yoˬ. (Tcuh yaˇ 11:27-30) Chi hk’a shuˍ shuˍ, mvuhˇ miˬ teˇ hpaˍ hpaˍ hk’aw chehˇ ve ngaˬ hui ve awˬ viˉ awˬ nyi dawˇ haˍ hpehꞈ haˍ ve htaꞈ ngaˬ hui shiˍ ve teˇ yanˇ, Hkriꞈ yaˇ awˬ moˍ htaꞈ cuˇ leh hpu shi mawˇ jeˬ tanˇ piˇ ve yoˬ. (2 Kawˇrenˍhtuˆ 8:13-15)

Awˬ bon cawˬ ve ga piˇ ve kanˉ te ve yoˬ. Kawˆ tuˬ dawˇ haˍ tuˬ keuˆ la htaˇ, chaw mawˇ chaw kehˉ hui lehˬ, Hkriꞈ yaˇ awˬ moˍ hk’aw ve awˬ moˍ yaˇ teˇ g’aˇ le le chehˇ sha chehˇ ve laˇ tehꞈ shiˍ tuˬ, teˇ g’aˇ le le htaꞈ ca nyi toˇ ve yoˬ. Ga piˇ ve kawˍmiˍtiˍ lehˬ caˇ tuˬ, kehˬ ve iˉ kaˆ, aˉ poꞈ veuꞈ k’aˇ, leh naˆ tsuhˇ naˆ yaweh hpawˇ cawˬ tuˬ gu piˇ ve yoˬ. Hpawnˬ daꞈ kuiˬ yehˬ leh yehˬ luˬ k’ai taˍ ve htaꞈ k’awꞈ gu te tuˬ, laꞈ meuˇ puiˉ ve Shaˉhkiˆhkanˍ ve chaw laiˉ g’aˇ awˬ to leh awˬ g’aˇ awˬ shaˉ ga piˇ ve awˬ hk’aw lo a shu yawˇ hk’aˇ yawˇ hpu tawˆ leh k’ai ve yoˬ. Cawˇ daꞈ hawˍ daꞈ puiˉ ve ngaˬ hui ve kanˉ hk’aˇ cawˬ leh teˇ geh kanˉ te ve pa taw, loˍ la htaˇ awˬ to leh awˬ g’aˇ awˬ shaˉ yuˬ tawˆ leh ga piˇ ve chaw laꞈ haˉ ca g’a ve yoˬ.[1] Ngaˬ hui hk’a shuˍ “yonˍ ve chaw” htaꞈ ga piˇ ve htawˇ, te g’a ve k’o peun daꞈ ve bon liˇ chaw htaꞈ kaꞈ ga piˇ ve yoˬ. (Gaˍlaˍtiˆ 6:10)

Nyi ma leh co ha hpawˇ ga piˇ ve yoˬ. Kawˆ tuˬ dawˇ haˍ tuˬ g’a hpuˇ ve chaw htaꞈ awˬ g’aˇ piˇ tuˬ loˍ jaˇ ve yoˬ. Awˬ yanˇ oˇ ve awˬ hk’aw lo, “dawˇ sha gaˇ sha tuˬ hk’a peu-eˬ piˇ shehˍ hpaˇ G’uiˬ sha” Yaˬhoˉvaˬ geh ngaˬ hui awˬ g’aˇ g’a ve yoˬ. (2 Kawˇrenˍhtuˆ 1:3, 4) Tuꞈ hkanˍ leh naˬ tuˬ te piˇ ve awˬ ceuˬ hk’a peu-eˬ htaꞈ maˇ maw k’o, G’uiˬ sha ve mvuhˇ miˬ te luˬ tuˬ yoˬ tehꞈ Liꞈ hpu hk’aw ka tiꞈ te taˍ ve hk’e, dawˇ tuiꞈ gaˇ tuiꞈ ve chaw htaꞈ ngaˬ hui ha lehˬ ha k’a ca hto piˇ ve yoˬ. (Hpeuꞈ maˍ ve 21:4)

  •  Kawˆ tuˬ dawˇ haˍ tuˬ keuˆ la htaˇ aˬ htoꞈ ma pa taw Shaˉhkiˆhkanˍ ve chaw laꞈ haˉ ga piˇ g’a ve le.

  •  Ponˬ ve chaw hui dawˇ sha maˇ la tuˬ, ngaˬ hui yawˇ hui htaꞈ co ha hpawˇ hk’aˬ hk’e ga piˇ g’a ve le.