Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

A shu Yaˬhoˉvaˬ ve A loˍ Awˬ hk’aˇ suh Te Chehˇ ve le

 Awˬ lawn 2

Aˬ htoꞈ ma pa taw Ngaˬ hui htaꞈ Yaˬhoˉvaˬ ve Shaˉhkiˆhkanˍ ve chaw tehꞈ Kuˬ ve le

Aˬ htoꞈ ma pa taw Ngaˬ hui htaꞈ Yaˬhoˉvaˬ ve Shaˉhkiˆhkanˍ ve chaw tehꞈ Kuˬ ve le

Noˉaꞈ

Aˍbraˍhanˍ leh Saˍraˇ

Moˉseˍ

Yeˍsuˆ Hkriꞈ

Yaˬhoˉvaˬ ve Shaˉhkiˆhkanˍ ve chaw lehˬ, bon liˇ awˬ suhˉ ve awˬ meh hpehꞈ ve yoˬ tehꞈ laiˉ g’aˇ dawˇ ve yoˬ. Yaꞈ hk’aˇ, ponˬ taˉ peuˬ ve 2,700 hk’awꞈ hpaˆ htaˇ, awˬ tehˬ awˬ na G’uiˬ sha teˇ g’aˇ tiˉ ve htaꞈ kanˉ te piˇ ve chaw yawˇ ve “shaˉ hkiˆ” tehꞈ kuˬ ve yoˬ. (Iˉsaˍyaˆ 43:10-12) 1931 hk’awꞈ gaˬ htaˇ, Liꞈ hpu Henˇ ve Chaw tehꞈ awˬ meh htaꞈ ngaˬ hui yuˬ yehˇ ve yoˬ. Aˬ htoꞈ ma pa taw awˬ meh Yaˬhoˉvaˬ ve Shaˉhkiˆhkanˍ ve chaw tehꞈ ngaˬ hui yuˬ yehˇ ve le.

Awˬ meh chi ve ngaˬ hui ve G’uiˬ sha a shu le tehꞈ shiˍ laˇ ve yoˬ. G’uiˬ sha ve awˬ meh Yaˬhoˉvaˬ tehꞈ Liꞈ hpu hk’aw laiˉ hinˉ pawˆ cawˬ taˍ ve yoˬ tehꞈ, aˬ sho-eˬ htaˇ bvuhꞈ taˍ ve Liꞈ hpu awˬ k’oˆ teˇ hpaˍ hk’aw hpeuꞈ maw laˇ ve yoˬ. Chi beuꞈ Liꞈ hpu laiˉ k’oˆ hk’aw awˬ meh chi ve shiˆ baˬ leh yawˇ ve aˉ yaˇ G’uiˬ sha maˇ heˆ k’o, Jawˇ mawˇ G’uiˬ sha yuˬ keu ve yoˬ. Yaꞈ hk’aˇ, awˬ tehˬ awˬ na ve G’uiˬ sha yawˇ awˬ to Moˉseˍ htaꞈ hpeuꞈ maw piˇ htaˇ, yawˇ ve awˬ meh Yaˬhoˉvaˬ tehꞈ yehˇ leh k’oˆ ve, “Chi lehˬ, co co taiˍ taiˍ ngaˬ ve awˬ meh hpehꞈ” ve yoˬ. (Tawˆ k’ai ve 3:15) Chi htaꞈ pa taw, yawˇ awˬ to g’uiˬ sha awˬ kehˆ teˇ hpaˍ htaꞈ fuiˍ teh taˍ ve yoˬ. G’uiˬ sha ve daꞈ kehˬ ve awˬ meh htaꞈ ngaˬ hui ha lehˬ ha k’a yuˬ yehˇ ve yoˬ.

Ngaˬ hui ve awˬ meh ngaˬ hui te chehˇ ve kanˉ hto laˇ ve yoˬ. Aˬ sho-eˬ htaˇ, laiˉ co-e ve chaw Yaˬhoˉvaˬ htaꞈ yonˍ ve awˬ hk’aw lo shaˉ hkiˆ hpehꞈ ve chaw hteˇ cawˇ ve Aˍbeˍlaˆ tanˬ ve yoˬ. Laiˉ ha hk’awꞈ awˬ yanˇ awˬ hk’aw lo Noˉaꞈ, Aˍbraˍhanˍ, Saˍraˇ, Moˉseˍ, Daˍviˆ, leh awˬ kaˍ awˬ nu ve chaw “shaˉ hkiˆ hkanˍ shehˍ hpaˇ” awˬ moˍ lonˉ hpehꞈ la ve yoˬ. (Heˍbrehˇ 11:4–12:1) Shaˉ nanˉ hk’aw chaw teˇ g’aˇ lehˬ, yaꞈ kuiˬ maˇ cawˬ ve chaw awˬ pon shaˉ hkiˆ hkanˍ ve hk’a shuˍ, G’uiˬ sha htaꞈ caˉ daꞈ ve awˬ tehˬ ma htaꞈ chaw yaˇ shiˍ tuˬ ngaˬ hui ga piˇ gaˇ ve yoˬ.

Ngaˬ hui Yeˍsuˆ htaꞈ henˇ yuˬ ve yoˬ. Liꞈ hpu yawˇ htaꞈ kuˬ taˍ ve, “Ka tiꞈ yeˬ leh hteˇ lehˍ cawˇ lehˍ shaˉ hkiˆ hkanˍ shehˍ hpaˇ” hpehꞈ ve yoˬ. (Hpeuꞈ maˍ ve 3:14) Yeˍsuˆ yawˇ k’awꞈ k’oˆ ve, yawˇ G’uiˬ sha ve awˬ meh hpeuꞈ maw piˇ leh, G’uiˬ sha htaꞈ caˉ daꞈ ve “hteˇ ve cawˇ ve teˇ ceuˬ awˬ lawn shaˉ hkiˆ hkanˍ” maˍ ve yoˬ. (Yoˇhanˬ 17:26; 18:37) Yeˍsuˆ hk’aˇ suh awˬ tehˬ awˬ na g’aꞈ yuˬ ve chaw Yaˬhoˉvaˬ ve awˬ meh htaꞈ g’a haꞈ yuˬ leh awˬ meh oˇ ve shu htaꞈ g’a shiˍ piˇ ve yoˬ. Chi ve lehˬ, Yaˬhoˉvaˬ ve Shaˉhkiˆhkanˍ ve chaw te chehˇ ve awˬ ceuˬ hpehꞈ ve yoˬ.

  • Aˬ htoꞈ ma pa taw Liꞈ hpu Henˇ ve Chaw awˬ meh Yaˬhoˉvaˬ ve Shaˉhkiˆhkanˍ ve chaw tehꞈ yuˬ yehˇ ve le.

  •  Yaˬhoˉvaˬ lehˬ miˬ g’uiˬ hk’oˆ yawˇ ve shaˉ hkiˆ hk’aˬ htaˆ tanˬ cawˬ la ve le.

  •  Yaˬhoˉvaˬ ve Shaˉ hkiˆ hkanˍ shehˍ hpaˇ shu aꞈ kehˉ uiˍ jaˇ ve a shu le.