Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

G'uiˬ sha Geh Laˬ ve Daꞈ ve Awˬ lawn sha tanˇ

 Awˬ lawn 6

Suh peuˬ ve Chaw Aˬ htoꞈ ma Dawˇ law kuiˬ Cawˬ ve le

Suh peuˬ ve Chaw Aˬ htoꞈ ma Dawˇ law kuiˬ Cawˬ ve le

G’uiˬ sha Aˍdanˍ htaꞈ k’oˆ piˇ ve, “Nawˬ jeꞈ hpehꞈ leh nawˬ jeꞈ hk’aw k’oꞈ-e tuˬ yoˬ.” AWˬ HKUIˉ PUIˍ 3:19, MGS.

1. Suh peuˬ ve chaw awˬ pon daꞈ ve awˬ lawn sha tanˇ aˬ htoꞈ ma cawˬ ve le.

Yeˍruˆsaˍlehnˍ venˇ neˇ ve Beˍtaˍniˆ venˇ lo Yeˍsuˆ gaˬ la htaˇ, yawˇ ve awˬ chawˇ Laˍzaˍruˆ suh ve awˇ nyi gaˬ peuˬ. Yeˍsuˆ lehˬ, Laˍzaˍruˆ ve awˬ viˉ ma Maˍhtaˆ leh Maˍriˆ geh tuˍ hpfuh lo k’ai ve yoˬ. Teˇ hkui gaˬ leh, chaw moˍ lonˉ hpawnˬ la ve yoˬ. Yeˍsuˆ Laˍzaˍruˆ htaꞈ k’awꞈ teꞈ tu la piˇ htaˇ, Maˍhtaˆ leh Maˍriˆ hk’aˬ ma ha lehˬ ve htaꞈ nawˬ dawˇ mawˬ g’a-aw laˇ.—Yoˇhanˬ 11:21-24, 38-44 g’aw sheˍ.

Maˍhtaˆ lehˬ, suh peuˬ ve chaw awˬ pon daꞈ ve awˬ lawn sha tanˇ cawˬ ve yoˬ tehꞈ yawˇ shiˍ peuˬ ve yoˬ. Yaˬhoˉvaˬ suh peuˬ ve chaw htaꞈ miˬ guiˬ hk’oˆ k’awꞈ teꞈ tu la piˇ tuˬ yoˬ tehꞈ, G’uiˬ sha ve Tawˇ hkawˇ k’oˆ taˍ ve htaꞈ yawˇ shiˍ ve yoˬ.—Yawˇbaˆ 14:14, 15 g’aw sheˍ.

2. Suh peuˬ ve chaw hk’aˬ hk’e hpehꞈ ve le.

Chaw yaˇ htaꞈ jeꞈ yuˬ hpanˍ taˍ ve yoˬ. (Awˬ hkuiˉ puiˍ 2:7; 3:19) Ngaˬ hui awˬ suhˍ awˬ shaˍ hk’aw chehˇ ve awˬ ha hpehꞈ ve maˇ heˆ. Chi htaꞈ pa taw ngaˬ hui suh k’o, teˇ ceuˬ kaꞈ maˇ ponˬ. Ngaˬ hui suh htaˇ uˉ nawꞈ nehˆ kaꞈ suh leh, teꞈ chiˉ kaꞈ maˇ dawˇ nyi puiˉ. Hk’e te leh, suh ve chaw maˇ nawˇ ve pa taw, Laˍzaˍruˆ lehˬ suh ve htaꞈ hk’aˬ hk’e hpehꞈ la ve awˬ lawn teꞈ ciˉ kaꞈ maˇ k’oˆ.—Chiˇ mvuh ve 146:4; Cuˇ yiˍ piˇ ve 9:5, 6, 10 g’aw sheˍ.

Chaw yaˇ suh peuˬ hk’awꞈ nawˉ, G’uiˬ sha yawˇ hui htaꞈ aˬ miˍ hk’aw hkanˍ tcuh ve laˇ. Suh peuˬ ve chaw teꞈ chiˉ maˇ shiˍ maˇ nawˇ tehꞈ Liꞈ hpu hk’aw k’oˆ taˍ ve pa taw, aˬ miˍ moˬ naˆ hoꞈ awˬ lawn heˍ ve teˇ ceuˬ hpehꞈ leh, G’uiˬ sha htaꞈ venˇ baˆ taˍ chehˇ ve yoˬ. Chaw yaˇ htaꞈ aˬ miˍ hk’aw hkanˍ tcuh tuˬ yoˬ tehꞈ dawˇ ve ceh kaꞈ G’uiˬ sha canˇ jaˇ ve yoˬ.—Yeˍraˍmiˆ 7:31 g’aw sheˍ.

 3. Suh peuˬ ve chaw ngaˬ hui htaꞈ tawˇ yaw laˇ g’a-aw laˇ.

Suh peuˬ ve chaw tawˇ yaw maˇ puiˉ kaˇ maˇ puiˉ. (Chiˇ mvuh ve 30:9) Yaꞈ hk’aˇ, mvuhˇ naw ma tcuh yaˇ teˇ hpaˍ hpaˍ haiˬ ve pa taw, suh peuˬ ve chaw hk’e te leh chaw htaꞈ tawˇ yaw piˇ ve yoˬ. (2 Peˍtruˆ 2:4) Suh peuˬ ve chaw htaꞈ coˇ caˇ leh tawˇ na nyi ve htaꞈ Yaˬhoˉvaˬ tawˍ taˍ ve yoˬ.—Bon maˍ ve 18:10, 11 g’aw sheˍ.

4. A shu k’awꞈ teꞈ tu la tuˬ le.

Suh peuˬ ve chaw laiˉ lanˬ g’aˇ miˬ guiˬ hk’oˆ k’awꞈ teꞈ tu la tuˬ yoˬ. G’uiˬ sha htaꞈ maˇ shiˍ leh, maˇ daꞈ ve awˬ ceuˬ te ve chaw teˇ hpaˍ hpaˍ htaꞈ htawˇ k’awꞈ teꞈ tu la piˇ tuˬ yoˬ.—Chiˇ mvuh ve 37:9; Tcuh yaˇ 24:15 g’aw sheˍ.

Teꞈ tu la ve chaw G’uiˬ sha htaꞈ caˉ daꞈ ve awˬ tehˬ ve awˬ lawn henˇ shiˍ g’a leh, Yeˍsuˆ htaꞈ yonˍ ve hk’aw yawˇ hkawˇ na yuˬ tuˬ yoˬ. (Hpeuꞈ maˍ ve 20:11-13) K’awꞈ teꞈ tu la leh daꞈ ve awˬ ceuˬ htaꞈ te ve chaw oˇ ve teˇ hpaˍ miˬ guiˬ hk’oˆ co co taiˍ taiˍ pyawˍ ve a shaꞈ g’a tuˬ yoˬ.—Yoˇhanˬ 5:28, 29 g’aw sheˍ.

5. Yaˬhoˉvaˬ lehˬ, suh peuˬ ve chaw htaꞈ k’awꞈ teꞈ tu la piˇ ve awˬ lawn ngaˬ hui htaꞈ aˬ htoꞈ ma hpeuꞈ maw laˇ ve le.

Suh peuˬ ve chaw dawˇ law kuiˬ cawˬ tuˬ, G’uiˬ sha yawˇ ve Yaˇ hpu htaꞈ peu laˇ leh ngaˬ hui awˬ pon hkanˍ suh ve yoˬ. Chi htaꞈ pa taw, suh peuˬ ve chaw htaꞈ k’awꞈ teꞈ tu la piˇ ve teˇ ceuˬ hpeuꞈ maw laˇ ve, Yaˬhoˉvaˬ haꞈ pehnˇ ve leh ha k’aˉ puiˉ jaˇ ve yoˬ. Suh peuˬ ve chaw k’awꞈ teꞈ tu la htaˇ, nawˬ a shu htaꞈ mawˬ daꞈ gaˇ ve le.—Yoˇhanˬ 3:16; Roˉmaꞈ 6:23 g’aw sheˍ.