Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ lawn 9

Nawˬ ve Yehˬ k’a Hk’aˬ hk’e Ha lehˬ Tuˬ le

Nawˬ ve Yehˬ k’a Hk’aˬ hk’e Ha lehˬ Tuˬ le

1. Aˬ htoꞈ ma pa taw heuˆ daꞈ ve teˇ ceuˬ yehˬ k’a ha lehˬ tuˬ a yeˇ uiˍ ve le.

Daꞈ ve awˬ lawn sha tanˇ lehˬ, ha lehˬ ve G’uiˬ sha Yaˬhoˉvaˬ geh laˬ ve yoˬ. Yawˇ lehˬ yehˬ k’a htaꞈ ha lehˬ tcuh gaˇ ve yoˬ. (1 Tiˆmoˉseˍ 1:11) G’uiˬ sha lehˬ, heuˆ daꞈ ve teˇ ceuˬ htaꞈ teh taˍ ve yoˬ. Yaˇ hu duˬ hu leh yehˬ k’a yeˬ chehˇ tuˬ, mvuhˇ miˬ awˬ liˇ awˬ hk’aˇ suh heuˆ daꞈ ve teˇ ceuˬ a yeˇ uiˍ ve yoˬ.

Heuˆ daꞈ ve teˇ ceuˬ htaꞈ G’uiˬ sha hk’aˬ hk’e dawˇ ve le. Heuˆ daꞈ peuˬ ve hawˉ hk’aˆ yaˇ miˇ htaꞈ yawˇ hk’aˬ htaˆ kaꞈ teˇ geh chehˇ tcuh piˇ gaˇ ve yoˬ. Hkriꞈ yaˇ lehˬ heuˆ daꞈ ve liꞈ te ve htaꞈ caˉ daꞈ ve mvuhˇ miˬ awˬ liˇ htaꞈ na yuˬ cawˇ ve yoˬ. (Luˉkaꞈ 2:1, 4, 5) Awˬ hpawˇ awˬ miˇ ka tiꞈ yeˬ daꞈ tuˬ Yaˬhoˉvaˬ heuˆ gaˇ ve yoˬ. (Heˍbrehˇ 13:4) Awˬ hpawˇ awˬ miˇ baˬ daꞈ ve htaꞈ yawˇ canˇ ve yoˬ. (Maˍlaˍhkiˆ 2:16) Awˬ hpawˇ awˬ miˇ ma teˇ g’aˇ haˉ chawˇ te htaˇ hehꞈ, Hkriꞈ yaˇ baˬ daꞈ leh awˬ suhˉ heuˆ tuˬ G’uiˬ sha a hkaw-anˬ piˇ ve yoˬ.—Maꞈhtehˍ 19:3-6, 9 g’aw sheˍ.

2. Awˬ hpawˇ awˬ miˇ hk’aˬ hk’e te piˇ daꞈ cawˇ ve le.

Yaˬhoˉvaˬ lehˬ, hawˉ hk’aˆ leh yaˇ miˇ heuˆ daꞈ htaˇ awˬ chawˇ hpehꞈ daꞈ tuˬ te hpanˍ ve yoˬ. (Awˬ hkuiˉ puiˍ 2:18) Awˬ suhˍ awˬ shaˍ hpawˇ ca caˍ leh G’uiˬ sha awˬ lawn maˍ tuˬ, awˬ hpawˇ lehˬ yehˬ k’a htaꞈ sheh k’ai cawˇ ve yoˬ. Awˬ miˇ ma awˬ pon yawˇ dawˇ nyi piˇ leh yawˇ htaꞈ haꞈ cawˇ ve yoˬ. Awˬ hpawˇ awˬ miˇ yawˆ yan daꞈ leh haꞈ daꞈ cawˇ ve yoˬ. Awˬ hpawˇ awˬ miˇ teˇ g’aˇ le le yaꞈ kuiˬ cawˬ ve pa taw, yehˬ k’a ha lehˬ tuˬ awˬ pon venˇ baˆ hpehˇ daꞈ ve awˬ hk’aˇ henˇ shiˍ ve teˇ ceuˬ a yeˇ uiˍ ve yoˬ.—Eˇfeˇsuꞈ 4:31, 32; 5:22-25, 33; 1 Peˍtruˆ 3:7 g’aw sheˍ.

3. Awˬ hpawˇ awˬ miˇ ha lehˬ kuiˬ maˇ cawˬ k’o baˬ daꞈ cawˇ-aw laˇ.

Awˬ hpawˇ awˬ miˇ ma maˇ cawˇ maˇ hawˍ daꞈ ve k’o, yawˇ huiˉ maˬ coˇ caˇ leh haꞈ pehnˇ ve awˬ hk’aw lo te piˇ daꞈ cawˇ ve yoˬ. (1 Kawˇrenˍhtuˆ  13:4, 5) Awˬ hpawˇ awˬ miˇ ma awˬ hk’aw lo i ve awˬ lawn htaꞈ gu tuˬ teˇ g’aˇ teˇ kaˬ hpaˆ daꞈ chehˇ tuˬ G’uiˬ sha ve tawˇ hkawˇ maˇ beˆ maˍ laˇ.—1 Kawˇrenˍhtuˆ 7:10-13 g’aw sheˍ.

4. Yaˇ teˇ hpaˍ-oˬ, G’uiˬ sha nawˬ hui htaꞈ aˬ htoꞈ ma peꞈ laˇ gaˇ ve le.

Yaˬhoˉvaˬ nawˬ hui htaꞈ ha lehˬ piˇ tcuh gaˇ ve yoˬ. Yaˇ nehˬ hpehꞈ chehˇ ve awˬ yanˇ awˬ hk’aw lo ha lehˬ tuˬ G’uiˬ sha nawˬ htaꞈ daꞈ jaˇ ve beˆ maˍ laˇ hkawˇ peꞈ laˇ ve yoˬ. Nawˬ pa nawˬ e hpehꞈ jaw hpuˇ jaw ve awˬ ceuˬ leh cuˇ yiˍ htaꞈ nawˬ awˬ bon g’a tuˬ G’uiˬ sha heuˆ gaˇ ve yoˬ. (Kawˇlawˇsehˇ 3:20) Nawˬ ve Te hpanˍ shehˍ hpaˇ leh yawˇ ve Yaˇ hpu awˬ pon kanˉ te ve awˬ hk’aw lo Yaˬhoˉvaˬ nawˬ htaꞈ ha lehˬ tcuh gaˇ ve yoˬ.—Cuˇ yiˍ piˇ ve 11:9–12:1; Maꞈhtehˍ 19:13-15; 21:15-16 g’aw sheˍ.

5. Awˬ pa awˬ e teˇ hpaˍ-oˬ, nawˬ hui ve yaˇ ha lehˬ tuˬ awˬ pon aˬ htoꞈ ma loˍ ve le.

Nawˬ ve yaˇ htaꞈ caˇ tuˬ dawˬ tuˬ, veuꞈ k’aˇ, chehˇ kuiˬ cawˬ piˇ tuˬ awˬ pon nawˬ kanˉ te hkeuꞈ cawˇ ve yoˬ. (1 Tiˆmoˉseˍ 5:8) Yaꞈ hk’aˇ, nawˬ hui ve yaˇ ha lehˬ ve htaꞈ g’a hpuˇ tuˬ awˬ pon, G’uiˬ sha htaꞈ haꞈ ve maˇ k’oˆ, yawˇ ve awˬ lawn shiˍ tuˬ g’a maˍ piˇ ve yoˬ. (Eˇfeˇsuꞈ 6:4) Nawˬ G’uiˬ sha htaꞈ haꞈ ve henˇ kuiˬ jawˬ kuiˬ te taˍ ve lehˬ, nawˬ ve yaˇ nyi ma awˬ tawˬ hk’a gaˬ heuˆ la g’a ve yoˬ. Nawˬ G’uiˬ sha ve tawˇ hkawˇ htaꞈ cuˇ leh beˆ maˍ piˇ ve k’o, yaˇ ve dawˇ hk’aˇ k’awꞈ gu daꞈ la piˇ g’a tuˬ yoˬ.—Bon maˍ ve 6:4-7; Tawˇ naˉ ve 22:6 g’aw sheˍ.

Nawˬ yaˇ htaꞈ awˬ g’aˇ piˇ leh chiˇ mvuh piˇ ve k’o, yawˇ hui awˬ bon g’a ve yoˬ. Yawˇ hui htaꞈ dawˇ hk’aˇ gu piˇ leh jawꞈ maˍ tuˬ loˍ ve yoˬ. Chi hk’e te maˍ piˇ ve lehˬ, yawˇ hui ha lehˬ ve htaꞈ mehˉ k’ai tuˬ te piˇ ve te hk’aˇ htaꞈ jaw k’ai tuˬ ga piˇ ve yoˬ. (Tawˇ naˉ ve 22:15) Yaꞈ hk’aˇ, jawꞈ maˍ ve teˇ ceuˬ hehnˇ jaˇ ve maˇ te cawˇ.—Kawˇlawˇsehˇ 3:21 g’aw sheˍ.

Yaˬhoˉvaˬ ve Shaˉhkiˆhkanˍ ve chaw lehˬ, awˬ pa awˬ e leh yaˇ htaꞈ ga piˇ ve liꞈ laiˉ k’oˆ yanˍ tawˆ ve yoˬ. Liꞈ chi teˇ hpaˍ Liꞈ hpu htaꞈ cuˇ taˍ ve yoˬ.—Chiˇ mvuh ve 19:7, 11 g’aw sheˍ.