Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

G'uiˬ sha Geh Laˬ ve Daꞈ ve Awˬ lawn sha tanˇ

 Awˬ lawn 2

G’uiˬ sha lehˬ A shu le

G’uiˬ sha lehˬ A shu le

1. Aˬ htoꞈ ma pa taw ngaˬ hui G’uiˬ sha htaꞈ oˉ k’oˍ pui cawˇ ve le.

Awˬ tehˬ awˬ na G’uiˬ sha lehˬ, teˇ ceuˬ le le htaꞈ Te hpanˍ shehˍ hpaˇ hpehꞈ ve yoˬ. Yawˇ awˬ hkuiˉ puiˍ kaꞈ awˬ leh meuˇ kaꞈ maˇ cawˬ. (Chiˇ mvuh ve 90:2) Liꞈ hpu hk’aw cawˬ ve daꞈ ve awˬ lawn sha tanˇ yawˇ geh laˬ ve yoˬ. (1 Tiˆmoˉseˍ 1:11) G’uiˬ sha ngaˬ hui htaꞈ a shaꞈ peꞈ laˇ ve pa taw, yawˇ teˇ g’aˇ htaꞈ ceh tiˉ oˉ k’oˍ pui cawˇ ve yoˬ.—Hpeuꞈ maˍ ve 4:11 g’aw sheˍ.

2. G’uiˬ sha hk’aˬ hk’e cawˬ ve le.

Chaw teˇ g’aˇ kaꞈ G’uiˬ sha htaꞈ maˇ mawˬ jaw. Awˬ lawn k’o, yawˇ awˬ ha hpehꞈ ve yoˬ. Tcuhˉ kuiˬ lehˬ, miˬ guiˬ hk’oˆ a shaꞈ teꞈ ve hk’a peu-eˬ aꞈ kehˉ yawˇ mvuh jaˇ ve yoˬ. (Yoˇhanˬ 1:18; 4:24) Yaꞈ hk’aˇ, hpanˍ taˍ ve awˬ ceuˬ htaꞈ mawˬ k’o, yawˇ ve awˬ hoꞈ awˬ han te hk’aˇ dawˇ hk’aˇ htaꞈ shiˍ hpehꞈ ve yoˬ. Tawˇ pa haˉ te k’o, yawˇ cuˇ yiˍ leh haꞈ pehnˇ ve cawˬ ve yoˬ tehꞈ, iˉ shiˍ suhˉ veˆ laiˉ ceuˬ maw laˇ ve yoˬ. Yawˇ ve kanˇ paˆ uiˍ jaˇ ve yoˬ tehꞈ k’ehˬ jaˇ ve mvuhˇ naw ma miˬ naˆ ma hpeuꞈ maw laˇ ve yoˬ.—Roˉmaꞈ 1:20 g’aw sheˍ.

G’uiˬ sha ve awˬ hoꞈ awˬ han te hk’aˇ dawˇ hk’aˇ htaꞈ leuˉ leh henˇ shiˍ hpehꞈ tuˬ ngaˬ hui Liꞈ hpu g’a g’aw ve yoˬ. G’uiˬ sha dawˇ cawˇ leh maˇ dawˇ cawˇ ve awˬ ceuˬ, yawˇ shu htaꞈ te piˇ ve awˬ hk’aˇ leh, hpehꞈ la ve awˬ lawn teˇ hpaˍ htaꞈ yawˇ te hk’awꞈ ve awˬ hk’aˇ Liꞈ hpu ngaˬ hui htaꞈ hto laˇ ve yoˬ.—Chiˇ mvuh ve 103:7-10 g’aw sheˍ.

3. G’uiˬ sha awˬ meh cawˬ ve laˇ.

Yeˍsuˆ k’oˆ ve, “Mvuhˇ naw ma hk’oˆ chehˇ ve ngaˬ hui ve Awˬ pa-oˬ, nawˬ ve awˬ meh htaꞈ yawˆ yan te piˇ lawˬ-oꞈ.” (Maꞈhtehˍ 6:9) G’uiˬ sha aˉ yaˇ laiˉ ceuˬ cawˬ htawˇ, awˬ meh teˇ meh tiˉ cawˬ ve yoˬ. Teˇ chaw ceuˬ leh teˇ chaw ceuˬ ve tawˇ hkawˇ awˬ meh oˇ ve awˬ hkawˇ tawˆ la ve maˇ shuˍ daꞈ. Laˇhuˍ hkawˇ k’o, “Yaˬhoˉvaˬ” k’oˆ ve yoˬ. (Chiˇ mvuh ve 83:18, MGS ) Hpeuꞈ maˍ ve liꞈ 19:6 hk’aw “Haˍleˍluˇyaˬ” tehꞈ k’oˆ ve tcuhˉ kuiˬ lehˬ, Yaˬ maˇ heˆ leh Yaˬhoˉvaˬ htaꞈ chiˇ mvuh-o tehꞈ k’oˆ gaˇ ve yoˬ.

Liꞈ hpu laiˉ daw awˬ hk’aw lo G’uiˬ sha awˬ meh yuˬ baˬ leh, Jawˇ mawˇ maˇ heˆ k’o G’uiˬ sha yuˬ keu ve yoˬ. Yaꞈ hk’aˇ Liꞈ hpu bvuhꞈ htaˇ, G’uiˬ sha awˬ meh aˬ laˬ hk’e 7,000 pawˆ cawˬ ve yoˬ.  Yeˍsuˆ G’uiˬ sha awˬ lawn maˍ htaˇ, chaw yaˇ htaꞈ G’uiˬ sha awˬ meh shiˍ piˇ ve yoˬ.—Yoˇhanˬ 17:26 g’aw sheˍ.

Haꞈ pehnˇ ve hk’a biˇ cawˬ ve awˬ pa chi teˇ g’aˇ hk’a shuˍ, hk’aˬ htaˆ kaꞈ ngaˬ hui awˬ bon g’a tuˬ G’uiˬ sha te ve yoˬ.

4. Yaˬhoˉvaˬ ngaˬ hui awˬ pon dawˇ nyi puiˉ ve laˇ.

Tuꞈ ve hkanˍ ve cawˬ maˇ jaˇ ve oˇ ve lehˬ, Yaˬhoˉvaˬ ngaˬ hui awˬ pon maˇ dawˇ nyi puiˉ ve G’uiˬ sha hpehꞈ ve yoˬ tehꞈ k’oˆ gaˇ ve laˇ. Ngaˬ hui htaꞈ lawˇ nyi laˇ tuˬ awˬ pon G’uiˬ sha tuꞈ hkanˍ tcuh laˇ ve yoˬ tehꞈ chaw teˇ hpaˍ hpaˍ k’oˆ ve awˬ tehˬ maˇ heˆ.—Yaˍkoˆ 1:13 g’aw sheˍ.

G’uiˬ sha chaw yaˇ htaꞈ awˬ meꞈ awˬ hponˇ cawˬ piˇ ve awˬ hk’aw lo a shu yawˇ hk’aˇ yawˇ awˬ to awˬ pon leuˆ yuˬ tuˬ hpehˇ piˇ taˍ ve yoˬ. G’uiˬ sha kanˉ te tuˬ ngaˬ hui hk’aˇ ngaˬ hui leuˆ yuˬ tuˬ hpehˇ laˇ ve teˇ ceuˬ awˬ hpfuhˇ hk’aˆ ve maˇ heˆ laˇ. (Yawˇsuˆ 24:15) Yaꞈ hk’aˇ, maˇ daꞈ ve awˬ ceuˬ shu htaꞈ te piˇ tuˬ laiˉ g’aˇ leuˆ yuˬ ve yoˬ. Chi htaꞈ pa taw laiˉ g’aˇ tuꞈ hkanˍ jaˇ. Maˇ hteˇ maˇ cawˇ ve awˬ ceuˬ chi htaꞈ mawˬ htaˇ, G’uiˬ sha nyi ma naˬ ve yoˬ.—Awˬ hkuiˉ puiˍ 6:5, 6 g’aw sheˍ.

Yaˬhoˉvaˬ lehˬ, ngaˬ hui awˬ pon dawˇ nyi puiˉ ve G’uiˬ sha hpehꞈ ve yoˬ. Ngaˬ hui chehˇ sha pyawˍ sha tuˬ yawˇ heuˆ gaˇ ve yoˬ. Maˇ maw k’o, shu htaꞈ tuꞈ hkanˍ piˇ ve chaw leh tuꞈ ve hkanˍ ve awˬ ceuˬ hk’a peu-eˬ htaꞈ yawˇ te luˬ tuˬ yoˬ. Tinˍ taˍ ve awˬ nyi oˇ ve hk’a gaˬ, tuꞈ hkanˍ ve htaꞈ maˇ hehꞈ hkehnˉ ve pa taw awˬ bon cawˬ ve yoˬ. Aˬ htoꞈ ma awˬ bon cawˬ tuˬ, henˇ yuˬ tuˬ 8 awˬ hk’aw lo cawˬ ve yoˬ.—2 Peˍtruˆ 2:9; 3:7, 13 g’aw sheˍ.

5. G’uiˬ sha htaꞈ meuˆ daꞈ maˇ la tuˬ ngaˬ hui hk’aˬ hk’e te tuˬ le.

Ngaˬ hui Yaˬhoˉvaˬ htaꞈ meuˆ daꞈ tuˬ yawˇ geh bon lawˬ hpehꞈ ve yoˬ. Yawˇ lehˬ, ngaˬ hui teˇ g’aˇ leh teˇ g’aˇ htaꞈ dawˇ nyi laˇ ve yoˬ. (Chiˇ mvuh ve 65:2; 145:18) Yawˇ lehˬ, ha lehˬ ha k’a venˇ baˆ hpehˇ laˇ ve yoˬ. Yawˇ nyi hk’aˇ suh tuˬ coˇ caˇ leh te ve awˬ hk’aw lo teˇ pawˆ pawˆ te maˇ g’a ve htawˇ, ngaˬ hui coˇ caˇ ve htaꞈ yawˇ mawˬ ve yoˬ. Chi htaꞈ pa taw, ngaˬ hui maˇ biˇ maˇ lawꞈ ve htawˇ, G’uiˬ sha htaꞈ awˬ tehˬ awˬ na meuˆ daꞈ g’a ve yoˬ.— Chiˇ mvuh ve 103:12-14; Yaˍkoˆ 4:8 g’aw sheˍ.

Yaˬhoˉvaˬ ngaˬ hui htaꞈ a shaꞈ peꞈ laˇ ve pa taw, yawˇ htaꞈ shu aꞈ kehˉ haꞈ cawˇ ve yoˬ. (Maˍkuˆ 12:30) G’uiˬ sha htaꞈ haꞈ tuˬ, yawˇ ve awˬ lawn henˇ shiˍ maˇ la leh yawˇ lawˬ ve hk’e shaˬ te shaˬ nawˬ yawˇ htaꞈ shaˬ meuˆ daꞈ maˇ la tuˬ yoˬ.—1 Tiˆmoˉseˍ 2:4; 1 Yoˇhanˬ 5:3 g’aw sheˍ.