Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

G'uiˬ sha Geh Laˬ ve Daꞈ ve Awˬ lawn sha tanˇ

 Awˬ lawn 4

Yeˍsuˆ Hkriꞈ lehˬ A shu le

Yeˍsuˆ Hkriꞈ lehˬ A shu le

Aˬ htoꞈ ma pa taw Yeˍsuˆ geh laˬ ve chaw dawˇ sha ve le.—MAꞈHTEHˍ 11:29; MAˍKUˆ 10:13-16.

1. Yeˍsuˆ ve a shaꞈ hk’aˬ hk’e tanˬ ve le.

Yeˍsuˆ awˬ kaˍ awˬ nu chaw teˇ g’aˇ htaꞈ kaꞈ maˇ shuˍ. Yawˇ miˬ guiˬ hk’oˆ maˇ paw la sheˍ htaˇ, mvuhˇ naw ma hk’oˆ awˬ ha ve awˬ to hpehꞈ ve yoˬ. (Yoˇhanˬ 8:23) G’uiˬ sha yawˇ htaꞈ awˉ lawˉ peuˇ hpanˍ leh, yawˇ lehˬ awˬ kaˍ awˬ nu hk’a peu-eˬ htaꞈ g’a ga hpanˍ ve yoˬ. Awˬ kaˍ awˬ nu hk’a peu-eˬ htaꞈ Yeˍsuˆ g’a ga hpanˍ ve yoˬ. Yaˬhoˉvaˬ hteˇ lehˍ hpanˍ ve yawˇ teˇ g’aˇ tiˉ cawˬ ve yoˬ. Chi htaꞈ pa taw, G’uiˬ sha ve “Yaˇ hpu tiˍ” tehꞈ kuˬ keunˍ ve yoˬ. (Yoˇhanˬ 1:14) Yeˍsuˆ G’uiˬ sha awˬ tan kanˉ te shehˍ hpaˇ hpehꞈ ve pa taw, yawˇ htaꞈ “Tawˇ hkawˇ” kaꞈ kuˬ ve yoˬ.—Tawˇ naˉ ve 8:22, 23, 30; Kawˇlawˇsehˇ 1:15, 16 g’aw sheˍ.

2. Aˬ htoꞈ ma pa taw Yeˍsuˆ miˬ guiˬ hk’oˆ laˬ ve le.

G’uiˬ sha yawˇ ve Yaˇ hpu miˬ guiˬ hk’oˆ peu laˇ tuˬ, mvuhˇ naw ma hk’oˆ Yeˍsuˆ ve a shaꞈ jiˆ yaꞈ la leh, Yuˇdaꞈ chaw Maˍriˆ meh ve daꞈ kehˬ ve yaˇ miˇ g’oˇ peˬ hk’aw keu piˇ ve yoˬ. Yeˍsuˆ lehˬ, chaw yaˇ hpehꞈ ve awˬ pa maˇ cawˬ. (Luˉkaꞈ 1:30-35) Yeˍsuˆ lehˬ, 3 ceuˬ chi htaꞈ te tuˬ miˬ guiˬ hk’oˆ laˬ ve yoˬ. (1) G’uiˬ sha htaꞈ caˉ daꞈ ve awˬ tehˬ ve awˬ lawn maˍ ve, (2) tuꞈ ve hkanˍ ve htaꞈ g’a hpuˇ htaˇ htawˇ, G’uiˬ sha a loˍ g’aꞈ te tuˬ ngaˬ hui awˬ pon Yeˍsuˆ henˇ yuˬ tuˬ te maˍ laˇ ve, leh (3) yawˇ biˇ jaˇ ve a shaꞈ chaw yaˇ htaꞈ “htaiˍ hk’awꞈ” laˇ tuˬ laˬ ve yoˬ.—Maꞈhtehˍ 20:28 g’aw sheˍ.

3. Aˬ htoꞈ ma pa taw ngaˬ hui htaiˍ hk’awꞈ ve htaꞈ g’a tuˬ loˍ ve le.

Htaiˍ hk’awꞈ ve oˇ ve lehˬ, chaw teˇ g’aˇ a shaꞈ ponˬ tuˬ awˬ hpfuhˇ piˇ ve htaꞈ k’oˆ gaˇ ve yoˬ. (Tawˆ k’ai ve 21:29, 30) Chaw yaˇ mawˇ suh tuˬ awˬ hkuiˉ puiˍ htaˇ G’uiˬ sha dawˇ law ve maˇ heˆ. Ngaˬ hui hk’aˬ hk’e te shiˍ g’a ve le. Liꞈ hpu hk’aw “venˇ baˆ” k’oˆ ve htaꞈ te ve k’o, suh tuˬ yoˬ tehꞈ hawˉ hk’aˆ awˉ lawˉ teˇ g’aˇ htaꞈ G’uiˬ sha k’oˆ piˇ ve yoˬ. Chi htaꞈ pa taw, Aˍdanˍ venˇ baˆ maˇ te k’o yawˇ maˇ suh. (Awˬ hkuiˉ puiˍ 2:16, 17; 5:5) Liꞈ hpu hk’aw k’oˆ ve hk’e, Aˍdanˍ htaꞈ pa taw chaw yaˇ hk’a peu-eˬ awˬ hk’oˆ suh ve teˇ ceuˬ “gaˬ la ve” yoˬ. Hk’e te leh, venˇ baˆ leh suh  ve teˇ ceuˬ Aˍdanˍ lehˬ, awˬ yaˇ awˬ duˬ htaꞈ pehˉ k’ai ve yoˬ. Aˍdanˍ geh g’a ve venˇ baˆ htaꞈ ponˬ tuˬ htaiˍ hk’awꞈ laˇ ve htaꞈ ngaˬ hui loˍ ve yoˬ.—Roˉmaꞈ 5:12; 6:23 g’aw sheˍ.

Ngaˬ hui suh ve htaꞈ ponˬ tuˬ a shu htaiˍ hk’awꞈ laˇ g’a tuˬ le. Ngaˬ hui suh-e htaˇ, ngaˬ hui hk’aˇ ngaˬ hui venˇ baˆ meuˉ ve awˬ hpfuhˇ htaꞈ ceh shaiˍ g’a ve yoˬ. Maˇ biˇ ve chaw yaˇ teˇ g’aˇ kaꞈ shu ve venˇ baˆ meuˉ ve awˬ hpfuhˇ htaꞈ shaiˍ maˇ g’a.—Chiˇ mvuh ve 49:7-9 g’aw sheˍ.

4. Aˬ htoꞈ ma pa taw Yeˍsuˆ suh ve le.

Yeˍsuˆ ngaˬ hui htaꞈ maˇ shuˍ, yawˇ biˇ jaˇ ve yoˬ. Yawˇ ve venˇ baˆ awˬ pon suh tuˬ maˇ loˍ. Awˬ lawn k’o, yawˇ venˇ baˆ maˇ te jaw. Yaꞈ hk’aˇ, shu ve venˇ baˆ awˬ pon Yeˍsuˆ hkanˍ suh ve yoˬ. G’uiˬ sha chaw yaˇ htaꞈ haꞈ jaˇ leh, ngaˬ hui awˬ pon hkanˍ suh tcuh tuˬ yawˇ ve Yaˇ hpu htaꞈ peu laˇ ve yoˬ. Yeˍsuˆ htawˇ, ngaˬ hui htaꞈ haꞈ jaˇ leh Awˬ pa hkawˇ na yuˬ ve awˬ hk’aw lo, ngaˬ hui ve venˇ baˆ awˬ pon htaiˍ hk’awꞈ laˇ tuˬ yawˇ ve a shaꞈ peꞈ laˇ ve yoˬ.—Yoˇhanˬ 3:16; Roˉmaꞈ 5:18, 19 g’aw sheˍ.

5. Chi teˇ hkui Yeˍsuˆ aˬ htoꞈ ma te chehˇ ve le.

Yeˍsuˆ miˬ guiˬ hk’oˆ chehˇ htaˇ chaw naˬ htaꞈ gu na-e piˇ ve, suh peuˬ ve chaw htaꞈ teꞈ tu la piˇ ve, leh kawˆ tuˬ hk’aw chehˇ ve chaw htaꞈ ga piˇ ve yoˬ. Yawˇ awˬ ceuˬ chi teˇ hpaˍ te ve lehˬ, hk’a na yuˬ ve chaw yaˇ awˬ pon awˬ g’uˇ suhˍ hpawˇ te tuˬ hpeuꞈ maw piˇ ve yoˬ. (Maꞈhtehˍ 15:30, 31; Yoˇhanˬ 5:28) Yeˍsuˆ suh peuˬ hk’awꞈ nawˉ, G’uiˬ sha yawˇ htaꞈ awˬ ha ve awˬ to teꞈ tu la tcuh ve yoˬ. (1 Peˍtruˆ 3:18) Yaˬhoˉvaˬ yawˇ htaꞈ miˬ guiˬ hk’a peu-eˬ hk’oˆ Hkunˉ hawˉ hkanˇ hpehꞈ tcuh htaˇ hk’a gaˬ, yawˇ lehˬ G’uiˬ sha laꞈ sha paˉ lo mui taˍ ve yoˬ. (Heˍbrehˇ 10:12, 13) Chi teˇ hkui, yawˇ Hkunˉ hawˉ hkanˇ hpehꞈ leh mvuhˇ naw ma hk’oˆ uˉ peunˍ chehˇ ve yoˬ. Leh yawˇ hk’aˇ suh g’aꞈ yuˬ ve chaw daꞈ ve awˬ lawn sha tanˇ oˇ ve miˬ guiˬ hk’a peu-eˬ hk’oˆ hto toˇ chehˇ ve yoˬ.—Daˍyeˍlaˆ 7:13, 14; Maꞈhtehˍ 24:14 g’aw sheˍ.

Maˇ maw k’o, Yeˍsuˆ Hkunˉ hawˉ hkanˇ hpehꞈ ve awˬ hk’aw lo shu htaꞈ tuꞈ hkanˍ piˇ ve chaw leh, tuꞈ ve hkanˍ ve awˬ ceuˬ hk’a peu-eˬ htaꞈ yawˇ te luˬ piˇ tuˬ yoˬ. Yeˍsuˆ htaꞈ yonˍ leh yawˇ hkawˇ htaꞈ na yuˬ ve chaw teˇ g’aˇ le le, miˬ guiˬ hk’oˆ paˍraˍdiˇsuˆ hk’aw a shaꞈ g’a tuˬ yoˬ.—Chiˇ mvuh ve 37:9-11 g’aw sheˍ.