Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 Awˬ lawn 11

Liꞈ hpu Hk’aw Awˬ liˇ awˬ hk’aˇ Ngaˬ hui Awˬ pon Aˬ htoꞈ ma Awˬ bon Cawˬ le

Liꞈ hpu Hk’aw Awˬ liˇ awˬ hk’aˇ Ngaˬ hui Awˬ pon Aˬ htoꞈ ma Awˬ bon Cawˬ le

Ngaˬ hui ve a shaꞈ leh shu ve a shaꞈ kawˆ tuˬ hk’aw maˇ g’a gaˬ tcuh tuˬ Liꞈ hpu hk’aw awˬ liˇ awˬ hk’aˇ awˬ g’aˇ hk’aˬ hk’e peꞈ laˇ ve le. CHIˇ MVUH VE 36:9.

1. Aˬ htoꞈ ma pa taw ngaˬ hui beˆ maˍ laˇ kuiˬ htaꞈ loˍ ve le.

Ngaˬ hui ve Te hpanˍ shehˍ hpaˇ lehˬ, ngaˬ hui aꞈ kehˉ cuˇ yiˍ cawˬ ve yoˬ. Haꞈ pehnˇ ve hk’a biˇ cawˬ ve awˬ pa hk’a shuˍ, yawˇ ngaˬ hui htaꞈ haꞈ shaˉ laˇ ve yoˬ. Ngaˬ hui yawˇ htaꞈ maˇ peun tuˬ yawˇ dawˇ law ve maˇ heˆ. (Yeˍraˍmiˆ 10:23) Yaˇ ehˉ teˇ g’aˇ awˬ pa awˬ e beˆ maˍ piˇ ve htaꞈ loˍ ve hk’e, ngaˬ hui htaꞈ htawˇ G’uiˬ sha beˆ maˍ laˇ tuˬ loˍ ve yoˬ. (Iˉsaˍyaˆ 48:17, 18) Liꞈ hpu hk’aw beˆ maˍ laˇ ve awˬ liˇ awˬ hk’aˇ G’uiˬ sha peꞈ laˇ ve laꞈ shawnˍ hpehꞈ ve yoˬ.—2 Tiˆmoˉseˍ 3:16 g’aw sheˍ.

Yaˬhoˉvaˬ ve awˬ liˇ tawˇ hkawˇ leh awˬ liˇ awˬ hk’aˇ, chi beuꞈ ngaˬ hui htaꞈ daꞈ jaˇ ve a shaꞈ teꞈ hk’aˇ maˍ laˇ ve awˬ hk’oˆ kaꞈ, awˬ g’uˇ suhˍ hpawˇ co co taiˍ taiˍ ve laꞈ shawnˍ g’a tuˬ awˬ hk’aˇ maw laˇ ve yoˬ. G’uiˬ sha ngaˬ hui htaꞈ te hpanˍ taˍ laˇ ve pa taw, yawˇ beˆ maˍ laˇ ve awˬ bon htaꞈ dawˇ nawˇ ve awˬ hk’aw lo haꞈ yuˬ cawˇ ve yoˬ.—Chiˇ mvuh ve 19:7, 11; Hpeuꞈ maˍ ve 4:11 g’aw sheˍ.

2. Liꞈ hpu hk’aw ve awˬ liˇ awˬ hk’aˇ hk’aˬ hk’e hpehꞈ ve le.

Liꞈ hpu hk’aw ve awˬ liˇ awˬ hk’aˇ laiˉ hk’aˇ laiˉ hpawˇ lo awˬ tehˬ awˬ na yehˇ hpehꞈ ve yoˬ. Yaꞈ hk’aˇ, awˬ liˇ tawˇ hkawˇ k’o, awˬ lawn teˇ lawn lawn htaꞈ ceh tiˉ hteˇ-ehˍ yehˇ g’a ve yoˬ. (Bon maˍ ve 22:8) Awˬ liˇ awˬ hk’aˇ teˇ maˬ a shaꞈ teꞈ chehˇ ve awˬ hk’aw lo yehˇ ve awˬ hk’aˇ shiˍ tuˬ g’a dawˇ nyi puiˉ ve yoˬ. (Tawˇ naˉ ve 2:10-12) Tawˇ pa haˉ te tuˬ awˬ pon, Liꞈ hpu hk’aw maˍ ve, a shaꞈ lehˬ G’uiˬ sha peꞈ laˇ ve laꞈ shawnˍ hpehꞈ ve yoˬ. Awˬ liˇ awˬ hk’aˇ chi ve ngaˬ hui kanˉ te kuiˬ lo maˇ k’oˆ, aˉ hk’aw lo maˇ k’oˆ, yaꞈ k’aw toˇ htaˇ maˇ k’oˆ, beˆ maˍ laˇ ve yoˬ. Ngaˬ hui ve a shaꞈ leh shu ve a shaꞈ kawˆ tuˬ hk’aw maˇ g’a gaˬ tcuh tuˬ awˬ liˇ awˬ hk’aˇ chi ve shaˍ tiꞈ te tuˬ maˍ laˇ ve yoˬ.—Tcuh yaˇ 17:28 g’aw sheˍ.

3. Awˬ liˇ awˬ hk’aˇ a yeˇ uiˍ jaˇ ve nyiˇ maˬ aˬ htoꞈ ma le.

Awˬ liˇ awˬ hk’aˇ a yeˇ uiˍ jaˇ ve nyiˇ maˬ htaꞈ Yeˍsuˆ k’oˆ ve yoˬ. Awˉ lawˉ teˇ hk’aˇ hpeuꞈ maw laˇ ve, G’uiˬ sha htaꞈ shiˍ ve, yawˇ htaꞈ haꞈ ve, leh ka tiꞈ yeˬ ve awˬ hk’aw lo yawˇ ve kanˉ te tuˬ awˬ pon chaw yaˇ a shaꞈ teꞈ ve yoˬ. Ngaˬ hui dawˇ cheˆ ve teˇ ceuˬ le le awˬ hk’aw lo awˬ liˇ awˬ hk’aˇ awˉ lawˉ chi teˇ hk’aˇ htaꞈ cuˇ cawˇ ve yoˬ. (Tawˇ naˉ ve 3:6) Awˬ liˇ awˬ hk’aˇ chi ve htaꞈ a yeˇ te ve chaw hui lehˬ,  G’uiˬ sha htaꞈ meuˆ daꞈ ve, awˬ tehˬ awˬ na ha lehˬ ve teˇ ceuˬ cawˬ ve, leh co co taiˍ taiˍ a shaꞈ g’a ve yoˬ.—Maꞈhtehˍ 22:36-38 g’aw sheˍ.

Awˬ liˇ awˬ hk’aˇ nyiˇ hk’aˇ teˇ hk’aˇ lehˬ, shu htaꞈ hawˍ daꞈ puiˉ tuˬ beˆ maˍ laˇ ve yoˬ. (1 Kawˇrenˍhtuˆ 13:4-7) Awˬ liˇ awˬ hk’aˇ nyiˇ hk’aˇ teˇ hk’aˇ chi ve htaꞈ yuˬ yehˇ ve teˇ ceuˬ lehˬ, G’uiˬ sha chaw yaˇ htaꞈ te piˇ ve awˬ hk’aˇ hk’a shuˍ ngaˬ hui g’aꞈ te ve yoˬ.—Maꞈhtehˍ 7:12; 22:39, 40 g’aw sheˍ.

4. Liꞈ hpu hk’aw awˬ liˇ awˬ hk’aˇ ngaˬ hui awˬ pon aˬ htoꞈ ma awˬ bon cawˬ ve le.

Liꞈ hpu hk’aw ve awˬ liˇ awˬ hk’aˇ lehˬ, yehˬ k’a haꞈ daꞈ cawˇ daꞈ tuˬ ve awˬ hk’aˇ maˍ piˇ ve yoˬ. (Kawˇlawˇsehˇ 3:12-14) G’uiˬ sha ve tawˇ hkawˇ yehˬ k’a htaꞈ kaꞈ haꞈ shaˉ ve awˬ hk’aw lo, awˬ hpawˇ awˬ miˇ teˇ geh yeˬ chehˇ cawˇ ve yoˬ tehꞈ awˬ liˇ awˬ hk’aˇ teˇ hk’aˇ k’awꞈ beˆ maˍ laˇ ve yoˬ.—Awˬ hkuiˉ puiˍ 2:24 g’aw sheˍ.

Liꞈ hpu maˍ ve hkawˇ htaꞈ na yuˬ ve teˇ ceuˬ nyi ma hpawˇ maˇ k’oˆ, hpu shi mawˇ jeˬ hpawˇ maˇ k’oˆ, ngaˬ hui ve chehˇ sha cawˬ sha ve teˇ ceuˬ htaꞈ haꞈ shaˉ laˇ ve yoˬ. Tawˇ pa haˉ te k’o, laiˉ pawˆ laiˉ yanˇ g’aˇ hpehˇ paˍ lehˬ Liꞈ hpu awˬ liˇ awˬ hk’aˇ suh a shaꞈ teꞈ ve g’aˇ ga caˇ paˍ htaꞈ dawˇ cawˇ ve yoˬ. Awˬ lawn k’o, yawˇ hui ka tiꞈ yeˬ leh kanˉ te ve kaiˬ ve yoˬ. (Tawˇ naˉ ve 10:4, 26; Heˍbrehˇ 13:18) G’uiˬ sha ve tawˇ hkawˇ ngaˬ hui htaꞈ k’awꞈ maˍ laˇ ve, a shaꞈ teꞈ tuˬ loˍ ve teˇ hpaˍ cawˬ k’o, nyi hk’aˇ g’a suh leh, hpu shi mawˇ jeˬ aꞈ kehˉ G’uiˬ sha htaꞈ awˬ chawˇ te ve teˇ ceuˬ awˬ hpfuhˇ hk’aˆ jaˇ ve yoˬ tehꞈ shawˍ cawˇ ve yoˬ.—Maꞈhtehˍ 6:24, 25, 33; 1 Tiˆmoˉseˍ 6:8-10 g’aw sheˍ.

Liꞈ hpu hk’aw ve awˬ liˇ awˬ hk’aˇ htaꞈ yuˬ yehˇ ve teˇ ceuˬ ngaˬ hui awˬ to chehˇ sha cawˬ sha hpawˇ haꞈ shaˉ laˇ ve yoˬ. (Tawˇ naˉ ve 14:30; 22:24, 25) Tawˇ pa haˉ te k’o, G’uiˬ sha ve tawˇ hkawˇ tzuhˬ taˇ dawˬ bvuhˆ k’oˆ ve htaꞈ na yuˬ ve k’o, kawˆ tuˬ ve a naˍ leh maˇ dawˇ maˇ gaˇ ve awˬ ceuˬ maˇ g’a hpuˇ. (Tawˇ naˉ ve 23:20) Tzuhˬ dawˬ hpehꞈ ve yoˬ. Yaꞈ hk’aˇ, dawˬ bvuhˆ tuˬ Yaˬhoˉvaˬ a hkaw-anˬ maˇ peꞈ laˇ. (Chiˇ mvuh ve 104:15; 1 Kawˇrenˍhtuˆ 6:10) G’uiˬ sha ve awˬ liˇ awˬ hk’aˇ ngaˬ hui ve te hk’aˇ htaꞈ ceh tiˉ shaˍ tiꞈ te tuˬ maˍ laˇ ve maˇ heˆ, ngaˬ hui dawˇ hk’aˇ htaꞈ htawˇ shaˍ tiꞈ g’a te ve yoˬ tehꞈ, maˍ laˇ ve pa taw ngaˬ hui awˬ bon g’a ve yoˬ. (Chiˇ mvuh ve 119:97-100) Yaꞈ hk’aˇ, awˬ tehˬ ve Hkriꞈ yaˇ a shu yawˇ awˬ to awˬ bon g’a tuˬ G’uiˬ sha ve awˬ liˇ awˬ hk’aˇ htaꞈ g’aꞈ te ve ceh tiˉ maˇ heˆ, yawˇ hui Yaˬhoˉvaˬ G’uiˬ sha htaꞈ yawˆ yan tuˬ awˬ pon te ve yoˬ.—Maꞈhtehˍ 5:14-16 g’aw sheˍ.