Awˬ lawn awˬ tanˇ hk'a gaˬ hteˇ lehˍ k'ai tuˬ

Leuˆ yuˬ g'a ve teˇ hpaˍ cawˬ taˍ ve liꞈ mehˆ hpfuhˇ nyiˇ k'oˆ teˇ k'oˆ lo hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Laˇhuˍ hkawˇ

G'uiˬ sha Geh Laˬ ve Daꞈ ve Awˬ lawn sha tanˇ

 Awˬ lawn 3

Daꞈ ve Awˬ lawn sha tanˇ G’uiˬ sha Geh Laˬ tehˬ tehˬ leh laˇ

Daꞈ ve Awˬ lawn sha tanˇ G’uiˬ sha Geh Laˬ tehˬ tehˬ leh laˇ

1. Liꞈ hpu a shu geh laˬ ve le.

Chaw yaˇ miˬ guiˬ hk’oˆ co co taiˍ taiˍ g’a chehˇ ve awˬ lawn sha tanˇ Liꞈ hpu hk’aw bvuhꞈ taˍ ve yoˬ. (Chiˇ mvuh ve 37:29) Liꞈ hpu hk’aw awˬ k’oˆ ehˉ 66 k’oˆ cawˬ ve yoˬ. Awˬ k’oˆ ehˉ oˇ ve teˇ hpaˍ bvuhꞈ tuˬ G’uiˬ sha lehˬ, hawˉ hk’aˆ paˍ ka tiꞈ yeˬ ve 40 g’aˇ htaꞈ yehˇ ve yoˬ. Ponˬ laˬ ve aˬ laˬ hk’e 3,500 hk’awꞈ htaˇ, Moˉseˍ lehˬ awˉ lawˉ 5 k’oˆ bvuhꞈ ve yoˬ. Ponˬ laˬ ve 1,900 hk’awꞈ hpaˆ htaˇ, tcuh yaˇ Yoˇhanˬ lehˬ awˬ leh meuˇ teˇ k’oˆ bvuhꞈ peuˬ ve yoˬ. Liꞈ hpu bvuhꞈ paˍ a shu ve dawˇ hk’aˇ bvuhꞈ ve le. G’uiˬ sha lehˬ, Liꞈ hpu bvuhꞈ paˍ teˇ hpaˍ htaꞈ yawˇ ve daꞈ kehˬ ve awˬ ha hpu dawˇ pawnˍ piˇ ve yoˬ. (2 Saˍmo-eˍlaˆ 23:2) Yawˇ hui G’uiˬ sha ve dawˇ hk’aˇ bvuhꞈ ve yoˬ. Yawˇ hui ve dawˇ hk’aˇ maˇ heˆ. Chi htaꞈ pa taw, Liꞈ hpu lehˬ Yaˬhoˉvaˬ geh laˬ ve yoˬ.—2 Tiˆmoˉseˍ 3:16; 2 Peˍtruˆ 1:20, 21 g’aw sheˍ.

2. Ngaˬ hui Liꞈ hpu htaꞈ awˬ tehˬ awˬ na yonˍ g’a ve laˇ.

Liꞈ hpu G’uiˬ sha geh lo laˬ ve htaꞈ ngaˬ hui shiˍ ve yoˬ. Awˬ lawn k’o, Liꞈ hpu lehˬ awˬ g’uˇ suhˍ hpawˇ ve awˬ lawn hk’a tawˍ lehˆ k’oˆ laˇ ve yoˬ. Chaw yaˇ hk’aˬ ve teˇ g’aˇ htawˇ oˇ hk’e te maˇ g’a. (Yawˇsuˆ 23:14) Awˬ g’uˇ suhˍ hpawˇ chaw yaˇ geh hpehꞈ la tuˬ ve awˬ ceuˬ, Awˬ g’aˇ uiˍ shehˍ hpaˇ G’uiˬ sha teˇ g’aˇ tiˉ shiˍ ve yoˬ.—Iˉsaˍyaˆ 42:9; 46:10 g’aw sheˍ.

Ngaˬ hui dawˇ law hpehꞈ ve, G’uiˬ sha geh lo laˬ ve liꞈ lehˬ awˬ kaˍ awˬ nu liꞈ htaꞈ peun daꞈ ve yoˬ. Liꞈ hpu oˇ hk’e hpehꞈ ve yoˬ. Liꞈ hpu lehˬ laiˉ ha chaw ceuˬ tawˇ hkawˇ awˬ hk’aw lo, laiˉ hinˉ lanˬ k’oˆ pehˬ tawˆ-e ve yoˬ. Liꞈ hpu lehˬ, aˬ sho-eˬ htaˇ bvuhꞈ taˍ ve htawˇ, mvuhˇ lawn miˬ lawn henˇ paˍ shiˍ ve awˬ ceuˬ htaꞈ hawˍ daꞈ ve yoˬ. Liꞈ hpu 40 g’aˇ bvuhꞈ taˍ ve awˬ lawn hawˍ daꞈ ve yoˬ. * Liꞈ hpu hk’aw k’oˆ taˍ ve haꞈ pehnˇ ve awˬ lawn lehˬ, awˬ tehˬ awˬ na haꞈ pehnˇ ve G’uiˬ sha geh laˬ ve yoˬ. Liꞈ hpu lehˬ, chaw yaˇ ve a shaꞈ teꞈ hk’aˇ daꞈ la tuˬ pa piˇ ve kanˇ paˆ cawˬ ve yoˬ. Awˬ ceuˬ chi htaꞈ pa taw, Liꞈ hpu G’uiˬ sha ve tawˇ hkawˇ hpehꞈ ve yoˬ tehꞈ laiˉ lanˬ g’aˇ yonˍ ve yoˬ.—1 Hteˇsaˍlawˇniˆ 2:13 g’aw sheˍ.

 3. Liꞈ hpu aˬ htoꞈ ma awˬ lawn cawˬ ve le.

G’uiˬ sha chaw yaˇ htaꞈ dawˇ law kuiˬ peꞈ piˇ ve daꞈ ve awˬ lawn sha tanˇ Liꞈ hpu hk’aw awˬ lawn lonˉ ma hpehꞈ ve yoˬ. Aˬ sho-eˬ htaˇ, miˬ guiˬ hk’oˆ paˍraˍdiˇsuˆ hk’aw chaw yaˇ g’a tawˆ-e ve awˬ lawn leh, hko oˇ ve k’awꞈ gu te tuˬ awˬ hk’aˇ Liꞈ hpu k’aoˍ taˍ ve yoˬ.—Hpeuꞈ maˍ ve 21:4, 5 g’aw sheˍ.

G’uiˬ sha ve tawˇ hkawˇ lehˬ awˬ liˇ tawˇ hkawˇ, awˬ liˇ awˬ hk’aˇ, leh beˆ maˍ laˇ hkawˇ cawˬ ve yoˬ. G’uiˬ sha chaw yaˇ htaꞈ te piˇ jaw ve awˬ ceuˬ Liꞈ hpu awˬ hk’aw lo bvuhꞈ taˍ ve yoˬ. Bvuhꞈ taˍ ve oˇ ve teˇ hpaˍ, G’uiˬ sha ve awˬ hoꞈ awˬ han te hk’aˇ dawˇ hk’aˇ hpeuꞈ maˍ laˇ ve yoˬ. Chi htaꞈ pa taw, nawˬ G’uiˬ sha htaꞈ shiˍ daꞈ tuˬ Liꞈ hpu ga laˇ g’a ve yoˬ. Nawˬ G’uiˬ sha htaꞈ awˬ chawˇ te tuˬ ve awˬ hk’aˇ kaꞈ Liꞈ hpu k’aoˍ taˍ ve yoˬ.—Chiˇ mvuh ve 19:7, 11; Yaˍkoˆ 2:23; 4:8 g’aw sheˍ.

4. Nawˬ Liꞈ hpu htaꞈ hk’aˬ hk’e shiˍ g’a tuˬ le.

Liꞈ hpu tcuhˉ kuiˬ shiˍ tuˬ Yeˍsuˆ shu htaꞈ ga piˇ ve hk’e, liꞈ chi teˇ k’oˆ nawˬ htaꞈ ga laˇ ve yoˬ. Yawˇ lehˬ Liꞈ hpu awˬ tawn laiˉ tawn “tcuhˉ kuiˬ hpeuꞈ maˍ piˇ ve yoˬ.”—Luˉkaꞈ 24:27, 45 g’aw sheˍ.

G’uiˬ sha geh laˬ ve daꞈ ve awˬ lawn sha tanˇ chi aꞈ kehˉ daꞈ leuˉ ve hk’aˬ nyiˇ ceuˬ maˇ cawˬ. Yaꞈ hk’aˇ, chaw teˇ hpaˍ hpaˍ daꞈ ve awˬ lawn sha tanˇ chi htaꞈ a yeˇ maˇ te. Awˬ kaˍ awˬ nu chaw k’o maˇ dawˇ cawˇ. Nyi ma taˇ luˬ. Nawˬ co co taiˍ taiˍ a shaꞈ teꞈ chehˇ tuˬ dawˇ law kuiˬ G’uiˬ sha htaꞈ shiˍ ve ceh tiˉ cawˬ ve yoˬ.—Yoˇhanˬ 17:3 g’aw sheˍ.

 

^ aw? tawn 7 Liꞈ Hpu Awˬ hk’aw lo Awˬ tehˬ awˬ na Aˬ htoꞈ ma Maˍ ve le liꞈ mehˆ hpfuhˇ 20 awˬ hk’aw lo g’aw nyi sheˍ.