Awˬ lawn awˬ tanˇ hk'a gaˬ hteˇ lehˍ k'ai tuˬ

Awˬ hk'aˇ lonˉ maˬ teˇ hpaˍ cawˬ taˍ ve liꞈ mehˆ hpfuhˇ lo hteˇ lehˍ k'ai tuˬ

Yaˬhoˉvaˬ ve Shaˉhkiˆhkanˍ ve Chaw

Select language Laˇhuˍ hkawˇ

 HKRIꞈ YAˇ VE A SHAꞈ TEꞈ HK’Aˇ

“Pawˇluꞈ.  . . . G’uiˬ sha ve bon htaꞈ chiˇ mvuh leh nyi ma awˬ g’aˇ cawˬ la ve”

“Pawˇluꞈ.  . . . G’uiˬ sha ve bon htaꞈ chiˇ mvuh leh nyi ma awˬ g’aˇ cawˬ la ve”

Roˉmaꞈ mvuhˇ miˬ hk’aw ve Hkriꞈ yaˇ awˬ moˍ Pawˇluꞈ gaˬ la ve g’a kaˇ htaˇ, Pawˇluꞈ htaꞈ ca haꞈ yuˬ la tuˬ yawˇ hui ve awˬ tan teˇ hpaˍ 64 kiˇ loˇ g’a k’ai ve yoˬ. Yawˇ hui chi hk’e te ve pa taw, Pawˇluꞈ htaꞈ hk’aˬ hk’e heuˆ la piˇ ve le? “Pawˇluꞈ yawˇ hui htaꞈ g’a mawˬ htaˇ, G’uiˬ sha ve bon htaꞈ chiˇ mvuh leh nyi ma awˬ g’aˇ cawˬ la ve yoˬ.” (Tcuh 28:15) Pawˇluꞈ Hkriꞈ yaˇ awˬ moˍ geh ca guiˇ-e htaˇ, yawˇ awˬ viˉ awˬ nyi htaꞈ hk’aˬ htaˆ kaꞈ awˬ g’aˇ piˇ ve yoˬ. Yaꞈ hk’aˇ, chi teˇ hkui yawˇ htawnˍ yaˇ hpehꞈ ve pa taw, yawˇ awˬ viˉ awˬ nyi geh awˬ g’aˇ loˍ ve yoˬ.—2 Kawˇ 13:10

Chi beuꞈ teˇ co-e, toˇ nyi shehˍ hpaˇ lehˬ Hkriꞈ yaˇ awˬ moˍ geh k’ai leh awˬ viˉ awˬ nyi htaꞈ awˬ g’aˇ piˇ ve yoˬ. Yawˇ kaꞈ awˬ nu ve G’uiˬ sha ve kanˉ te ve chaw hk’a shuˍ yoˬ. Teˇ pawˆ pawˆ k’o, yawˇ hui heuˬ ve, dawˇ haˍ ve, awˬ g’aˇ nuˇ ve yoˬ. Toˇ nyi shehˍ hpaˇ leh yawˇ ve awˬ miˇ ma nawˬ hui ve Hkriꞈ yaˇ awˬ moˍ hk’aw ca guiˇ la htaˇ, yawˇ hui htaꞈ awˬ g’aˇ piˇ tuˬ nawˬ hk’aˬ hk’e te g’a ve le? Chi hk’e te ve k’o “teˇ g’aˇ htaꞈ teˇ g’aˇ awˬ g’aˇ piˇ daꞈ” g’a tuˬ yoˬ.—Roˉ 1:11, 12

  • Hto toˇ tuˬ awˬ pon hpawnˬ daꞈ ve. Toˇ nyi shehˍ hpaˇ ca guiˇ la ve teˇ shinˉ htaˇ, awˬ viˉ awˬ nyi coˇ caˇ leh teˇ geh hpawnˬ daꞈ la ve k’o, toˇ nyi shehˍ g’a mawˬ htaˇ awˬ g’aˇ g’a ve yoˬ. (1 Hteˇ 1:2, 3; 2:20) Toˇ nyi shehˍ hpaˇ ca guiˇ la ve teˇ ha pa hk’aw nawˬ teˇ tcuhˉ teˇ yanˇ ve g’uˇ suhˍ peuˍ ve chaw te g’a ve yoˬ. Nawˬ toˇ nyi shehˍ hpaˇ leh yawˇ ve awˬ miˇ ma geh teˇ geh hto toˇ g’a-aw laˇ? Maˇ heˆ leh, yawˇ hui htaꞈ shiˍ veuˬ leh nawˬ ve Liꞈ hpu henˇ ve chaw geh teˇ geh k’ai g’a-aw laˇ? Awˬ viˉ awˬ nyi awˬ suhˉ maˇ k’oˆ, hk’a dehꞈ hto toˇ maˇ puiˉ ve chaw geh maˇ k’oˆ, teˇ g’aˇ le le geh G’uiˬ sha ve kanˉ g’a te ve yawˇ hui ha lehˬ jaˇ.

  • Ha lehˬ ha k’a haꞈ yuˬ piˇ ve. Haˉ kuiˬ leh awˍ teˇ poˍ poˍ toˇ nyi shehˍ hpaˇ htaꞈ gu taˍ piˇ g’a-aw laˇ? Chi hk’e te ve k’o, nawˬ yawˇ hui htaꞈ haꞈ ve tehꞈ hpeuꞈ maw piˇ ve yoˬ. Awˬ tehˬk’o, yawˇ hui hk’aˬ hk’e kaꞈ hpehꞈ ve chi hk’e tawn tawn maˇ loˍ.—Luˉ 10:38-42

  • Yawˇ beˆ maˍ laˇ hkawˇ na yuˬ leh g’aꞈ te ve. Yaˬhoˉvaˬ ve kanˉ te puiˉ la tuˬ, toˇ nyi shehˍ hpaˇ haꞈ pehnˇ ve hk’aw ngaˬ hui htaꞈ ga laˇ ve yoˬ. Teˇ pawˆ pawˆ k’o, yawˇ nawˬ hui htaꞈ hteˇ leh beˆ maˍ laˇ tuˬ yoˬ. (1 Kawˇ 5:1-5) Ngaˬ hui toˇ nyi shehˍ hpaˇ ve hkawˇ htaꞈ na yuˬ leh haꞈ yuˬ ve k’o, yawˇ ha lehˬ tuˬ yoˬ.—Heˍ 13:17

  • Ha lehˬ ve hk’aw awˬ bon uiˍ hkawˇ k’oˆ piˇ ve. Toˇ nyi shehˍ hpaˇ leh yawˇ ve awˬ miˇ ma ca guiˇ la ve nawˬ awˬ gaˇ g’a jaˇ tehꞈ k’oˆ piˇ sheˍ. Chi hk’e te g’a tuˬ, nawˬ k’oˆ piˇ ve maˇ heˆ leh liꞈ bvuhꞈ piˇ kaꞈ g’a ve yoˬ.—Kawˇ 3:15