Awˬ lawn 26
G’uiˬ sha ve mvuhˇ miˬ hpawnˬ daꞈ kuiˬ yehˬ htaꞈ ngaˬ hui hk’aˬ hk’e te haꞈ shaˉ g’a tuˬ le?
Ehˆsa-toˇniˇaˇ
Ziˬbaˬbo-e
Monˍgoˇli-aˇ
Hpaw-toˇriˇgoˇ Conˇ
Yaˬhoˉvaˬ ve Shaˉhkiˆhkanˍ ve chaw G’uiˬ sha ve mvuhˇ miˬ Hpawnˬ daꞈ kuiˬ yehˬ teˇ kaˬ le le lo G’uiˬ sha ve daꞈ kehˬ ve awˬ meh cawˬ ve yoˬ. Chi htaꞈ pa taw, ngaˬ hui awˬ pon hpawnˬ daꞈ kuiˬ yehˬ htaꞈ daꞈ kehˬ tuˬ te leh haꞈ shaˉ ve lehˬ daꞈ ve awˬ vuiˬ leh daꞈ kehˬ ve oˉ k’oˍ pui ve hk’aw a yeˇ uiˍ ve teˇ ceuˬ hpehꞈ ve yoˬ. Teˇ g’aˇ le le te g’a ve yoˬ.
Hpawnˬ daꞈ peuˬ hk’awꞈ nawˉ ha lehˬ ve hk’aw daꞈ kehˬ tuˬ te-o. Hpawnˬ daꞈ peuˬ hk’awꞈ nawˉ teˇ pawˆ le le awˬ viˉ awˬ nyi ha lehˬ ve hk’aw G’uiˬ sha ve mvuhˇ miˬ Hpawnˬ daꞈ kuiˬ yehˬ htaꞈ daꞈ kehˬ tuˬ te ve yoˬ. Daꞈ kehˬ tuˬ hk’a dehꞈ dehꞈ te ve teˇ shinˉ teˇ pawˆ cawˬ ve yoˬ. Nyi haꞈ shaˉ paˍ leh ga piˇ shehˍ hpaˇ te cawˇ ve awˬ ceuˬ liꞈ k’oˆ yehˇ leh kanˉ pehˬ piˇ ve yoˬ. Teˇ hpaˍ k’o yehˬ shiˆ ve, yehˬ htu-eˍ ve, maˇ heˆ leh jeꞈ meu-e shiˆ baˬ ve, piˉ htawˆ hteˇ-ehˍ gu teh ve, aˉ k’aꞈ yehˬ tsuhˇ ve, yehˬ miˉ ehˉ tsuhˇ ve, maˇ daꞈ ve mawˇ yuˬ baˬ ve, maˇ heˆ leh awˬ baˬ hpawˇ daꞈ kehˬ tuˬ te leh mvuhꞈ tawˆ baˬ ve yoˬ. Teˇ hk’awꞈ ve teˇ pawˆ, daꞈ kehˬ tuˬ hk’a dehꞈ te ve teˇ nyi cawˬ ve yoˬ. Ngaˬ hui ve yaˇ htaꞈ kanˉ teˇ ceuˬ ceuˬ te tcuh ve k’o, yawˇ hui oˉ k’oˍ pui kuiˬ yehˬ htaꞈ yawˆ yan puiˉ la ve yoˬ.—Cuˇ yiˍ piˇ ve 5:1.
Maˇ daꞈ ve cawˬ k’o gu piˇ-oˆ. Teˇ hk’awꞈ le le G’uiˬ sha ve mvuhˇ miˬ Hpawnˬ daꞈ kuiˬ yehˬ hk’aw leh awˬ baˬ lo hk’a dehꞈ chaˬ nyi ve teˇ pawˆ cawˬ ve yoˬ. Peuˬ hk’awꞈ nawˉ, hpawnˬ daꞈ kuiˬ yehˬ chi maw maw yehˇ g’a leh hpu chi ma ma maˇ g’a peuˬ tuˬ, hk’aˬ htaˆ kaꞈ g’a gu ve yoˬ. (2 Raˍsaˍvanˍ 24:13; 34:10, 11) Hpawnˬ daꞈ kuiˬ yehˬ daꞈ kehˬ leh teˇ ceuˬ kaꞈ maˇ luˬ ve k’o, G’uiˬ sha htaꞈ oˉ k’oˍ pui tuˬ keunˍ ve awˬ ti hpehꞈ ve yoˬ. Hpawnˬ daꞈ kuiˬ yehˬ htaꞈ ngaˬ hui haꞈ shaˉ ve k’o, Yaˬhoˉvaˬ htaꞈ haꞈ leh oˉ k’oˍ pui kuiˬ awˬ ti chi awˬ hpfuhˇ hk’aˆ ve tehꞈ shawˍ ve ngaˬ hui hpeuꞈ maw piˇ g’a ve yoˬ. (Chiˇ mvuh ve 122:1) Ngaˬ hui chi hk’e te ve k’o, awˬ paˇ awˬ kui chehˇ ve chaw kaꞈ dawˇ cawˇ tuˬ yoˬ.—2 Kawˇrenˍhtuˆ 6:3.
Aˬ htoꞈ ma pa taw ngaˬ hui oˉ k’oˍ pui kuiˬ awˬ ti htaꞈ haꞈ shaˉ cawˇ ve le?
G’uiˬ sha ve mvuhˇ miˬ Hpawnˬ daꞈ kuiˬ yehˬ daꞈ kehˬ ve hk’aˬ htaˆ kaꞈ cawˬ tuˬ, hk’aˬ hk’e gu ve le?
