IMBATA 11
Siki Ndra E’yo Yesu Ma Dria
Mi ne agupi i’da ma alea ’diyi ra ya?— ’Ba ’diyi ma ru Matayo, Marako, Luka, Yohana, Petero, Yakobo, Yuda, azini Paulo i. ’Ba ’diyi o’a ndra tualu sawa alu Yesu ni o’azu nyakua ri ma alea, dika siki e’yo Yesu ma dria.
E’yo mini niagupi ’diyi ma driaringoni?
’Ba e’yo sipi Yesu ma dria na ’diyi ma azi eyi ndra ’ba ti opele ’diyi. Mi ni eyi ma ru ra ya?— Eyi ma ru Matayo, Yohana, azini Petero i. ’Ba ti pele Matayo pi Yohana be niki ndra Yesu ni kililiru, dika siki ndra iritro e’yo idri Yesu niri ma dria ra. ’Ba ti pele Yohana si buku omvele E’yo Eceza ri pi waraga Yohana ni Aluri, Iriri ri, azini Na ri pie. ’Ba ti pele Petero si vini ndra waraga iri Biblia ma alea indi. ’Diyi waraga Petero ni Aluri pi Iriri be. Waraga erini iriri ma alea, Petero si e’yo sawa ndra Yehova ni e’yo Nzezu engazu ’bua Yesu ma dria ri ma e’yo ’dini: ‘’Diri ma mva. Ale eri saaru, dika ma o’a erisi ayikosi.’
Agupi azi i’da ma alea ’diyi vini ama imba Yesu ma dria buku yini si ’diyi ma alea si. Yi ma azi aluri Marako i. Sawa ndra ’bani Yesu ni bizu ’dasi isu deresi eri ci. Azi irizori Luka i. Eri ndra dakitari ni dika eca ndra Kristiani ru drata Yesu ni ma vutia.
’Ba azi iri Biblia sipi mini ne i’da ’di ma alea ’diyi ndra Yesu ma adripika oderu ’diyi. Mi ni eyi ma ru ra ya?— Eyi ma ru Yakobo i azini Yuda i. Okorisi, a’ikini ndra e’yo Yesu niri ku. Sawa azinia egaki ndra eri ma dri nga azi kilili ku. Te vutivuti ru emuki e’yo Yesuni ri a’i ra dika ngaki eca Kristiani ru ra.
Agu asizu Biblia sipi mini ne i’da ’di ma alea ri Paulo i. De nga ecani Kristiani ru ku, eri ma ru ndra Saulo i. Ngu ndra Kristiani yi onzi dika ri ndra eyi inza tu. Mi ni a’du afa fe Paulo ni ecazu Kristiani ru ni’ari ra ya?— O’du azini alu Paulo ni muria geria ria, nga o’duko azini eri engazu ’bua e’yo nze i be. ’Da ndra o’duko Yesuni! Nga Paulo ni zi kini: ‘Mi ’ba ma vuti bipi ’diyi inza ’dini a’du e’yo si ya?’ ’Da ma vutia coti, Paulo nga i oja Kristiani ru. Paulo si buku ndundu 14 Biblia ma alea, e’dozu ’Ba Rumia ’Diyi si kpere ’Ba Ebraniani ria.
Ama Biblia la o’du dria, ’dini ku ya?— Biblia laza si, ama e’yo kakau oni Yesu ma dria. Mi le e’yo oni angiri Yesu ma dria ra ya?—
