Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Mi Imba Anzi Mini ’Diyi

 IMBATA 7

Sawa Azinisi Mi Ega Mi A’dule Azini Mi O’a Urisi ra Ya?

Sawa Azinisi Mi Ega Mi A’dule Azini Mi O’a Urisi ra Ya?

Mi ne nga agupiamva e’da ’di ma alea ri. E’da ekile eri ma agyi yo azini eri o’a urisi nile, e’dani ’dale ku ya? Mi o’a oku drio ’dale ’bo ya?— ’Ba dria ni o’a ’dale sawa azini pi ma alea indi. Biblia nze e’yo Yehova ma agyipika azi ndra o’api agyi kokoru azini urisi ’diyi pi ma dria ra. Eyi ma azi aluri Eliya i.

Yezibeli le ndra Eliya ni ’di

Eliya o’a ndra Israelia drio, de nga Yesu osini ku. Ahabu, opi Israeli niri inzi ni ndra Yehova Mungu adari ku. Ahabu pi ndra oku erivu Yezibeli be, mungu inzoru Baali ni inzi. ’Di fe di ani anzi Israelini ’diyi e’doki Baali ni inzi indi. Opi okuru Yezibeli ni ndra ’ba azi onzi ni, ani le ndra ’ba dria Yehova ni inzipi ’diyi ki o’di Eliya pie dria! Mi ni Eliya ’ye a’du afa ni’ari ra ya?—

Eliya nga apa ra! Apa roko dria dika zi i oni egulea. Mini ega risi apa ndra a’du  ma e’yosi ya?— Adaru, ’ye ndra urisi. Te adanisi le ndra ma ’ye urisi ku. A’du ma e’yo si? A’dusikuni ni ndra ra kini Yehova ni nga eri ma aza ko ra. Yehova e’da ndra okpo ini ri Eliya ni oko raka. Sawa azini alu Yehova omvi izita Eliya niri erini aci ma ti epezu engazu ’bua risi. ’Di e’da adaru Yehova ni ndra vini mu Eliya ma aza ko sawa ’disi ece kokoru!

Yehova ko ndra Eliya ma aza ngoni ngoni?

Te Eliya ni nga ovuzu oni egulea ria, Yehova nga e’yo nze eri be dika zi eri kini: ‘Mi ’dia a’du ’ye ya?’ Eliya nga omvi kini: ‘Ma i adaru ma ace a’dule mi inzizu ni. Ma i a’dule, ma sawa ’disi urisi yi ’ye ma ’di.’ Eliya ega ndra kini ’ba dria Yehova ni inzipi ’diyi ’ba o’di eyi de ’bo. Te Yehova nga ’yo Eliya ma tia kini: ‘Yo, ovuni ’dini ku. ’Ba ma inzipi ogogo alifu aziri ’diyi nga idriru. Mi asi ma mba mba. Ale mi ma mu drile azi ngazu mani!’ Mini ega risi Eliya o’a ndra ayikosi e’yo ’diri erizu ya?—

Imbata mini eco oni e’yo ’yepiru Eliya ma rua ’di ma dria ri ngoni?— Le sawa azini si mi ega kini mi a’dule ’dini ni ku. Mi agyipi mi lepi azini Yehova ni lepi ’diyi ci. Dika indi, Yehova ni okporu, eri nga sawa driasi mi aza ko ra! Mi o’ani ayikosi nizu kini mi ovuni a’dule ku risi ku ya?—

MI LA MI BIBLIA MA ALEA

  • 1 Opi 19:3-18

  • Zaburi 145:18

  • 1 Petero 5:9