Mi mu e'yo alenia ria

Mi mu e'yo were were 'diyi ma alea

'Ba Yehova ma E'yo Eti Nzepi 'Diyi

Lugbara

Mi le E’yo Adari Oni ra ya?

Mi le E’yo Adari Oni ra ya?

E’YO ada a’du ma dria? Zita azi orodri ru ’ba eyini ebi ozi ’diyi pi ma dria. Mi ico vini ’dile zita nde ’diyi ma azi ozira ekile:

  • Mungu asi ’di ada ada ama si ra ya?
  • A’di ’diza azini driciza nga eyi de ra ada ya?
  • A’du ma e’yo ni i ’ye ama be ni amani odrazu ’bo ria?
  • Asi ’baza ’ba odrapi ’bo ’diyi pi ma dria ni ci ya?
  • Ma eco Mungu zi erini ecozu ma erizu ra ngoni ru?
  • Ma eco ayiko isu idri ma alia ngoni ngoni?

Mi eco omvita zita ’diyi pi niri nda ngoa? Mi ka ta mu pari ’bani buku lazu kaniku buku ta mbazu ’diyi pi ma alia, mi eco buku lepi mini omvita fepi ’diyi isu alifu alifu. Te sawa dria si, buku alu ni ecini i azi ’diyi pie ku. Azi ’diyi ecoki i’da orodri ru sawa va ’disi, te mbeleko ciciru eyi eca orodri koko ani ’ba eco eyi ma ale omvi kaniku ’ba o’di ni gba i.

Te buku azini omvita kilili ’diyi fepi ri ci. Eri buku e’yo ada ni ri. Yesu Kristo ’yo dini: “E’yo mini ri e’yo ada ri.” (Yohana 17:17) Andrusi ama ni ra E’yo ’dari Biblia Onyiru ri. Peji drile ’dale ’diyi pi ma alia, mi nga omvita nditiri, ada ada zita uruleru ’diyi pi ni ri ki oni.

Mungu Asi ’di ada ada Ama si ra Ya?

Agupi azi o’bi ongulumu ni ce kuru ri

ASISILE ZITA ’DI ZIZU RI: Ama o’a wudrikuru adra pini gazu e’yo kilili ru ku ’diyi pie tre ri ma alia. Dini kakau yi imba kini candi ama ni dri fuzu eyi pie ’diyi enga Mungu vu.

E’YO BIBILIA NI IMBA RI: Mungu feni e’yo onzi alu ni ku. Yobu 34:10 ’yo ’dini: “Mungu econi azi onzi ’yezaru ku, Okpoe’i econi e’yo onzi ’yezaru ku.” Mungu ovu asisile leta ru ni be ’ba ada vu. ’Anei asisile ’disi Yesu imba ama zizu ’dini: “Ata amani ovupi ’buari, …Suru mini ma emu. E’yo mini leleri ma ’ye i nyakua ekile ’bua rile.” (Matayo 6:9, 10) Mungu asi amasi saaru ani owi ima ngulupi fezu asisile i ni ’diyi ma eca ece kokoru.—Yohana 3:16.

Mi ne vini E’doza 1:26-28; Yakobo 1:13; azini 1 Petero 5:6, 7.

A’di ’Diza Azini Driciza Nga Eyi De Ra Ada Ya?

Asikari ki

ASISILE ZITA ’DI ZIZU RI: A’di ’diza de ’ba ma kalafe la kokoru. Driciza ’ba ada niri obi amaworo.

E’YO BIBILIA NI IMBA RI: Mungu ondri sawa azi erini ngazu asi anzu ejizu wudrikuru ma dria ni. Opi nyaza erini ma alia, gamete bualeru ria, ’ba ngaki ni “omba ma e’yo oni alu ni ku.” ’Da ma paria, “eyi nga sei eyini di e’buru.” (Isaya 2:4) Mungu ni nga e’yo onzi azini candi ma ti de dria. Biblia so oyo ’dini: “Mungu ni nga mindre ini yi ma miliasi dria, dra ngani ovu dika ku, awu wuza pi lulu gaza pie, rua suza pie ngani ovu dika ku. E’yo oku [alenia indi ’diyi e’yo onzi dria azini candi nyaza be] ’diyi aga ’bo.”—E’yo Eceza 21:3, 4.

Mi ne vini Zaburi 37:10, 11; 46:9 azini Mika 4:1-4.

A’du Ma E’yo ni i ’Ye Ama be ni Amani Odrazu ’bo Ria?

Nyadri

ASISILE ZITA ’DI ZIZU RI: Dini wudrikurua ’diyi ma ndeni ki imba afa azini ci ’ba ada ma alia eri awi idri ru ’ba ka dra ’bo ria. Azi ’diyi a’iki kini ’ba odrapi ’bo ’diyi ecoki ’ba idriru ’diyi ni candi fe ra.

E’YO BIBILIA NI IMBA RI: Dra eri asiza idri ’ba ada ni ri. Eklesiaste 9:5 ’yo ’dini: “’Ba odra pi ’bo…’diyi nini afa azini aluni ku.” ’Ba odrapi ’bo ’diyi ni ovule nita kokoru, trumu kokoru kaniku egata kokoru risi, ecokini candi—kaniku azakoza fe— ’ba idriru ’diyi pi ni aluni ku.—Zaburi 146:3, 4.

Mi ne vini E’doza 3:19 azini Eklesiaste 9:6, 10.

Asi ’Baza ’ba Odrapi ’bo ’Diyi pi ma Dria ni ci Ya?

Mva ni owu i ma ’ba drapi risi

ASISILE ZITA ’DI ZIZU RI: Ama leki o’a idri ru dika ama leki ayiko nya ’ba ama ni lele ’diyi pie. Ada ava amani lezu ’ba amani lele tu odrapi ’bo ’diyi nezu dika ri ama ma alia ci.

E’YO BIBILIA NI IMBA RI: ’Ba kakau odrapi ’bo ’diyi nga enga ra. Yesu so oyo kini “ ’ba dria nyadria ’diyi…nga efu ra.” (Yohana 5:28, 29) Asisile Munguni oko ri si ria, ’ba ngapi engapi ’diyi dria nga o’a wudrikuru paradisi ru ria. (Luka 23:43) Oyo soza ewu drile ’dale ru ’diyi ni ma alia ’ba dria ruta be ’diyi nga ovu rua kilili ru be azini eyi nga o’a idri ru ’dani ’dani. Biblia ’yo kini: “ ’Ba onyiru ’diyi nga angu nya awitaru, yi nga adri alenia ’dani ’dani.”—Zaburi 37:29.

Mi ne vini Yobu 14:14, 15; Luka 7:11-17; azini ’Yeta 24:15.

Ma eco Mungu Zi Erini Ecozu ma Erizu ra Ngoni Ru?

Agupi azini Mungu zi

ASISILE ZITA ’DI ZIZU RI: Ba dini dria ma alia ’diyi Mungu zi. Te ’da ma driasi, ’ba kakau neki kini Mungu ziza eyiniomvita kokoru.

E’YO BIBILIA NI IMBA RI: Yesu imba ama e’yo alu ’diyi omvizu dika dika Mungu ziza ma alia aluni ku. ’Yo ’dini: “Te emini ziria emi ma ’yo e’yo toko toko ’ba jururu ’diyini ’yelerile ku.” (Matayo 6:7) Aka ki le Mungu ma eri zita amani, le ama ma ziki eri geri erini lele ’diyi si. ’Da i ’yezu, le ama ma oniki e’yo erini lele ’diyi ki ani ama nga eri zi trotro ’dale beni. Yohana okori 5:14 ece ’dini: “Ama ka afa [Munguni] lele feleri zi, eri ama eri ra.”

Mi ne vini Zaburi 65:2; Yohana 14:6, 14; azini 1 Yohana 3:22.

Ma eco Ayiko Isu Idri ma Alia Ngoni Ngoni?

Oku azini ayiko nda Biblia laza si

ASISILE ZITA ’DI ZIZU RI: ’Ba kakau egaki kini silingi, ru kuza kaniku onyi ni eyi ni ayiko fe. Ani eyi di afa ’diyi nda asi driasi—asizu esukini ayiko alu ni ku.

E’YO BIBILIA NI IMBA RI: Yesu ece geri ayiko isuzu ri erini ’yo ria kini: “ ’Ba alioru orindi ma alia ’diyi drile ba ru.” (Matayo 5:3) Ayiko adari ama ecoki isu ra akaki afa ndepi ni ’ba ada ni le ri isuria—asi ’baza amani e’yo ada Mungu ma dria ri nizu azini asisile erini amani ri beri i. E’yo ada ’diri Biblia alia. E’yo ada ’dari onizu ri eco ama aza ko e’yo orodri ru ’di vazu—dika e’yo orodri koko ’diyi be. Ama ni fezu e’yo ada Biblia ma alia ri ni ama dri cezu peta azini ’yeta amani ma alia ni ri amani idri kilili ri fe.—Luka 11:28.

Mi ne vini E’yo O’beza 3:5, 6, 13-18 azini 1 Timoteo 6:9, 10.

’Da bani di omvita Biblia ni zita azia ’diyi pini ri. Mi le zita azini ’diyi oni ’da ma drilea ra ya? Mi ka ovu ’ba “ava be e’yo orindi ni si ’diyi ma azi,” ecekokoru mi le ra. Mi ico di zita azi ’dile ’diyi ki ozi: ‘Mungu ka di asi ama si ra, asisile erini kuzu e’yo onzi azini candi ni gazu nyakua tre ri ngoni? Ma eco idri ’ba mavule akua ’diyi ni ri ’ba kilili ru ngoni ngoni?’ Biblia fe omvita zita ’diyi pini azini zita azi kakau ’diyi pie ri dria ra.

Te kiri, ’ba kakau lekini Biblia ma ti nzi ku. Eyi Biblia ne buku azi ambo dika ewaru ni le. Mi le azakoma omvita ’diyi ki isuzu Biblia ma alia ri ra ya? ’Ba E’yo Eti Yehovani Nzepi ’Diyi afa azi yi fe iri mi aza kozu.

Aluzu ri, buku Mungu le Ama ma ’ye A’du afa ni Ya? ’bani gba ’ba azi be dria tre ’diyi ma azakozu omvita zita azi ’diyi pini ri isuzu ri. Afa irizo ri otuta ’bani ecozu Biblia onizu mi be ’dani aje koko ri. Aje kokoru, ’Ba E’yo Eti Nzepi Yehovani ’Diyi ma azi alu Biblia nipi saaru ni eco emu mivule akua kaniku pari mini lele ria dika sa kilili mini ria sabatu dria si Biblia onizu mi be. ’Ba milioni milioni wudrikuru si ndulu isuki orodri otuta ’disi ’bo. Ani eyi ma azi kakau ngaki di ’yo ’dini: “Ma isu di e’yo ada ri ’bo!”

Lonyi azi orodri ru ’di ndepi ra ni yo. E’yo ada Biblia ma alia ’diyi ama onze e’yo andri ndriza pini si, abaza pie azini uri pie dria. Eri amani asi ’baza fe, asisile idrini pie azini ayiko pie. Yesu ’yo ’dini: “Emi nga e’yo adaru ni, e’yo adaru nderi nga emi otru ra.”—Yohana 8:32.

1. Agupi azi ni e’yo Biblia ni imbari oni; 2. Oku azi ni e’yo Biblia ni imbari oni