Dra ni candi azini asi nyoza angiri eji. ’Da asisile Biblia ni dra omvezu ari’bo niri. (1 ’Ba Korintoa ’Diyi 15:26) Imbata 27 ma alea, mi oni ndra Yehovani nga ari’bo ’di ma dri ja ra. Te a’du ma e’yo ni nga i ’ye ’ba odrapi ’bo ’diyi pie ni? Imbata ’di ma alea, mi nga e’yo oni aziza Yehovani onyiru ni ma dria—Eri nga ’ba bilioni bilioni odrapi ’bo ’diyi enga idriru dika ecozu ayiko zuzu idri ma alea ’dani ’dani. Eri nga eyi enga ra! ’Da eco adaru i ’ye ra ya? ’Ba nga eyi enga o’azu ’bua ya kani nyakua?

1. E’yo Yehovani le ’ye ’ba amani leletu drapi ’bo ’diyi niri a’duni?

Yehova ma ava lezu ’ba odrapi ’bo ’diyi engazu idriru dika ri ci. Agu azi a’ita be omvele Yobu ruri a’i ndra ra Mungu ngani ima e’yo avi dra ma vutia ku. ’Yo Mungu ni ’dini: “Mi nga omve, ma nga di e’yo omvi mi tia ra [engazu nyadria risi].”​—Mi la Yobu 14:13-15.

2. Ama ni ngoniru ’ba odrapi ’bo ’diyi nga enga ra?

Yesu ni ndra o’azu nyakua risi, Mungu fe erini okpo ’ba drapi ’bo ri engazu ra. Yesu enga ndra zamva azi eli 12 ni azini oku azi awizi runi ma mvi ni idri ru ra. (Marako 5:41, 42; Luka 7:12-15) Sa azi ma vutia, Lazaro dra ra. Lazaro ni tro ndra o’azu ’bilea o’du su ra ti, Yesu enga eri idriru dika. Yesu ni Mungu zizu ’bo ri ma vutia, eri nga tre o’duko uru si: “Lazaro, mi efu amve ’doa!” “’Ba drapi ’bori nga efu ra”​—idriru! (Yohana 11:43, 44) Mi ega nga ayiko ’ba Lazaro ma akua ’diyi fupi eri ma agyi pie ri!

3. Asi ’baza ’ba mini leletu odrapi ’bo ’diyi niri a’duni?

Aziza Biblia ma alea ri ’yo ’dini: ‘engata ni nga ovu ci.’ (’Yeta 24:15) ’Ba Yesu ni enga ewu drio ’dasi ’diyi ndra ’bua ku. (Yohana 3:13) Eyi ndra ayikosi ’bani eyi engazu idriru nyakua ’dia risi. Ace were Yesu ni ’ba bilioni bilioni yi engazu idriru dika paradisia nyakua ’dia. Yesu ’yo ndra “’ba dria ovupi nyadria ’diyi”​—Ata ’ba azi amani eyi ma e’yo avi ’bo ’diyi Mungu ma dria ci. Eri nga eyi enga ra.​—Yohana 5:28, 29.

 OVAZU ALI

4. Yesu e’da i eco ’ba drapi ’bo ’diyi enga ra

Mi oni e’yo angiri e’yo Yesu ni ’ye ima agyi Lazaro niri ma dria. Mi la Yohana 11:14, 38-44: zita ’diyi omvizu

• Ama ni ngoniru Lazaro dra ndra ada ada?​—Ine vasi  39.

• Lazaro ka ndra tu ’bua mini ega risi Yesu ni ndra eri eji idriru nyakua dika ra ya?

Mi avi VIDIO ’di.

5.’Ba nga ’ba kakau yi enga ra!

Mi la Zaburi 37:29, zita ’di omvizu:

• ’Ba ’bani enga bilioni bilioni ’diyi nga o’a ngoa?

Yesu ngani lu ’ba Yehovani inzipi ’diyi enga i a’dule ku, te eri nga ’ba kakau yi enga indi. Mi la ’Yeta 24:15, zita ’di omvizu:

• ’Ba mini nga le ne idriru dika ri a’di i?

• Asi ’baza engata ma dria ri fe asi omiza Phelicity ma tipika yini ngoniru?

 ’BAZU ALIARU

Aziza Biblia ma alea ’diyi e’da ’ba bilioni bilioni odrapi ’bo ’diyi nga enga ra. Yehova le ma o’aki idriru dika, azini fe Yesu ni okpo yi engazu ra.

Aleni amvizu

• Yehova pi ma trumu Yesu be lezu ’ba drapi ’bo ’diyi engazu idriru dika ri ngole?

• ’Ba bilioni bilioni ’bani mu enga idriru ’diyi nga o’a ngoa ​—’bua kani nyakua? Mi omvi ’dile a’dusi?

• A’du fe mini a’izu ’ba mini leletu drapi ’bo ’diyi nga o’a idriru dika ni?