Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

E’yo Baru Engazu Mungu Vu!

 Imbata 7

Suru Munguni ri A’du afa ni Ya?

Suru Munguni ri A’du afa ni Ya?

Afa fepi Yesu ni ovuzu Opi kilili ni ri a’du afa ni ya?MARAKO 1:40-42.

1. Suru Munguni ri a’du afa ni ya?

Suru Munguni ri eri gamete ’bua ri i. Eri nga pa so gamete azi ’diyi pi ma paria azini Mungu ni nga eri ayu e’yo erini lele ri ’yezu ’bua azini nyakua. Geri Mungu ni ngazu Suru erini ri ayuzu ri e’yo azi onyiru ni. Ace were Suru Munguni ri nga afa ’ba yini le gamete mukeri vuri fe ra. Eri nga ’ba woro nyakua ’diyi ki ici tualu.Mi la Danieli 2:44; Matayo 6:9, 10; 24:14.

Suru dria ma opi ci. Yehova pe ima Mvi, Yesu Kristo ni ovuzu Opi ru Suru erini ria.Mi la E’yo Eceza 11:15.

2. Yesu ni Opi sipi ra ri i a’du ma e’yo si ya?

Mungu ma Mvi ni Opi sipi ra ri i a’dusikuni eri asi ndriza be azini e’yo kilili ri ’ye. (Yohana 1:14) Dika eri okpo be ’ba ada ma aza kozu a’dusikuni eri nga opi nya nyaku dria engazu ’bua. Erini engazu ’bo ri ma vutia, tu ’bua dika nga ri Mungu ma dri adaria. (’Ba Ebraniani 10:12, 13) Asizu, Mungu fe di erini okpo e’dozu opi nyazu.Mi la Danieli 7:13, 14.

3. Yesu ni nga opi nya a’di be ya?

’Ba omvele “alatararu” ’diyi nga opi nya Yesu be ’bua ’dale ni. (Danieli 7:27) ’Ba oko alatararu ’diyi ndra ’ba ti pele Yesu ni a’ita be ’diyi ki. Yehova ni nga kiri mu drile agupi azini oku a’ita be ’diyi ki opezu ovuzu ’ba alatararu ’diyi ru. Ekile ndra Yesu dri rile, ’ba nga eyi enga rua orindiru ri be.Mi la Yohana 14:1-3; 1 ’Ba Korintoa Diyi 15:42-44.

 ’Ba mupi bua ’diyi ma kalafe si ya? Yesu omve eyi “kabilo were” ’diyi. (Luka 12:32) Eyi ma kalafe woro ri di nga ovu 144,000. Eyi nga opi nya Yesu be nyaku ma dria.Mi la E’yo Eceza 14:1.

4. A’du afa ’ye i Yesu ni e’dozu opi nyazu risi ni ya?

Suru Mungu ni ri e’do opi nya eli 1914 si. * E’yo ndra Opi Yesu ni ’ye oko ri Sitani ni e’bezu orindi onzi erini ’diyi pie nyakua va. Sitani eca di ombasi dika e’do di ocoko eji nyaku dria woro. (E’yo Eceza 12:7-10, 12) E’dozu sawa ’dasi, ocoko ’ba ada niri ma omgbo tu di angiri. A’di, abiri, azo, azini oyakia eyi woro “eceta” e’dazu ace were Suru ’diri ’ye e’yo nyakua ’diyi otu.Mi la Luka 21:7, 10, 11, 31.

5. Afa Suru Mungu niri ni ’ye ri a’du ni ya?

E’yo oluza wudrikuru siri si, Suru Mungu niri di sawa ’disi ’ba kakua suru ndundu ma alea ’diyi ki ici tualu. ’Ba milioni milioni asi e’yere be ’diyi ki di sawa ’disi eca ’ba ovupi Suru Munguni Yesu ni ovuzu Opi ni ru niri ma palaa. Suru Munguni ri nga eyi ma ta mba sawa erini e’yo onzi curu’do ’yepiru nyakua ’diyi dezu risi. Ani e’yo ’disi ’ba dria lepi orodri isupi Suru Mungu niri ma alea ra ’diyi ma oniki ecazu ’ba e’yo eripi Yesu ma tia ra ’diyi ru.Mi la E’yo Eceza 7:9, 14, 16, 17.

Eli 1,000 ma alea, Suru ’diri di nga asisile Munguni ndra oko ’ba ada niri ’ye. Wudrikuru ni di nga eca woro paradisi ru. Asizu, Yesu ni di nga Suru nde fe ima Ati vu ogogo. (1 ’Ba Korintoa ’Diyi 15:24-26) Mi ni agu azi mini lezu erini e’yo nzezu Suru Munguni ri ma dria ni ra ya?Mi la Zaburi 37:10, 11, 29.

 

^ par. 12 E’yo onizu angiri e’yo ondriza Biblia ni eli 1914 ma dria, mi ne buku E’yo Ada Biblia ni Imba ri Ngoni? ri ma peji 215-218.

E'YO ONIZA ANGIRI

E’yo Ada Biblia ni Imba ri Ngoni?

Ama di O’a “Ewu Asizu ’Diyi” ma Alea Ya?

A’DIPI E’YO YEHOVANI LELERI ’YE ANDRUSI NI YA?

’Ba Yehova ma E’yo Eti Nzepi ’Diyi Azi Yini E’yo Oluza Niri Otu Ngoniru?

Ama eceta ndra Yesu ni e’da de nga eri nyakua ’dia ri ma vuti obi. Geri amani e’yo oluzu ’diyi ma azi yi ngo yi ya?