Mi mu e'yo alenia ria

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Mi pe ti Lugbara

 Imbata 5

Asisile Munguni Nyaku ’Di ma Driari Ngoni?

Asisile Munguni Nyaku ’Di ma Driari Ngoni?

1. Asisile Mungu ni nyaku ’di o’bazu ri ngoni?

Yehovah fe nyaku ’di agupi pini oku pie. Eri aku amani. Ani e’yo disi, ’ba oko, Adamu pi Eva be, ’ba o’ba ni ndra eyi kalafe ’bua ri ezuzu ku—Mungu o’ba ndra malaika eyi o’azu ’bua ’dale ’bo. (Yobu 38:4, 7) Kani raria, Mungu ’du agu oko ri dika ’ba eri paradisi alatararu omvele amvu Edeni ni ria. (E’doza 2:15-17) Yehova fe erini eri ma a’bianzi be drileba ecozu o’azu nyakua ’dia idriru ’dani ’dani ri.Mi la Zaburi 37:29; 115:16.

Okokele risi, paradisi ndra lu amvu Edenia a’dule. Agupi azini oku oko ’di piki ndra mu anzi ti nyaku ’di ifizu. Sawa azini ma vutia, eyi ndra nga ga tre nyaku dria dika eyi ndra di eri oja paradisi ru. (E’doza 1:28) Nyaku ’di ma dri ngani ovu jazuru ku. Eri nga ovu aku ’ba ada ni ’dani ’dani.Mi la Eklesiaste 1:4.

2. Nyaku ovuni di sawa ’disi paradisi ni ku a’du ma e’yo si ya?

Adamu pi Eva be gaki Mungu ma ti eriko si, ani Yehova ofu eki amvu nde ma alea risi te. Paradisi avi di ra, dika ’ba azi ejini nga eri vule dika ku. Bilbia ’yo ’dini: “Fe angu wudrikuruni ’ba e’yo onzi ’yepi ’diyi ma dria ’bo.”Yobu 9:24. Mi la E’doza 3:23, 24.

’Di ma ifi di kini Yehova ku asisile ini ndra oko ’ba ada ni ri ’bo ya? Yo! Eri okpo e’i i. E’yo azi ndeni eri ku. (Isaya 45:18) Eri nga e’yo dria dria ’ba ada niri otu tro tro ndra erini lele rile.Mi la Zaburi 37:11, 34.

3. Paradisi ni di nga eca dika ogogo ngoni ru ya?

Paradisi ni nga eca nyakua dika ogogo sawa Mungu ni Yesu ni ’bazu Opi ru ri ma alea. A’di Amagedoni ni ria, Yesu ni nga malaika Mungu ni ’diyi ma dri ce ari’bo Mungu ni ’diyi ma dri  jazu dria. ’Da ma vutia Yesu ni di nga Sitani ni ombe arujoa eli 1,000. ’Ba Munguni ’diyi nga eyi pa drijaza ’di ma alea risi ra a’dusikuni Yesu ni nga eyi ma dri ce azini eyi ma ageyi te ni. Eyi nga idri ’dani ’dani ri isu Paradisia nyakua.Mi la E’yo Eceza 20:1-3; 21:3, 4.

4. Ocoko ni nga i de ngoari?

Mungu ni nga e’yo onzi nyakua ’diyi de ngoari ya? Yesu fe “eceta” asiza di enyia ri e’dazu ri ra. E’yo sawa ’disi ’yepiru wudrikurua ’diyi uri fe ’ba ada ni dika eyi e’da ama o’a sawa “asiza angu wudrikuruniri” ma alea.Mi la Matayo 24:3, 7-14, 21, 22.

Sawa Yesu ni ngazu opi nyazu ’bua ’dale eli 1,000 nyaku ma dria risi, eri nga ocoko dria de ra. (Isaya 9:6, 7; 11:9) Yesu ni tro ngazu ovuzu Opi ru ra ti, eri nga ovu Kuhani Ambori ru indi dika eri nga ezata ’ba Mungu ni lepi ’diyi pini ri wu ra. ’Dini, geri Yesu vu risi, Mungu ni nga azo, deta, azini dra de ra.Mi la Isaya 25:8; 33:24.

5. A’di ni nga o’a Paradisi emupi ri ma alea ni ya?

Jo Karini (Kingdom Hall) ria, mi nga dri fu ’ba Mungu ni lepi azini e’yo erini ayiko fepi ’diyi onipi ’diyi pie

’Ba e’yo eripi Mungu ma tia ’diyi nga o’a Paradisia ni. (1 Yohana 2:17) Yesu pe ’ba ima vuti bipi ’diyi ma ti muzu ’ba asi e’yere be ’diyi ki ndazu azini eyi imbazu ecazu ’ba Mungu ni lele ra ’diyi ru. Andrusi, Yehova ni ’ba milioni milioni ki otu o’azu Paradisi emupi nyakua ewu driale ri ma alea rini. (Zefania 2:3) Jo Karini (Kingdom Hall) ’Ba Yehova ma E’yo Eti Nzepi ’Diyi pini ria, ’ba ki e’yo oni ecazu agupi azini ata muke ri ru dika ecazu oku azini ayia muke ri ru. Anzi yi tipika pie Mungu inzi tualu dika eyi geri orodri isuzu e’yo ba ’di ma alea ri oni.Mi la Mika 4:1-4.