Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

E’yo Ada Biblia ni Imba ri Ngoni?

E’YO O’BAZARU ’DIYI

E’yo Adaru Ata, Mva Azini Orindi Alatararu ri ma Dria Ri

E’yo Adaru Ata, Mva Azini Orindi Alatararu ri ma Dria Ri

’BA TRINITA ma imbata a’ipi ’diyi ’yoki kini ’ba yi na Mungu alu ri ma alea—Ata i, Mva i, azini Orindi Alatararuri i. Eyi ’yo kini ’ba ’diyi ma alu alu yi trotro aziri be, eyi ma okpo vini trotro, azini eyi ma e’doza yo. Imbata Trinita ni risi, Ata ni Mungu, Mva ni Mungu, azini Orindi Alatararuri vini Mungu, te eyi woro Mungu alu ri’i.

’Ba kakau ru imbata Trinita ni a’ipi ’di ’yoki kini eyi ecokini imbata ’di ma ifi ece ku. Te kiri, eyi ega kini eri imbata engapi Biblia ma alea ni. Okokele risi le mi ma ni ra kini e’yo ’yoza “Trinita” ’diri Biblia ma alea yo. Te imbata azi di Trinita ma dria Biblia ma alea ni ci ya? Zita ’diri omvizu, le ama ma neki nga e’yo siza ’ba Trinita a’ipi ’diyi pini sawa driasi ayu imbata nde atizu ri.

“E’YO NDERI MUNGU’I”

Yohana 1:1 kini: “Okokele E’yo ovu indi, E’yo nderi ovu Mungu be, E’yo nderi Mungu’i.” Vuti vuti ru capita alu ’di ma alea, ’ba ti pele Yohana nga e’da kililiru kini “E’yo” ’diri Yesu’i. (Yohana 1:14) Ani ’bani E’yo ’diri omvezu Mungu i risi, ’ba azi egaki di kini Mva ’di pi Ata be Mungu aluri.

Le mi ma ni ra kini Biblia ma woko ’di ’ba si ndra ti Giriki ni si. Vuti vuti ru, ’ba nga di ti Giriki ni ’diri oja ti ndu ndu si. Te, ’ba Biblia ojapi ti ndu ndu si tre ’diyi, awikini si “E’yo nderi Mungu’i” ’dini ku. A’dusi ya? Vata ndra eyini ti Giriki ni vazu risi, ’yoki kini le ’ba ma oja “E’yo nderi Mungu’i” ri ndu. Te ngoni ya? Eceta ni ma azi ki ’di: “Logos [kaniku E’yo] ’diri ndra okpo Munguniri be” (A New Translation of the Bible) “E’yo nderi ndra mungu le” (The New Testament in an Improved Version) “E’yo nderi ndra Mungu be dika si ndra eri le.” (The Translator’s New Testament) Ti ojaza’diyi ni ece risi, E’yo ovuni Mungu ma ngulupi i ku.* Kani si, eri ma pari o’bata Yehovani ma alea rini ovuzu uru tu risi, E’yo nde e’da di “mungu” le. ’Bani ’yozu e’da “mungu” le ri ma ifi kini “eri okporu.”

MI NDA E’YO ADARI MA AZI KI DIKA

’Ba kakau ru niki ni ti Giriki ni ’bani Biblia sizo ri ku. Ani mi eco di e’yo ’ba ti pele Yohana ni ’yo ri ma ifi va kililiru ngoni ru ya? Mi ega nga e’yo eceta ’di ma dria: Imbapi ece afa azini anzi kilasia ’diyi pini. Te vuti vuti ru e’yo anzi kilasia ’diyini ni afa ’da ma dria ri i ndu. Anzi ’diyi nga e’yo adari ni ngoni ru ya? Ecoki imbapi ni zi dika afa ’dari ecezu eyini. Adaru, e’yo onizu angiri ri nga eyi ma aza ko afa ’diri vazu kilili. Tro tro ’dile, Yohana 1:1 ma ifi vazu kilili mi eco Buku e’yo nzepi idri Yesu ni ma dria Yohanani si ri la pari Yesu niri nizu. E’yo onizu angiri imbata ’di ma dria ri nga mi aza ko ecozu nizu kani Trinita eri ada ya ri isuzu.

Ecetasi mi ne di nga e’yo Yohana ni si capita 1 vasi 18 ma aleari: “Drio ’ba neni nga Mungu [Okpo e’ini] aluani ku kpere curu’do.” Te, ’ba ada neki Yesu, mva’i ’bo, ekile Yohana ni ’yole ’dile: “E’yo nde [Yesu] ovu ’ba rua beriru, eri ovu ama eselia, ’yeta anzutiruri be tre, e’yo ada be, ama lu diza erini vu.” (Yohana 1:14) Ka di te ’dile, adaru, Mva ’di eco di ovu Mungu Okpo e’i i ngoni ru ya? Yohana ’yo vini kini E’yo ni ndra ‘Mungu be.’ Te agu azi eco o’a ’ba azini be te deresi eri bani agu ’da’i ngoni ru ya? O’bazu ’da ma dria, Yohana 17:3 ma alea, Yesu e’da esele coza ima eselea Ata ini ’bua ri be ri kililiru. Omve i ma Ati ni “Mungu alu a’dule adaruri’i.” E’yo Siza Yohana ni rini i deria leru, si ’dini: “Te si ’diyi emini a’izu ani Yesu eri Kristo Mungu ma Mvi’i.” (Yohana 20:31) Mi ne ’dia ra kini ’ba Yesu ni omve Mungu i ku, te, Mungu ma Mvi’i. E’yo Siza Yohana ni o’ba ’diri amani ecozu Yohana 1:1 ni vazu kilili. ’Yo Yesu i, “mungu ru” pari erini rini ovuzu uru tu risi, te ovuni Mungu Okpo E’i ni ku.

MI NDA E’YO ADA ’DIYI KI

Mi ega nga e’yo dika eceta ta imbapi sukulua anzi be kilasia rini ma dria. Ata tro imbapi ni e’yo ini imbari ecezu dika dika ’bo ri ma vutia, anzi azi ecoki nga ’dele e’yo erini imbari va ku. Eyi di nga a’du afa ’ye ya? Ecoki mu imbapi azini vu e’yo alu ’da ma ifi zizu beni. Imbapi irizuri ka e’yo ’dari ece tro tro imbapi okori ni ecele rile, anzi kilasia ’diyi ki di nga dria e’yo ’dari a’i ra. Geri alu ’dile risi, mi ka api e’yo Yohana Biblia sipi rini ece Yesu pi ma esele cozu Mungu Okpo E’i be risi ku, mi eco e’yo agu azi ndu Biblia sipi rini ne ra. Ecetasi, mi eco e’yo Matayo ni si ri ne ra. Erini e’yo nzezu asiza ewu ’di ni ri ma dria ria, nga e’yo Yesu ni nze ri lu amani ’dini: “Te o’du ’dari pi ma e’yo etu ’dari be ’ba aluni nini ku, kani malaika ’bua ’diyi, kani Mvi’i ti, te Ata a’dule nini.” (Matayo 24:36) E’yo ’di e’da nditiri Yesu ovuni Mungu Okpo E’ini ku ri ngoni ngoni ya?

Yesu ’yo kini Ata ni e’yo aga Mva ni niri ra. Te, Yesu ka di ovu woko Mungu Okpo E’ini ri ma azi, ecekokoru eri ta nga e’yo dria Ata ni ni ra riki ni ra. Adaru, yo kini Mva pi ki Ata be ovukini trotro ku. Te, ’ba azi ecoki ’yo ’dini: ’Yesu ni obi iri si. ’Dia eri ndra e’yo nze dere eri ’ba ada ni.’ Te ’da ka tro ndra ovu ’dile ra ti, te di Orindi Alatararuri i ria? Ka ovu Mungu azini Ata alu ri ma woko, Yesu awini ’yo kini ni e’yo Ata ni nira ri ku a’du ma e’yo si ya?

Mini muzu drile mi Biblia ma oniza be ria, mi di nga e’yo azi Biblia ma alea yi ecipi ’di be ri ma azi ki isu oni. Eyi nga mini e’yo adaru Ata, Mva azini orindi alatararu ri ma dria ri ki ece.—Zaburi 90:2; ’Yeta 7:55; ’Ba Kolosaia ’Diyi 1:15.


*  E’yo onizu angiri Yohana 1:1 ma dria, mi ne buku ’Ba Yehova ma E’yo Eti Nzepi ’diyi pini gba Watchtower, mba mudri drini alu ma o’du 1, 2008, driri ri ma peji 24-25.

← Mi ne angu ’bani capita e’dazuri