MI LA gazeti ci ri. Mi ne televizoni, kaniku mi eri radio. Eyo ndepi mini nga isu ’diyi e’yo adra pini, a’di ’diza pie, azini mbumbu o’beza pini! Mi ega vini nga e’yo candi ru mi ngulupi ni ’diyi ki. Ecoki ovu azo ni kaniku dra ’ba amani lele tu ri ni candi fepi ama asia ri’i. Ecodi fe mini ecazu agu ndra muke Yobu ’yopi kini, “candi ma dri” ri le.—Yobu 10:15.

Mi zi di mi ngulupi:

  • Diri afa Munguni lele ma ’yeru ma rua azini ’ba woro ma rua ri i ya?
  • Ma eco azakoma isu e’yo ma obipi ’diyi ma ti tazu ngoa ya?
  • Asi ’baza asi anzuru ni ri nga ovu nyaku dria ’dia ci adaru ya?

Biblia fe omvita kililiru zita ’diyi pi ni ra.

BIBLIA IMBA KINI MUNGUNI NGA OJATA ’DILE ’DIYI KI EJI NYAKU MA DRIA RA.

Mbaza ecapi karile ru dika ri

“Eri nga mindre ini yi ma miliasi dria, dra ngani ovu dika ku, awu wuza pi lulu gaza pie, rua suza pie, ngani ovu dika ku; eyo oko ’diyi aga bo.” —E’yo Eceza 21:4


Zamva pa pie acoza ri sawa ’disi ongu nzu ria

“’Ba pa acozaru ’diyi nga ombu nyajole.”—Isaya 35:6


Agupi mile kokori e’do angu ne ’bo

“’Ba mile odraza ’diyi ma mile yi nga yi ozi mgboru.” —Isaya 35:5


Oku ’di o’a ayiko si erini ’ba erini lele tu drapi ’bo ri nezu idriru dika risi

“’Ba dria ovupi nyadria ’diyi nga…efu ra.” —Yohana 5:28, 29


Mva azoru ’di ri rua alaru be dika

“’Ba ovupi angu nde ma aliari ngani ’yo, ‘Ma azoru, ’dini ku.’”—Isaya 33:24


Amvu anya ni

“Anyani nga ovu tre nyakua oni ma dria.” -Zaburi 72:16


MI ISU ORODRI IMBATA ENGAPI BIBLIA MA ALEA ’DIYI SI

Agupi iri ’diyi ki Biblia oni

Le mi ega kini e’yo amani onile ’bo ’diyi ki orobi ni ku. Mungu so oyo e’yo ’diyi ki ’yezu dria, azini Biblia ece eri nga eyi ’ye ngoni ngoni’ari ra.

Te e’yo Biblia ni lu amani ri aga ’diri ra. Fe geri mini ecozu ayiko isuzu idri ma alea ewu ’disi ri ra. Mi ega nga e’yo were candi mini ma dria azini afa mi asi supi ’diyi pie. ’Diyi ecoki ovu e’yo silingi ni, e’yo aku ma alea ’diyi ki, azo ni, kaniku drata ’ba amani lele turi niri’i. Biblia eco mi aza ko e’yo curu’do ewaru ’diyi ma ti tazu ra, azini eri nga mi asi omi erini zita ’dile ’diyi ki omvizu risi:

  • Ama candi isu a’du ma e’yo si ya?
  • Ama eco di e’yo orata ru asi otiza ejipi idri ma alea ’diyi ma ti ta ngoni ngoni ya?
  • Ama eco di fe idri aku amani ma aleari eco ovu ayiko ru ngoni ngoni ya?
  • A’du afa ni i ’ye ama be ni aka ki dra ’bo ria?
  • Ama eco di ba amani lele tu odrapi ’bo ’diyi ki ne dika ra ya?
  • Ama ecoki ovu asi ’baza si adaru kini Munguni nga oyo soza erini ’diyi ki ’ye ewu driale ri ma alea ra ngoni ru ya?

Mini buku ’diri lazu ri e’da adaru kini mi le e’yo Biblia ni imba ’diyi ki oni ra. Buku ’diri nga mi aza ko ra. Mi eco ne ’dia ra kini paragirafu alu alu ma zita ci peji ni i deria vaa. ’Ba milioni milioni tre isuki geri ’bani zita zizu azini omvizu ’Ba Yehova ma E’yo Eti Nzepi ’Diyi pie e’yo onizu Biblia ma alea ri orodri ru. Ama ovu asi ’baza si kini ’diri nga vini ovu mini orodri ru indi. Le tusu coza Munguni ma ovu mi dria mini di e’yo onyiru azini Adaru Biblia ni imba ’diyi ki oni ria!

LE MI MA NI MI BIBLIA

Biblia

Biblia ma alea buku ma kalafe waraga pie dria ri 66. ’Ba awa ki capita vusi azini vasi vusi ecozu eyi isuzu mbeleru beni. ’Ba ka e’yo siza e’da buku ’di ma alea, namba oko buku nde ma ru ma vutia ri capita buku nde niri kaniku waraga nde niri, azini namba vutinia ri di vasi e’da. Ecetasi ’ba ka si “2 Timoteo 3:16” ifini kini waraga irizu ’bani si Timoteo vuri, capita 3, vasi 16.

Mi di nga ni Biblia ayuzu mbeleru e’yo siza buku ’di ma alea ’diyi ki si. Mi eco di e’do Biblia la o’du driasi ku a’du ma e’yo si ya? Mi ka capita la e’dozu na kpere towi o’du dria si, mi nga Biblia la woro eli alu ma alea.