Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

E’yo Ada Biblia ni Imba ri Ngoni?

CAPITA MUDRI DRINI ARO

Baputizimu Azini Mi ma O’aza Mungu Beri

Baputizimu Azini Mi ma O’aza Mungu Beri

Kristiani ki baputizimu fe ngoni ru ya?

Afa le mi ma ’ye mini ecozu baputizimu isuzu beni ’diyi ki ngoki ya?

Geri agu azi ni ecozu idri ini fezu Munguni ri ngoi ya?

Asisile orodriru ’bani baputizimu isuzo ri ngoni?

MI NE! Yi eri ’do, a’du afa oga mani baputizimu bizu ni ya?” Zita ’diri agu azi ngapi opi Etiopia ri vile akua eli turu aluzo okori ma alea ri zi ni. Isu deresi Kristiani Filipo ece erini kini Yesu ni bani Mesia ndra ’bani e’yo ni ondri ri’i. Afa erini oni E’yo Siza ma alea ’diyi ma e’yo ni fizu eri ma asia risi, agu engapi Etiopia ’di nga coti e’yo ’ye ’yetasi. Nga e’da kini i le baputizimu bi ra!—’Yeta 8:26-36, NW.

Ranya Etiopia eli turu turu okori ma aleari

2 Mi ka ebi buku ’di ma capita azi alipi ’bo ’diyi ki oni asi dria si ’Ba Yehova ma E’yo eti Nzepi ’Diyi pie, mi eco vini ovu ngonde zita ’diri zizu ra, ‘A’du afa fe mani baputizimu bizu ku ni ya?’ Sawa ’di ma alea mi oni di oyo soza Biblia ni idri ’dani ’dani paradisia ri ma dria ri ma e’yo ’bo. (Luka 23:43; E’yo Eceza 21:3,  4) Mi oni vini e’yo adaru ’ba drapi ’bo ’diyi pi ma dria azini asi ’baza engata ni ri be ’bo. (Eklesiaste 9:5; Yohana 5:28, 29) Mi eco vini ’dele ’di sawa azini si eciru tualu ’Ba Yehova ma E’yo eti Nzepi ’Diyi pie okuza eyini ma alea dika mi ndre vini mi ngulupisi eyi dini adari ma alea ri e’da ngoniru’ari ’bo. (Yohana 13:35) Orodrisi ndepini ri, mi eco di vini ’dele ’di e’do agyi mi ma ngulupi niri ’ba Yehova Mungu be ’bo.

3 Mi ecodi mi le azi nga Mungu niri e’da ngoni ru ya? Yesu ’yo ’ba ima vuti obipi ’diyi pini: ‘Emi mu…emi oja suru dria ’ba ma vuti bipiriru, emi fe baputizimu yi dri.’ (Matayo 28:19) Yesu ma ngulupi e’da eceta ’diri erini baputizimu bizu yi ma alearisi. ’Ba oyani ndra yi eri ma dria oya oya ’dini ku, azini feni ndra vini lu ’bani yi dazu eri ma dria ’dini ku. (Matayo 3:16) “Baputizimu” eri ti Giriki ni ifini “Suzu.” Baputizimu Kristiani ni ri ma ifi di kini ’bani mi suzu pi, kaniku mi mizu woro pi, yi ma alea.

4 Baputizimu ’bani fe yi si ri eri afa ’ba dria lepi agyi ’bapi Yehova Mungu beri ma isu ra ri. Baputizimu ni di mi ava lezu azi ngazu Mungu dri ri e’da ’ba woro ni. Eri e’da kini mi ovu ayikosi tu e’yo Yehovani lele ’diyi ’yezu. (Zaburi 40:7, 8) Te, mini mi otuzu baputizimu bizu, le di mi ma ’ye e’yo azini ki ’yeta si raka.

NITA AZINI A’ITA EYI OKPORU

5 Mi e’do afa aluzo ri ’ye ’bo. Ngoni ru ya? Mini e’dozu nita Yehova Mungu ma dria azini Yesu Kristo be ri onizu, kaniku Biblia onizu tiasi risi. (Yohana 17:3) Te afa kakau mini nga oni ’diyi ki ci. Le Kristiani “ma ga tre nita e’yo erini [Munguni] leleri nizurisi.” (’Ba Kolosaia ’Diyi 1:9) Ovuzu okuta ’Ba Yehova ma E’yo eti Nzepi ’Diyi ni eyi okuzu ri ma alea ciri nga mi aza ko angiri nita ’diri isuzu. Eri orodriru mini acizu okuta ’diyi ma alea. (’Ba Ebraniani 10:24, 25) Acizu okuza ’diyi ma alea sawa dria siri nga fe mi nita Mungu ma dria ri eca angiri.

Nita adaru E’yo Munguni ma alea ri onizu ri eri geri azi orodriru mini ecozu mi otuzu baputizimu isuzu ri’i

Biblia oniza

6 ’Di ma ifi ovuni kini, le mi ma oni e’yo dria Biblia ma alea ’diyi ki raka mi di nga baputizimu isu ndo ’dini ni ku. Agu azi ngapi opi Etopia ri vile akua ri ni ndra lu e’yo were, te le ndra azakoma E’yo Siza azi ’diyi vazu. (’Yeta 8:30, 31) Trotro ’dinile, afa le mi ma oni ’diyi nga kakau. Adanisi, mi econi nga e’yo woro Mungu ma dria riki oni de ku. (Eklesiaste 3:11) Te, de nga mi bini baputizimu ku, le mi oni azini mi a’i imbata okporu Biblia ma alea ’diyi ki ra ka. (’Ba Ebraniani 5:12) Imbata ’dile ’diyi ma alea indi riki e’yo adaru ’ba odrapi ’bo ’diyi pi ma dria ri pi, orodri Mungu ma ru nizu azini Suru erini ri pie.

7 Te, nita a’dule ri cani ku, a’dusikuni “aita kokoru econi ’bani ayiko fezaru eri [Mungu] dri ku.” (’Ba Ebraniani 11:6) Biblia lu amani kini ’ba azi ndra drio aku amboru Korintoa ’diyi ni e’yo Kristiani ni erizu ’bo ri ma vutia “yi a’i ra, bi baputizimu indi.” (’Yeta 18:8) Geri alu ’dile risi, le e’yo mini oni Biblia ma alea ri ma fe mini a’ita nizu kini eri E’yo siza Munguni ri. Le vini Biblia ma oniza ma ko mi aza a’ita ’bazu oyo soza Munguni ’diyi ma dria azini owita Yesu ni i owizu ’ba pazu ri ma dria indi.—Yosua 23:14; ’Yeta 4:12; 2 Timoteo 3:16, 17.

E’YO ADA BIBLIA MA ALEA ’DIYI ONIZU’ BA AZI ’DIYI PIE

8 A’ita ni zozu mi asia risi, mi nga isu ne kini ovuzu ciri e’yo mini oni’bo ’diyi ma dria ri ewaru. (Yeremia 20:9) Ece kokoru mi di nga okpo isu e’yo nzezu ’ba azi ’diyi pie Mungu ma dria azini asisile erini ’diyi pie.—2 ’Ba Korintoa ’Diyi 4:13.

Le a’ita ma fe mi olu e’yo mini oni’bo ’diyi ’ba azi ’diyi pini

Agupi ’di aita ini ri ma e’yo olu ’ba azi ’diyi pini

9 Mi eco e’do e’yo adaru Biblia ma alea ’diyi olu onduasi mi ori’ba yini, agyi pie, ’ba jo ejelea ’diyi pie, azini ’ba mini azi ngazu eyi pie ’diyi pini. ’Di ma vutia, mi ecodi e’do e’yo olu tualu ’Ba Yehova ma E’yo eti Nzepi ’Diyi pie. Mi ka di mi ama ngonde e’yo oluzu, mi nze e’yo Agu mini Biblia onizu eri be rini asisile mini ri ma dria. Mi ka di aga ra ecozu e’yo oluzu o’bi ni, mi i azini imbapi mivule ri be emi di nga dri fu mbaza kanisa ocepi ’diyi ma azi iri niki pie.

10 ’Diri di nga fe mini ecozu Kristiani mbazaru, kabilo Munguni ocepi ’diyi ma azi ki nizu kilili beni. (’Yeta 20:28; 1 Petero 5:2, 3) ’Ba mbazaru ’diyi kaki ndre kini mi va azini mi a’i imbata orodriru Bibliani ’diyi ki ra, azini kaki ne kini mi e’yo mini oni Biblia ma alea ’diyi ki ’ye ’yetasi, dika ka ki ndre adaru mi le eca ’Ba Yehova ma E’yo eti Nzepi ri ru, eyi nga fe mini nizu kini mi eco di e’do e’yo olu ra de nga mi isuni baputizimu ku.

11 O’bazu ’da ma dria, le mi ma oja geri mini o’azu idri mini ma alea ’diyi ki azini adriza azi ta sipi ku ’diyi pie ecozu e’dozu e’yo oluzu ’ba dria ni beni. ’Di ma ifi kini le mi ma ku e’yo onzi mini ebi ’ye oziza ru ’diyi ki dria. Ifini kini, de nga mi zini e’dozu e’yo oluzu ku, le mi ma ku ezata onzi ekile ali o’baza pi, atizu ewasi ri pie, azini ’bani aro ayuzu atizu ani beni ’diyi pie, dria ja.—1 ’Ba Korintoa ’Diyi 6:9, 10; ’Ba Galatiaa ’Diyi 5:19-21.

EZATA OGAZA AZINI ASI OJAZA

12 Afa azi le mi ma ’ye eyi raka de nga mi isuni baputizimu ku ’diyi ki vini ci. ’Ba ti pele Petero kini: “Emi ma oja emi asi…emi nga ojita isu e’yo onzi emini si beni.” (’Yeta 3:19) Ezata ogazu ri ma ifi mini o’azu candi si e’yo mini ’ye ’bo ri si. Ezata ogazuri eri afa azi kilili ni agu azi ebipi ali o’bapi ri ni, te eri vini kilili agu azi ali o’bapi ku rini indi. A’du ma e’yo si ya? A’dusikuni ’ba woro eyi eza’ba ni azini leki truta Mungu niri ra. (’Ba Rumia ’Diyi 3:23; 5:12) Mini ndra nga e’dozu Biblia onizu ku ria, mi ni ndra e’yo Munguni lele ri ngoni’ari ku. Ani mi eco ndra di e’yo erini lele ri ’ye ngoni ru ya? Adaru, ezata ogaza eri afa azi kilili le ama ma ’ye ra ri.

13 Ezata ogaza ma vutia ri asi ojaza, kaniku e’yo onzi kuza. Le mi ma o’a lu candi si a’dule ku. Le mi ma ku geri mini ebizu idri mini o’azu drio ri ja azini le mi ma so pa kirikiri e’yo kililiru ri ’yezu e’dozu sawa ’disi muzu drile. Ezata ogaza azini asi ojaza eyi geri azi le mi ma ’ye deresi mi isu ni nga baputizimu ku ri.

MINI IDRI MI NGULUPI NI FEZU

14 Geri azi orodriru ndeni le mi ma ’du deresi mi isu nga baputizimu ku ri vini ci. Le mi ma fe mi idri Yehova Munguni.

15 Mini mi idri fezu Yehova Mungu ni izita asi adasi ri ma alea risi, mi adani si oyo so azi ngazu erini asi driasi ’dani ’dani. (Azita Amvizu 6:15) Te adaru, ’ba azi eco le ’ye ’dini a’dusi ya? Ecetasi, agupi azi ka e’do oku azi ’bo. Erini di muzu drile e’yo onisi eri ma dria ria azini ndrezu kini eri ma adriza muke risi, eri di nga eca eri ma agyi enyia ndepi niri. Sawa azini ma vuti, ecodi nga eri zi ini eri ’duzu oku ru. Adaru, oku ’duzu ri nga azi eji eri ma dria angiri. Te leta ni nga fe erini muzu drile eri ’duzu ni.

16 Mi ka di Yehova ni ni azini eri le ’bo, mi di nga le afa azi ma oga mi kaniku ma se mi vule eri inzizu ri ma alea risi ku. ’Ba dria alu alu lepi Yesu Kristo, Mungu ma Mvi ma vuti bipi ri, le “ma ga i ma ngulupi si.” (Marako 8:34) Ama di ama ngulupi ga si akaki afa ama ni lele tu te ecopi fepi amani Munguni ruzu ku ’diyi ki ku ja risi. Ani e’yo ’disi, de nga mi isuni baputizimu ku, le e’yo Yehova Mungu niri ’yezuri ma ovu afa ndepi ni idri mini ma alea ri.—1 Petero 4:2.

URI MI ASIA ’DIYI NDEZU RI

17 ’Ba azi ’diyi lekini idri eyini fe Yehova dri ku a’dusikuni eyi o’a urisi kini ’diri e’yo azi okporu ni. Eyi eco ovu urisi kini idri mini fezu Yehova dri ecazu Kristiani ru ri nga mini e’yo eji ra. Eyi ovu urisi kini eyi nga Yehova ma ru eza ra, azini eyi di vini ega kini cikanisi eyini idri yini fezu eri dri ku.

18 Mi ni o’bi Yehovani lezu risi, ’diri di nga fe mi idri mini fe eri dri dika mi nga okpo ’ba o’azu geri erini lele risi. (Eklesiaste 5:4) Mini di idri mini fezu ’bo ri ma vutia, adaru mi nga le “aci ani onyiru ekile Yehovani lele rile, ayiko fezu eri dri.” (’Ba Kolosaia ’Diyi 1:10) Leta mini Mungu ni lezu risi, mi ngani ega eri ewaru afa erini lele ri ’yezu ’dini ku. Ece kokoru, mi nga e’yo ’ba ti pele Yohana ni sile ’diri a’i ra: “Leta amani Mungu lezuri ’di amani azita erini ma ta mbazuri’i. Te azita erini ovuni nzizaru ku.”—1 Yohana 5:3.

19 Le mi ovu kililiru raka mi di idri mini fe Munguni ndo ’dini ku. Yehova ni okpoako mini ’diyi ra ani cani fe mini afa azi mini eco ’yeku ’diyi ki ’yezu ku. (Zaburi 103:14) Le mi drile ma su su ani eri mi ati azini mi aza ko. (Isaya 41:10) Mi eco di ovu asi ’baza si kini mi ka asi mini dria ’ba Yehova ma dria ra, eri nga “leti mi ni ’ba kililiru.”—E’yo O’beza 3:5, 6.

FETA MINI RI E’DAZU BAPUTIZIMU BIZA SI

20 Mini e’yo egazu afa amani oni ’diyi pi ma dria ri ecoki fe mini mi ngulupi ma idri fezu Yehova dri izita ma alea ra. Le ’ba woro Munguni lepi asi adarusi ’diyi ma ‘e’daki pata isuza eyini ’ba dria ma ni ra.’ (’Ba Rumia ’Diyi 10:10) Mi eco ’dari e’da ngoni ru ya?

Mi fe di mi ngulupi Mungu dri izitasi ’bo ya?

Agupi ’di izita izi

21 Le mi fe mbaza e’yo kanisa ma alea ’diyi ki otupi ri ma ni mi le baputizimu isu ri ra. Eri nga mbaza azi ’diyi ki otu mi ozizu zita azi imbata Bibliani orodriru ’diyi ki si. Mbaza ’diyi ka ki a’i ra kini mi omvi zita ’diyi ki muke, eyi nga lu mini mi eco baputizimu bi o’du ’bani baputizimu fezu risi ra.* E’yo nzeza baputuzimu ma ifi ecezu ri ’ba fe o’du ’da si ra. Agu e’yo nde nzepiri nga ’ba woro ngonde mupi baputizimu isupi ’diyi ki a’i zita iri ki omvizu a’ita yini “e’dazu ’ba dria ni” o’duko urusi.

22 Eri lu baputizimu e’dapi ’ba dria ni kini mi fe di mi idri Mungu ni ’bo azini o’du ’disi mi eca di ’Ba Yehova ma E’yo eti Nzepi ’Diyi ma azi ru ’bo ri’i. ’Ba baputizimu isupi ’diyi ’ba dria ’bani su pi yi ma alea ’ba dria ma milea e’dazu ada feki idri eyini Mungu dri ’bo ’diyi.

BAPUTIZIMU MINI RI MA IFI

23 Yesu kini ’ba i ma vuti obipi ’diyi nga baputizimu isu “ru Atanisi, Mvinisi, azini orindi alatararu rini si.” (Matayo 28:19) ’Di ma ifi kini agu baputizimu bipi ri ma ni okpo Yehova Munguni azini Yesu Kristo niri ra. (Zaburi 83:18; Matayo 28:18) Le ma ni vini azi azini ’yeta orindi alatararu rini, kaniku okpo Munguni rini ri ra.—’Ba Galatiaa ’Diyi 5:22, 23; 2 Petero 1:21.

Baputizimu ma ifi kini mi dra e’yo onzi onzi mini drio ’diyi kisi ’bo dika mi di idriru e’yo Munguni lele ’diyi ki ’yezu

Agupi ’di baputizimu isu

24 Te, baputizimu ovuni lu rua ojiza ’dini ku. Eri e’daza afa azi agapi tu ra rini. Mu suzu yi ma etia ri e’da kini mi dra ’yeta mini okorisi. Mini ifuzu yi ma etia risi ri e’da kini mi curu’do idri ru e’yo Munguni lele ri ’yezu. Le mi ega ra kini, feta mini mi fezu ri Yehova Mungu ma ngulupi dri, ovuni ’ba azini dri ku, kaniku amuti azini dri ku. Mi ma feta azini baputizimu yi e’da kini agyi mini Mungu be ri—eri kililiru nde ni.—Zaburi 25:14.

25 Baputizimu ma ifi di kini mi pa mi ’bo ’dini ku. ’Ba ti pele Paulo si ’dini: “Emi ma nga azi pata eminirini rutasi azini rua yaza be.” (’Ba Filipia ’Diyi 2:12) Baputizimu eri lu e’doza ni. Zita ’dia ri di ’dini, Mi eco di awi Mungu ma leta ma alea ngoni ru ya? Ama ma capita asizuri di nga omvita ni fe ni.

E’YO ADA BIBLIA NI IMBA RI NGONI?

  • Baputizimu Kristiani ni ria ’ba mi su yi ma alea pi, ovuni yi oyaza si ku.—Matayo 3:16.
  • Afa le mi ma ’ye mini ecozu baputizimu isuzu beni ’diyi nita adari isuzu azini a’ita e’dazu vutinia mini mi onzi ogazu ri be, asi ojaza pie, azini di mini mi ngulupi fezu Mungu dri ri.—Yohana 17:3; ’Yeta 3:19; 18:8.
  • Mini mi fezu Yehova dri, le mi ma ga mi ngulupi si, ekile ’ba ndra Yesu ma vuti obipi ’diyi pini eyi ma ngulupi gazu siri le.—Marako 8:34.
  • ’Baputizimu ni e’da kini mi dra e’yo mini oko ’diyi kisi ’bo azini mi sawa ’disi di idriru e’yo Munguni lele ri ’yezu.—1 Petero 4:2.

*  Baputizimu eyi o’du driasi okuza ’Ba Yehova ma E’yo eti Nzepi ’Diyi pini ambo ambo ’diyi ma alea.


Zita Imbata Imzazu ’Diyi Ki

1. Agu azi ngapi opi Etiopia ri vile akua ri le ndra baputizimu bi ra a’du ma e’yo si ya?

2. Le mi ega di e’yo okporo baputizimu ma dria a’dusi ya?

3. (a) Azita ndra Yesu ni fe ’ba i ma vuti obipi ’diyi ni ri ngoi ya? (b) ’Ba baputizimu yi si ri fe ngoni ru ya?

4. Mini baputizimu bizu yi siri a’du afa e’da ya?

5. (a) Afa oko mini eco ’ye mi otuzu baputizimu bizuri a’du afa ni ya? (b) Okuta Kristiani ni ’diyi orodriru angiri a’du ma e’yo si ya?

6. Le nita mini Biblia ma dria ri ma ovu ngopi ra ka mini ecozu baputizimu isuzu ndo ya?

7. Le Biblia ma oniza ma fe mini a’du afa ’ye ya?

8. A’du afa ni nga fe mini muzu e’yo mini oni ’bo ’diyi oluzu ’ba azi ’diyi pini ni ya?

9, 10. (a) Mi eco e’do e’yo ada Biblia ma alea ri olu a’di pini ya? (b) Mi ka di le e’do e’yo olu ’ba Yehova ma E’yo eti Nzepi ’Diyi pie tualu le mi ma ’ye a’du afa ni ya?

11. Adriza le ’ba azi ’diyi ma kuki raka de nga e’doki e’yo olu ku ’diyi ngoki ya?

12. Ezata ogaza eri afa azi kilili ni a’du ma e’yo si ya?

13. Asi ojaza eri a’du ni ya?

14. Geri azi orodriru ndeni le mi ma ’du deresi mi isu nga baputizimu ku ri ngo’i ya?

15, 16. Mini mi ngulupi fezu Munguni ri ma ifi ngoni ya, azini a’du afa ni fe ’ba azi ni e’yo ’dile ri ’ye ni ya?

17. Ba azi ’diyi ecokini le idri eyini fe Mungu dri ku a’du ma e’yo si ya?

18. A’du afa ni nga fe mini idri mini fezu Yehova dri ni ya?

19. Le mi ma ’ye urisi idri mini fezu Mungu dri ku a’du ma e’yo si ya?

20. Feta mini mi fezu Yehovani ri eco ovu e’yo mi ngulupi ni a’dule siri i ku a’du ma e’yo si ya?

21, 22. Mi eco a’ita mini ri “e’da ’ba dria ni” ngoni ru ya?

23. Mini baputizimu isuzu “ru Atanisi, Mvinisi, azini orindi alatararu rini si” ri ma ifi ngoni ya?

24, 25. (a) Baputizimu ni a’du afa e’da ya? (b) Zita ngori di nga ovu omvizaru capita asizuri ma alea ni ya?