Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

E’yo Ada Biblia ni Imba ri Ngoni?

E’YO O’BAZARU ’DIYI

O’du E’yo Lizaniri​—Eri A’duni Ya?

O’du E’yo Lizaniri​—Eri A’duni Ya?

MI egata O’du E’yo Lizani ma dria ri ngoni? ’Ba kakau yi ega kini, ’ba nga ’ba dria bilioni bilioni ’diyi eji alu alu oguŋa Munguniri ma drilea. Vutinia, ’ba di e’do e’yo li ’ba alu alu ma dria. ’Ba azi ’diyi di nga orodri muzu ayiko nyazu ’buari isu, azi ’diyi di nga fi aci okopi ku ri ma alea. Te, Biblia e’da sawa e’yo liza ni ’diri nga ovu ngoni’ari ndu. E’yo Munguniri e’da kini, ovuni sawa uri uriru ni ku, kani ra ria sawa asi ’baza ni azini etota ni.

E’yo Eceza 20:11, 12 ma alea, ’ba ti pele Yohana ece amani e’yo O’du E’yo Liza ni ma dria ri ’dini: “Te ma ndre oguŋa emveru amboru, ’ba ripi driniari be; nyaku pi apa eri ma milia ’bu be ra, isuni pari yi dri dika ku. Ma ndre ’ba draza, ’ba ’wara piyi ’ba nyiri be, yini pa soria oguŋa opini ma drilia; buku yi ovu zizaru. Yi nga buku azini alu zi indi, ’di buku idriniri’i. Yi nga ’ba odraza ’diyi ma e’yo li e’yo yini ovupi sizaru buku ’diyi ma aliarile, ’yeta yini vusi.” Agu e’yo lipi ’bani ece ’dia ri a’di i ya?

Yehova Mungu ni ’ba e’yo lipi amboru ndepi ni ri i. Te, fe azi e’yo lizuri agu azi ndu ni dri. ’Yeta 17:31 ni ’yo risi, ’ba ti pele Paulo kini Mungu “pe o’du alu erini ngazu ’ba wudrikurua ’diyi ma e’yo lizu onyi alia, ’ba nde erini pele azi ndesirisi.” Agu ’bani pele E’yo lizu ’diri Yesu Kristo engapi dra ma alea risi ’bo ri’i. (Yohana 5:22) Te di, O’du E’yo Lizani ’diri di nga i e’do a’du ngari ya? Eri nga sawa ’du ngopi ya?

Buku E’yo Eceza niri e’da kini O’du E’yo Lizaniri nga i e’do a’di Hari-Magedoni nisi, ’bani ngazu otuta Sitani ni ri ma dri jazu ’bo ri ma vutia.* (E’yo Eceza 16:14, 16; 19:19-20:3) Hari-Magedoni ma vutia, Sitani pi orindi onzi erini ’diyi pie dria ’ba nga eyi ’be arujoa ’bile asikokoruri ma alia eli alifu alu. Sawa ’da ma alia ’ba 144,000 ngapi tupi ’bua ’diyi nga “opi nya Kristo be eli alifu alu.” (E’yo Eceza 14:1-3; 20:1-4; ’Ba Rumia ’Diyi 8:17) Adaru O’du E’yo Lizaniri ovuni lu mbele mbele sawa 24 ’dini ku. Eri nga eli ’du alifu alu.

Eli alifu alu ’da ma alea, Yesu Kristo ni nga “’ba draza pi ma e’yo li ’ba idriru ’diyi be.” (2 Timoteo 4:1) “’Ba idriru ’diyi” nga ovu “’ba ongulumuru amboru” eyi pa pi Hari-Magedoni ma alea risi ra ’diyi ki. (E’yo Eceza 7:9-17) ’Ba ti pele Yohana ne vini “’ba draza yi…pa soria oguŋa e’yo liza ni ma drilia.” Ekile ndra Yesuni azile rile, “’ba dria ovupi nyadria ’diyi nga o’duko [Kristoni] eri ra, yi di nga efu ra,” kaniku enga ra. (Yohana 5:28, 29; ’Yeta 24:15) ’Ba di nga ’ba woro ma e’yo li ngoni ngoni ya?

Ka ovu afa ndreza Yohana ni ndrele risi, “buku yi ovu zizaru,” azini “’ba li ’ba odraza ’diyi ma e’yo afa ovupi sizaru buku ’diyi ma alea risi ’yeta yini vusi.” Afa ovupi sizaru buku ’diyi ma aleari ’ba yi ma ’yeza drio riki ya? Yo, e’yo liza ngani ovu ’yeta ’ba yini drio de nga draki ku ’diyi ki si ku. Ama di ’dari ni ngoni ru ya? Biblia kini: “’Ba drapi ini rari, tru eri e’yo onzi vusi ’bo.” (’Ba Rumia ’diyi 6:7) ’Ba ’bani nga enga ’diyi nga ovu ezata koko, kaniku ezata eyini oko ’diyi nga ovu wuzaru. Ifini kini Buku ’diyi nga ovu azita Munguni o’di ni ki pie. Ecozu o’azu ’dani ’dani, le ’ba dria eyi papi Hari-Magedoni ma alea risi ’diyi pi ’ba ’bani nga enga ’diyi pie woro, ma obiki azita Munguni ma vuti ki azi Yehova ni nga mu eji eli alifu alu ’da ma alea ’diyi pie dria. Ani e’yo ’disi, ’ba nga e’yo li ’ba alu alu ma dria ’yeta eyini eli alifu alu ’diyi ma alearisi.

O’du E’yo Lizani ’diyi ma alea ’ba bilioni bilioni yi di nga drile ba isu e’yo onizu asisile Munguniri ma dria azini e’yo erini lele ri ’yezu beni. ’Di ma ifi di kini imbata amboru ni nga pari ’du ra. Adaru, “’ba ovupi angu wudrikuru ma alia ’diyi, yi e’yo onyiru oni ra.” (Isaya 26:9) Te, ovuni kini ’ba woro ni nga e’yo Munguni leleri ma vuti obi ’dini ku. Isaya 26:10 kini: “Ka asi ndriza ece ’ba azi onzi ’yepiri vu ti, eri ngani onyi oni ku; ka tro ri angu e’yo kililirunia ti, eri nga azi onzi ’ye, eri ngani diza Yehovani ndre ku.” ’Ba onzi ’diyi nga ovu drijazaru ’dani ’dani O’du E’yo liza niri si.—Isaya 65:20.

O’du E’yo Lizaniri ni i deria, ’ba dria papiru ra ’diyi “nga fi idri ma alea” ezata koko. (E’yo Eceza 20:5) O’du E’yo Lizaniri di nga fe ’ba ada ni eca kililiru dika ekile ndra oko rile. (1 ’Ba Korintoa ’Diyi 15:24-28) Vutinia obeta asizuri di nga pari ’du. ’Ba nga Sitani ni ofu arujoa risi kuzu erini ecozu ’ba obezu dika asizu. (E’yo Eceza 20:3, 7-10) ’Ba eri ma ti eripi ku ’diyi di nga ayiko Biblia ni e’yo ni azi ’diri isu: “’Ba onyiru ’diyi nga angu nya awitaru, yi nga adri alenia ’dani ’dani.” (Zaburi 37:29) Ada, O’du E’yo Lizaniri nga ovu tusu coza ’ba woro asi adaru be ’diyi ni!


*  E’yo onizu Hari-Magedoni ma dria, mi ne buku ’Ba Yehova ma E’yo Eti Nzepi ’Diyi pini gba Insight on the Scriptures, Volume 1, peji 594-5, 1037-8, azini capita 20 buku Worship the Only True God driri.

← Mi ne angu ’bani capita e’dazuri