Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 116: Ama Ecoki O’a ’Dani ’Dani Ngoni Ru

A’diko 116: Ama Ecoki O’a ’Dani ’Dani Ngoni Ru

MI ECO afa zamva wera di ni la i ma agyi pie ri a’du’niari lu ra ya? Ee, eri buku ’diri la—Ma Buku A’diko Biblia ma Alea ’Diyi Niri. Eyi vini e’yo va mini la ’diri la—“Ama Ecoki O’a ’Dani ’Dani Ngoni Ru.”

Agupiamva

Mi ni eyi ki a’du e’yo oniari ra ya? Okorisi le ama ma oni e’yo Yehova pi ma dria Mvi erini Yesu be amani ecozu o’azu ’dani ’dani. Biblia ’yo kini: ‘Geri ama ni ecozu idri ’dani ’dani ri ’di. E’yo onizu Mungu alu a’dule adari ma dria azini mvi erini ti epele nyakua Yesu Kristo be.’

Ama ecoki e’yo oni Yehova Mungu ma dria azini Mvi erini Yesu be ngoni ngoni ya? Geri aluzuri mini ecozu Ma Buku A’diko Biblia ma Alea ’Diyi Niri lazu e’doza nia kpere asiza nia. Nze e’yo Yehova pi ma dria Yesu be tu, ’dini ku ya? Dika nze vini e’yo eyini ’ye ’bo azini eyini nga mu ’ye ’diyi pi ma dria indi. Te le e’yo amani ’ye ’diyi ma aga amani buku ’di lazu a’dule ri ra.

Biblia

Mi eco buku azi anzi ’diyi ma ageyia nyakua ’dari ne ra ya.? ’Di Biblia ni. Mi fe ’ba azi ma la mini a’diko diki Biblia ma alea. Biblia olu ama dri e’yo dria Yehova ni le ama ma ’ye amani ecozu idri ’dani ’dani ri isuzu beni ’diyi ki ni. Ani e’yo ’disi le ama ma oniki e’yo Biblia alea ’diyi sawa driasi.

Te e’yo onizu Yehova Mungu pi ma dria Yesu Kristo beri cani ku. Ama eco ki nita ’ba ’diyi pi ma dria azini imbata eyini isu angiri ra te ama ecoki sawa azinisi idri ’dani ’dani ri isu ku. Mi ni afa azi le ama ma ’ye ra ri a’du niari ra ya?

Le ama ma obiki e’yo amani oni ’bo ’diyi ma vuti. Mi eco Yudasi Isikariote ni ega ra ya? Eri ndra ba 12 Yesu ni opele i ma vuti ’bipi ’diyi ma azi. Yudasi ni ndra e’yo Yehova pi ma dria Yesu be angiri. Te a’du e’yo ’ye i eri be ni ya? Sawa were ma vutia, eca afimania ru ani nga Yesu ma o’di nya silingi 30 si. E’yo ’disi Yudasi ngani idri ’dani ’dani ri isu ku.

Mi eco Gehazi ama ni ndra e’yo onizu drinia A’diko 69 ’ari ega ra ya? Le ndra bongo azini silingi ovupi i niru ku ’di ki ’du ini. Ani nga inzo nze afa nde ’diyi o’duzu beni. Te Yehova fe eri dri panga ra. E’yo ’disi Yehova ni nga ama ni panga fe ecekokoru aka azita erini ma vuti obi ku ria.

Te ba azi ngapi Yehova dri a’ita si ’diyi ki kakau. Ama le ki o’a eyi le, ’dini ku ya? Karile oderu Samueli fe eceta kililiru amani eco vuti ni bi ra ri ni. Ekile amani ndra ne A’diko 55 rile, eri ma eli ndra su kaniku towi erini e’dozu azi ngazu Yehova dri hema ti ecizani ria. E’yo ’disi mi ka tro ovu oderu ti ,mi eco azi nga Yehova dri ra.

Ani ra ada, ’ba amani vuti biri Yesu Kristo i. Ndra erini ovuzu werea ru ekile A’diko 87 ni e’da rile, eri ndra e’yo olu ’ba yini hekalua ima Ati ’buari ma dria. Ama ma obiki eceta erini ma vuti. Le ama ma oluki e’yo ata amani ovupi uru tu Yehova Mungu ma dria Mvi erini Yesu Kristo be ’ba dria amani dri fuzu yi pie ’diyi ni ecekokoru. Aka e’yo ’diyi ’ye dria ra, ama nga idri ’dani ’dani paradisi o’diru Mungu ni nyakua ri ­nya ­ra.

Yohana 17:3; Zaburi 145:1-21.



Zita ki

  • Ama ka ki le o’a idri ru ’dani ’dani ra, le ama ma oniki e’yo a’du ma dria ya?
  • Ekile amani ne e’da ma alea zamva werea ’dapi ni ye ima agyika pie ri le, ama ecoki e’yo oni Yehova pi ma dria Yesu be ngoni ngoni ya?
  • Buku azi mini ne e’da ma alea ri ngo i, le mi ma la eri ra a’du e’yo si ya?
  • Akaki le idri ’dani ’dani ri isu ra, afa azi le ama ma ’ye ’yeta si e’yo oniza Yehova pi ma dria Yesu be ri ngo i?
  • Imbata amani oni A’diko 69 ri ngoni?
  • Eceta kilili ru Samueli ni A’diko 55 ri e’da amani a’du ma e’yo ya?
  • Ama ecoki eceta Yesu ni ma vuti obi ngoni ngoni, akaki obi ra, eri nga ama aza ko a’du afa ’yezu ewu drusi ri ma alea ya?

Zita o’bazaru ’diyi ki

  • Mi la Yohana 17:3.

    E’yo siza e’daki amani Yehova pi nizu Yesu beri ma ifi aga ’bani ’yeta eyini egazu ’diyi ra ngoni ngoni ya? (Mat. 7:​21; Yak. 2:​18-​20; 1 Yoh. 2:​17)

  • Mi la Zaburi 145:​1-​21.

    Asisile azi kakau ru ama ni Yehova ma ru icuzu ’diyi ngoki ya? (Zab. 145:​8-​11; Ece. 4:​11)

    Yehova ni “muke ’ba dria vu” ngoni ngoni, ani le ’di ma isi di ama eri vu inyia ngoni ru ya? (Zab. 145:9; Mat. 5:​43-​45)

    E’yo Yehova ni dria ka adri asi ama ni ma alea ci, ’diri nga fe ama a’du afa ’ye ya? (Zab. 119:171, 172, 175; 145:11, 12, 21)