Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 112: Oguru Aridi ’I pari A’wiru Miri Alea ri Dria

A’diko 112: Oguru Aridi ’I pari A’wiru Miri Alea ri Dria

MI NE, oguru aridi i ’bo! Onyo i nyingiriki! Mi ne ’ba o’de pi iyi alea ’diyi ’bo ya? Azi ’diyi efuria amve. Pauloni da indi ya? Ama ma isu nga a’du e’yo ’ye i erima rua ni’ari.

’Ba papiru oguru andipiru ri ma alea ’diyi

Le mi ega ra kini, eli iri Paulo ebi ovu arujoa Kaisaria ’dale. Paulo i azini ’ba azi arujoa ’diyi pie ’ba nga eyi ’ba oguru alea eyi jizu Rumia. Yini caria angu a’wiru ’yi alia Kirete ma ageyi a ’bo ria, oli ambo ru nga lira. Oli nde ni ovuzu okporu ri si eco ki ni oguru ti ojizu kililiru ku. Ecoki ni vini etu ne ku azini bi’bio yi ne ini si ku indi. Asizu ’ba dria oguru alea ’diyi nzeki asi idri eyini ma dria risi ra.

Paulo nga di pa so uru si ’yo eyi tia: ‘Ba azi aluni cani dra ku; oguru ni kani nga i andi ni. Aje inisi malaika Munguni emu ma vu ’yo kini: “Mi ru ku Paulo! Le mi ma so pa opi Rumi ni Kaisari ma drilea ra. Ani e’yo disi Mungu ni nga ’ba dria oguru alea ’diyi opa ra.” ’

O’du 14 zu oli ni lizu ’bori ma inisi sawa azia, ’ba ndria oguru alea ’diyi nga ne kini ’yi ma ali ’ba i omvi ’bo! Te eyi ni o’azu urisi yi kazu eyi asizu oni madria kuru risi, nga ki aya nyangaru oguru ni pa so zu ani ri ’be ’yi alea. Drusi o’bitisi ’dini nga angu a’wi’ru eyini ecozu tuzu drinia ra ’dinile ri ne ani otuki yi mu alenia ’dale.

Yini caria enyia ogogo, oguru nga i si cinya yi alea ri ma rua dika ari di ci. Oli nga di oguru nde andi ’da nyingiriki. Asikari ma drile nga di ’yo eyi tia: ‘’Ba dria eco pi ’yi wepi ra ’diyi ma be yi ’yi alea ’yi wezu kpere angu a’wiru ma dria. ’Ba azi ecopi ku ’diyi ma ’be yi ecozu oguru ma nyiri eyi onyopi di bizu eyi ni vini ecozu zozu ’dale indi.’ ’Ba dria nga di ’ye ’dinile. E’yo disi ’ba 276 oguru nde ma alea ’diyi opaki yi dria akile ndra malaika ni azile rile.

Angu nde i lipi a’wiru miri alea di ma ru Melita i. ’Ba o’api angu nde di ma alea ’diyi asi ndri saaru ani mbaki ’ba dria efupi oguru alea ’diyi ma ta kililiru. Angu mile ka ’ba eca muke ’bo, ’ba ba Paulo ni oguru azini ma alea eri jizu Rumia.

’Yeta 27:1-44; 28:1-14.



Zita ki

  • A’du ma e’yo ’ye i o’bo Paulo ni ovuzu alenia ri be ni eyini alizu angu a’wiru Kiretea ri ma ageyia si ria?
  • Paulo ’yo ’ba o’bo alea ’diyi ni ngoni ya?
  • O’bo andi i nyiri nyiri ngoni ngoni ya?
  • Asikari ma drile fe azita ngoni, dika ’ba si fuki angu a’wiri ma dria ni ya?
  • Angu a’wiru eyini fuzu drinia ri ma ru ngoni, azini a’du ma e’yo ’ye i Paulo be ni angu ma mile ni i otuzu ’bo ria?

Zita o’bazaru ’diyi ki

  • Mi la ’Yeta 27:​1-​44.

    Akaki e’yo la aci Paulo ni muzu Rumia ri ma dria, ama nga okpo isu asi ’baza amani Biblia ma sita kilili ru ma dria risi ngoni ngoni ya? (’Yeta 27:​16-​19, 27-​32; Luka 1:3; 2 Tim. 3:​16, 17)

  • Mi la ’Yeta 28:​1-​14.

    ’Ba kafiri ru Melitua ’diyi ka ndra “yiki anzutiru ri e’da” Paulo pi ni ’ba azi oguru alea ’diyi pie ra, le e’yo Kristayo ma ’yeki ’yeta si ri ngo i tutu ni geri ngole ri si ya? (’Yeta 28:​1, 2; Ebr. 13:​1, 2; 1 Pet. 4:​9)