Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 102: Yesu ni Idriru

A’diko 102: Yesu ni Idriru

MI NI oku ’di azini ’ba iri ’da a’di piari ra ya? Oku ’di Maria Magadalena, Yesu ma agyi ni. Azini agupi bongo imvera si ’diyi ki malaika ki. Pari ena pi were Maria ni angu nezu alenia ’di i pari ndra ’bani Yesuni sazu drata erini ma vutia ri i. ’Ba pari nde ’di omve nyadri ni. Te sawa ’disi avu ’dia yo! A’di ’du avu nde ni ya? Ama ma ne nga.

Malaika ki e’yo nze Maria Magadelena be

Drata Yesu ni ma vutia, kuhani amboru di ’yo ki Pilato tia kini: ‘Ndra Yesu ni ovuzu idri ru ria, ’yo kini o’du na ma vutia i nga inga ra. Ani e’yo ’disi mi ma fe azita nyadri ageyi tezu kilili ani ’ba eri vuti bipi ’diyi kazu eri ma avu nzezu ’yozu ani kini enga ’ba draza ma eselea risi ’bo ku beni!’ Pilato nga di ’yo kuhani nde ’diyi ma fe asikari yi jizu nyadri ageyi tezu.

Te o’du na Yesu ni drazu ’bori ma vutisi, malaika Yehova ni nga emu o’bitisi drio drio. Nga oni ’bale nyadri tiari gu ra. Asikari o’aki urisi saaru ani ecoki ni mu ku. Asizu nga ki angu ne nyadri ’bule alea, te mi ne, avu ’da yo! Asikari nde ma azi ngaki mu aku amboru ri ma alea ’dale e’yo nde ecezu kuhani yi ni. Mi ni kuhani onzi ’diyi ’ye a’du afa niari ra ya? Feki sende asikari yini ecozu inzo lizu ’yozu kini: ‘Ama ni o’du koria inisi ’ba ti opele ’diyi emuki oguki avu nde ri ra.’

’Di ma vutisi oku Yesu ma agyika ru ni emuki vini nyadri nde andri. O’aki osuta si a’dusiku ni avu nyadria ’da yo! Coti malaika iri ngaki eyi e’da bongo diza ru be. Ziki eyi tia: ‘Emi Yesu ni nda dia a’du e’yo si ya?’ ‘Enga ’ba draza eselea risi ’bo. Imuki lu ’ba erivuti bipi ’diyi ni.’ Oku nde nga ki nzu rua yazasi. Te mi ne eyini nzuria geria, agu azi ni atri yi. Mi ni agu nde ’di a’di i’ari ra ya? Eri Yesu i! ’Yo eyi tia: ‘Emu lu ’ba ma vuti bipi ’diyi ni ’dinile.’

Oku ’diyi ni luzu ’ba Yesu vuti bipi ’diyi ni kini Yesuni idri ru ria ’ba nde ga e’yo di a’izu si. Petero pi Yohana be nga nzu nyadria e’yo ’di nezu eyi ma mile si, te mi ne nyadri a’le mgboru! Petero pini dri dazu Yohana be ’bo ria, Maria Magadalena nga awi vule. ’Diri bani sawa erini malaika iri ’diyi nezu ri ’i.

Mi ni a’du e’yo ’ye i rua Yesu ni be nia ri ra ya? Mungu fe erini avizu te. Mungu engani ndra Yesuni rua erini drazu eri pie ’da be ku. Nga Yesu ni rua o’di orindi ru malaika vile ri fe i. Te fezu ’ba i vuti bipi ’diyi ni a’izu ada i enga ra, eda ndra i rua ’ba ni eco ndre ra ’dini le amani nga oni indo rile.’

Matayo 27:62-66; 28:1-15; Luka 24:1-12; Yohana 20:1-12.



Zita ki

  • Oku e’da ma alea ri a’di i, agupi iri ’di a’dipi ki, azini eyi ngoa ya?
  • Pilato ’yo kuhani ni ma pe asikari ma ti nyadri Yesu vile ri tezu a’du e’yo si ya?
  • Malaika ’ye a’du afa ni o’du nazu drata Yesuni ma vutia ri ma obitisi, te kuhani nga a’du afa ’ye?
  • Oku azini ’diyi ecaki osuta si eyini caria Yesu ma nyadria ria a’du e’yo si ya?
  • Petero pi nzuki Yohana be Yesu ma nyadria a’du e’yo si, azini ngaki a’du afa isu?
  • A’du afa ’ye i Yesu ma avu be ni, azini nga a’du afa ’ye ecezu ’ba i vuti bipi ’diyi ni i curu’do idri ru?

Zita o’bazaru ’diyi ki

  • Mi la Matayo 27:​62-​66 azini 28:​1-​15.

    Yesuni engazu dra ma alea risi ’bo ria, kuhani amboru, ’ba Farasaini, azini ’ba ’wara ru ’diyi ’ye e’yo onzi orindi alatararu ri ma rua ngoni ngoni ya? (Mat. 12:​24, 31, 32; 28:11-​15)

  • Mi la Luka 24:​1-​12.

    E’yo Yesuni engazu dra ma aleari ece geri ngoni le risi Yehova ndre oku yi ’ba e’yo eti nzepi kilili ’diyi ru? (Luka 24:​4, 9, 10; Mat. 28:​1-7)

  • Mi la Yohana 20:​1-​12.

    Akaki e’yo ondriza Biblia ma alea ’diyi ma azi ki va ku, Yohana 20:​8, 9 eco ama aza ko tezu asi e’yere si ngoni ngoni ya? (O’be. 4:​18; Mat. 17:22, 23; Luka 24:​5-8; Yoh. 16:12)