Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 93: Yesu ni Nyaka Fezu Ba Kakau ni Ri

A’diko 93: Yesu ni Nyaka Fezu Ba Kakau ni Ri

E’YO azi onzi ni ’ye i ’dia ni. Yohana Baputizi fepiri ’ba ’di eri ra. Adusiku ni oku opi vile Herodiasi leni ndra eri ku. Ani nga di ndra fe opi ma li Yohana ma dri te.

Yesu ni e’yo ’di erizu ’boria, o’a candi amboru si. Nga mu pari ’ba kokoru ria a’dule. Te ’ba ngaki eri ma vuti bi ’dale. Yesu ni o’bi ongulumuru ’diyi neria, o’a vini candisi indi. Nga di e’yo nze eyini suru Munguni ma dria azini ati ’ba azoru eyi ni ’diyi indi.

Ondre ’dasi ba eri vuti bipi ’diyi ngaki emu eri vu ’yoki kini: ‘Pari ’dori roko ru, etu ’de vini ’bo indi. Mi pe ’ba ongulumuru ’diyi ma ti mvizu yi ma nda nyaka je aku were were ’diyi ma aleasi beni.’

Yesu ni nyaka fe o’bi ongulumu ni

Te Yesu nga ’yo eyi tia kini: ‘Le ma mviki ku, emi fe nyaka eyi dri emi i.’ Nga ti oja Filipo vu zi kini: ‘Ama eco nyaka je fezu ba ’diyi ni ngoa ya?’

Filipo nga omvi: ‘Eri nga aje nya angiri tu amani ecozu nyaka jezu fezu ’ba ’diyi ni dria yini ngazu apizu beni.’ Anderia nga ’yo: ‘Karileo nyaka ojipi amani ’di dri mukati towi azini e’bi iri be ’doa ci te nga ni ca ’ba dria ni ku.’

Yesu nga ’yo eyi tia: ‘Emi lu ki ’ba ’diyi ma ri va ase dria.’ Nga Mungu zi nyaka nde ma dria, vuti nia awa nyaka nde nyiri nyiri. Nga di fe ’ba ti opele ’diyi dri eyi ni awazu ’ba dria dri beni. Agupi yi ndra ’da 5,000 drinia oku yi pie anzi nyiri pie indi. Eyi dria nya nyaka kpere eyi ni apizu. ’Ba ti opele ’diyi ni nyaka ma joloko acepi ’diyi okuria, isu ki ace ogayi 12!

Yesu nga ’di fe ’ba ini imbale ’diyi ni fizu oguru alea muzu miri Galilia ria. Ini ’dasi, oli ambo ru nga li ani oya oguru dole ’dale. ’Ba erini imbale ’diyi ma asi nga oti saaru. Angu ni ’baria ceria tra ’bo, ne ki agu azi ni aciria ’yi driasi. Ngaki otre urisi a’dusiku nini ’da a’du afa nia ri ku.

Yesu nga ’yo eyi tia: ‘Emi ’ye urisi ku, ’do ma i.’ Te eyi a’i ni ku. Ani Petero nga ’yo kini: ‘Opi ’di ka adri mi i ada, mi fe ma ma mu mivu ’dele yi driasi.’ Yesu nga omvi: ‘Mi emu!’ Petero nga isi oguru alea risi muzu ’yi driasi! Te uri nga fi eri ma asia ani e’do ’de yi etia, te Yesu nga eri pa ra.

’Da ma vutia Yesu nga vini nyaka fe ’ba alifu alifu dri dika. ’Dia ria, fe eyini mukati aziri piki e’bi were be. Te dika nyaka nde ’ba driani ambamba. E’yo Yesu ni ’ba ma ageyi tezu ’di ovuni e’yo azi orodri ru ni ku ya? Ani e’yo ’disi ka nga eca opi ru suru Mungu ni ma alea ’bo, ama asi ngani oti e’yo azini si alu ni ku!

Matayo 14:1-32; 15:29-38; Yohana 6:1-21.



Zita ki

  • E’yo onzi i ’yepi Yohana Baputizimu feperi ma rua ri ngoni, azini fe Yesuni o’a ani ngoni?
  • Yesu fe nyaka ’ba ongulumuru ima vuti bipi ’diyi dri ngoni ngoni, azini nyaka asipi ri ngopi ya?
  • ’Ba Yesu ma vuti bipi ’diyi o’aki urisi inisi a’du e’yo si, azini a’du afa ’ye i Petero be ni ya?
  • Yesu fe nyaka ’ba alifu alifu dri pale iri risi ngoni ngoni ya?
  • Yesu ka nga angu nya Opi ru suru Mungu nia,e’yo dria ni nga ovu onyi ru a’du ma eyo si ya?

Zita o’bazaru ’diyi ki

  • Mi la Matayo 14:​1-​32.

    Matayo 14:​23-​32 ece e’yo angiri adriza Petero ni ma dria ngoni ngoni ya?

    E’yo siza ece amani Petero nga zo ra dika oja adriza ini e’yo ’yezu rua yaza si ri goni ngoni? (Mat. 14:27-​30; Yoh. 18:10; 21:7; ’Yeta 2:14, 37-40; 1 Pet. 5:​6, 10)

  • Mi la Matayo 15:​29-​38.

    Yesu i’da ruta afa feza ima Ati ni fe ini rua si ’diyi ma dria ngoni ru ya? (Mat. 15:37; Yoh. 6:​12; Kol. 3:​15)

  • Mi la Yohana 6:​1-​21.

    ’Ba Kristayo ru curu’do ’diyi eco Yesu ma pamvu obi e’yo gamete ni si ngoni ngoni? (Yoh. 6:​15; Mat. 22:21; Rum. 12:2; 13:​1-4)