Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 82: Modekayi pi Esiteri Be

A’diko 82: Modekayi pi Esiteri Be

AMA ma da dri eli were vule sawa ndra Ezirani nga muzu Yerusalemua kuria. Modekayi pi Esiteri be ’yi ki anzi Israelini orodri ru suru Parisia ni ma alea niki. Esiteri ni oku opi vileri ri i, eri ma andripuru vile mva Modekayi ni ndra ’ba irizu opi ma vutisi opi nyaza ’da ma aleari i. Ama ma ne nga di eca ngoni ngoni’ari.

Esiteri ma tipika odra ki isu dere eri nga wereru, ani Modekayi nga di eri izo ni. Ahasure, opi Parisia ni ri ma pari ci aku ambo Susa ni ma alea, dika Modekayi ni ati’bo erini ’da ni. O’du alu opi nga oku ndu ’du i dri a’dusikuni oku eri vile okori ga eri ruko si. Mi ni oku erini ’du ri ra ya? Ee, zamva Esiteri ndripi saaru ’dinile ri.

A’oko nya Hamani i Modekayi ni

Mi ne agu afube ’ba ni kumuti osizu drilenia ’di ri ra ya? ’Di ri Hamani i. Eri ’ba azi amboru sura Parisia ni ma aleani. Hamani le vini Modekayi mini ne ripi va di ma si kumuti ima drilea indi. Te Modekayi ga si. Nira kini ovuni kililiru ku kumuti osizu ’ba onzi ’dileri ma drilea ku. ’Di fe a’oko nya Hamani ni saaru. Ani nga di e’yo ’ye ’dinile.

Hamani nga di inzo nze Israeli ma dria opi ma bilea. Nga ’yo kini: ‘Israeli ki ’ba onzi azita mini ma vuti obipi ku riki. Le ’ba ma o’di eyi ra.’ Opi Ahasure nini oku i vile Esiteri ni Israelio ni ri ku. Nga di e’yo eri Hamani ma tia, ani ’ba ’ba azita ecozu anzi Isrealini ki o’dizu dria o’du alu.

Modekayi ni azita ’diri erizu ’boria, o’a candisi. Nga di o’duko fe Esiteri ni kini: ‘Mi ma lu opi ni ma pa ama.’ Azita Parisia niri leni ’bani muzu opi vu ’dini ni ku pelu eri mi omve ni ka. Te Esiteri mu opi vu isu dere ’ba omve eri ku. Opi ’ba kali ini meleru ri eri ma drilea ku, ifini le ’ba ma ’di eri. Esiteri nga di opi ni omve Hamani be emuzu nyaka nyazu i vile joa. Opi nga di Esiteri ni zi i ma fe erini drileba ngo i’ari si. Esiteri nga ’yo opi ma tia kini, ma nga lu mini drusi mi ka nga emu nyaka nya ’dia ma vile joa Hamani be ria.

Etu opi pini dri edazu nyaka nyazu Esiteri vile joa Hamani berisi, Esiteri nga ’yo opi tia kini: ‘Ma i ’ba ma vule ’diyi pie, ama nga dri ja ra.’ A’oko nya opi ni saaru. Nga zi: ‘A’di otu e’yo onzikanyaru ’diri ni ya?’

Esiteri nga omvi: ‘Agu onzi ari’bo Hamani i!’

Opi ma okuni Esiteri i Hamani i to

A’oko nga opi ni nya dika dika. Fe ’ba ’di Hamani ni ra. ’Da ma vutia, opi ’ba Modekayi ni ’ba irizu opi nyaza i ni ri ma alea ri ru. Modekayi nga di ne kini, le ’ba ma ’ba azita o’diru anzi Israelini ngazu eyi ma idri opazu beni. Modekayi ni ovuzu orodri rurisi, ’ba kakau koki Israeli ma aza eyi opazu ari’bo eyini ma dria risi ra.

Buku Esiteri ni.



Zita ki

  • Modekayi pi Esteri be a’di pi ya?
  • Opi Ahasure le oku o’di ru ni a’du e’yo si, azini nga a’dini pe i?
  • Hamani ni a’di i, azini a’du afa fe erini o’azu a’oko si ni ya?
  • ’Ba ’ba azita ngoni le ri, Esiteri nga a’du afa ’ye eri ni e’yo ’diri erizu Moridekai vu ’bo risi?
  • A’du afa ye i Hamani be ni, azini a’du afa ye i Modekayi be ni ya?
  • ’Ba Israelini ’diyi opa eyi ari’ba dria risi ngoni ngoni ya?

Zita o’bazaru ’diyi ki

  • Mi la Esiteri 2:​12-​18.

    Esiteri ece orodri ’bani o’azu “asi ndriza si azini e’yere ri” ngoni ngoni ya? (Esi. 2:​15; 1 Pet. 3:​1-5)

  • Mi la Esiteri 4:​1-​17.

    ’Bani drile ba fezu Esiteri ni pa sozu inzita adaru si rile, drileba andrusi ’bani fe amani ecozu ama a’ita azini o’ata kilili ru ri edazu Yehova niri e’da ngoni ngoni ya? (Esi. 4:​13, 14; Mat. 5:​14-​16; 24:14)

  • Mi la Esiteri 7:​1-6.

    Geri ngoni le ri si, ’ba kakau Yehovani ’diyi fe eyi ma ngulupi inzamatara ekile ndra Esiteri ni ’ye le ri le ngoni ngoni ya? (Esi. 7:4; Mat. 10:16-​22; 1 Pet. 2:​12)