Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 81: Asi ’Baza Azakoma Munguni ma Dria Ri

A’diko 81: Asi ’Baza Azakoma Munguni ma Dria Ri

’BA OGOGO 50,000 mviki engazu Babilonia risi muzu Yerusalemua ni. Te eyini cazu Yerusalemua ’boria, isuki pari nde ovu ezazaru tu. ’Ba azi o’ani ’da ku. Ani anzi Israelini e’doki di ndra afa ’da ’diyi si woro o’diru.

Afa ndra eyini si oko ’diyi ma eseleari alitara edeta edezuri. ’Diri ndra pari eyini anyapa evezu, kaniku feta fezu Yehova dri ri i. Imba ni alizu were ’bo ri ma vutia, anzi Israelini e’doki ’di hekalu si. Te ari’bo o’api enyia ogogo ’diyi leni ndra anzi Israelini ma si hekalu nde ri ku. Ani e’doki ’di eyi egbe eyini ecozu azi nde kuzu ani beni. Asizu ari’bo nde ’di osoki opi Parisia ni ma bile erini ecozu azita ’bazu azi nde atrizu beni.

Eli kakau ngaki ali. Ca di eli 17 e’dozu sawa ndra anzi Israelini ’diyi ni egozu Babilonia risi ’bori ma vutia. Yehova nga di nabi Hagayi pi ma ti pe nabi Zakaria be muzu luzu anzi Israelini ’diyi ni jo siza e’dozu dika. ’Ba nde ’diyi ’ba asi eyi ni azakoma Munguni ma dria, ani obiki eyo nabi nderi ni ’ye ’di ma vuti ra. E’doki azi nde nga o’diru tro ndra azita ni ’yozu kini le eyi ma nga azi nde ku ra ti.

Ani ’ba ’wara Parisia ni aluni ma azi omvele Tatenayi i ri nga bemu anzi Israelini zizu a’di fe azita eyini hekalu sizu ni ya ri si. Anzi Israelini nga e’yo omvi eri ma tia kini ama ni ndra ovuria Babilonia opi Kuro ’yo ndra ama tia kini: ‘Emi mviki di sawa ’disi Yerusalemua dika emi siki hekalu Yehova Mungu emini dri.’

Tetanayi nga waraga fe Babilonia zizu kani opi Kuro ’yo ’dini ra ya ri onizu tro ndra eri ni drazu ’bo ti. ’Da ma vutia indikindi waraga nga eca opi Parisia ri vu. ’Yo kini opi Kuro fe ndra azita ’da ra. Ani opi nga di waraga si: ‘Emi feki anzi Israelini ma siki hekalu Mungu eyini dri. Dika eko ki eyi ma aza indi.’ Ani eli su ma vutia, azi hekaluni ri de i ra dika anzi Israelini o’aki ayikosi.

Eli kakau ru ali vini indi. Sawa ’disi eli ali di 48 hekalu siza ma vutia. ’Ba Yerusalemua ’diyi ecaki alioru tu, fe ani aku ambo nderi azini hekalu alenia ’da pie enaki ni ndrizaru ku. Babilonia ’dale, Ezira nga e’yo ’bani lezu hekalu nde otuzuri eri ra. Mi ni ’ye a’du ma e’yo ni’ari ra ya?

Ezira mu opi Parisia ni Atasakise vu, ani eri ni ovuzu opi muke ni risi, fe feta kakauru ’bani ecozu jizu Yerusalemua. Ezira nga anzi Israelini Babilonia ’diyi ki zi i ma aza kozu lonyi ’diyi jizu Yerusalemua. ’Ba ogogo 6,000 ’dipi a’iki muzu eri be ra. Ovuki mele azini dahabu kakau ru be azini afa ovupi orodri ru tu ’dinile ’diyi pie.

Te Ezira ovu urisi, a’dusikuni ’ba onzi ’dinile ’diyi kakau geria. ’Ba ’diyi ecoki ndra eyi ma mele pi o’du dahabu pie ra dika ecoki ndra eyi o’di ra. Ani Ezira nga di ndra ’ba ’di omve tualu ekile eda ma alea ’dile. Ani ngaki di Yehova ni zi ecozu eyi ma azokozu aci izuru muzu Yerusalemua ’di ma alea.

Ezira ni Mungu ziria ’ba ki pie

Ani Yehova te eyi ma ageyi ra. Yini muzu imba su ’diniri ma vutia, nga ki di ca Yerusalemua e’yo kokoru. ’Diri e’da di kini Yehova teni ’ba asi ’bapi i ma dria di ma ageyi ku ’dini ya?

Ezira caputa 2 kpere 8.



Zita ki

  • ’Ba mupi aci izuru muzu Yerusalemua ri ma alea ’diyi ki si, te esuki a’du afa ni eyini caria ’dale ’bo ria?
  • Anzi Israelini ’diyi ni caria ’bo, e’doki a’du si, te ari’bo ngaki a’du ’ye eyi vu ya?
  • Hagai pi Zakaria be a’di pi ki, dika ’yoki ’ba eyini ngoni ya?
  • Tetanayi si waraga Babulonia a’du e’yo si ya, dika esu omvita ngoni?
  • Ezira ni e’yo onizu hekalu Munguni ma siza ma dria ’bo ria, nga a’du afa ’ye ya?
  • E’da ma alea ’dia, Ezira ni Mungu zi a’du e’yo si ya, dika ’di imba ama a’du ’yezu?

Zita o’bazaru ’diyi ki

  • Mi la Ezira 3:​1-​13.

    Aka ki ama esu pari okuta ’ba Munguni ’diyi ni eyi okuzu ri ni ovuzu yoria, le ama mu drile a’du afa ’yezu ya? (Ezr. 3:​3, 6; ’Yeta 17:​16, 17; Ebr. 13:15)

  • Mi la Ezira 4:​1-7.

    Eceta Zerubabeli ni fe ’ba Yehovani ’diyi ni ti ecita a’ita ndundu ni be ri ma dria ri ngoni ya? (Efu. 34:12; 1 Kor. 15:33; 2 Kor. 6:​14-​17)

  • Mi la Ezira 5:​1-5, 17 azini 6:​1-​22.

    ’Ba azi jo sizani onzopi ’diyi awiki ni jo siza atri ku a’du eyo si ya? (Ezr. 5:5; Isa. 54:17)

    Eceta mbaza Yahudi ru ’diyi ni ri eco okpo fe Kristayo mbaza ru orindisi ’diyi ni azakoma Yehova ni ri zizu sawa inzamatara vurisi ngoni ngoni ya? (Ezr. 6:​14; Zab. 32:​8; Rum. 8:​31; Yak. 1:5)

  • Mi la Ezira 8:​21-​23, 28-​36.

    De nga a’yoki ni e’yo azini ’yeta si ku, eceta Ezira ni kilili le ama ma obi vutini ra ri ngo i ya? (Ezr. 8:​23; Zab. 127:1; O’be. 10:22; Yak. 4:​13-​15)