Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 78: E’yo Sile Abi Rua Ri

A’diko 78: E’yo Sile Abi Rua Ri
Dri ni afa sieia abi rua

A’DU ma eyoni i ’ye dia ni ya? Ba ki omu amboru ni ma alea. Opi Babuloni ni omve ba ’wara alifu alu. Eyiki kopo meleru dika dahaburu azini bakule ndra yini o’du hekalu Yehovani Yerusalemua ’diyi ki ayu. Te coti, afa azini ena ekile drianzi ’ba nile e’do afa si abi rua. ’Ba dria eca urisi.

Balisaza ni ’ba ’wara erini pie

Belisaza, mvi Nebukadineza niri i dere opi ru ni. Nga otre o’duko orusi kini ’ba ma eji ’ba onduaru i vile ’diyi ki dria joa. Nga yo kini: ‘Ba ci ecopi e’yo siza abi ma rua ’di lapi dika efini ecepi mani ri, ma eri dri afe feza kakau ru fe dika eri nga eca ’ba nazu ri ru opi ma vutisi suru ’di ma alia.’ Te ’ba onduaru ’diyi ma azi alu ecopi e’yo siza ’di lapi ra kaniku efini ecepi ra ni yo.

Opi ma andri nga otreta ’ba yini eri dika nga di efi joa. Nga yo opi tia kini: ‘Mi ma eca urisi ku. Agu azini ci suru mivule ’di ma alea adrou alatararu ’diyi nipi ni ci. Ndra mi a’bi Nebukadineza ni ovuzu opiru ria ’ba ndra eri drile ’ba onduaru ’diyi ni. Eri ma ru Danieli i. Mi pe ’ba ma ti erivu, eri nga mi dri e’yo ’diri ma efi ngoniari ece ra.’

Coti ’ba eji Danieli ni joa. Erini feta fele i dri ’diyi gazu siri ma vutia, Danieli nga asisile ndra Yehovani Nebukadineza Balisaza ma a’bi ni nzezu opiru te risi ri ece. Danieli nga ’yo kini: ‘Eri ndra afuru Yehova nga eri dri panga fe ra.’

Danieli nga ’yo Belisaza tia kini: ‘Te mi i mi ni eyo dria ndra eyi ’yepe mi a’bi Nebukadineza ma ruatia ’diyi dria ra, te kiri mi afusi erile. Mi o’du kopo azini bakule hekalu Yehovani ma aleasi mi i’do afa mvuza mvu ani. Mi ru mungu idele onisi azini patisi ’diyi, mi nini o’bapi i ku. Da i asisile Munguni fezu dri si e’yo ’di i ri.

Danieli nga ’yo: ‘E’yo ’bani sileri ’dini, MENE, MENE, TEKELI, UFARISINI.’

‘MENE ma ifi Mungu la opi nyaza mini ma kalafe ’bo azini asiza ni ’dipi. TEKELI ma ifi o’bi mi afa o’bizasi ’bo, te nziza mini cani ku. UFARISINI ma ifi awa suru mini ri ’ba Midia ’di dri ’ba Parisia ’diyi be ’bo.’

De nga kiri Danieli ni e’yo nzeria, ’ba Media ni pi ’ba Parisia ni be efiki e’dozu a’di ’dizu Babulonia. Ngaki aku ambo nderi ce kuru dika ’diki opi Beliseza ni ’da coti. E’yo siza abi ma ruatia ri ’ye i ini ’dasi coti! Te a’du ma e’yo ni di nga i ’ye ’ba Israelini be sawa ’disi ni ya? Ama nga ’da i ne mbeleru, te okokelerisi ama ma ne nga a’du ma e’yo ’ye i Danieli be niari.

Danieli 5:1-31.



Zita ki

  • Opi Babulonia ri ni omu amboru edezu dika erini kopo azini bakule ndra eyini o’du hekalu Yehova ni Yerusalimua ’diyi ayuzu ria, a’du ma e’yo ’ye i ni ya?
  • Balisaza nga ’yo ’ba ini onduaru ’diyi ni ngoni, te afa eyini eco ’yeku ri ngo i ya?
  • Opi ma andri nga di lu erini ma ’ye a’du afa ni ya?
  • E’yo Danieli ni lu opi ni ri si ria, asisile Mungu ni fezu dri ma si afa abi rua ri ngoni ya?
  • Danieli ece e’yo ’bani si abi rua ri ma efi ngoni ya?
  • Danieli ni nga e’yo nzezu ria, a’du ma e’yo ’ye i ni ya?

Zita o’bazaru ’diyi ki

  • Mi la Danieli 5:​1-​31.

    Mi fe esele coza uri Mungu ni urizu ri pi ma eselea uri Belisaza ni afa siza abi rua ri nezu ri be ri. (Dan. 5:​6, 7; Zab. 19:9; Rum. 8:​35-​39)

    Danieli e’da asi okpo erini e’yo nzeria Belisaza be azini omu erini inzile inzi ’diyi pie ria ngoni ni ya? (Dan. 5:​17, 18, 22, 26-​28; ’Yeta 4:​29)

    Danieli caputa 5 e’da Yehova ni opko e’iru wudrikuru dria ma drilea ngoni ngoni ya? (Dan. 4:​17, 25; 5:​21)