Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 77: Osikini Kumuti Va Ku

A’diko 77: Osikini Kumuti Va Ku

MI EGA mi eri eyo anzi na oderu ’diyi ma dria ra ya? Ee, eyiki agyi Danieli ni ndra gaba nyaka ovupi yini kililiru ku ri nyakosi ’diyi. Ba Babiloni ni omveki eyi Sadaraka i, Mesaka i azini Abedinego i. Te mi ne nga eyi sawa ’disi. Osikini kumuti va wura inzile inzi ’di ma drilea ’ba azi ’diyi le ku a’du e’yo si ya? Ama ma isu nga asisile ni.

Mi eco azita ndra mudri Yehova ni sile ’diyi ki ega ra ya? Aluzo ri yo ’dini: ‘Mi ma inzi Mungu azi nduni ku pelu ma i.’ Anzi oderu ’diyi ki azita ’di ma vuti obi, tro eri ni ovuzu ewaru ti.

Nebukadineza, opi Babiloni ni, omve ndra ’ba ’wara kakau ni emuzu inzita fezu wura ini sile ’da ni. Nga di ’yo ba dria tia kini: ‘Emi ka guka pi ma awu eri, a’dungu pie azini afa wupi awu be ndundu ’diyi pie ’bo, emi ma eco emi va wura meleru ’di inzizu. ’Ba ngapi i ecopi va wara ’da i inzizu kuri yi nga eri be aci si eka ndrindri ruri ma alea coti.’

Nebukadineza ni eri ria kini Sadaraka, Mesaka azini Abedinego osikini kumuti va ku ria, a’oko nya eri saaru. Nga fe ’ba ma eji eyi ima drilea. Fe dri wala diki eyi dri kumuti osizi va. Te anzi na ’diyi ’ba asi eyini Yehova ma dria. Ngaki ’yo Nebukadineza ma tia kini: ‘Mungu ama ni inziri nga ama para. Te ka tro nga ama pa ku ti, angakini kumuti osi va wura meleru mini ’di ma drilea ku.’

Sadaraka, Mesaka, azini Abedinego

Nebukadineza ni eyo ’di erizu ’bo ri ma vutia, a’oko nga eri nya dika dika. Aci si ekaru ’da ma dria, Nebukadineza nga azita fe kini: ‘Emi ma dro aci ma ka aga te erini kale okori paleko aziri!’ Nga di ’ba okpo be tu asikari ini ma eselea ’diyi ki omve Sadraka pi ombezu Mesaka pie azini Abedinego pie dika eyi o’bezu aci si eka ndri ndri ru ’da ma alea. Aci ni kale turisi ’ba okporu ’diyi oveki kai. Te anzi oderu na ta eyini o’be acia ’di ki ria?

Opi ne angu aci eka ’da ma alea, nga eca urisi. Nga zi kini: ‘Ama ombeni te anzi na ’diyi ki eyi o’bezu aci ekaruri ma alea, ku ’dini ya?’

Atiba erini ’di ngaki omvi kini: ‘Ee, a’ye te ’dinile.’

Opi yo kini: ‘Te ma ne ba su ki aciria aci ma aleasi, ovuki ombezaru ku dika aci veni eyi ku. Azini ’ba su zori ena ekile mungu le.’ Opi nga ’di mu aci ma ageyia nyia dika nga otre o’duko orusi kini: ‘Sadaraka! Mesaka! Abedinego! Emi efu amve, emi atibo Mungu Oru Turini la!’

Eyini efuri amve ’bo, ’ba dria nga ne kini enyibi eyi ma rua yo. Opi nga di yo kini: ‘Mungu Sadaraka ni, Mesaka ni azini Abedinego ni ma ovu inziza ru! Epe malaika ini ma ti eyiki opazu a’dusikuni osikini kumuti va mungu azi nduni inzizu ku pelu Mungu eyini ri i.’

’Di ovuni eceta kilili ru amani ecozu aita bazu Yehova ma dria ra ni ku ya?

Efuza 20:3; Danieli 3:1-30.



Zita ki

  • Azita Nebukadineza, opi Babulonia ri ni fe ba dria ni ri ngoni?
  • Danieli ma agyika na ’diyi osi kumuti wura edele melesi ri ma drilea ku a’du e’yo si ya?
  • Nebukadineza ni driwala fezu anzi Ebrania ru na ’diyi ni kumuti osizu dika ria, anzi ’diyi e’da asi ’baza eyini Yehova ma dria ri ngoni ngoni?
  • Nebukadineza nga di fe ’ba ivile ’diyi ma’ye a’du afa ni Sadaraka pi ma rua, Mesaka pie, azini Abedineigo pie?
  • Nebukadineza ni angu nezu aci si eka ndrindri ri ma alea ria, ne a’du afa ni ya?
  • Opi icu Mungu Sadaraka ni Mesaka ni azini Abedinego ni ma ru a’du e’yo si ya, dika eceta eyini fe ama ni ri ngoni?

Zita o’bazaru ’diyi ki

  • Mi la Danieli 3:​1-​30.

    Aka dri fu o’bita a’ita amani ri ni be, ecata kilili ru anzi na Ebrania ni oderu ’diyi dri le ama ma obi vutini ri ngo i? (Dan. 3:​17, 18; Mat. 10:28; Rum. 14:​7, 8)

    Imbata kiliriru Yehova ni imba Nebukadineza ni ri ngoni ya? (Dan. 3:​28, 29; 4:​34, 35)