Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 63: Opi Ondua Ru Sulemani I

A’diko 63: Opi Ondua Ru Sulemani I

SULEMANI ni ecazu opi ru risi deresi eri ma eli nga mudri dri pie. Le Yehova ni saaru dika obi azita ndra ima ati Daudi ni fele ’diyi dria ra. Yehova o’a ayikosi ’yeta Sulemani ni si ani o’du alu geri orobi aleasi, kini: ‘Sulemani mi le afe mini a’du afa ni ya?’

Sulemani nga omvi: ‘Yehova Mungu ma ni la, ani ni geri ’ba dri cezuri ku. E’yo ’disi mi fe mani ondua ecozu ’ba mini ma dri cezu geri kililiru si beni.’

Yehova o’a ayikosi zita Sulemani ni si. Ani ’yo kini: ‘Mi ni ondua zizu i te idri azini lonyi zizu ku risi, ma nga mini ondua fe aga ba dria nyakua ’diyi ra. Te ma vini nga mini afa mini zile ku lonyi pi fe ru kuza be indi.’

Sawa were ma vutia, oku azini ki iri nga ki emu Sulemani vu eyo ewa ru be. Eyi ma azi aluni ’yo kini: ‘Oku ’di i azini ma i, ama o’a jo alu ma alea. Anga agupiamva osi ra, o’du iri ma vutia, oku ’di osi vini agupiamva indi. Ini azinisi mva eri ni dra ra. Te mani o’du koria, nga mva ini drapi ’bo ’dari ’ba ma ageyia dika ’du mva mavule idriru ri ’ba i ma ageyia. Mani engaria o’duarisi, ma isu mva drapi ’bo ’da ovuni mva ma vuri i ku.’

Coti oku azi ’da nga ’yo kini: ‘Inzo! Mva idri ru ’diri mani, mva drapi ’bo ’da mini.’ Dika oku oko da ’yo kini: ‘Inzo! Mva drapi ’bo ’da mini, te mva idri ru ’diri mani.’ Oku nde nga agata ga eyi ma eselea tro tro ’dinile. Le di Sulemani ma ’ye a’du afa ya?

Nga sei a’i, coti ’bani sei ejizu ’bo ria ’yo kini: ‘Mi ma aga mva ’diri iri ife oku ’diyi dri alu alu.’

Mva ma andri nga wu ’dini: ‘Yo fo! Emi fu mva ’diri ku, ife kani eri oku ’da dri.’ Te oku aziri ’yo ’dini: ‘Mi fe mva ’di ama azi dri ku, imu drile mi fu eri ra.’

Opi Sulemani ni e’yo ewaru ni otu

Asizu Sulemani nga e’yo nze dini: ‘Mi fu mva ’diri ku! Mi fe eri oku oko ’da dri. Eri mva ’di ma andri i.’ Sulemani ni e’yo ’diri oku oko ’da ni mva ’di lezu saaru risi azini erini lezu ’ba ma fu mva nde ma idri ku risi. ’Ba kakau ni e’yo liza Sulemani ni ’di eriria, o’aki ayikosi opi onduaru ’di si.

Ewu Sulemani ni ovuzu opi ru ria Mungu co tosu eyi ma dria ani fe nganu pi anya pie a’balanga pie, elo ma efi pie, azini nyaka esele ndundu pie ka onyiru. ’Ba nde nga bongo onyiru su dika o’aki jo ala ru ma alea. Ani afa onyiru fu ndra dri ci ba dria ni.

1 Opi 3:3-28; 4:29-34.



Zita ki

  • Sulemani zi Yehova vu a’du afa ni, dika nga omvi ngoni?
  • Yehova ni o’azu zita Sulemani nisi ayikosi ri ma e’yo si, so oyo erini a’du fezu ya?
  • E’yo ewaru oku iri ni iji Sulemani ma drilea ri ngoni ya?
  • Ekile mini ne e’da ma alea ’da le, Sulemani li e’yo ’da ngoni ngoni?
  • Driceza Sulemani vileri ngole ya, azini a’du ma e’yo si?

Zita o’bazaru ’diyi ki

  • Mi la 1 Opi 3:​3-​28.

    Afa azi andrusi agupi ’bani azi fezu eyi dri otuta Munguni ma alea ’diyi ni eco oni zita asi adasi Sulemani ni ’bani isu 1 Opi 3:7 ma alea ri ngoni ya? (Zab. 119:105; O’be. 3:​5, 6)

    Zita Sulemani ni ri fe amani eceta afa onyiru ’diyi zizu ri ma dria ngoni ya? (1 Opi 3:​9, 11; O’be. 30:​8, 9; 1 Yoh. 5:​14)

    E’yo liza ewaru oku iri ’da pini iji Sulemani dri dika eri ni li geri kilili ru si ’da fe ama ni asi omiza opi nyaza Sulemani Amboru, Yesu Kristo ni nga nya ri ma dria ngoni ya? (1 Opi 3:​28; Isa. 9:​6, 7; 11:​2-4)

  • Mi la 1 Opi 4:​29-​34.

    Yehova omvi Sulemani ma zita ruta niri ngoni ru ya? (1 Opi 4:​29)

    Okpo ndra ’ba eyini ’ba ondua Sulemani ma e’yo onizu ri ma dria, le ama ma neki e’yo onizu o’duko Munguni ma alea ri ngoni ya? (1 Opi 4:​29, 34; Yoh. 17:3; 2 Tim. 3:​16)