Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 62: Candi Aku Daudi Nia

A’diko 62: Candi Aku Daudi Nia

DAUDI ni e’dozu opi nyazu Yerusalemua ’bo ria, Yehova fe eri dri okpo ari’bo erini ’diyi ndezu pale kakau. Yehova so vini oyo angu Kanani ni fezu anzi Israeli ni dri. Ani sawa ’disi, angu ndra ’bani oyo ni so ’bo ’diyi eca di dria eyi ni.

Daudi ni ’ba azi muke ni. Le Yehova ni saaru. Eyini Yerusalemu ma dri jazu ’bori ma vutia coti nga sanduku oyo soza ni ri eji ’daa. ’Dinile nga hekalu si eri ’bazu alenia.

Te Daudi ma eli ni caria angiri ’bo, ’ye e’yo azi sipi ku ’dinile ni. Daudi ni ra mini ’ba azi ma afa ’duzu ri onzi. Te o’du alu ondresi, Daudi tu jo ini ma dria coti nga oku azi ndrizaru ni ne ra. Oku nde ma ru Batiseba i, agupi erini Uria i asikari Daudi ni ma azi.

Daudi ma asi ni Batiseba ni lezu turisi nga fe ’ba eji eri i vile joa. Isu de agupi erini a’di ’diria ’dale. Daudi nga di la erisi vutinia nga mva isu ra. Daudi nga di eca urisi tu ani fe asikari ma drile ma ’ba Uria ni a’di amboru ma drilea ’bani ecozu eri ’dizu ani beni. Uria ni drazu boria, Daudi nga Batiseba ni ’du ra.

A’oko nya Yehova ni Daudi ni saaru. Ani nga ati’bo ini Natani ma ti pe muzu ezata erini e’dazu. Mi eco Natani ni ne ’dia e’yo nzeria Daudi be ra. Daudi o’a candisi e’yo ini ’yele ’dasi, ani Yehova te ni eri dri ja ku. Te Yehova ’yo ’dini: ‘Mini e’yo onzi ’dinile ’diyi ’yezurisi, candi ni nga adri mivule akua.’ Candi ngoleni nga eca Daudi dria ni ya!

Natani ni daudi ni imbata fe

Okorisi, Batiseba vule mvari dra ra. Vutinia Daudi mvi Aminoni nga la ima amvi Tamara si okposi. Vutinia a’oko nya Daudi ma mvi Abisalomu ni e’yo ’disi saaru ani gba i ma adri Aminoni ni kai. Dika vutinia Abisalomu ma ’yeta eca ’ba kakua ma milea onyiru ani fe eca opi ru. Asizu Daudi nga a’di ’di ima mvi Abisalomu be ani fu eri kai. Ada ada Daudi ovu e’yo ewaru be kakau.

Eyo ’diyi ni eyi ’yeria dria, Batiseba nga mva azini osi ra ’da ru ni Sulemani i. Daudi ni ecaria deza ru azini azoru ria, eri ma mvi Adoniya nga i ’ba opi ru. Te kuhani Daudi ni Zadoki nga odu osu Sulemani ma dria e’dazu eri nga eca opi ru ni. Coti Daudi ma eli ka ca 70 ’bo, dra ra. Nya opi eli 40 ani Sulemani ni di sawa ’disi opi ru ni.

2 Samueli 11:1-27; 12:1-18; 1 Opi 1:1-48.



Zita ki

  • Aza koza Yehovani si, a’du ma e’yo ’ye i angu Kanani nia ni ya?
  • Ondre azi alu nisi Daudi ni ovuzu jo sia ’bua ria, a’du ma e’yo ’ye i ni ya?
  • A’oko nya Yehova ni Daudi ni a’du e’yo si ya?
  • E’da ma alea ’dia, Yehova pe a’di ma ti muzu ezata Daudi ni ’diyi ki e’dazu, azini agu ’da ’yo a’du ma e’yo ni nga i ’ye Daudi be ni ya?
  • E’yo ewaru Daudi ni dri fuzu eri be ri ngoni?
  • Daudi ma vutia, a’di eca opi ru ni ya?

Zita o’bazaru ’diyi ki

  • Mi la 2 Samueli 11:​1-​27.

    Azi Yehovani ngazu o’du driasi ri ama ageyi te ngoni ngoni ya?

    A’du ce Daudi ma dri ezata ma alea ni, dika imbata ati’ba Yehovani ’diyi ni oni ’dia andrusi ri ngoni? (2 Sam. 11:2; Mat. 5:​27-29; 1 Kor. 10:12; Yak. 1:​14, 15)

  • Mi la 2 Samueli 12:​1-​18.

    Imbata mbaza kanisaa ’diyi ni oni tipika be geri Natani ni muzu Daudi vu ri ma alea ri ngoni ya? (2 Sam. 12:​1-4; O’be. 12:18; Mat. 13:34)

    Yehova e’da asianzu Daudi ni a’du e’yo si ya? (2 Sam. 12:13; Zab. 32:5; 2 Kor. 7:​9, 10)