Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 55: Agupiamva Werea Ru Ri Nga Azi Mungu Dri

A’diko 55: Agupiamva Werea Ru Ri Nga Azi Mungu Dri

’DIRI ovuni agupiamva werea e’dapi muke ni ku ya? Eri ma ru Samueli i. Agu dri ’ba pi Samueli ma dria ri eri kuhani Israelia omvele Eli i ri. ’Diri Samueli ma ati Elikana pi andri Hana be eji Samueli ni Eli vu.

Samueli fudri kuhani amboru Eli be

Samueli ovu eli be su kaniku towi. Te eri nga o’a Yehova vile hema alea ’dia Eli pie azini kuhani azi ’diyi pie. Elikana pi Hana be fe mva werea ’dinile ri azi ngazu Yehova vile hema alia a’du e’yo si ya? Ama ma ndre ki nga.

Eli agapi werea ’diyi ma alia Hana ebi ovu candisi tu. A’dusiku le ta mva isu ra, te econi mva isu ku. Ani o’du alu Hana nga mu Yehova vile hema ti icita ni ria Mungu zizu: ‘Yehova la, mi ma avi ma e’yo ku fo! Mi ka agupiamva fe mani, ma nga eri fe midri azi ngazu mini ewu erini si dria.’

Yehova nga Hana ma zita omvi ra, mba were vutia nga Samueli ni osi ra. Hana le agupiamva ini ’diri saaru, nga e’do eri ni e’yo imba Yehova ma dria de nga eri werea ru. Nga ‘yo agupi ivule ri ni kini: ‘Samueli ka nga ca angiri bani erini e’ba fezu ku ’bo, ma nga eri ji hema ti icita niri ma alia azi ngazu Yehova dri ’dale.’

’Diri afa amani ndre Hana pini ’ye Elikana be i’da ’diri ma alia ri i. ’Ba Samueli ni tipi ’diyi ni eri imbazu kilili ru risi, eri ovu ayikosi azi ngazu Yehova vule hema ti icita ni ri ma alea. Eli alu alu vusi hema ’di ma alea, Hana pi Elikana be imu Yehovani inzi azini mva werea ’diri ndre. Eli alu alu vusi Hana ni vini bongo o’diru ewu kokori ede dika eji Samueli ni.

Eli ni aliria, Samueli nga mu drile azi ngazu Yehova vile hema ti ecizani ria, ani ’yeta erini ovu onyiru Yehova ma milia azini ’ba ma milia indi. Te kuhani amboru Eli vule anzi Hofini pi Finehasi be ovuni ’ba muke ni ku. Eyi afa onzi kakua ’ye, eyi vini fe ’ba azini ’diyi ni e’yo onzi ’ye Yehova vu indi. Le ndra Eli ma ofu eyi ovuzu atalo ru ri si te, te ofuni eyi ku.

Samueli werea ’diri feni e’yo onzi ’yele hema ti ecitani ri ma alea ’diyi ogani ini azi ngazu Yehova dri ku. Te a’dusiku ’ba were ni Yehovani lele ri si, ovu o’du angiri Yehova nze ni e’yo ’ba be ku. Samueli ni zozu angiri ’boria, ’diri e’yo i ’yepi ri.

Samueli ni o’du koria hema ti icita niri ma alea ria, o’duko azi nga eri enga o’duari si. Nga omvi: ‘Ma ’do i.’ Enga urusi nzu Eli vu. Nga ’yo tinia: ‘Mi omve ma mi i, ma ’do i.’

Te Eli nga omvi kini: ‘Ma omveni mi ku, mi mu mi la va.’ Samueli nga mu laru va ra.

’Da ma vutia eri omveta irizo ri: ‘Samueli!’ Samueli enga ra nga nzu Eli vu dika kini: ‘Mi omve ma mi’ i, ma do i.’ Te Eli nga omvi dika: ‘Ma omveni mi ku, ma mvi, mi mu mi la va.’ Samueli nga mu i la va ra.

‘Samueli!’ o’duko nga eri omve pale na risi. Samueli nga nzu Eli vu. ‘Ma ’do’i, adisiku mi omve ma mi’i sawa ’disi,’ nga ’yo ra. Eli nga ni ra le ’di ma ovu Yehova i eri omve piri. Nga ’yo Samueli ni kini: ‘Mi mu mi la va eri ka nga mi omve dika, mi ‘yo: “Mi nze e’yo, Yehova, ati’bo mini ri mi eri ria.” ’

’Diri bani e’yo Samueli ni omvi Yehova tia erini eri omvezu dika ria. Yehova nga ’yo kini i nga Eli pini panga fe anzi eri dri ’diyi pie ra. Hofini pi Finehasi be nga dra a’di ’diria ’ba Filisitia ’diyi pie ria, ani Eli ni e’yo ’diyi erizu ’boria, nga e’de va, ombeloko dria mgbiri nga dra ra. E’yo Yehova vile ri nga eca ada ada.

Samueli nga zo ra, eca ’ba e’yo lipi Israelia asizu ri ru. Ka mu de ’bo, ’ba nga eri zi kini: ‘Mi ’ba ama dri opi ama drice zu.’ Samueli leni e’yo ’diri ’ye ku, a’dusiku ni ra Yehovani opi eyi ope ni. Te Yehova nga ’yo eri ni ma eri e’yo ’ba ’diyi ni ri.

1 Samueli 1:1-28; 2:11-36; 4:16-18; 8:4-9.



Zita ki

  • Agupiamva werea e’da ma alea ’di ma ru a’di i, azini ’ba azi ’dayi a’di pi ki?
  • O’du alu Yehova vile hema ti ecitaniria Hana nga Mungu zi ngoni, dika Yehova omvi eri ngoni ya?
  • ’Bani Samueli ni jizu azi ngazu Yehova vile hema alea risi dere eri ma eli si, eri ma andri nga eri ni a’du afa ’ye eli alu alu si?
  • Eli vile agupianzi ri ma ru a’dipi ki, azini eyi ’ba ngole ni ki?
  • Yehova omve Samuelini geri ngoni le ri si, azini o’duko erini fe ri ngoni?
  • Samueli nga eca a’duru eri ni zozu ’boria, azini a’du afa ’ye i ni zozu ’boria?

Zita o’bazaru ’diyi ki

  • Mi la 1 Samueli 1:​1-​28.

    Eceta kililiru ’ba aku ma dri cepi ’diyi pini esu driceza kililiru Elikana ni ce inzita adari ma alea ri ma dria ri ngoni ya? (1 Sam. 1:​3, 21; Mat. 6:​33; Fil. 1:​10)

    Ama eco e’yo ngole ni oni geri Hana ni e’yo ima dri ezapi teketeke ’diri otuzu ri ma alea si ya? (1 Sam. 1:​10, 11; Zab. 55:22; Rum. 12:12)

  • Mi la 1 Samueli 2:​11-​36.

    Eli ru anzi ivile ’diyi aga Yehovani ra ngoni ngoni, azini ’diri bilenduliza ru amani ngoni ru ya? (1 Sam. 2:​22-​24, 27, 29; Azi. 21:​18-​21; Mat. 10:​36, 37)

  • Mi la 1 Samueli 4:​16-​18.

    E’yo su ewaru engapi angu a’di ’dizu ria ovupi ngoki, azini fe Eli ni o’azu ngoni ya?

  • Mi la 1 Samueli 8:​4-9.

    Ba Israelini ’diyi fe Yehovani a’oko ngoni ngoni, dika ama eco Suru Munguni ri ati curu’do ngoni ngoni ya? (1 Sam. 8:​5, 7; Yoh. 17:16; Yak. 4:​4)