MI NI agu ovupi drio okpo be tu ri ra ya? Eri ’ba e’yo lipi ’bani omvele Samisoni i ri. Yehova fe Samisoni dri okpo ’diri ni. De nga Samisoni osi ni ku, Yehova nga ’yo eri ma andri ni kini: ‘Ace were mi nga agupiamva isu ra. Eri nga ovu dricere ru ba Israelini ’diyi opazu engazu ’ba Filisitia ’diyi vu risi ni.’

Samisoni kami fu

’Ba Filisitia ni ’diyi ’ba onzi o’a ’ba Kanania ’diyi. Ovuki ’ba a’di ’dipi ’diyi pie kakua, azini eyi ’ba Israelini ’diyi ni candi fe. Pale okori si, Samisoni ni muria pari ’ba Filisitia ’diyi ni o’azu ria, kami amboru efu awube eri vu. Te Samisoni ’di kami ’diri i ma drisi afa azi kokoru. Nga vini ’ba Filisitia turu turu azi ni ki o’di indi.

’Di ma vu tia Samisoni nga oku omvele Delila i ri be agyi ’ba. ’Ba dricere ru Filisitia ni ’diyi nga ’yo kini, ’ba alu alu ni nga Delila dri silingi dahabu ru ri fe 1,100, ka nga lu eyini a’du afa ni fe Samisoni ni ovuzu okpo be nia ri ra ria. Delila le silingi ’diri ra. Ovuni Samisoni ma agyi adaru ri i ku, kani agyi ru ’ba Munguni ’diyi be ku. Nga Samisoni zi dika dika a’du afa ni fe erini ovuzu okpo be nia ri ma dria.

Delila pi Samisoni be

Asizu, Delila nga e’yo ’di ma eti isu Samisoni vu risi. ’Yo ’dini: ‘Yi ofani nga dribi ima driari ku, ini engazu ima andri ma opkojoarisi kpere sawa ’disi, Mungu pe ma ovuzu ati’bo ini ru ndu. ’Ba ka ma dribi ofa ra, ma nga di eca okpo kokoru.’

Delila ni e’yo ’diri onizu ’bo ria, fe Samisoni ni o’du kozu ima kumu dria. ’Da ma vutia omve ’ba alu ofa eri ma dribi dria. Samisoni ka mu enga o’duari si ’bo, eri ma okpo fu eri ma rua ri si ra. ’Ba Filisitia ’diyi nga efi eri bizu. Onze eri ma mile iri tro ra, azini nga eri ’ba ati’bo ru eyini.

Saisoni ni abi onyo va

O’du alu ’ba Filisitia ’diyi oku yi taulu omu edeza amboruri edezu Dagoni adroi eyini ri dri, nga Samisoni ni eji engazu arujoarisi eri ma fe eyi ma oguki beni. ’Deresi Samisoni ma dribi du dika ’bo. Samisoni ’yo mva i ma dri bipiri ma tia: ‘Mi ku ma ma amvi nga idiafe jo ni pa sozu drinia ri.’ Samisoni nga di Mungu zi okpo fezu ini, coti bi idiafe ’diyi. Nga ’yo dini: ‘Mi ku ma ma dra ’ba Filisitia ’diyi be taulu.’ ’Ba Filisitia ogogo 3,000 emuki omu ’di ma alea ni, coti Samisoni ka mu i ati idiafe ma rua ’bo, nga jo nyo va ani ’ba onzi ’diyi odraki dria.

’Ba E’yo Lipi ’Diyi caputa 13 kpere 16.



Zita ki

  • Agupi Okpo be turi ma ru a’di i, azini a’di fe eri ni okpo nde ni ya?
  • O’du alu, Samisoni nga a’du afa ’ye kami amboru vu, ekile mini ndre le e’da ’di ma alea ri le?
  • E’yo zizaru Samisoni ni nze Delila ni e’da ’di ma alea ngoni, ani ’di fe ’ba Filisitia ni bi ei ngoni ru ya?
  • O’du Samisoni drazu ’dasi, fe ari’ba Filisitia ni 3,000 ’diyi ni odrazu indi ngoni ngoni ya?

Zita o’bazaru ’diyi ki

  • Mi la ’Ba E’yo Lipi ’Diyi 13:​1-​14.

    Manoa pi ima okuni be fe ki eceta kililiru tipika ni anzi ezoza ma dria ngoni ngoni ya? (Lip. 13:8; Zab. 127:3; Efe. 6:​4)

  • Mi la ’Ba E’yo Lipi ’Diyi 14:​5-9 azini 15:​9-​16.

    E’yo siza amani la kini Samisoni ’di kami, ace baka o’diru ’bani eri ombezu ri, azini o’di ’ba 1,000 akanya ma siso si ’diyi ece geri Yehovani orindi alatararuri ayuzuri ngoni ru ya?

    Orindi alatararu ri curu’do ama aza ko ngoni ngoni? (Lip. 14:6; 15:14; Zek. 4:6; ’Yeta 4:​31)

  • Mi la ’Ba E’yo Lipi ’Diyi 16:18-31.

    Samisoni ni i ecizu ’ba onzi beri fe erini ecazu ’ba ngonile ri ru, azini ama eco e’yo ngoleni onizu? (Lip. 16:​18, 19; 1 Kor. 15:33)