Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 53: Oyo Soza Yefita Ni

A’diko 53: Oyo Soza Yefita Ni
Yefita ma izi i

INGAZU drio mi so oyo te vuti vuti ru mi isu oyo soza mini ’yezu eca ewa ewa ’dini ’bo ya? Agu e’da ’diri ma alea ’da ’ye ndra ’dile, ’diri e’yo eri ni ovuzu candi si ri i. Agu nderi ’ba ori kokoru e’yo lipi Israelia omvele Yefita i ri.

Yefita o’a ndra sawa Israelini Yehovani inzizu ku ri ma alea. Eyi vini dika e’yo onzi ’diyi ’yeria dika. Yehova fe ani ’ba Amoni ni ’di fe eyini candi saaru. ’Di fe ’ba Israeli ni ’diyi owu Yehova vu kini: ‘Ama ’ye e’yo onzi mi vu. Kiri kiri mi opa ama fo!’

Yefita ni ’ba erivile ’diyi pie

’Ba ’diyi ovu candi si e’yo onzi eyini ’yele ’diyi si. Nga e’da eyi ovu candi si tu eyi ni dri edazu Yehovani inzizu dika ri ma alia ri si. ’Dini dika Yehova nga eyi ma azako ra.

’Ba nga Yefita ni pe a’di ’dizu ’ba onzi Amoni ni ’diyi be. Yefita le Yehova ma ko ima aza a’di ’di ndezu. Nga oyo so Yehova ni kini: ‘Mi ka nga anzi Amoni ni ’diyi fe ma dria adaru ra ’ba ngapi efupi ma vule jotilea dri fupi ma be, mani emviria a’di ndeza alearisi ri, ma nga eri fe mi ni.’

Yehova nga oyo soza Yefita ni ri eri ra, nga azani ko a’di ndezu ra. Yefita ni dri edaria a’diarisi akua ria, mi ni a’di efu oko jotilea risi dri fuzu eri be ni’ari ra ya? Eri zamva eri dri ovu pi alu a’dule ri i. Yefita nga wu: ‘Eyawaye, ma zi la! Mi eji ma dri candi ’dini a’du si ya. Te ma ni ma tile zizu Yehova dri ’bori si, ma econi tile mani oja vile ku.’

Yefita vule zamva ri ni e’yo onizu oyo soza ’diri ma dria ’boria, okori si nga ovu candisi. Ece kini eri nga ati ni ku ima agyi pie. Te eri nga azi nga Yehova vule hema alia Siloa. Nga ’yo ima ati ni kini: ‘Mi ka oyo so Yehova ni ’bo, mi ma ’ye ekile ’dale.’

Yefita vile zamva ri nga mu Siloa dika nga o’a ’dale o’du eri ni ovuzu idri ru ri si dria azi ngazu hema Yehova vule ri ma alea. O’du su eli alu alu ma alia oku Israelini ’diyi emu eri ndre, azini eyi o’a tualu ayikosi. ’Ba le Yefita vule zamva ’diri saaru erini ovule ati’ba Yehovani kililiru risi.

’Ba E’yo Lipi ’Diyi 10:6-18; 11:1-40.



Zita ki

  • Yefitani adi i, azini o’a ewu ngo ma alea ya?
  • Yefita so oyo Yehova dri ngoni ya?
  • Yefita o’a candisi erini dri edaria a’di ’diza ’ba Amoni ni beri ndezu ’bori ma vutia a’du ma e’yo si ya?
  • Yefita ma izi ’yo ngoni eri ni e’yo onizu oyo soza i atini ri ma dria ’bo ria?
  • ’Ba leki Yefita ma izi ni saaru a’du e’yo si ya?

Zita o’bazaru ’diyi ki

  • Mi la ’Ba E’yo Lipi ’Diyi 10:​6-​18.

    Bilenduliza ama ni isu acita anzi Israelini ’diyi ni acizu Yehova be a’ita kokoru ri ma dria ri ngoni ya? (Lip. 10:​6, 15, 16; Rum. 15:4; Ece. 2:​10)

  • Mi la ’Ba E’yo Lipi ’Diyi 11:​1-​11, 29-​40.

    Ama ni Yefita ni ima izi ni fezu “edeta vezari ru” ri eceni kini eve eri acisi fetaru ’dini ku ngoni ngoni ya? (Lip. 11:31; Lev. 16:24; Azi. 18:​10, 12)

    Geri Yefita ni ima izi ni owizu edeta ru ri ngoni ya?

    Imbata ama ni eco oni egata Yefita ni oyo soza i ni Yehova vu ri ma dria ri ngoni ya? (Lip. 11:35, 39; Ekl. 5:​4, 5; Mat. 16:24)

    Eceta Yefita izi ni ri kilili ru Kristayo oderu lepi fipi azi e’yo oluza sawa dria si ri ma alea ’diyi ni ngoni ngoni ya? (Lip. 11:​36; Mat. 6:​33; Fil. 3:​8)