Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 52: Gideoni pi ’Ba Ivile 300 ’Diyi Pie

A’diko 52: Gideoni pi ’Ba Ivile 300 ’Diyi Pie

MI ECO ndre a’du afa ni i ’ye ’dia niari ra ya? ’Diyi ’ba dria a’di ’di ’ba Israelini ’diyi. ’Ba avu’ba vaa ’diyi yi mvu ria. ’Ba e’yo lipi Gideoni so pa eyi ma ageyia. Eri eyi ndre eyi yi mvu geri ngoni ngonia ri si.

Mi ndre geri ndu ndu eyini yi mvu zu ’di. ’Ba azini ’diyi su eyi ma ti vaa yi mvu zu. Te ’ba aluni eko ima dria eyi erini pa soria urusi, ecozu angu ondre zu ima ageyia si beni. ’Diri ovu orondriru tu, a’dusiku Yehova ’yo Gideoni ni kini ma ope ’ba yi mvupi angu ondre ’ba indi ’diyi i. ’Ba asi’ba ’diyi, Mungu kini, ma pe eyi ma ti akua vule. Le ama ndre ki a’du e’yo si ’ari.

’Ba Israelini ovu vini candi pie angiri ’dika. A’dusiku obini e’yo Yehova ni ma vu ti ku. ’Ba Midia ni ’diyi nga ovu okpo be ’ba Israelini ’diyi ndezu te. ’Ba Israeli ni ’diyi nga awu wu Yehova vu eyi ma aza ko zu, Yehova nga eyi ma awu wuza eri ra.

Yehova nga ’yo Gideoni ma isu ’ba a’di ’dipi ’diyi, coti Gideoni oku’ba 32,000. Te ’ba azi a’di ’dipi Israeli pie ’diyi 135,000. Te Yehova ’yo Gideoni ni kini: ‘’Ba mivu ’diyi kakau ru tu.’ Yehova ’yo ’dini a’du e’yo si ya?

A’dusiku ni ’ba Israelini ’diyi ka nga a’di ’di nde ra, eyi nga ega kini eyi nde okpo eyi ni si. Eyi nga ega eyi leni azakoza Yehova ni ri a’di ndezu ’dini ku. Yehova nga ’yo Gideoni ni kini: ‘Mi ma ’yo ’ba ovupi ori si ’diyi ni eyi ma da dri muzu akua.’ Gideoni ka mu ’ye ’dini ’bo, ’ba a’di ’dipi eri dri 22,000 ’diyi nga mvi akua. Di nga eri ku ’ba 10,000 be a’di ’dizu ’ba 135,000 pie.

Gidioni ni ’ba erivile ’diyi ki o’bi

Te, mi ma eri! Yehova nga yo kini: ‘Mi ovu kiri ’ba kakau pie.’ Nga ’yo Gideoni ni ma fe ba eyini yi mvu, mi pe ’ba ti supi vaa yi mvupi ndo ’diyi ma ti dria akua. Yehova nga oyo so ’dinile: ‘Ma nga fe mini eyi ndezu ’ba 300 angu ondrepi de eyi yi mvuria ’diyi be ra.’

Sawa a’di dizu ri nga di eca ra.’ Gideoni nga ’ba ivile 300 ’diyi ma ale awa esele be na. Eri fe guka pi ’ba dria dri, imvu tala ni ovuzu alenia ci ’diyi pie. Eri ni cazu sawa ogogo azia inisi ’bo ria, nga eyi oku ari’ba ’diyi ma pari hema ni ria kuru. Eyi dria taulu, nga guka vu azini aco imvu eyi ma dria ’diyi dika eyi oyu o’duko orusi kini: ‘Sei Yehovani, azini Gideoni ni!’ ’Ba a’di ’dipi ariba ru ’diyi ni engazu o’dua risi ’boria, ecaki abaza si azini uri si. Nga dria e’do apa, coti ’ba Israelini nga a’di nde ra.

’Ba E’yo Lipi ’Diyi caputa 6 kpere 8.



Zita ki

  • ’Ba Israelini ’diyi candi ambo ma alea ngoni ru azini a’du e’yo si ya?
  • Yehova nga ’yo Gideoni ni agupi a’di ’dipi ’diyi kakau ru a’du e’yo si ya?
  • Gideooni ni ’yozu ’ba uri ru ’diyi mvi akua vile ria, Agupi nga asi si ya?
  • E’da alea ’di le, mi ece geri Yehovani asikari Gideoni ni ’diyi ma kalafe omvizu kpere 300 toko ri.
  • Gideoni otu agupi i vile 300 ’diyi ngoni ngoni, azini ’ba Israelini nga a’di nde ngoni ru ya?

Zita o’bazaru ’diyi ki

  • Mi la ’Ba E’yo Lipi ’Diyi 6:​36-​40.

    Gideoni nga e’yo Yehova ni lele ri ’ye ngoni ngoni ya?

    Ama eco andrusi e’yo Yehova ni lele ’diyi isu ngoa ya? (O’be. 2:​3-6; Mat. 7:​7-​11; 2 Tim. 3:​16, 17)

  • Mi la ’Ba E’yo Lipi ’Diyi 7:​1-​25.

    Ama eco e’yo oni esele coza ’ba asipi 300 mile be ’diyi pini ’ba azi lokiri koko ’diyi pie ri ngoni ya? (Lip. 7:​3, 6; Rum. 13:​11, 12; Efe. 5:​15-​17)

    Ekile ’ba 300 ’diyi ni e’yo onizu eyini Gideoni ni ndrele ri si rile, ama nga e’yo oni Gideoni Amboru Yesu Kristo ma ndreza si, ngoni ngoni ya? (Lip. 7:​17; Mat. 11:29, 30; 28:​19, 20; 1 Pet. 2:​21)

    E’yo sile ’Ba E’yo Lipi ’Diyi 7:​21 ma alea ri eco ama aza ko azi ngazu Yehova dri angu ciria otuta erini ma alea ngoni ngoni ya? (1 Kor. 4:2; 12:14-​18; Yak. 4:​10)

  • Mi la ’Ba E’yo Lipi ’Diyi 8:​1-3.

    Ka eca e’yo ndu ndu ama eselea ’diyi otuzu ama adripi be kaniku ama amvipi be ria, eyo amani eco oni geri Gideoni ni e’yo otuzu ’ba Efiraimuni pi ma eselea ri ngoni ya? (O’be. 15:1; Mat. 5:​23, 24; Luka 9:​48)