Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 41: Ori Mola Ru Ri

A’diko 41: Ori Mola Ru Ri
Musa i ori mola ru ri be

’DA I ori adaru ikila i pati ma rua ri ni ya? Ovuni i ku. Ori ’diri edele mola siri i. Yehova ’yo Musa ma tia ma ede eri, ma ’ba eri pati rua oru, ’ba ni eri nezu ani eyini o’azu idriru beni. Te ori azi nyakua ’diyi ada ri. Nga ’ba yi oga ra fe eyi ni ecazu azo ru. Mi ni a’du e’yo si’ari ra ya?

A’dusiku ’ba Israelini ’diyi nze e’yo Mungu ma rua onzi azini Musa ma rua onzi indi. Nga onota ono kini: ‘Mi eji ama Misiria risi amve amani imuzu odrazu angu rokoni ma dria a’du e’yo si ya? ’Doa nyaka yo, yi pie vini yo. Ama ngani mana ’diri nya dika ku.’

Te mana ’diri nyaka muke ni. Tali si Yehova nga eri fe eyini. Vini tali si indi nga yi fe eyini. Te ’ba ’diyi ovuni ayikosi geri Munguni eyi ma ta mbazu ’diyi si ku. Yehova nga ori enyata be ’diyi ma ti epe panga fezu ’ba Israelini ’diyi dri. Ori nga yi oga, dika ’ba kakau nga odra ra.

Ori oga ’ba Isaraelini ’diyi ki

Asizu ’ba ’diyi nga imu Musa vu nga ’yo tinia kini: ‘Ama eza ra amani e’yo onzi ’yele Yehova pima rua mi be risi. Mi zi Yehova ni erini ecozu ori ’diyi o’duzu amavu risi ra.’

Musa nga Mungu ni zi ’ba ’diyi dri. Yehova nga ’yo Musa ma tia, ma ede ori molasi ri. Nga ’yo ma ’ba eri pati rua, ’ba ori ni ga ’diyi ni ecozu eri ndrezu beni. Musa nga ’ye trotro Munguni ’yole rile. ’Ba orini gale ’diyi nga ori edele molasi ’diri ndre ngazu ecazu muke ’dika.

’Diri imbataru amani. Ama woro geri azini si ’ba Israelini ori ni gale ’bo ’diyi le. Ama woro ’ye odra odra. Mi ndre angu mi ageyia, mi nga ndre ’ba ki dezaru, azoru, azini odra ria. A’dusiku agupi oko azini oku oko, Adamu pi Eva be, oja ndra eyi ma nguku Yehovah vu dika ama woro eyi ma anzi ni. Te Yehova ede geri amani ecozu o’azu indriru ’dani dani bo.

Yehova epe ima Mvi Yesu Kristo, ma ti nyakua. ’Ba ’di Yesu ni pati rua, a’dusiku ’ba kakau egaki kini eri ’ba onzini. Te Yehova fe Yesu ni ama opazu. Ama ka angu ne erivu, amaka eri ma vuti bi, ama eco idri ’dani ’dani ri isu ra. Te ama nga e’yo angiri oni ’di ma dria indo.

Kalafe 21:4-9; Yohana 3:14, 15.



Zita ki

  • E’da ma alea rile, afa ’bani tra pati rua ri a’du afa ni, dika Yehova ’yo Musa ma ’ba eri ’daa a’du e’yo si ya?
  • ’Ba ’dayi e’da eyi awadifo kokoru ’yeta Munguni ’diyi si ngoni ngoni ya?
  • ’Ba ’diyi zi Musa ni a’du ’yezu Yehova ni panga fezu ori enyata be ’diyi si ’bori ma vutia?
  • Yehova ’yo Musa ni ma ede ori mola ru ri a’du e’yo si ya?
  • Imbata ama ni oni a’diko ’di ma alea ri ngoni?

Zita o’bazaru ’diyi ki

  • Mi la Kalafe 21:​4-9.

    Imbata ama ni esu onuta anzi Israelini ’diyi ni onuzu feta Yehova ni si ’diyi pi ma dria ri ngoni ya? (Kal. 21:​5, 6; Rum. 2:4)

    Eli turu turu alipi ’diyi ma vutia, anzi Israeli ni ’diyi ayuki ori Mola ru ’dari ngoni ru, azini Opi Hezekia nga di a’du ’ye? (Kal. 21:9; 2 Opi 18:​1-4)

  • Mi la Yohana 3:​14, 15.

    ’Bani ori Mola ru ri bazu kali sia ri e’da e’yo ’bani Yesu Kristo ni pazu pati sia ri ngoni ngoni? (Gal. 3:​13; 1 Pet. 2:​24)