Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 38: ’Ba 12 Azi Ndindia Ni Ngapi ’Diyi

A’diko 38: ’Ba 12 Azi Ndindia Ni Ngapi ’Diyi
’Ba azi ndindia ni ngapi Israelio ru ’diyi pati efi eji

MI NDRE nga pati efi ’ba ’diyi ni ’du ’diyi. Mi ndre nga zabibu efi ’yapi ’wara ’di. ’Ba iri eyi eri ’du pati si. Mi ndre elio pati azini pomegranate pati ma efi ’da. Pati efi ndriza ’diyi enga ngua ya? Enga angu Kanani ni ma alea. Le mi ma ni ra kini angu Kanani ni ri eri angu Ibrahimu, Isaka azini Yakobo pini ndra o’azu ri. Te liki ni ndra ’dezu ’dale risi Yakobo, azini ’ba erivule akua ’diyi pie dria nga mu Misiria. Eli ogogo 216 ma vutia, sawa ’disi Musa ni ’ba Israelini ki ji Kanania vule. Ecaki di angu roko dria omvele Kadesia ’bo.

’Ba onzi ’diyi o’a angu Kanani ni ma alea ni. Musa nga ’ba 12 ndi ndia azi ngapi ’diyi ma ti pe dika ’yo eyi ma tia kini: ‘Emi ma isu ’ba o’api ’da ’diyi si, azini eyi ma okpo ngo pi. Emi ma isu vini kani nyaku nde ri muke nyaka ni zozu ra ya ri indi. Emi ma eji patiefi ’yapi ’dale ’diyi indi.’

’Ba ndi ndia azi ngapi ’diyi ni dri edazu Kadesia ’bo ria, nga ’yo Musa ni kini: ‘Eri angu muke ni.’ ’Diri e’dazu ada ada nga di patiefi ’dale ’diyi e’da Musa ni. Te ba azi 10 ’diyi kini: ‘’Ba o’api ’dale ’diyi ’ba amboru azini izuru ’diyi. Eyi nga ama o’di ra aka mu eyi ma angu ’du ria.’

’Ba Israelini nga eca urisi eyini e’yo ’diri erizu ’bo ria. Ngaki ’yo ’dini: ‘Cika ni amani ndra odrazu Misiria ’dale kaniku doa roko dria. ’Ba nga ama o’di a’di ’diria si teke teke, dika ’ba nga ama okupika ki obi anzi amani ’diyi pie dria ra. Ama ma pe ’ba ama dri cepi o’dini Musa ma paria, ama ma daki dri Misiria vule!’

Te ’ba iri ndindia azi ngapi ’diyi ’ba yima asi Yehovani ma dria, dika nga di ’ba yi ma asi omi. Eyi ma ru Yosua pi Kalebu be. Nga ’yo kini: ‘Emi ovu urisi ku. Yehova ni ama be. Eri nga ovu ewa kokoru amani angu ’dari ’duzu.’ Te ’ba ’diyi erini e’yo ’diri ku. Leki ata Yosua pi o’di Kalebu be ra.

E’yo ’di fe a’oko Yehova ni saaru ani nga ’yo Musa ma tia kini: ‘’Ba dria edozu eli 20 si dria ’dale ’diyi ma azi aluni ngani fi angu Kanani nia ku. Neki tali mani ’ye le Misiria azini roko dria ’diyi dria ra, te ’bani asi eyini ma dria ku. E’yo ’disi eyi nga aci angu roko ma dria eli 40 kpere ’ba asizuri ni drazu. Yosua pi Kalebu be yi lu nga fi angu Kanani nia ni.

Kalafe 13:1-33; 14:1-38.



Zita ki

  • Afa mini ndre zabibu e’da ’di ma alea ri ma rua ri a’du afa ni, azini ’ba ibi eri iji ngoa ya?
  • Musa pe ’ba 12 azi ndindia ni ngapi ’diyi ma ti angu Kanania ria a’du e’yo si ya?
  • ’Ba mudri azi ndindia ni ngapi ’diyi nga omvi ngoni eyini dri edazu Musa vu ’bo ria?
  • ’Ba iri azi ndindiani ngapi ’diyi ece eyi ma a’ita Yehova ma dria ri ngoni ru, azini eyi ma ru adi pi ki?
  • A’oko nya Yehova ni a’du e’yo si, azini nga ’yo Musa ni ngoni ya?

Zita o’bazaru ’diyi ki

  • Mi la Kalafe 13:​1-​33.

    ’Ba pe a’dipiki azi ndindia niri ngazu, azini ngaki drileba ngonile ri isu ya? (Kal. 13:​2, 3, 18-​20)

    Geri Yosua pini angu ’dari ndrezu Kalebu be ri co esele ’ba azi mudri ndindia azi ngapi ’diyi niri be ra adu e’yo si, ’di imba ama ngoni? (Kal. 13:​28-​30; Mat. 17:20; 2 Kor. 5:​7)

  • Mi la Kalafe 14:​1-​38.

    Bilenduliza ’bani fele amadri onota onozu ’ba Yehova ma azi ngapi nyakua ’diyi ma rua ri ma dria ri ngoni ya? (Kal. 14:​2, 3, 27; Mat. 25:​40, 45; 1 Kor. 10:10)

    Kalafe 14:24 ece amani geri Yehova ni asi ’bazu ati’bo ini alu alu ma dria ri ngoni ngoni ya? (1 Opi 19:18; O’be. 15:​3)