Mi mu e'yo alenia ria

Mi mu e'yo were were 'diyi ma alea

Mi mu e'yo alenia 'diyi ma alea

'Ba Yehova ma E'yo Eti Nzepi 'Diyi

Lugbara

Ma Buku A'diko Biblia ma Alea 'Diyi Niri

A’diko 33: Miri Ekari Zozu Ri

A’diko 33: Miri Ekari Zozu Ri

MI NDRE nga e’yo i ’yepi ’di! ’Di Musa i kali ini ri iju Miri Ekaruri ma dria. ’Ba yi opapi ra kala ’da eyi ’ba Israelini. Te Farau pi ’ba a’di ’dipi erini ’diyi pie avuki yi alia ra. Ama ma ndre a’du afa ’ye i ni’ari.

Asiksri Misiri ni ’diyi ki di avu ria yi ma alea

Amani ndra onile ’bo rile, Farau nga ’ba Israelini yi ku fuzu Misiria risi Mungu ni dra matu ru 10 ’diyi efezu ’bo ri ma vutia. Agupi Israelini ogogo 600,000 nga mvi vule, oku pie azini anzi pie kakau ru. Dika ’ba azi kakau ndra eyi ma asi oja pi e’yo Yehovani a’ipi ra ’diyi nga mu anzi Israelini ’diyi pie indi. ‘Du ki kabilo eyini pi ki indri pie azini ti pie dria indi.

De nga muni ku, ba Israelini ’diyi nga bongo pi a’i onyiafa dahaburu azini meleru ’diyi pie ’ba Misiri ni ’diyi vu. ’Ba Misirini ’diyi nga ovu urisi tu a’dusiku candi asizu ’diyi ni ndra eyi obizu adule risi. Nga ’di afa woro ’Ba Israelini ni a’i ’diyi ofe yi dri ra.

O’du were ma vutia ’ba Israelini nga ca miri ekaru ri ma tia ra. Nga di ava lidaa. ’Da ma vutia, Farau azini ’ba erivile ’diyi nga ovu candi si tu eyi ni ’ba Israelini ’diyi fezu muzu ra ri si. Nga ’yo dini: ‘Ama fe atiba amani diyi mu bo!’

Farau nga ima asi oja alu dika. Mbeleru nga gari ombani ’diyi ’du ’ba a’di ’dipi akanya dria ’diyi pie gonde. Nga di e’do ’ba Israelini ’diyi dro tualu ’ba Misiri ni gari dria azini akanya dria 600 ’diyi pie.

’Ba Israelini ’diyi ni ndreria Farau pi emuria ’ba a’di ’dipi ’diyi pie eyi ma vuti si ria, nga eca uri si tu. Pari eyini ecozu apazu ni yo. Miri Ekaru ri ovu yi ma kale aluria, azini ’ba Misirini ’diyi eyi emuria kale azirisi. Te Yehova nga iriti pa sopi piri ru ri fe ’ba ivule ’diyi pi ma eselia ’ba Misiri ni ’diyi be. Fe ani ’ba Misirini ’diyi econi ’ba Israelini ’diyi ndre a’di ’dizu eyi be ku.

Yehova nga di ’yo Musa tia ma su kali amve Miri Ekaruri ma dria si. Erini ’yezu ’boria, Yehova nga oli amboru engapi etuni efuria leruri fe yi miri ma ale nga i awa iri dika yi nga paso ci.

’Da ma vutia ’ba Israelini nga di mu angu a’wi ru Miri alea ri ma dria si. ’Ba milioni milioni ’diyi nga sawa ’du angiri alizu anyapa yini pie alizu miri ma kalati azi ’dale ria. Asizu ’ba Misiri ’diyi nga ’di ’ba Israelini ’diyi ndre dika ra. Eyi ma ati’ba eyi ’ye apa apa! Nga nzu mbele mbele eyi ma vutisi.

Eyi ni nzuzu ’bo ri ma vutia, Mungu nga fe gari eyini akanya ru ’diyi ma pa nga eyi onze ndu ndu. ’Ba Misirini nga eca uri si tu ani nga awu wu dini: ‘Yehova ni a’di’ di Israeli ni ama ama be ni yo. Ama ma fu dia risi te!’ Te ’diri vule ru tu.

’Diri bani di sawa Yehovani ’yozu Musa ma su kali ini Miri Ekaruri ma dria, mini ndrele e’da ’diri ma alea rile. Musa ni kali suzu bo ri ma vutia, yi ta pa tupi abi le ’di nga di eyi aku rugbu ’ba Misirini ’diyi ma dria gari akanya ru eyini ’diyi pie dria. ’Ba a’di ’dipi ’diyi dria nga ’ba Israelini ’diyi ma vuti bi Miri ma alia. ’Ba Misirini aluni awini i pa indriru ku!

’Ba Munguni ’diyi nga ovu ayikosi yini yi opazu dria ra risi! Agupi nga ongo awadifo fezu Munguni ri ngo kini: ‘Yehova aga suru diza be diyi re tu. Nga akanya azini ’ba akanya nzupi ’diyi o’be Miri ma alia.’ Musa ma anvi Miriamu ’du ima arimva dika oku dria efu eri ma vutiasi arianzi be. Eyini diria ongo tusi, nga ki vini ongo ngo ekile ’ba agupi ru ’diyi ni ngole rile kini: ‘Yehova aga suru diza be ’diyi re tu. Nga akanya azini ’ba akanya nzupi ’diyi o’be Miri ma alea.’

Efuza caputa 12 kpere 15.



Zita ki

  • Agupi Israelini, oku pie azini anzi nyiri pie angu, ndra Misiri ni kupi ’diyi si ya?
  • Farau nga e’yo ega ngoni eri ni ’ba Israelini ’diyi kuzu muzu ’bo ria, azini nga a’du afa ’ye?
  • ’Ba Misiri ni ’diyi ogazu ’ba ivile ’diyi obizu ku, Yehova ’ye a’du afa ni ya?
  • Musa ni ima kali ijuzu Miri Ekari ma dria ria si a’du ’ye i ni, azini anzi Israelini nga a’du afa ’ye?
  • ’Ba Misirini ’diyi ni muzu mbele mbele ’ba Israelini ma vuti si miri aleasi ria, a’du afa ’ye i ni ya?
  • ’Ba Israelini nga ayiko azini awadifo eyi ni ece Yehova dri erini eyi opale ri si ngoni ru ya?

Zita o’bazaru ’diyi ki

  • Mi la Efuza 12:​33-​36.

    Yehova nga ewu ’ba ini ’diyi ni o’azu ati’ba ru Misiria ’diyi ki ofe dria ngoni ru ya? (Efu. 3:​21, 22; 12:​35, 36)

  • Mi la Efuza 14:​1-​31.

    E’yo Musa ni ’yole Efuza 14:​13, 14 ma alea ri fe Yehova vile ati’bo curu’do ’diyi o’a ngoni eyini o’du Hari-Magedoni ni imu pi ri te ria? (2 Sur. 20:17; Zab. 91:8)

  • Mi la Efuza 15:​1-8, 20, 21.

    Le ati’ba Yehova ni ’diyi ma ngo ru kuza eri dri a’du e’yo si ya? (Efu. 15:​1, 2; Zab. 105:​2, 3; Ece. 15:​3, 4)

    Eceta kilili ru Yehova ni inzizu Miriamu pini ece oku Miri Ekaru ri zopi ’diyi pie oku Kristayo ru andrusi ’diyi ni ri ngoni ya? (Efu. 15:20, 21; Zab. 68:11)